(vovworld.vn)- ຄວາມຂາດສະຖຽນລະພາບຢູ່ ອີຢີບ ໃນຊຸມມື້ມໍ່ໆມານີ້ໄດ້ມີການຜັນແປຢ່າງສັບສົນ, ພ້ອມກັບຈຳນວນຜູ້ເສຍຊີວິດ ແລະຖືກບາດເຈັບເພີ່ມຂຶ້ນຢູ່ໃນລະດັບສະຖິຕິນັ້ນ, ໄດ້ເຮັດໃຫ້ປະຊາຄົມໂລກເກີດຄວາມເປັນຫ່ວງກັງວົນທີ່ສຸດ. ນັ້ນແມ່ນຍ້ອນຄວາມອ່ອນດ້ອຍໃນການຄຸ້ມຄອງຂອງອຳນາດການປົກຄອງດ້ານການທະຫານໃນປະຈຸບັນ, ຫຼື ຢູ່ເບື້ອງຫຼັງການແຫ່ຂະບວນປະທ້ວງ, ການໃຊ້ຄວາມຮຸນແຮງນີ້ແມ່ນແຜນການທີ່ໄດ້ວາງອອກ. ຄວາມເຊື່ອໝັ້ນຂອງປະຊາຊົນທີ່ມີຕໍ່ອຳນາດການປົກຄອງໃນປະຈຸບັນນັບມື້ນັບຫຼຸດລົງ, ອັນໄດ້ເປັນສັນຍານທີ່ສະແດງໃຫ້ເຫັນການຜັນແປບໍດີທາງດ້ານການເມືອງ, ສັງຄົມໃນຊຸມມືທີ່ຈະມາເຖິງ.
ນັບແຕ່ອຳນາດການປົກຄອງຂອງອະດີດປະທານາທິບໍດີ Hosni Mubarak ຖືກໂຄ່ນລົ້ມ, ໃນຫຼາຍເດືອນຜ່ານມາ, ອີຢີບໄດ້ຕົກເຂົ້າສູ່ສະພາບແຫ່ຂະບວນປະທ້ວງ ແລະ ການຈະລາຈົນ. ເຊິ່ງສາຍເຫດຕົ້ນຕໍນັ້ນແມ່ນການຈະລາຈົນຢູ່ສະໜາມກິລາເມື່ອວັນທີ ½ ຜ່ານມາ, ເຮັດໃຫ້ 80 ຄົນເສຍຊີວິດ ແລະ 1.000 ກວ່າຄົນຖືກບາດເຈັບ. ຫຼັງຈາກນັ້ນ 4 ວັນ, ປະຊາຊົນຢູ່ນະຄອນຫຼວງ ຄາຍໂຮ ແລະ ນະຄອນອື່ນໆ ຢູ່ປະເທດນີ້ໄດ້ລົງຖະໜົນແຫ່ຂະບວນປະທ້ວງ ເພື່ອຄັດຄ້ານອຳນາດການປົກຄອງດ້ານການທະຫານໃນປະຈຸບັນ ບໍ່ມີຄວາມສາມາດຢ່າງພຽງພໍ ເພື່ອນຳເອົາຄວາມສະຫງົບສຸກມາໃຫ້ປະເທດນີ້.
ພາຍຫຼັງເຫດການດັ່ງກ່າວ, ຫາງສຽງຖືວ່າ, ມີຫຼັກຖານຫຼາຍຢ່າງໄດ້ສະແດງໃຫ້ເຫັນວ່າ, ນີ້ແມ່ນການຈະລາຈົນທີ່ມີການຈັດຕັ້ງຕາມແຜນການທີ່ໄດ້ວາງອອກ. ຕາມ ເທບບັນທຶກພາບໂດຍບັນດາຕົວພະຍານສະໜອງໃຫ້ແລ້ວ, ຕຳຫຼວດຢູ່ໃນສະໜາມກິລາບໍ່ມີການກະທຳໃດໆເພື່ອແກ້ໄຂການຈະລາຈົນ. ມີບາງແຫຼ່ງຂ່າວຍັງໃຫ້ຮູ້ຕື່ມອີກວ່າມີປະມານ 600 ຄົນທີ່ຫຼົບຊ້ອນຢູ່ນອກສະໜາມກິລາ PortSaid ໄດ້ຮັບເງິນເພື່ອທຳລາຍການແຂ່ງຂັນບານເຕະ. ແລະ ຕຳຫຼວດກໍ່ບໍ່ໄດ້ທຳການກວດກາກອງເຊຍກ່ອນທີ່ເຂົ້າເຈົ້າຈະເຂົ້າສະໜາມກິລາ..
ຄວາມລະແວງສົງໄສເຫຼົ່ານັ້ນລ້ວນແຕ່ມີພື້ນຖານ. ກ່ອນອື່ນໝົດ, ຖ້າສັງເກດການແຫ່ຂະບວນໂຄ່ນລົ້ມລະບອບຂອງອະດີດປະທານາທິບໍດີ Hosni Mubarak ຄັ້ງຕ່າງໆ ເມື່ອປີກາຍ, ກໍ່ສາມາດເຫັນໄດ້ວ່າກອງເຊຍຂອງທິມບານເຕະທັງສອງນີ້ແມ່ນກຳລັງລຸກຮຶ້ຂຶ້ນ. ເມື່ອການປະຕິວັດເກີດຂຶ້ນ, ເຂົາເຈົ້າໄດ້ພ້ອມກັນຕ້ານລະບອບຂາດປະຊາທິປະໄຕ ແລະ ເຂົາເຈົ້າໄດ້ປະສົບຜົນສຳເລັດ ເມື່ອຮ່ວມແຮງຮ່ວມໃຈເພື່ອໂຄ່ນລົ້ມອຳນາດການປົກຄອງຂອງອະດີດປະທານາທິບໍດີ Hosni Mubarak ເມື່ອເດືອນ 2/2011. ແຕ່ເຖິງຢ່າງໃດກໍ່ຕາມ, ຍ້ອນການມອບໂອນສິດອຳນາດໄດ້ດຳເນີນໄປຢ່າງຊັກຊ້າຍ້ອນອຳນາດການປົກຄອງຊົ່ວຄາວດ້ານການທະຫານໄດ້ເຮັດໃຫ້ເຂົາເຈົ້າເສຍໃຈ ແລະ ນີ້ແມ່ນສາຍເຫດທີ່ພາໃຫ້ການແຫ່ຂະບວນປະທ້ວງ ແລະ ການຈະລາຈົນເກີດຂຶ້ນຢ່າງຕໍ່ເນື່ອງ. ເພື່ອຕ້ານກຳລັງທີ່ຄັດຄ້ານອຳນາດການປົກຄອງດ້ານການທະຫານນີ້, ແລະ ເຮັດໃຫ້ຊື່ສຽງຂອງກອງເຊຍທີ່ແຂງກະດ້າງນີ້ຖືກຊຸດໂຊມ, ກິລາໄດ້ກາຍເປັນຂໍ້ອ້າງ ເພື່ອໃຫ້ສະພາການທະຫານ ອີຢີບ ຢືນຢູ່ເບື້ອງຫຼັງ ຊີ້ນຳນຳພາການຈະລາຈົນທີ່ນອງເລືອດນີ້.
ເຖິງວ່າ, ມາຮອດປະຈຸບັນ, ການຖົກຖຽງກັນກ່ຽວກັບເລື່ອງ ການຈະລາຈົນຈະມີສ່ວນກ່ຽວຂ້ອງເຖິງບັນຫາການເມືອງຫຼືບໍ່ນັ້ນຍັງບໍ່ທັນມີຄຳຕອບກໍ່ຕາມ, ແຕ່ບັນຫານີ້ກໍ່ບໍ່ມີຄວາມສຳຄັນອີກ. ເພາະວ່າບັນຫາສຳຄັນໃນປະຈຸບັນນັ້ນແມ່ນຄວາມຄຽດແຄ້ນຂອງປະຊາຊົນທຸກຊັ້ນວັນນະຢູ່ອີຢີບ. ພາຍຫຼັງເຫດການທີ່ເກີດຂຶ້ນຢູ່ສະໜາມກິລາ Port Said, ຄວາມເຊື່ອໝັ້ນຂອງປະຊາທີ່ມີຕໍ່ກຳລັງຕຳຫຼວດ ແລະ ທະຫານໃນການປ້ອງກັນຄວາມສະຫງົບກໍ່ຖືກຊຸດໂຊມ. ປະຊາຊົນເປັນຈຳນວນຫຼວງຫຼາຍໄດ້ລົງຖະໜົນເພື່ອແຫ່ຂະບວນປະທ້ວງ, ທຳການຈະລາຈົນກັບຕຳຫຼວດ, ອັນໄດ້ເຮັດໃຫ້ນະຄອນຫຼວງກາຍເປັນສະໜາມຮົບໃນຊຸມມື້ຜ່ານມາ. ບັນດາຜູ້ແຫ່ຂະບວນປະທ້ວງ ໄດ້ຮຽກຮ້ອງໃຫ້ອຳນາດການປົກຄອງດ້ານການທະຫານດຳເນີນການເລືອກຕັ້ງ ແລະ ມອບໂອນສິດອຳນາດໃຫ້ອຳນາດການປົກຄອງພົນລະເຮືອນໂດຍໄວ. ຄວາມຂາດສະຖຽນລະພາບດ້ານການເມືອງຢູ່ອີຢີບໃນປະຈຸບັນ ແມ່ນສາຍເຫດທີ່ພາໃຫ້ສະພາບກໍ່ອາດສະຍາກຳເພີ່ມຂຶ້ນ.
ຕໍ່ໜ້າສະພາບການແຫ່ຂະບວນປະທ້ວງພວມເພີ່ມຂຶ້ນນັ້ນ, ປະຈຸບັນ, ໄດ້ມີສະພາພົນລະເຮືອນໜຶ່ງ ໂດຍກອງທັບແຕ່ງຕັ້ງໄດ້ຮັບການສ້າງຕັ້ງຂຶ້ນ, ຄາດວ່າ, ນັບແຕ່ວັນທີ 23/2 ຈະບົ່ງຕົວບັນດາຜູ້ສະໝັກຮັບເລືອກຕັ້ງເປັນປະທານາທິບໍດີ, ກ່ອນກຳນົດເວລາ 2 ເດືອນເມື່ອທຽບໃສ່ແຜນການທີ່ໄດ້ວາງອອກແມ່ນວັນທີ 15/4. ສິ່ງດັ່ງກ່າວໝາຍຄວາມວ່າການເລືອກຕັ້ງປະທານາທິບໍດີອາດຈະດຳເນີນໃນເດືອນ 4 ຫຼືເດືອນ 5, ກ່ອນແຜນການທີ່ໄດ້ວາງອອກແມ່ນເດືອນ 6. ຕາມບັນດານັກໄຈ້ແຍກແລ້ວ, ຖ້າຫາກວ່າອຳນາດການປົກຄອງທະຫານຊົ່ວຄາວບໍ່ມອບໂອນສິດອຳນາດໂດຍໄວ. ອີຢີບ ຍັງຈະເປັນພິຍານຫຼັກຖານການປະທະກັນຫຼາຍຄັ້ງ.