ຊາວກູບາອາໄສຢູ່ຕ່າງປະເທດ ກັບຄືນເມືອຢ້ຽມຢາມບ້ານເກີດເມືອງນອນ
ພາບ:thaibinhtv.vn
(vovworld) - ວັນທີ 7/2 ຜ່ານມາ ເປັນຂີດໝາຍແຫ່ງວັນອຳນາດການປົກຄອງ ອາເມລິກາ ເລີ່ມປະຕິບັດນະໂຍບາຍປີດລ້ອມ, ຂວ້ຳບາດຕ້ານ ກູຍບາ ຄົບຮອບ 50 ປີ. ພາຍຫລັງເຄິ່ງສັດຕະວັດ, ຜ່ານ ປະທານາທິບໍດີ 9 ສະໄຫມ, ຄຳສັ່ງຂວ້ຳບາດນີ້ ນັບມື້ນັບໄຮ້ເຫດຜົນ, ຫລ້າຫລັງ ແລະ ສະແດງໃຫ້ເຫັນການປະລາໄຊຂອງອຳນາດການປົກຄອງ ອາເມລິກາ ໃນການຕ້ານຄືນບັນດາການປະຕິວັດສັງຄົມນິຍົມຢູ່ ກູຍບາ.
ບົດລາຍງານຂອງຫ້ອງການບັນຊີ ລັດຖະບານ ອາເມລິກາ (GAO) ໃຫ້ຮູ້ວ່າ: ຄຳສັ່ງຂວ້ຳບາດຂອງ ອາເມລິກາ ຕໍ່ກັບກູບາ ໄດ້ຮັບຖືວ່າ ແມ່ນກໍ່ຄວາມເສຍຫາຍຢ່າງຫນັກຫນ່ວງທີ່ສຸດໃນຈຳນວນ 20 ຄຳສັ່ງຂວ້ຳບາດຊຶ່ງ ອາເມລິກາ ຈັດວາງຕໍ່ກັບປະເທດຕ່າງໆ. ຕາມນັກສັງເກດການຫລາຍທ່ານແລ້ວ, ນີ້ຍັງແມ່ນ ຄຳສັ່ງຂວ້ຳບາດຮອບດ້ານ ແລະ ແກ່ຍາວທີ່ສຸດໃນປະຫວັດສາດສຳລັບປະເທດຫນຶ່ງທີມີອະທິປະໄຕ. ສິ່ງດັ່ງກ່າວຖຶກພິສູດໃຫ້ເຫັນຜ່ານຕົວເລກສະຖິຕິລ້າສຸດໂດຍລັດຖະບານ ກູບາ ຫາກໍປະກາດ. ຄຳສັ່ງຂວ້ຳບາດແກ່ຍາວຕະຫລອດໄລຍະ 50 ປີຜ່ານມາ ໄດ້ກໍ່ຄວາມເສຍຫາຍປະມານ 975 ຕຶ້USD ຕໍ່ພື້ນຖານເສດຖະກິດຂອງກູບາ. ນັ້ນແມ່ນຍັງບໍ່ທັນເວົ້າເຖິງເລື່ອງ, ປະຈຸບັນ ກູບາ ບໍ່ມີສິດນຳເຂົ້າສິນຄ້າຈາກ ອາເມລິກາ ຫລື ສົ່ງສິນຄ້າໄປຂາຍຢູ່ອາເມລິກາ, ບໍ່ໄດ້ນຳໃຊ້ສະກຸນເງິນ USD ໃນການແລກປ່ຽນຄ້າຂາຍກັບຄູ່ຮ່ວມມືຕ່າງປະເທດ ກໍຄືບໍ່ໄດ້ສຳພັດກັບບັນດາກົນໄກສິນເຊື່ອສາກົນໃຫຍ່. ເຖິງຢ່າງໃດກໍຕາມ, ຄວາມຈິງແລ້ວຫາງສຽງອາເມລິກາເອງພັດຖືວ່າຄຳສັ່ງຂວ້ຳບາດນີ້ໄດ້ເຮັດໃຫ້ອາເມລິກາ ຖືກເສຍຫາຍຫລາຍກວ່າກູບາ. ຖ້າສັງເກດດ້ານເສດຖະກິດ, ບັນດາບໍລິສັດອາເມລິກາ ບໍ່ສາມາດຮ່ວມມືກັບກູບາໄດ້, ພິເສດໃນຂົງເຂດນ້ຳມັນອາຍແກສ, ຊຶ່ງແມ່ນຂົງເຂດທີ່ອາເມລິກາ ມີຄວາມຕ້ອງການທີ່ສຸດ ໃນຂະນະ ທີ່ ກູບາ ມີ ຊັບ
ພະຍາກອນ ນ້ຳມັນດິບ ແລະ ອາຍແກສທຳມະຊາດເປັນຈຳນວນຫລວງຫລາຍ. ສິ່ງດັ່ງກ່າວກໍໝາຍຄວາມວ່າ ອາເມລິກາໄດ້ມອບທ່າໄດ້ປຽບກ່ຽວກັບການແກ້ງແຍ້ງໃຫ້ແກ່ບັນດາບໍລິສັດຕ່າງປະເທດ.
ກ່ຽວກັບດ້ານການເມືອງ, ຄຳສັ່ງຂວ້ຳບາດທີ່ມີຕໍ່ ກູບາ ໂດຍອາເມລິກາຈັດວາງເມື່ອປີ 1962 ແມ່ນບັນຫາກໍ່ຄວາມບໍ່ລົງລອຍກັນຢ່າງເລິກເຊິ່ງທີ່ສຸດລະຫວ່າງ ອາເມລິກາ ແລະ ບັນດາປະເທດອາເມລີກາລາຕີນ, ເຊິ່ງແມ່ນພາກພື້ນທີ່ໄດ້ຮັບຖືວ່າ ແມ່ນເບື້ອງຫລັງຂອງອາເມລິກາ. ການນຳອາເມລິກາລາຕີນ ສ່ວນຫລາຍຖືຄຳສັ່ງນີ້ແມ່ນການແຊກແຊງຢ່າງຮ້າຍແຮງເຖິງສິດຕັດສິນດ້ວຍຕົນເອງຂອງປະຊາຊົນ ກູບາ. ສິ່ງດັ່ງສະແດງໃຫ້ເຫັນວ່າ ອາເມລິກາ ຍັງຄົງສືບຕໍ່ສ້າງນະໂຍບາຍໃຫ້ແກ່ ອາເມລິກາລາຕີນ ຫາກບໍ່ຢາກສ້າງນະໂຍບາຍຮ່ວມກັບ ອາເມລິກາລາຕີນ. ຊ້ຳບໍ່ໜຳ ໃນຊຸມມື້ຕົ້ນເດືອນ 2 ຜ່ານມາ, 33 ປະເທດ ອາເມລິກາໃຕ້ ແລະ ເຂດ Caribe ໄດ້ສ້າງຕັ້ງປະຊາຄົມບັນດາປະເທດ ອາເມລິກາລາຕີນ ແລະ Caribe (CELAC) ຢ່າງເປັນທາງການ. ອົງການນີ້ ມີກູບາ ຫາກບໍ່ມີອາເມລິກາ, ດ້ວຍຫລັກການເຄົາລົບປະຊາທິປະໄຕ, ອະທິປະໄຕ ແລະ ຜືນແຜ່ນດິນອັນຄົບຖ້ວນຂອງປະເທດສະມາຊິກທັງໝົດ, ບໍ່ນຳໃຊ້ ຫລື ນາບຂູ່ ນຳໃຊ້ກຳລັງອາວຸດ, ປົກປັກຮັກສາສິ່ງແວດລ້ອມ, ສິດທິມະນຸດ ແລະ ກົດໝາຍສາກົນ, ສ້າງ ສັນຕິພາບ ແລະ ຄວາມສະຫງົບປອດໄພຢູ່ພາກພື້ນ. ດ້ວຍການສ້າງຕັ້ງ CELAC ນັ້ນ, ບັນດາປະເທດທີ່ໄດ້ຮັບຖືວ່າແມ່ນເບື້ອງຫລັງຂອງອາເມລິກາ ນັບມື້ນັບສະແດງໃຫ້ເຫັນຄວາມສາມັກຄີກັບ ປະຊາຊົນກູບາ ຢ່າງຈະແຈ້ງກວ່າ. ທີ່ເວທີປາໄສ ສະຫະປະຊາຊາດ(ສປຊ) ໃນຕະຫລອດ 20 ປີ ຜ່ານມາ, ບັນດາປະເທດສ່ວນຫລາຍໃນຈຳນວນ 190 ສະມາຊິກຂອງ ສປຊ ໄດ້ຮຽກຮ້ອງໃຫ້ອາເມລິກາ ລົບລ້າງຄຳສັ່ງຂວ້ຳບາດທີ່ມີຕໍ່ກູບາ ທີ່ບັນດາວາລະປະຊຸມສະມັດຊາໃຫຍ່. ໃນການລົງຄະແນນສຽງເຊິ່ງຈັດຂຶ້ນໃນ ເດືອນ 10/2011, ສະມັດຊາໃຫຍ່ໄດ້ຢືນຢັນອີກຄັ້ງຫນຶ່ງວ່າຈະສະຫນັບສະຫນູນປະຊາຊົນ ກູບາ , ຮຽກຮ້ອງໃຫ້ ອາເມລິກາ ຢຸດຕິນະໂຍບາຍ ຂວ້ຳບາດດ້ານເສດຖະກິດພຽງຝ່າຍດຽວ ຊຶ່ງອາເມລິກາໄດ້ຈັດວາງຕ້ານປະເທດບ້ານໃກ້ເຮືອນຄຽງໃນຕະຫລອດເຄິ່ງສັດຕະວັດຜ່ານມາ. ຕາມບັນດານັກສັງເກດການແລ້ວ, ຄຳສັ່ງຂວ້ຳບາດຂອງ ອາເມລິກາ ຍັງໄຮ້ປະໂຫຍດຢູ່ບ່ອນວ່າໂດຍບໍ່ຫົວຊາຕໍ່ທຸກຄວາມຫຍຸ້ງຍາກ, ກູບາ ຍັງຄົງພັດທະນາຢ່າງແຂງແກ່ນ. ປີ 2011,ເສດຖະກິດ ກູບາ ຍັງຄົງບັນລຸລະດັບຈະເລີນເຕີບໂຕ 2.7%. ຊ້ຳບໍ່ໜຳ ບັນດາອົງການສາກົນ ຍັງໃຫ້ຂໍ້ສັງເກດວ່າ ກູບາ ບັນລຸໄດ້ບັນດາຜົນງານທາງດ້ານສັງຄົມຫລາຍກວ່າເມື່ອທຽບກັບ ອາເມລິກາຄື: ຮັກສາສຸຂະພາບໃຫ້ແກ່ທົ່ວປວງຊົນ, ການສຶກສາຢູ່ຊັ້ນມະຫາວິທະຍາໄລ ແລະ ມັດທະຍົມ. ເປັນທີ່ຈະແຈ້ງແລ້ວວ່າ ເຈດຈຳນົງໃນເບື້ອງຕົ້ນ ເຊິ່ງ ອາເມລິກປາດຖະຫນາເມື່ອຈັດວາງຄຳສັ່ງຂວ້ຳບາດນັ້ນໄດ້ຖືກປະລາໄຊ. ໃນໄລຍະມໍ່ໆມານີ້ ນັກການເມືອງ ອາເມລິກາ ຫລາຍທ່ານກໍໄດ້ຮັບຮູ້ວ່າ ການປັບປຸງການພົວພັນສອງຝ່າຍ ກູບາ ແລະ ອາເມລິກາ ຕ້ອງກາຍ ເປັນຄວາມຕ້ອງການ ແລະ ທ່າອ່ຽງອັນແນ່ນອນ ແລະ ໃນ 3 ປີກຳອຳນາດຜ່ານມ, ທ່ານປະທານາທິບໍດີ ອາເມລິກາ Barack Obama ໄດ້ມີບັນດານະໂຍບາຍຫລຸດຜ່ອນຄຳສັ່ງຂວ້ຳບາດຕ້ານກູບາ ຄື: ຍົກເລີກການຈຳກັດຈຳນວນເງິນຝາກ ແລະ ການກັບຄືນເມືອຢ້ຽມຢາມບ້ານເກີດເມືອງນອນ ຂອງຊາວກູບາທີ່ດຳລົງຊີວິດ ຢູ່ຕ່າງປະເທດ, ອະນຸຍາດໃຫ້ເຊ່ືອມຕໍ່ການເຈລະຈາ ກ່ຽວກັບການບໍລິການໄປສະນີ ແລະ ຍົກຍ້າຍປະຊາຊົນ, ຟື້ນຟູການແລກປ່ຽນການຮ່ວມມືດ້ານການສຶກສາ, ແຕ່ຕາມນັກວິຈານສາກົນຫລາຍທ່ານແລ້ວ, ບັນດາວຽກງານເຫລົ່ານັ້ນເປັນພຽງສ້ຽວເທົ່ານັ້ນ.
ໃນສະພາບການປະຈຸບັນ, ນະໂຍບາຍປີດລ້ອມຂວ້ຳບາດຂອງອາເມລິກາ ຕ້ານກູບາ ໄດ້ກາຍເປັນນະໂຍບາຍທີ່ຫລ້າຫລັງຢ່າງແທ້ຈິງ. ຖ້າຫາກບໍ່ຍົກເລີກຄຳສັ່ງຂວ້ຳບາດຕ້ານ ກູບາ, ອາເມລິກາ ຈະສືບຕໍ່ໄປຝືນກັບທ່າອ່ຽງຂອງຍຸກສະໄຫມ.
ແທນເວີນ