(vovworld) - ວັນທີ 4/4, ເກຼັກ ເລີ່ມສົ່ງຊາວອົບພະຍົບໄປ ເຕິກກີຕາມຂໍ້ຕົກລົງທີ່ບັນລຸໄດ້ລະຫວ່າງສະຫະພາບອີລົບ (ອີຢູ) ແລະ ເຕິກກີ ເມື່ອເດືອນ 3/2016, ຂໍ້ຕົກລົງນີ້ແມ່ນເພື່ອແນໃສ່ຫຼຸດຜ່ອນຄວາມດັນຈາກຂະບວນຊາວອົບພະຍົບເຂົ້າມາບັນດາປະເທດເອີລົບຕາເວັນຕົກ, ໃນນັ້ນມີຫຼາຍກໍລະນີຂ້າມທະເລ Aegea ດ້ວຍຄວາມຜະຈົນໄພ. ແຕ່ປະສິດທິຜົນຂອງຂໍ້ຕົກລົງນີ້ແມ່ນຄືແນວໃດ, ນັ້ນແມ່ນຄຳຖາມທີ່ພວມວາງອອກ ໃນຂະນະທີ່ຂະບວນຊາວອົບພະຍົບຂ້າມທະເລ ແມດີເຕີຣານຽມ ເຂົ້າອີຕາລີພວມກາຍເປັນຄວາມວິຕົກກັງວົນ.
ຕາມຂໍ້ຕົກລົງທີ່ບັນລຸໄດ້ລະຫວ່າງ ອີຢູ ແລະ ເຕິກກີ, ບັນດາກໍລະນີຊາວອົບພະຍົບເຂົ້າ ເກຼັກ ໃນວັນທີ 20/3 ຈະຖືກເນລະເທດກັບຄືນ ເຕິກກີ. ກົງກັນຂ້າມ, ບັນດາປະເທດ ອີຢູກໍ່ຕ້ອງຮັບເອົາຊາວ ຊີຣີ ຈາກ ເຕິກກີຄືນໃໝ່, ໝາຍຄວາມວ່າ ເຕິກກີຮັບເອົາ 1 ຄົນກັບຄືນປະເທດ, ອີຢູກໍ່ຕ້ອງຮັບເອົາຊາວອົບພະຍົບ ຊີຣີ 1 ຄົນ. ຈຸດປະສົງຂອງຂໍ້ຕົກລົງນີ້ແມ່ນ ອັດປະຕູເສັ້ນທາງ ທາງການຂ້າມທະເລ Aegea, ເຊິ່ງແມ່ນເຂດທະເລລະຫວ່າງ ເກຼັກ ແລະ ເຕິກກີ, ຜ່ານເສັ້ນທາງນີ້ໄດ້ມີຊາວອົບພະຍົບ 1 ລ້ານກວ່າຄົນເຂົ້າ ເອີລົບໃນປີ 2015.
ກຳ່ປັ່ນຂົນສົ່ງຊາວອົບພະຍົບທຽບທ່າ Dikili ວັນທີ 4/4
(ພາບ:AFP/TTXVN)
ກຽມພ້ອມໃຫ້ການມອບຮັບຊາວອົບພະຍົບ
ວັນທີ 4/4, ຖ້ຽວບິນທີ່ຂົນສົ່ງຊາວ ຊີຣີອົບພະຍົບຖ້ຽວທຳອິດຈາກ ເຕິກກີ ໄດ້ລົງຈອດສະໜາມບິນ Hannover ຢູ່ ເຢຍລະມັນ. ໃນຂະນະນັ້ນ, ເກຼັກ ກໍ່ຈັດກຳ່ປັ່ນຂົນສົ່ງຊາວອົບພະຍົບຢ່າງຜິດກົດໝາຍປະມານ 200 ກວ່າຄົນກັບຄືນ ເຕິກກີ ຕາມຂໍ້ຕົກລົງລະຫວ່າງ ອີຢູ ແລະ ເຕິກກີ. ໃນການມອບ-ຮັບຊາວອົບພະຍົບໃນຄັ້ງນີ້, ມີຊາວ ຊີຣີປະມານ 42 ຄົນຖືກຂົນສົ່ງດ້ວຍທາງການບິນເຖິງ ເຢຍລະມັນ. ເລື່ອງຮັບເອົາຊາວອົບພະຍົບເຂົ້າ ເຢຍລະມັນໃນຄັ້ງນີ້ແມ່ນພາກສ່ວນໜຶ່ງໃນຂໍ້ຕົກລົງດຳເນີນງານລວມ ລະຫວ່າງ ອີຢູ ແລະ ເຕິກກີ ກ່ຽວກັບການແກ້ໄຂວິກິດການຊາວອົບພະຍົບ ເຊິ່ງສອງຝ່າຍບັນລຸໄດ້ໃນວັນທີ 20/3 ຜ່ານມາ.
ຕາມແຜນການໃນເວລາ 3 ວັນ, ລະຫວ່າງວັນທີ 4-6/4, ຈະມີຊາວອົບພະຍົບປະມານ 750 ຄົນທຳອິດ ຈາກເກາະ Lesbos ຂອງ ເກຼັກ ຖືກຂົນສົ່ງເຂົ້າ ເຕິກກີ, ໃນຂະນະນັ້ນບາງປະເທດຄື: ເຢຍລະມັນ, ຝລັ່ງ, ໂຮນລັງ, ແຟງລັງ ແລະ ປັອກຕູຍການ ຈະແມ່ນບັນດາປະເທດ ອີຢູ ທຳອິດຕ້ອນຮັບຊາວອົບພະຍົບທີ່ມາຈາກ ເຕິກກີ. ໃນການມອບ-ຮັບຊາວອົບພະຍົບຄັ້ງທຳອິດນີ້, ບັນດາປະເທດ ເອີລົບເຫຼົ່ານັ້ນ, ແຕ່ລະປະເທດຈະຮັບເອົາຊາວອົບພະຍົບປະມານ 1.600 ຄົນ, ຫຼັງຈາກນັ້ນເຢຍລະມັນຈະກຽມພ້ອມຕ້ອນຮັບຊາວອົບພະຍົບຕື່ມອີກ 13.500 ຄົນ.
ກ່ອນໜ້ານັ້ນ, ເພື່ອກະກຽມໃຫ້ການປະຕິບັດຂໍ້ຕົກລົງນີ້, ເຕິກກີ ໄດ້ຜັນຂະຫຍາຍການກໍ່ສ້າງສູນຈົດທະບຽນ 2 ແຫ່ງ ເພື່ອກຽມພ້ອມຮັບເອົາຊາວອົບພະຍົບທີ່ມາຈາກ ເກຼັກ. ສູນທັງສອງນີ້ລ້ວນແຕ່ນອນໃນເຂດດິນຕໍ່ແຜ່ນທີ່ຂຶ້ນກັບແຂວງແຄມຝັ່ງທະເລ Izmir, ທາງທິດຕາເວັນຕົກຂອງ ເຕິກກີ. ພາຍຫຼັງສຳເລັດການກວດສຸຂະພາບ ແລະ ຈົດທະບຽນຢູ່ທີ່ນີ້ແລ້ວ, ຊາວອົບພະຍົບຈາກ ເກຼັກ ຈະຖືກສົ່ງເຖິງບັນດາຄ້າຍຫຼົບໄພຢູ່ປະເທດນີ້.
ຂໍ້ຕົກລົງສາມາດຫຼຸດຜ່ອນຄວາມດັນຈາກການອົບພະຍົບໄດ້ຫຼືບໍ
ຫວັງວ່າຂໍ້ຕົກລົງລະຫວ່າງ ອີຢູ ແລະ ເຕິກກີ ກ່ຽວກັບມາດຕະການແກ້ໄຂວິກິດການຊາວອົບພະຍົບ ເຊິ່ງບັນລຸໄດ້ເມື່ອວັນທີ 20/3 ຜ່ານມາຈະຊ່ວຍແກ້ໄຂວິກິດການອົບພະຍົບໃຫ້ບັນດາປະເທດເອີລົບ. ແຕ່ປະຈຸບັນ, ຍັງມີຄວາມສົງໃສຫຼາຍຢ່າງກ່ຽວກັບລັກສະນະເປັນໄປຂອງຂໍ້ຕົກລົງນີ້. ມີຫຼາຍຄວາມເຫັນຖືວ່າ, ຂໍ້ຕົກລົງ ລະຫວ່າງ ອີຢູ ແລະ ເຕິກກີ ແມ່ນບາດຄ້ອນທັບແຮງໃສ່ສິດຂອງມະນຸດ, ຂະນະທີ່ພາຍໃນເວລາພຽງສອງ, ສາມສັບປະດາຜ່ານມາ, ເຕິກກີ ໄດ້ເນລະເທດຊາວຫຼົບໄພ ຊີຣີ ຫຼາຍຄົນກັບຄືນປະເທດທີ່ພວມເກີດເສິກກາງເມືອງ. ໃນຂະນະນັ້ນ, ລັດຖະບານ ເກຼັກກໍ່ພວມຕົກເຂົ້າສູ່ສະພາບຄວາມຫຍຸ້ງຍາກ ເມື່ອຕ້ອງຮັບມືກັບກັບສະພາບການໃຊ້ຄວາມຮຸນແຮງ ກ່ອນທີ່ຂໍ້ຕົກລົງ ລະຫວ່າງ ອີຢູ ແລະ ເຕິກກີ ໄດ້ຮັບການປະຕິບັດ. ທ້າຍສັບປະດາຜ່ານມາ, ມີຊາວອົບພະຍົບນັບພັນຄົນ ໄດ້ແຫ່ຂະບວນຄັດຄ້ານ ແຜນການເນລະເທດຊາວອົບພະຍົບກັບຄືນ ເຕິກກີ. ບັນດາເກາະຂອງ ເກຼັກໃນປະຈຸບັນ ພວມກາຍເປັນຈຸດທີ່ເຄັ່ງຮ້ອນ, ພາຍຫຼັງປະຊາຄົມຊາວອົບພະຍົບຖືກຕິດຂັດຢູ່ທີ່ນີ້ ໄດ້ທັບມ້າງຄ້າຍເຕົ້າໂຮມຢູ່ Chios.
ຂໍ້ຕົກລົງ ລະຫວ່າງ ອີຢູ ແລະ ເຕິກກີ ຍັງກໍ່ຄວາມວິຕົກກັງວົນທີ່ວ່າ ຂະບວນຊາວອົບພະຍົບເຂົ້າ ອີຕາລີ ຜ່ານທາງທະເລ ແມດີເຕີຣານຽມຄັ້ງໃໝ່ ນັບມື້ນັບເພີ່ມຂຶ້ນ. ນັບແຕ່ ອີຢູ ແລະ ເຕິກກີ ບັນລຸໄດ້ຂໍ້ຕົກລົງດັ່ງກ່າວ, ຈຳນວນຊາວອົບພະຍົບເຂົ້າບັນດາທ່າກຳ່ປັ່ນຂອງ ອີຕາລີ ຜ່ານທາງທະເລ ແມດີເຕີຣານຽມ ໄດ້ເພີ່ມຂຶ້ນທົບ 2 ເທົ່າ ເມື່ອທຽບໃສ່ຈຳນວນຊາວອົບພະຍົບຈາກເຕິກກີເຂົ້າເກຼັກ ຜ່ານທະເລ Aegean . ກະຊວງພາຍໃນ ອີຕາລີ ຄາດຄະເນວ່າ, ໃນປີ 2016 ປະເທດນີ້ຈະຕ້ອງຮັບເອົາຊາວອົບພະຍົບປະມານ 270.000 ຄົນ , ຫຼາຍທົບ 2,5 ເທົ່າເມື່ອທຽບໃສ່ປີ 2015. ໄລ່ສະເພາະໃນ 2 ສັບປະດາຜ່ານມາ, ໄດ້ມີຊາວອົບພະຍົບ 5.000 ກວ່າຄົນເຂົ້າບັນດາທ່າກຳ່ປັ່ນຂອງ ອີຕາລີ. ບໍ່ພຽງແຕ່ເຂົ້າ ອີຕາລີ ດ້ວຍຈຳນວນຫຼາຍເທົ່ານັ້ນ, ຫາກຊາວອົບພະຍົບຍັງມາຈາກຫຼາຍປະເທດກວ່າກ່ອນນີ້ອີກ.
ປະຈຸບັນ, ຍັງບໍ່ທັນຢັ້ງຢືນໄດ້ປະສິດທິຜົນແທ້ຈິງຂອງຂໍ້ຕົກລົງ ລະຫວ່າງ ອີຢູ ແລະ ເຕິກກີ ກ່ຽວກັບການສະກັດກັ້ນຂະບວນຊາວອົບພະຍົບຢ່າງຜິດກົດໝາຍເຂົ້າອີຢູ ເທື່ອ. ແຕ່ແນ່ນອນວ່າ ເອີລົບຍັງຕ້ອງເສຍເວລາຫຼາຍເພື່ອແກ້ໄຂບັນຫາຊາວອົບພະຍົບນີ້.