(vovworld) - ວິກິດການດ້ານການເມືອງທີ່ແກ່ຍາວຢູ່ຊີຣີ ອາດຈະໄດ້ຮັບການແກ້ໄຂ, ເມື່ອການນຳລັດເຊຍ ແລະ ອາເມລິກາຫາກໍ່ເຫັນດີສ້າງຕັ້ງກົນໄກຮ່ວມມືສອງຝ່າຍ ເພື່ອພ້ອມກັນແກ້ໄຂບັນຫານີ້. ເລື່ອງລັດເຊຍ - ອາເມລິກາເຫັນດີແກ້ໄຂວິກິດການຢູ່ຊີຣີ ໄດ້ຮັບຖືວ່າແມ່ນສັນຍານຕັ້ງໜ້າທຳອິດ, ເປີດແງ່ຫວັງໃຫ້ວິວັດທະນາການສັນຕິພາບຢູ່ຕາເວັນອອກກາງ.
ການພົບປະຄັ້ງທຳອິດລະຫວ່າງປະທານາທິບໍດີອາເມລິກາ Barack Obama ແລະ ປະທານາທິບໍດີລັດເຊຍ Vladimir Putin ໃນຮອບເວລາ 2 ກວ່າປີທີ່ຜ່ານມາ, ເຊິ່ງຫາກໍ່ດຳເນີນຢູ່ນອກວາລະປະຊຸມຂອງສະມັດຊາໃຫຍ່ສະຫະປະຊາຊາດ ທີ່ນິວຢອກ ນັ້ນ, ຖືກແກ່ຍາວກວ່າແຜນການທີ່ໄດ້ວາງອອກ, ເຖິງວ່າຍອມຮັບຍັງມີຫຼາຍສິ່ງທີ່ບໍ່ທັນເຫັນດີເຫັນພ້ອມກັນ, ແຕ່ການນຳທັງສອງລ້ອນແຕ່ຢືນຢັນວ່າຈະຮ່ວມມືໃນລະດັບສູງສຸດໃນການແກ້ໄຂວິກິດການທີ່ແກ່ຍາວຢູ່ຊີຣີ.
ລັດເຊຍ - ອາເມລິກາຈັບມືກັນ
ເຖິງວ່າມີຈຸດປະສົງລວມແມ່ນດັບສູນອົງການລັດອິດສະລາມ (IS) ກໍ່ຕາມ, ແຕ່ລັດເຊຍ, ອາເມລິກາ ແລະ ຝ່າຍຕາເວັນຕົກພັດມີທັດສະນະທີ່ຝືນກັນ. ລັດເຊຍ ສະໜັບສະໜູນປະທານາທິບໍດີຊີຣີ Bashar al-Assad ແລະ ໜູນຊ່ວຍອຸປະກອນ, ອາວຸດ ແລະ ກອງທັບເພື່ອໃຫ້ຊີຣີດັບສູນຝ່າຍຄ້້ານ ແລະ IS. ໃນຂະນະນັ້ນ, ອາເມລິກາ ແລະ ຝ່າຍຕາເວັນຕົກພັດຖືວ່າ, ປະທານາທິບໍດີ Bashar al-Assad ເອງແມ່ນສາຍເຫດທີ່ພາໄປເຖິງວິກິດການການເມືອງ ແລະ ການອົບພະຍົບຢູ່ຊີຣີ. ແຕ່ຄວາມຈິງສົງຄາມຢູ່ຊີຣີ ໄດ້ກ້າວເຂົ້າສູ່ປີທີ 5 ຢ່າງລຽນຕິດແລ້ວ. ບັນດາມາດຕະການນັບທັງດ້ານການທູດ ແລະ ການທະຫານ ກໍ່ບໍ່ສາມາດຊ່ວຍໃຫ້ປະເທດນີ້ຫຼຸດພົ້ນອອກຈາກ “ຝັນຮ້າຍ“ ຈາກສົງຄາມ ແລະ ການໃຊ້ຄວາມຮຸນແຮງ. ປະທານາທິບໍດີ Bashar al-Assad ບໍ່ອາດລາອອກຈາກຕຳແໜ່ງຕາມການຈັດວາງຂອງອາເມລິກາ ແລະ ຝ່າຍຕາເວັນຕົກ ໄດ້, ຫາກຍາມໃດກໍ່ຖືວ່າ, ການຂ້າມຜ່ານດ້ານການເມືອງຢູ່ປະເທດນີ້ພຽງແຕ່ເກີດຂຶ້ນເມື່ອບັດເລືອກຕັ້ງຂອງປະຊາຊົນໄດ້ຮັບການຮັບຮອງເອົາເທົ່ານັ້ນ.
ສະພາບຕົວຈິງຄືດັ່ງກ່າວ ພ້ອມກັບວິກິດການອົບພະຍົບ ແລະ ເຄິ່ງປະເທດຊີຣີ ພວມຢູ່ພາຍໃຕ້ການຄວບຄູມຂອງ IS ນັ້ນ ໄດ້ເຮັດໃຫ້ທັງລັດເຊຍ, ແລະ ອາເມລິກາຮັບຮູ້ວ່າ, ບຸລິມາສິດອັນດັບໜຶ່ງໃນປະຈຸບັນ ແມ່ນຕ້ອງຮ່ວມແຮງຮ່ວມໃຈເພື່ອຕີເອົາຊະນະພວກກໍ່ການຮ້າຍ.
ເປີດບັນດາມາດຕະການແກ້ໄຂວິກິດການ
ເປັນທີ່ຈະແຈ້ງແລ້ວວ່າ, ການຫຍັບມໍ່ໃກ້ກັນລະຫວ່າງລັດເຊຍ ແລະ ອາເມລິກາ ໄດ້ສ້າງທ່າໃຫ້ແກ່ການປັບປຸງສາຍພົວພັນລະຫວ່າງລັດເຊຍ ກັບຝ່າຍຕາເວັນຕົກ. ແຫຼ່ງຂ່າວຈາກລັດຖະບານ ເຢຍລະມັນ ຫວ່າງແລ້ວນີ້ ຢືນຢັນວ່າ, ນາຍົກລັດຖະມົນຕີປະເທດນີ້, ທ່ານນາງ Angela Merkel ຈະມີການພົບປະກັບປະທານາທິບໍດີລັດເຊຍ Vladimir Putin, ທີ່ການປະຊຸມກັບບັນດາການນຳກຸ່ມ “Norman +“ ຢູ່ນະຄອນຫຼວງ ປາຣີ ໃນວັນທີ 2/10 ຈະມາເຖິງ. ທ່ານນາງ Angela Merkel ກໍ່ຖະແຫຼງວ່າ, ໃນການຊອກຫາມາດຕະການແກ້ໄຂບັນຫາ ຊີຣີ ນັ້ນ, ສິ່ງທີ່ຈຳເປັນນັ້ນແມ່ນຕ້ອງເຈລະຈາກັບຫຼາຍຝ່າຍ, ໃນນັ້ນລວມມີອຳນາດການປົກຄອງ Damacus. ວິກິດການພຽງແຕ່ສາມາດແກ້ໄຂໄດ້ ຜ່ານຄວາມມານະພະຍາຍາມຂອງ ອີຢູ, ອາເມລິກາ, ລັດເຊຍ ແລະ ບັນດາປະເທດຕາເວັນອອກກາງ. ເປັນທີ່ຈະແຈ້ງແລ້ວວ່າ, ນີ້ແມ່ນຄຳເຊີນມາ ມົດສະກູ ເພື່ອເຂົ້າຮ່ວມການແກ້ໄຂບັນຫາ ຊີຣີ.
ໃນຂະນະນັ້ນ, ໃນຖະແຫຼງທີ່ກອງປະຊຸມໃຫຍ່ ສະມັດຊາລັດຖະສະພາ ສະຫະປະຊາຊາດ ຫວ່າງແລ້ວນີ້, ທ່ານນາຍົກລັດຖະມົນຕີອັງກິດ David Cameron, ໄດ້ອອກສຽງສະເໜີປະທານາທິບໍດີຊີຣີ Bashar al-Assad ສືບຕໍ່ກຳອຳນາດໃນລັດຖະບານຂ້າມຜ່ານ, ພ້ອມທັງຖືວ່າ, ມົດສະກູ ຄວນເຂົ້າຮ່ວມການກະທຳລວມໝູ່ຕ່າງໆເພື່ອຕ້ານຄືນ IS.
ລັດເຊຍເຂົ້າຮ່ວມການຕ້ານ IS
ຄວາມຈິງແລ້ວ, ລັດເຊຍມີບົດບາດສຳຄັນທີ່ສຸດສຳລັບຊີຣີ ໃນການແກ້ໄຂວິກິດການຢູ່ປະເທດນີ້. ມີແຕ່ທ່ານປະທານາທິບໍດີ Putin ເທົ່ານັ້ນຈຶ່ງສາມາດໂອ້ລົມສົນທະນາກັບປະທານາທິບໍດີ al-Assad ແລະ ສາມາດເຮັດໃຫ້ສະພາບການຕ້ານ IS ຢູ່ຊີຣີ ໄດ້ເທົານັ້ນ. ຮອດເວລາແລ້ວທີ່ບັນດາປະເທດ ອີຢູ ຕ້ອງຮູ້ໄດ້ວ່າການແບ່ງແຍກ, ຄວາມບໍ່ລົງລອຍກັນໃນການພົວພັນກັບລັດເຊຍ ພຽງແຕ່ເຮັດໃຫ້ກຳລັງແຮງໃນການຮົບຕ້ານ IS ອ່ອນເພຍລົງເທົ່ານັ້ນ. ຍ້ອນເຫດນັ້ນ, ບັນດາປະເທດມະຫາອຳນາດ ບໍ່ໄດ້ນຳໃຊ້ຍຸດທະສາດຊີຣີ ຢູ່ຕາເວັນອອກກາງ, ເພື່ອຜົນປະໂຫຍດສ່ວນຕົວ, ແນໃສ່ຮັບໃຊ້ພາລະກິດລວມ ແມ່ນຕ້ານ IS . ຍ້ອນເຫດນັ້ນ, ເຖິງວ່າຍັງມີຄວາມບໍ່ເຫັນດີເຫັນພ້ອມດ້ານທັດສະນະ ແລະ ຜົນປະໂຫຍດ ກໍ່ຕາມ, ແຕ່ການໂອ້ລົມສົນທະນາ, ການຮ່ວມມື ແມ່ນການເລືອກເຟັ້ນຂອງບັນດາຝ່າຍໃນປະຈຸບັນ, ເພື່ອແນໃສ່ຢຸດຕິເສິກກາງເມືອງ ທີ່ແກ່ຍາວແຕ່ປີ 2011, ເຮັດໃຫ້ 240.000 ກວ່າຄົນເສຍຊີວິດ, ແລະນັບລ້ານຄົນຕ້ອງອົບພະຍົບອອກຈາກບ້ານເກີດເມືອງນອນໄປລີ້ໄພ.