ກ່ອນນີ້ 2 ປີເຕັມ ຄືວັນທີ 2/5/2011, ທົ່ວທັງປະເທດອາເມລິກາມີຄວາມປິຕິຊົມຊື່ນຮັບຕ້ອນເຫດການຫົວໂປເຄືອຂ່າຍກໍ່ການຮ້າຍ ອານກີດາ Osama Bin laden , ຊຶ່ງແມ່ນບຸກຄົນຖືກຖືວ່າເປັນຕົວການຢືນຢູ່ເບື້ອງຫຼັງເຫດການບຸກໂຈມຕີແບບກໍ່ການຮ້າຍ ວັນທີ 11/9/2001 ໄດ້ຖືກດັບສູນ. ພາຍຫຼັງເຫດການນີ້ 2 ປີ, ເຖິງວ່າ ເຮືອນຮັງຂອງ ເຄືອຂ່າຍກໍ່ການຮ້າຍ ອານກີດາຂອງຫົວໂປເຄືອຂ່າຍກໍ່ການຮ້າຍຄົນນີ້ຢູ່ປາກິດສະຖານໄດ້ຖືກດັບສູນແລ້ວກໍຕາມ, ແຕ່ບັນດາສາຂາຂອງ ເຄືອຂ່າຍກໍ່ການຮ້າຍນີ້ຍັງຄົງຕົວຢູ່ຫຼາຍແຫ່ງໃນໂລກ, ຊຶ່ງແມ່ນໄພນາບຂູ່ຕໍ່ຄວາມສະຫງົບຂອງອາເມລິກາ ກໍຄືໃນທົ່ວໂລກ.
ເຫດວາງລະເບີດກໍ່ການຮ້າຍທີ່ງານແຂ່ງຂັນແລ່ນມາຣາຕອນ
ສາກົນທີ່ຈັດຂຶ້ນຢູ່ Boston ເມື່ອວັນທີ 15/4
(ພາບ: AP)
|
ໃນຈຸດເວລານີ້, ຢູ່ ອາເມລິກາພວມເພີ່ມທະວີບັນດາມາດຕະດານປ້ອງກັນຄວາມສະຫງົບ. ປະທານາທິບໍດີອາເມລິກາ Barak Obama ໄດ້ອອກຄຳສັ່ງຜັນຂະຫຍາຍ ທຸກໆມາດຕະການທີ່ສາມາດ ປະຕິບັດໄດ້ເພື່ອປ້ອງກັນປະຊາຊົນ. ສະຖານທູດອາເມລິກາປະຈຳປາກິດສະຖານ ກໍໄດ້ສະເໜີໃຫ້ພາລະກອນຂອງຕົນບໍ່ຄວນໄປພັດຕະຄານຫຼືແຫ່ງຕ່າງໆທີ່ມີຜູ້ຄົນເຕົ້າໂຮມຢ່າງໜາແໜ້ນຢູ່ນະຄອນ ຫຼວງຂອງປາກິດສະຖານໃນຈຸດເວລານີ້. ວັນທີ 2/5 ຢູ່ ປາກິດສະຖານກໍໄດ້ດຳເນີນການເຄື່ອນໄຫວຫຼາຍຢ່າງເພື່ອລະນຶກ 2 ປີແຫ່ງວັນຫົວໂປເຄືອຂ່າຍກໍ່ການຮ້າຍ ອານກີດາ Osama Bin laden ຖືກກຳລັງສະເພາະກິດຂອງອາເມລິກາດັບສູນ. ຜູ້ຄົນທັງຫຼາຍບໍ່ອາດປະຕິເສດວ່າ ກຳລັງສະເພາະກິດຂອງອາເມລິກາດັບສູນຫົວໂປເຄືອຂ່າຍກໍ່ການຮ້າຍ ອານກີດາ Osama Bin laden ກ່ອນນີ້ 2 ປີແມ່ນຜົນສຳເລັດອັນໃຫຍ່ຫຼວງຂອງວໍຊິງຕັນ. ທີ 1 ແມ່ນມັນໄດ້ລົບລ້າງຄວາມຫຼອກຫຼອນຈາກລາຍຊື່ Osama Bin laden ທີ່ມີຕໍ່ປະເທດອາເມລິກາ. ທີ 2 ແມ່ນເມືອ່ Osama Bin laden ຖືກດັບສູນ, ໄດ້ເຮັດໃຫ້ບັນດາເຄືອຂ່າຍກໍ່ການຮ້າຍໃນທົ່ວໂລກອ່ອນແອລົງ.
ຜູ້ຄົນທັງຫຼາຍຍັງຈືດີວ່າ ເມື່ອຫົວໂປເຄືອຂ່າຍກໍ່ການຮ້າຍ ອານກີດາ Osama Bin laden ຖືກດັບສູນນັ້ນ, ປະຊາຊົນອາເມລິກາ ແລະ ປະຊາຊົນໃນທົ່ວໂລກລ້ວນແຕ່ມີຄວາມອຸ່ນອຽ່ນໃຈ. ຄຳຖະແຫຼງຂອງເຈົ້າໜ້າທີ່ອຳນາດການປົກຄອງ ອາເມລິກາຖືວ່າ ການເຖິງແກ່ຄວາມຕາຍຂອງ Osama Bin laden ໄດ້ເຮັດໃຫ້ເຄືອຂ່າຍກໍ່ການຮ້າຍ ອານກີດາ ຖືກອ່ອນແອລົງ ແລະ ມັນຈະບໍ່ສາມາດດຳເນີນບັນດາກໍລະນີບຸກໂຈມຕີຄືເຫດກໍການຮ້າຍວັນທີ 11/9/2001 ອີກແລ້ວ. ຄຳຖະແຫຼງນີ້ໄດ້ເປັນການປອບໃຈຊາວອາເມລິກາ ແລະ ໄດ້ມີຫຼາຍຄົນເຊື່ອໝັ້ນວ່າ ນັບແຕ່ນີ້ເປັນຕົ້ນໄປ, ຊາວອາເມລິກາຈະມີຊີວິດໃນທ່າມກາງຄວາມສະຫງົບສຸກ. ແຕ່ໃນຕົວຈິງ, ພັດບໍ່ເຊັ່ນນັ້ນ, ນັບຕັ້ງແຕ່ Osama Bin laden ຖືກດັບສູນ, ບັນດາການບຸກໂຈມຕີກໍ່ການຮ້າຍທີ່ມີຂອບຂະໜາດໃຫຍ່ແມ່ນບໍ່ຖືກຄິດໄລ່ເຖິງ, ແຕ່ສຳລັບ ການບຸກໂຈມຕີກໍ່ການຮ້າຍທີ່ມີຂອບຂະໜາດນ້ອຍ ໄດ້ກາຍເປັນໄພອັນຕະລາຍທີ່ນັບມື້ນັບຮ້າຍແຮງຂຶ້ນ. ເຖິງວ່າບໍ່ໄດ້ຮັບການຊີ້ນຳໂດຍກົງຈາກ ເຄືອຂ່າຍກໍ່ການຮ້າຍ ອານກີດາ ກໍຕາມ, ແຕ່ບັນດາການບຸກໂຈມຕີກໍ່ການຮ້າຍແບບນີ້ ຍັງຄົງແມ່ນສິ່ງທ້າທາຍຢ່່າງໃຫຍ່ຫຼວງທີ່ມີຕໍ່ກຳລັງຕ້ານກໍ່ການຮ້າຍ. ລະອຽດແມ່ນໃນຕະຫຼອດ 2 ປີທີ່ຜ່ານມາ, ປະເທດອາເມລິກາຕ້ອງໄດ້ປະເຊີນໜ້າກັບບັນດາກົນອຸບາຍວາງລະເບີດທີ່ແນໃສ່ບັນດາເຈົ້າໜ້າທີ່ກໍຄືບັນດາອົງການສຳນັກງານຂັ້ນສູນກາງຂອງປະເທດນີ້. ແລະ ເມື່ອມໍ່ມານີ້, ແມ່ນເຫດວາງລະເບີດທີ່ງານແຂ່ງຂັນແລ່ນມາຣາຕອນສາກົນທີ່ຈັດຂຶ້ນຢູ່ Boston ເມື່ອວັນທີ 15/4.
ເຖິງວ່າຈຳນວນຜູ້ເສຍຊີວິດ ແລະ ຮັບບາດເຈັບບໍ່ຫຼາຍກໍຕາມ, ແຕ່ ເຫດວາງລະເບີດທີ່ເຫດການກິລາໃຫຍ່ທີ່ມີມາແຕ່ດົນນານຂອງປະເທດອາເມລິກາ ໄດ້ເຮັດໃຫ້ເພີ່ມຄວາມວິຕົກກັງວົນຕໍ່ບັນຫາຄວາມສະຫງົບປອດໄພ. ພິເສດມັນໄດ້ເກີດຂຶ້ນໃນຈຸດເວລາທີ່ສະດຸ້ງໄວຄື ຍັງອີກບໍ່ຮອດ 2 ອາທິດ, ປະເທດອາເມລິກາຈັດຕັ້ງສະເຫຼີມສະຫຼອງ 2 ປີແຫ່ງວັນ Osama Bin laden ຖືກດັບສູນ. ເປັນທີ່ຈະແຈ້ງແລ້ວວ່າ ການບຸກໂຈມຕີກໍການຮ້າຍໄດ້ດຶງດູດຄວາມສົນໃຈສຳລັບ ບໍ່ພຽງແຕ່ປະເທດອາເມລິກາເທົ່ານັ້ນ, ຫາກຍັງສຳລັບທົ່ວໂລກອີກດ້ວຍ. ພ້ອມກັນນັ້ນ, ເຖິງວ່າ ເຄືອຂ່າຍກໍ່ການຮ້າຍ ອານກີດາ ຖືກອ່ອນແອລົງກໍຕາມ, ແຕ່ໃນ 2 ປີ ທີ່ຜ່ານມາ, ບັນດາກຸ່ມກໍ່ການຮ້າຍອື່ນໆໄດ້ເປີດກ້ວາງການເຄື່ອນໄຫວຢູ່ ອາບການິສະຖານ, ປາກິດສະຖານ ແລະ ບັນດາປະເທດອາຟະລິກາ. ພາຍຫຼັງບັນດາການຫັນປ່ຽນດ້ານການເມືອງຢ່າງຮຸນແຮງຢູ່ຕາເວັນອອກກາງ, ອາຟະລິກາເໜືອ, ອານກີດາ ກໍພວມຂະຫຍາຍເປັນ ເຄືອຂ່າຍກໍ່ການຮ້າຍໃນວົງກ້ວາງໂດຍເຊື່ອມຕໍ່ Somalia ຜ່ານທະເລແດງ ໄປເຖິງ Yemen. ຂ່າວຄາວກ່ຽວກັບການບຸກໂຈມຕີກໍ່ການຮ້າຍຢູ່ຕາມຈຸດຮ້ອນນີ້ຖືກອອກຂ່າວເປັນປະຈຳວັນ ຊຶ່ງເປັນການສະແດງໃຫ້ເຫັນວ່າ ຄວາມຕາຍຂອງ Osama Bin laden ແມ່ນຍັງບໍ່ທັນພຽງພໍເພື່ອບັນເທົ່າຄວາມວິຕົກກັງວົນທີ່ພວມເກີດຂຶ້ນ. ສິ່ງທີ່ເປັນອັນຕະລາຍແມ່ນຢູ່ບ່ອນວ່າ ເຄືອຂ່າຍກໍ່ການຮ້າຍ ອານກີດາ ພ້ອມກັບລະບົບແນວຄິດທຳສົງຄາມສັກສິດ ອິດສະລາມ ແລະ ປັດສະຍາຂອງ Osama Bin laden ຍັງຄົງຕົວຢູ່ຫຼາຍແຫ່ງໃນໂລກ ແລະ ໄດ້ກາຍເປັນໜໍ່ແໜງໃຫ້ດຳເນີດແນວຄິດຫົວຮຸນແຮງໃນໄວໜຸ່ມພາກສ່ວນໜຶ່ງ. ຖ້າຫາກສັງເກດຕົວການຂອງ ເຫດວາງລະເບີດທີ່ງານແຂ່ງຂັນແລ່ນມາຣາຕອນສາກົນທີ່ຈັດຂຶ້ນຢູ່ Boston ແລະ ແບບວິທີປະຕິບັດການບຸກໂຈມຕີນັ້ນ, ແມ່ນອາດຈະເຫັນແຈ້ງເຖິງສິ່ງດັ່ງກ່າວ. ລູກລະເບີດ 2 ລູກຖືກວາງຢູ່ ນະຄອນ Boston ແມ່ນລູກລະເບີດທີ່ຜະລິດເອງດ້ວຍໝໍ້ຕົ້ມ ເຊັ່ນດຽວກັນກັບ ອາວຸດໂດຍບັນດາມືປືນອິດສະລາມຫົວຮຸ່ນແຮງເຄີຍນຳໃຊ້ຢູ່ ອາບການິສະຖານ, ປາກິດສະຖານ ແລະ ອີນເດຍ.
ພາຍຫຼັງທີ່ Osama Bin laden ຖືກດັບສູນເປັນເວລາ 2 ປີ, ບໍ່ອາດປະຕິເສດ ຕໍ່ ບັນດາໝາກຜົນກໍຄືຄວາມຕັດສິນໃຈຂອງອຳນາດການປົກຄອງ ປະທາ ນາທິບໍດີ Barak Obama ໃນການສູ້ຮົບຕ້ານລັດທິກໍ່ການຮ້າຍ, ແຕ່ກໍຕ້ອງຮັບຮູ້ຕໍ່ຄວາມຈິງທີ່ວ່າ ເຖິງວ່າ ຫົວໂປເຄືອຂ່າຍກໍ່ການຮ້າຍ ອານກີດາ Osama Bin laden ຖືກດັບສູນແລ້ວກໍຕາມ, ແຕ່ເຄືອຂ່າຍກໍ່ການຮ້າຍ ອານກີດາ ຍັງຄົງແມ່ນຄວາມວິຕົກກັງວົນຢ່າງໃຫຍ່ຫຼວງ. ສະພາບຂາດສະຖຽນລະພາບທາງດ້ານການເມືອງຢູ່ບັນດາປະເທດຕາເວັນອອກກາງ, ອາຟະລິກາ ແລະ ການແຊກແຊງຂອງບັນດາປະເທດມະຫາອຳນາດໃນການປ່ຽນແປງລະບອບຢູ່ປະເທດເຫຼົ່ານັ້ນ ຈະເປັນເງື່ອນໄຂເພື່ອໃຫ້ບັນດາອົງການກໍ່ການຮ້າຍເປີດກ້ວາງການເຄື່ອນໄຫວ. ການສູ້ຮົບຕ້ານກໍ່ການຮ້າຍ ແນ່ນອນວ່າ ຈະຍັງຄົງແມ່ນການສູ້ຮົບທີ່ຍາວນານ