ເລື່ອງຕວກກີຍິງເຮືອບິນສູ້ຮົບ Su 24 ຂອງລັດເຊຍຕົກເມື່ອວັນທີ 24/11 ຢູ່ເຂດຊາຍແດນຊີຣີ ແມ່ນຍ້ອນຖືວ່າ ເຮືອບິນລຳນີ້ໄດ້ລ່ວງລ້ຳເຂດນານຟ້າຂອງ ຕວກກີ ແລະ ເລື່ອງນີ້ບໍ່ພຽງແຕ່ກໍ່ຄວາມເຄັ່ງຕຶງໃຫ້ແກ່ການພົວພັນລະຫວ່າງ 2 ປະເທດເທົ່ານັ້ນ, ຫາກຍັງເຮັດໃຫ້ກຳລັງໃນສຳພັນທະມິດສູ້ຮົບສາກົນຕ້ານກຳລັງລັດອິດສະລາມໂດຍຂະໜານນາມເອງ IS ຢູ່ຕາເວັນອອກກາງຖືກກະແຈກກະຈາຍອີກດ້ວຍ
ການສູ້ຮົບຕ້ານ IS ຍັງຈະແກ່ຍາວ ແລະ ສິ້ນເປືອງເງິນທຶນຢ່າງຫຼວງຫຼາຍ ( ພາບ: AP) |
ເຫດຍິງເຮືອບິນຕົກໄດ້ເກີດຂຶ້ນໃນສະພາວະທີ່ລັດເຊຍ ແລະ ບັນດາປະເທດໃນສຳພັນທະມິດສູ້ຮົບສາກົນຕ້ານ ISໂດຍອາເມລິການຳໜ້າ ພວມເພີ່ມທະວີການບຸກໂຈມຕີ, ທຳລາຍບັນດາເປົ້າໝາຍຂອງ IS. ບັນດາການບຸກໂຈມຕີໂດຍລັດເຊຍປະຕິບັດ ພວມໄດ້ຮັບບັນດາໝາກຜົນອັນຕັ້ງໜ້າ.
IS ໄດ້ຮັບຜົນປະໂຫຍດຫຼາຍກວ່າໝູ່
ເປົ້າໝາຍໄດ້ຮັບຜົນປະໂຫຍດກ່ອນໝູ່ໃນກໍລະນີນີ້ ບໍ່ແມ່ນໃຜນອກເໜືອຈາກ IS ແລະ ບັນດາກຸ່ມກໍ່ການຮ້າຍເອງ. ແຕ່ດົນນານມາແລ້ວ, ບັນດາການຂັດແຍ້ງທາງດ້ານຜົນປະໂຫຍດຂອງບັນດາປະເທດທີ່ເຂົ້າຮ່ວມຕ້ານກໍ່ການຮ້າຍນັ້ນ ຍາມໃດກໍແມ່ນສິ່ງທີ່ບັນດາອິດທິກຳລັງກໍ່ການຮ້າຍສວຍໃຊ້. ໄລຍະມໍ່ໆມານີ້, ບັນດາກຳລັງກໍ່ການຮ້າຍໄດ້ພະຍາຍາມດຳເນີນບັນດາການບຸກໂຈມຕີຊຶ່ງໄດ້ກໍ່ຄວາມບາດເຈັບລົ້ມຕາຍຢ່າງໜັກໜ່ວງໃຫ້ແກ່ລັດເຊຍ ແລະ ບັນດາປະເທດໃນໂລກຄື: ເຫດວາງລະເບີດໃສ່ເຮືອບິນ A-321 ຂອງລັດເຊຍ, ເຫດວາງລະເບີດຢູ່ ເບຣຸດປະເທດລີບັງ ແລະ ປາຣີ ປະເທດຝະລັ່ງ. ໃນສະພາວະການນັ້ນ, ເລື່ອງຕວກກີຍິງເຮືອບິນສູ້ຮົບ Su 24 ຂອງລັດເຊຍຕົກ ໄດ້ກໍ່ຄວາມເສຍຫາຍໃຫ້ແກ່ລັດເຊຍ ແລະ ກໍແມ່ນສິ່ງທີ່ IS ລໍຄອຍ. ກໍລະນີນີ້ໄດ້ເຮັດໃຫ້ລັດເຊຍ ແລະ ຕວກກີຖືກແບ່ງແຍກ ຂະນະທີ່ທັງ 2 ປະເທດລ້ວນແຕ່ມີການກະທຳທາງດ້ານການທະຫານຕ້ານ IS. ຕວກກີແມ່ນປະເທດສະມາຊິກຂອງ Nato , ດັ່ງນັ້ນການກະທຳຂອງຕວກກີໄດ້ສົ່ງຜົນສະທ້ອນບໍ່ໜ້ອຍເຖິງການພົວພັນ Nato-ລັດເຊຍ. ປະທານາທິບໍດີລັດເຊຍ ປູຕິນ ໄດ້ເຄີຍກ່າວເຕືອນວ່າ ການຮ່ວມມືລະຫວ່າງລັດເຊຍ ແລະ ກຳລັງທະຫານປະສົມໂດຍອາເມລິການຳໜ້າ ໃນການສູ້ຮົບຕ້ານ IS ຢູ່ຊີຣີຈະຢຸດຕິລົງຖ້າຫາກວ່າ ສືບຕໍ່ມີບໍ່ວ່າການເຄື່ອນໄຫວທາງທະຫານໃດໆຕ້ານກອງທັບອາກາດຂອງລັດເຊຍ. ນີ້ກໍແມ່ນສິ່ງທີ່ IS ຕ້ອງການ, ເພາະວ່າ ພາຍຫຼັງເກີດບັນດາການບຸກໂຈມຕີແບບກໍ່ການຮ້າຍຢູ່ປາຣີ, ປະຊາຄົມໂລກປາດຖະໜາວ່າ ບັນດາປະເທດມະຫາອຳນາດຈະຕັດສິນໃຈເຕົ້າໂຮມກຳລັງດ້ວຍສຳພັນທະມິດສູ້ຮົບໜຶ່ງດຽວຕ້ານ IS. ເປັນທີ່ຈະແຈ້ງແລ້ວວ່າ : ກໍລະນີນີ້ ໄດ້ເຮັດໃຫ້ສະພາບການສັບສົນຂຶ້ນຕື່ມ, ພ້ອມທັງກໍ່ຄວາມເຄັ່ງຕຶງໃນຈຸດເວລາທີ່ມີບາດລ້ຽວສຳຄັນໃນການສູ້ຮົບຕ້ານ IS. ທ່ານ Alan Mendoza, ຜູ້ຊ່ຽວຊານສັງກັດສະຖາບັນຄົ້ນຄ້ວາສັງຄົມອັງກິດ ໃຫ້ຂໍ້ສັງເກດວ່າ : ບັນດາການກະທຳໂຕ້ຕອບຂອງລັດເຊຍ ກໍຄືບັນດາການຄິດໄລ່ຂອງຕວກກີຈະເຮັດໃຫ້ສະພາບສູ້ຢັນກັນລະຫວ່າງ Nato-ລັດເຊຍຢູ່ຊີຣີມີຄວາມເຄັ່ງຕຶງຫຼາຍຂຶ້ນໃນໄລຍະທີ່ຈະມາເຖິງ ແລະ ສິ່ງນີ້ກໍນຳມາເຊິ່ງຜົນປະໂຫຍດໃຫ້ແກ່ IS ຢ່າງສິ້ນເຊິ່ງ.
ອາເມລິກາ, Nato ຮຽກຮ້ອງໃຫ້ບັນດາຝ່າຍເລັ່ງໃສ່ໄພນາບຂູ່ຈາກ IS
ການສູ້ຮົບຕ້ານ IS ຈະຖືກເຂວທິດ ກໍຕໍ່ເມື່ອບັນດາປະເທດມີເປົ້າໝາຍຮ່ວມຕ້ານ IS ເກີດການຂັດແຍ້ງກັນ. ສິ່ງນີ້ຍິ່ງຊົ່ວຮ້າຍກວ່າ ເມື່ອສັງເກດໃນວົງກ້ວາງ. ສຳພັນທະມິດສູ້ຮົບຕ້ານ IS ລວມມີ 65 ປະເທດໂດຍອາເມລິການຳໜ້າ ພວມອ່ອນແອລົງຢ່າງເຫັນໄດ້ຊັດ ຂະນະທີ່ມີຫຼາຍປະເທດພັນທະມິດ ອາຣັບ ໄດ້ຖອນຕົວອອກເພື່ອສຸມກຳລັງໃຫ້ແກ່ການສູ້ຮົບຕ້ານກຳລັງລຸກຮື້ຂຶ້ນ Houthi ຢູ່ເຢແມນ. ບັນດາເຈົ້າໜ້າທີ່ອາເມລິກາ ຕ່າງກໍຍອມຮັບຕໍ່ການບັນລຸປະສິດທິຜົນຕ່ຳໃນບັນດາການບຸກໂຈມຕີທາງອາກາດ ເມື່ອຂາດການຫນູນຊ່ວຍຂອງກອງທັບອາກາດທີ່ມາຈາກບັນດາປະເທດພັນທະມິດອາຣັບເຊັ່ນ: ຈໍແດນ, ບາແຣນ ແລະ ສະຫະລັດອາຣັບເອັມມີເລັດ.
ທີ່ການປະຊຸມຂ່າວເມື່ອວັນທີ 2/12, ຜູ້ນຳກອງບັນຊາການຮົບ, ກະຊວງປ້ອງກັນປະເທດລັດເຊຍ Sergey Rudskoi ໄດ້ແຈ້ງໃຫ້ຊາບວ່າ ບັນດາການບຸກໂຈມຕີທາງອາກາດຂອງກອງທັບອາກາດລັດເຊຍ ທີ່ແນໃສ່ຕ້ານ IS ຢູ່ຊີຣີ ໄດ້ຕັດເຄິ່ງໜຶ່ງແຫຼ່ງລາຍຮັບຢ່າງຜິດກົດໝາຍຂອງ IS ຈາກການຄ້າຂາຍນ້ຳມັນເຖື່ອນ. ຕາມທ່ານ Sergey Rudskoi ແລ້ວ, ລາຍຮັບຂອງ IS ຈາກການຄ້າຂາຍນ້ຳມັນເຖື່ອນ ແມ່ນຂຶ້ນເຖິງ 3 ລ້ານ USD /ວັນ, ເທົາກັບ 2 ຕື້ USD/ປີ ຊຶ່ງແມ່ນແຫຼ່ງລາຍຮັບຕົ້ນຕໍ່ເພື່ອສາມາດລ້ຽງຊີບແກ່ພວກກໍ່ການຮ້າຍ IS ຢູ່ຊີຣີ.
ໃນຂະນະນັ້ນ, ເມື່ອວັນທີ 1/12, ກຳລັງລັດອິດສະລາມໂດຍຂະໜານນາມເອງ IS ໄດ້ນາບຂູ່ວ່າ ຈະເປີດກ້ວາງສົງຄາມສັກສິດໄປຍັງອິນເດຍ, ປາກິສະຖານ, ບັງກະລາເທດ, ອາບການິສະຖານ…
ເລື່ອງຕວກກີຍິງເຮືອບິນສູ້ຮົບ Su 24 ຂອງລັດເຊຍຕົກນັ້ນ ບໍ່ພຽງແຕ່ເຮັດໃຫ້ການພົວພັນລະຫວ່າງ 2 ປະເທດຊົ່ວຮ້າຍໄປເທົ່ານັ້ນ, ຫາກຍັງສ້າງຮົ້ວກີດຂວາງໃນການສູ້ຮົບຕ້ານ IS ກໍຄືບັນດາຄວາມມານະພະຍາຍາມສາກົນ ແນໃສ່ແກ້ໄຂວິກິດການຢູ່ຊີຣີສຳເລັດຜົນ. ໃນສະພາວະປະຈຸບັນ, ໄດ້ສະແດງໃຫ້ເຫັນວ່າ ພຽງແຕ່ເມື່ອບັນດາຝ່າຍພ້ອມກັນປະລະຄວາມບໍ່ລົງລອຍກັນ ແລະ ຮ່ວມສຳພັນກາຍເປັນສຳພັນທະມິດສູ້ຮົບສາກົນຢ່າງໝັ້ນແກ່ນ ຊຶ່ງລວມທັງອາເມລິກາ, ບັນດາປະເທດຝ່າຍຕາເວັນຕົກ, ລັດເຊຍ ແລະ ບັນດາຄູ່ຮ່ວມມືໃນພາກພື້ນ ຈຶ່ງສາມາດສ້າງກຳລັງແຮງເປັນເອກະພາບໃນສຳພັນທະມິດສູ້ຮົບຕ້ານ IS.