ທ່ານ Nicolas Maduro ຜູ້ຮັກສາການ ປະທານາທິບໍດີ
(ພາບ: reuters.com)
ບັ້ນຫາສຽງເລືອກຕັ້ງປະທານາທິບໍດີ ເວເນຊູເອລາ ໄດ້ສິ້ນສຸດລົງໃນວັນທີ 11/4, ເພື່ອກະກຽມໃຫ້ແກ່ ການເລືອກຕັ້ງຢູ່ປະເທດອາເມລິກາລາຕິນນີ້ຢ່າງເປັນ ທາງການໃນວັນທີ 14/4 ທີ່ຈະມາເຖິງ. ມາຮອດຈຸດເວລານີ້, ການແຂ່ງຂັນ ລະຫວ່າງ 2 ຄູ່ແຂ່ງຕົ້ນຕໍ ຄື ທ່ານ Nicolas Maduro ຜູ້ຮັກສາການ ປະທານາທິບໍດີ ແລະ ທ່ານ Henrique Capriles ຜູ້ຕາງໜ້າຄະນະສາມັກຄີປະຊາທິປະໄຕ ພວມກ້າວສູ່ໄລຍະດຸເດືອດ. ການເລືອກເຟັ້ນເອົາຜູ້ທີ່ມີຄວາມສາມາດສືບທອດ , ເສີມຂະຫຍາຍພາລະກິດໂດຍທ່ານ Chavez ປະໄວ້ໃຫ້ນັ້ນ ຫຼື ຜູ້ທີ່ມີແຜນນະໂຍບາຍນຳປະເທດ ເວເນຊູເອລາ ກັບຄືນສູ່ພື້ນຖານເສດຖະກິດການຕະຫຼາດຕາມລັດທິເສລີພາບ, ຈຶ່ງແມ່ນສິ່ງທີ່ຜູ້ມີສິດເລືອກຕັ້ງຂອງປະເທດນີ້ພວມຊັງຊາ.
ໃນຈຸດເວລາທີ່ການເລືອກຕັ້ງພວມຫຍັບມໍ່ເຂົ້າ, ທ່ານ Nicolas Maduro ແລະ ທ່ານ Henrique Capriles ພວມຕຳນິຕິຕຽນກັນຢ່າງຮຸນແຮງ. ໃນຂະນະທີ່ ທ່ານ Nicolas Maduro ໝັ້ນໝາຍຈະປະຕິບັດແຜນການສັງຄົມນິຍົມແຫ່ງຊາດຄັ້ງທີ 2 ໄລຍະ 2013-2019, ສືບທອດຈາກອະດີດປະທານາທິບໍດີ Chavez ນັ້ນ, ທ່ານ Henrique Capriles ໄດ້ລວບລວມບັນດາຄຳໝັ້ນສັນຍາທີ່ຍັງບໍ່ທັນສຳເລັດຜົນຂອງລັດຖະບານໃນສະໄໝ ອະດີດປະທານາທິບໍດີ Chavez, ຕຳນິຕິຕຽນລັດຖະບານປະຈຸບັນມີການກະທຳສໍ້ລາດບັງຫຼວງ ແລະ ເຄື່ອນໄຫວບໍ່ມີປະສິດທິຜົນ, ອັດຕາອາດຊະຍາກຳສູງ ແລະ ຂາດແຄນສິນຄ້າປະເພດທີ່ຈຳເປັນ. ຊ້ຳບໍໜຳ, ທ່ານ Henrique Capriles ຍັງກ່າວຫາທ່ານ Nicolas Maduro ຢ່າງຕໍ່ເນື່ອງວ່າ ໄດ້ປົກປິດຂໍ້ມູນຂ່າວສານກ່ຽວກັບອາການສຸຂະພາບຂອງ ອະດີດປະທານາ ທິບໍດີ Chavez ໃນຈຸດເວລາກະກຽມອອກສະໝັກເລືອກຕັ້ງຂອງຕົນ. ໂດຍຕອບຄືນຕໍ່ຄຳກ່າວຫາ, ທ່ານ Nicolas Maduro ໄດ້ຖືວ່າ ຜູ້ສະໝັກເລືອກຕັ້ງຝ່າຍຄ້ານໄດ້ແຕະຕ້ອງເຖິງກຽດສັກສີຂອງຄອບຄົວອະດີດປະທານາທິບໍດີ Chavez ແລະ ອາດຈະຕ້ອງປະເຊີນໜ້າກັບລະບຽບກົດໝາຍຍ້ອນໄດ້ຕຳນິິຕິຕຽນວິທີການແກ້ໄຂຂອງລັດຖະບານທີ່ມີຕໍ່ອາການສຸຂະພາບ ແລະ ເລື່ອງເຖິງແກ່ມໍລະນະກຳຂອງ
ປະທານາທິບໍດີ Chavez.
ຕາມໝາກຜົນແຫ່ງການຢັ່ງຫາງສຽງຄັ້ງຫຼ້າສຸດ, ທ່ານ Nicolas Maduro ໄດ້ລື່ນກາຍຄູ່ແຂ່ງຢ່າງຂາດຂັ້ນ ດ້ວຍ 61,9% ຈຳນວນຜູ້ຖືກຖາມ ມີຄວາມເຊື່ອໝັ້ນວ່າ ທ່ານ Nicolas Maduro ຈະຮັບໄຊຊະນະໃນການເລືອກຕັ້ງປະທານາທິບໍດີ, ໃນຂະນະທີ່ ມີພຽງ 19,9% ມີຄວາມເຊື່ອໝັ້ນຕໍ່ໄຊະຊະນະຂອງທ່ານ Henrique Capriles. ບັນດານັກໄຈ້ແຍກໃຫ້ຂໍ້ສັງເກດວ່າ ເຖິງວ່າລັດຖະບານຂອງອະດີດປະທານາທິບໍດີ Chavez ຍັງບໍ່ທັນສາມາດແກ້ໄຂຢ່າງເຖິງຖອງກ່ຽວກັບບາງບັນຫາເສດຖະກິດສັງຄົມຄື ສະພາບຄວາມສະຫງົບ ຫຼືອັດຕາເງິນເຟີ້ຢູ່ໃນລະດັບສູງ, ແຕ່ໃນຕະຫຼອດ 14 ປີແຫ່ງການກຳອຳນາດ, ອະດີດປະທານາທິບໍດີ Chavez ໄດ້ສາມາດປົວແປງຊີວິດການເປັນຢູ່ໃຫ້ແກ່ຜູ້ທຸກຍາກຢ່າງມີປະສິດທິຜົນ ແລະ ນີ້ແມ່ນທ່າໄດ້ປຽບຢ່າງໃຫຍ່ຫຼວງຂອງ ທ່ານ Nicolas Maduro ຜູ້ຮັກສາການ ປະທານາທິບໍດີ ໃນ ການເລືອກຕັ້ງຄັ້ງນີ້. ພ້ອມກັນນັ້ນ, ທ່ານ Nicolas Maduro ມີຄວາມຄ່ອງແຄ້ວຍາດເອົາການສະໜັບສະໜູນຂອງຜູ້ມີສິດເລືອກຕັ້ງຢ່າງຫຼວງຫຼາຍ ເມື່ອເລືອກເອົານະຄອນ Sabaneta ທີ່ລັດ Barinas ຊຶ່ງແມ່ນບ້ານເກີດຂອງ ອະດີດປະທານາທິບໍດີ Chavez ເປັນສະຖານທີ່ເລີ່ມດຳເນີນບັ້ນຫາສຽງເລືອກຕັ້ງ. ຍ້ອນ ເຖິງວ່າ ປະທານາທິບໍດີ Chavez ໄດ້ເຖິງແກ່ມໍລະນະກຳແລ້ວກໍຕາມ, ແຕ່ຜົນສະທ້ອນຂອງ ອະດີດປະທານາທິບໍດີ Chavez ທີ່ມີຕໍ່ ທ່ານ Nicolas Maduro ທີ່ ການເລືອກຕັ້ງຄັ້ງນີ້ ແມ່ນຍັງໃຫຍ່ຫຼວງຢູ່. ໃນບັນດາບົດກ່າວປາໄສ, ທ່ານ Nicolas Maduro ຍາມໃດກໍຕັກເຕືອນຜູ້ມີສິດເລືອກຕັ້ງວ່າ ອະດີດປະທານາທິບໍດີ Chavez ນີ້ເອງໄດ້ເລືອກເອົາທ່ານເປັນຜູ້ສືບທອດເພື່ອສືບຕໍ່ປະຕິບັດບັນດານະໂຍບາຍປະຕິຮູບ. ດ້ວຍການກຳນົດເສັ້ນທາງໃນບັ້ນຫາສຽງເລືອກຕັ້ງເຊັ່ນດຽວກັນກັບໄລຍະທາງທີ່ ອະດີດປະທານາທິບໍດີ Chavez ໄດ້ຜ່ານ ໃນ ບັ້ນຫາສຽງເລືອກຕັ້ງ 6 ເດືອນກ່ອນນີ້, ທ່ານ Nicolas Maduro ໃຫ້ຄຳໝັ້ນສັນຍາ ຍູ້ແຮງບັນດາໂຄງການປະຕິຮູບສັງຄົມ, ຍຶດໝັ້ນເດີນຕາມຄຳໝັ້ນສັນຍາຂອງ ອະດີດປະທານາທິບໍດີ Chavez ດ້ວຍການປະຕິບັດ Bolivar ແລະ ລັດທິສັງຄົມນິຍົມຢູ່ ເວເນຊູເອລາ. ໃນຂະນະນັ້ນ, ຜູ້ສະໝັກເລືອກຕັ້ງ ທ່ານ Henrique Capriles, ເຖິງວ່າໄດ້ສະຫງວນເວລາຫຼາຍເພື່ອຊີ້ໃຫ້ເຫັນບັນດາຄວາມອ່ອນດ້ອຍຂອງອຳນາດການປົກຄອງໃຕ້ສະໄໝປະທານາທິບໍດີ Chavez, ແຕ່ທ່ານບໍ່ຍົກອອກບັນດາມາດຕະການ ເພື່ອແກ້ໄຂໄດ້. ຊ້ຳບໍໜຳ ກ່ອນດຳເນີນ ບັ້ນຫາສຽງເລືອກຕັ້ງ, ທ່ານ Henrique Capriles ຍັງລັ່ງເລໃຈເປັນເວລາ 1 ວັນ ເພື່ອຕັດສິນເປັນຜູ້ຕາງໜ້າໃຫ້ຝ່າຍຄ້ານ ອອກສະໝັກເລືອກຕັ້ງ. ນີ້ແມ່ນຈຸດອ່ອນເພື່ອໃຫ້ບັນດາຜູ້ສະໜັບສະໜູນ ທ່ານ Nicolas Maduro ຕິຕຽນວ່າ ຂາດຄວາມຫ້າວຫັນ ແລະ ຂາດຄວາມເຊື່ອໝັ້ນຕົນເອງຕໍ່ຄວາມສາມາດນຳພາປະເທດຊາດ.
ປະຈຸບັນ, ເປັນທີ່ຈະແຈ້ງແລ້ວວ່າ ຜູ້ຮັກສາການ ປະທານາທິບໍດີ ທ່ານ Nicolas Maduro ພວມມີທ່າໄດ້ປຽບຫຼາຍກ່ວາ ແລະ ຍັງອີກພຽງ 3 ວັນເທົ່ານັ້ນ, ທຳນຽບ ປະທານາທິບໍດີ Miraflores ຢູ່ປະເທດອາເມລິກາໃຕ້ນີ້ຈະຕ້ອນຮັບເຈົ້າຂອງທຳນຽບຄົນໃໝ່ຢ່າງເປັນທາງການ. ເຖິງວ່າຜູ້ໃດຂຶ້ນກຳອຳນາດກໍຕາມ, ສິ່ງທີ່ປະຊາຊົນຂອງປະເທດນີ້ຝາກຄວາມຫວັງ ແມ່ນບຸກຄົນນັ້ນ ຕ້ອງມີຄວາມສາມາດເຕົ້າໂຮມ, ສ້າງຄວາມສາມັກຄີທົ່ວປວງຊົນ, ນຳປະເທດ ເວເນຊູເອລາ ສືບຕໍ່ພັດທະນາບົນເສັ້ນທາງແຫ່ງຄວາມອີ່ມໜຳສຳລານ, ວັດທະນາຖາວອນ .