ປະທານາທິບໍດີອາເມລິກາ Barak Obama ໄດ້ຈັບມືທ່ານປະທານກູບາ Raul Castro ທີ່ພິທີໄຫວ້ອາໄລ ທ່ານNelson Mandela ຢູ່ ອາຟະລິກາໃຕ້
(ພາບ : reuters)
|
ປະທານາທິບໍດີອາເມລິກາ Barak Obama ຫາກໍມີກິລີຍາທີ່ບໍ່ເຄີຍມີມາ ຊຶ່ງໄດ້ດຶງດູດຄວາມສົນໃຈເປັນ ພິເສດຈາກປະຊາຄົມໂລກ, ນັ້ນແມ່ນການຈັບມືກັບຜູ້ນຳກູບາ ທ່ານປະທານ Raul Castro ທີ່ພິທີໄຫວ້ອາໄລອະດີດປະທານາທິບໍດີ Nelson Mandela ຢູ່ອາຟະລິກາໃຕ້. ເຖິງວ່າພຽງແຕ່ມີລັກສະນະເປັນສັນຍາລັກກໍຕາມ, ແຕ່ການຈັບມືທີ່ອົບອຸ່ນນີ້ ມີຄວາມໝາຍປະຫວັດສາດ, ບົ່ງບອກເຖິງສັນຍານທີ່ດີໃນສາຍພົວພັນລະຫວ່າງ 2 ປະເທດບ້ານໃກ້ເຮືອນຄຽງທີ່ເປັນປໍລະປັກກັນມາເປັນເວລາກ່ວາເຄິ່ງສະຕະວັດທີ່ຜ່ານມາ.
ວັນທີ 10/12, ທີ່ພິທີໄຫວ້ອາໄລຢ່າງເຄັ່ງຂຶມ, ຕໍ່ໜ້າປະມຸກລັດເກືອບ 100 ທ່ານ, ເມື່ອຂຶ້ນກ່າວຄຳປາໄສຍ້ອງຍໍສັນລະເສີນພາລະກິດ ແລະ ມໍລະດົກຂອງ ອະດີດປະທານາທິບໍດີ ອາຟະລິກາໃຕ້ Nelson Mandela, ບັງເອີນ ປະທານາທິບໍດີອາເມລິກາ Barak Obama ໄດ້ຢຸດເພື່ອຈັບມື ທ່ານປະທານກູບາ Raul Castro. ເພື່ອເປັນການຕອບຄືນ, ທ່ານປະທານ Raul Castro ກໍຍິ້ມຫົວ ແລະ ຈັບມືປະທານາທິບໍດີອາເມລິກາ Barak Obama. ກິລີຍາດັ່ງກ່າວຂອງການນຳ 2 ປະເທດທີ່ເຄີຍເປັນປໍລະປັກກັນ ໄດ້ເຮັດໃຫ້ຫາງສຽງສາກົນມີຄວາມຕົກສະເງີ້ທີ່ສຸູດ. ນີ້ແມ່ນ ການຈັບມືປະຫວັດສາດຄັ້ງທີ່ 2 ລະຫວ່າງການນຳ 2 ປະເທດ ນັບຕັ້ງແຕ່ການປະຕິວັດກູບາໄດ້ດຳເນີນໃນປີ 1960.
ສັນຍານທີ່ດີຕໍ່ການພົວພັນ
ບັນດາຄຳຖະແຫຼງເປັນປໍລະປັກ ແມ່ນສິ່ງທີ່ລຶ້ງເຄີຍຂອງສາຍພົວພັນລະຫວ່າງ 2 ປະເທດບ້ານໃກ້ເຮືອນຄຽງຊຶ່ງຕັ້ງຢູ່ຫ່າງຈາກກັນທາງທະເລພຽງ 140 ກິໂລແມດ. ນັບຕັ້ງແຕ່ປີ 1961, ອາເມລິກາໄດ້ຈັດວາງບັນດານະໂຍບາຍປິດລ້ອມຂວ້ຳບາດຢ່າງເຄັ່ງຄັດທີ່ມີຕໍ່ກູບາ. ຕາມການປະເມີນແລ້ວ, ນະໂຍບາຍປິດລ້ອມຂວ້ຳບາດໄດ້ເຮັດໃຫ້ພື້ນຖານເສດຖະກິດຂອງ ລາຮາວານ ເສຍຫາຍເປັນຈຳນວນເງິນກ່ວາ 1.100 ຕື້ USD. ການປິດລ້ອມຂວ້ຳບາດຍັງເຮັດໃຫ້ຊາວກູບາ, ພິເສດແມ່ນເດັກນ້ອຍ ບໍ່ມີເງື່ອນໄຂໄດ້ຊົມໃຊ້ບັນດາການບໍລິການດ້ານການແພດເພື່ອປິ່ນປົວພະຍາດ.
ແຕ່ໃນໄລຍະມໍ່ໆມານີ້, ກໍສາມາດສັງເກດເຫັນໄດ້ຢ່າງງ່າຍດາຍວ່າ ທັງ 2 ຝ່າຍພວມສະແດງທ່າທີຫຍັບມໍ່ເຂົ້າກັນແບບບໍ່ເປີດເຜີຍ. ປະກົດການລະອຽດທີ່ສຸດ ແມ່ນວິທີການປະພຶດທີ່ຄ່ອງແຄ້ວ ແລະ ລະມັດລະວັງຕໍ່ໜ້າຄວາມສັບສົນຂອງຄູ່ແຂ່ງ. ໃນຂະນະທີ່ຄວາມເຄັ່ງຕຶງທາງການທູດໄດ້ລະເບີດຂຶ້ນລະຫວ່າງອາເມລິກາ ແລະ ບາງປະເທດອື່ນທີ່ກ່ຽວຂ້ອງເຖິງບັນຫາໃຫ້ລີ້ໄພແກ່ Edward Snowden, ຜູ້ໄດ້ເປີດເຜີຍບັນດາຂໍ້ມູນຂ່າວສານລັບຂອງອົງການປ້ອງກັນຄວາມສະຫງົບແຫ່ງຊາດອາເມລິການັ້ນ, ກູບາໄດ້ປະຕິເສດ, ບໍ່ອະນຸຍາດໃຫ້ບຸກຄົນນີ້ເຂົ້າໄປລີ້ໄພຢູ່ກູບາ. ຕໍ່ຈາກນັ້ນ, ອາເມລິກາ ແລະ ກູບາ ກໍໄດ້ເລືອກເອົາມາດຕະການມິດງຽບເພື່ອແກ້ໄຂກໍລະນີກຳປັ່ນບັນທຸກອາວຸດຂອງ ສ.ປ.ປ.ເກົາຫຼີ ແລ່່ນຜ່ານ Panama ຊຶ່ງໄດ້ລະເມີດບັນດາມາດຕະການລົງໂທດຂອງສະຫະປະຊາຊາດ. ສິ່ງນີ້ແມ່ນກົງກັນຂ້າມກັບອະດີດຕະການເມືອ່ເກີດມີກໍລະນີຄ້າຍຄືກັນ.
ບັນດາບາດກ້າວເດີນທຳອິດ : ຈາກຄູ່ຕໍ່ສູ້ຫັນມາເປັນຄູ່ຮ່ວມມື
ທີ່ຈິງແລ້ວ, ນັບຕັ້ງແຕ່ເວລາຂຶ້ນກຳອຳນາດ, ປະທານາທິບໍດີອາເມລິກາ Barak Obama ໄດ້ໝັ້ນໝາຍສົນທະນາກັບທຸກໆປະເທດທີ່ເປັນຄູ່ຕໍ່ສູ້. ປະທານາທິບໍດີອາເມລິກາ Barak Obama ໄດ້ມີການປັບປຸ່ງຫຼາຍຢ່າງເພື່ອເຮັດໃຫ້ຄວາມເຄັ່ງຕຶງກັບລາຮາວານ ຜ່ອນຄາຍລົງຄື : ຍົກເລີກການຈຳກັດຈຳນວນເງິນຝາກ ແລະ ຈຳນວນການເດີນທາງກັບຄືນຢ້ຽມຢາມບ້ານເກີດເມືອງນອນຂອງຊາວກູບາຕ່າງດ້າວ, ອະນຸຍາດໃຫ້ເຊື່ອມຕໍ່ການເຈລະຈາກ່ຽວກັບການບໍລິການໄປສະນີ ແລະ ອົບພະຍົບ. ຕົ້ນປີນີ້,ອາເມລິກາໄດ້ອະນຸຍາດໃຫ້ນັກສືບລາຊະການລັບຂອງ ກູບາ ຖືກ ຕັດສິນລົງໂທດ ໄດ້ກັບຄືນປະເທດ. ອາເມລິກາກໍໄດ້ຊົມເຊີຍບົດບາດຂອງກູບາໃນການຈັດຕັ້ງການເຈລະຈາລະຫວ່າງກຳລັງປະກອບອາວຸດປະຕິວັດ ໂກລົມໂບ ກັບອຳນາດການປົກຄອງ ໂກລົມໂບ. ຍ້ອນເຫດນີ້ເອງ, ໄດ້ພາໃຫ້ມີຂ່່າວລືທີ່ວ່າ ວໍຊິງຕັນ ອາດຈະລົບຊື ກູບາອອກຈາກບັນຊີລາຊື່ບັນດາປະເທດຊ່ວຍເຫຼືອແກ່ພວກກໍ່ການຮ້າຍ. ແລະ ໃນມໍ່ໆມານີ້ ຄືໃນເດືອນ 10/2013, ພາຍຫຼັງທີ່ມີ 188/193 ປະເທດສະມາຊິກ ສ.ປ.ຊ ໄດ້ປ່ອນບັດຮັບຮອງເອົາມະຕິກ່າວປະນາມຄຳສັ່ງປິດລ້ອມຂວ້ຳບາດໂດຍອາເມລິກາໄດ້ຈັດວາງຕ້ານ ກູບາ ໃນຕະຫຼອດກ່ວາ 5 ທົດສະວັດທີ່ຜ່ານມາ, ປະທານາທິບໍດີອາເມລິກາ Barak Obama ກໍໄດ້ຖະແຫຼງວ່າ ອາເມລິກາຈະປ່ຽນແປງ ນະໂຍບາຍທີ່ມີຕໍ່ ກູບາ.
ນັບຕັ້ງແຕ່ຂຶ້ນກຳອຳນາດ ແທນໃຫ້ອ້າຍຄີງຂອງຕົນແມ່ນ ປະທານ Fidel Csstro ເມື່ອປີ 2008 ເປັນມາ, ທ່ານປະທານກູບາ Raul Castro ໄດ້ຮັບຄວາມໄວ້ເນື້ອເຊື່ອໃຈຢ່າງຫຼວງຫຼາຍດ້ວຍ ຂີດໝາຍແມ່ນການນຳປະຕິຮູບ. ວິວັດທະນາການປະຕິຮູບໄດ້ຮັບການຊຸກຍູ້ໃຫ້ແຂງແຮງຈາກທ່ານປະທານ Raul Castro ໃນຊຸມປີມໍ່ໆມານີ້. ກິດຈະການປະຕິຮູບເສດຖະກິດໄດ້ຮັບຖືວ່າ ແມ່ນຈະບໍ່ພຽງແຕ່ສ້າງພະລັງຊີວິດໃໝ່, ນຳແງ່ຫວັງທີ່ດີມາສູ່ພື້ນຖານເສດຖະກິດກູບາເທົ່ານັ້ນ, ຫາກຍັງເປີດກາລະໂອກາດໃໝ່ໃນການພົວພັນດ້ານເສດຖະກິດກັບສາກົນອີກ ດ້ວຍ.
ແຕ່ປະຈຸບັນ, ຍັງບໍ່ທັນສາມາດສະຫຼຸບວ່າ ກິລີຍາທີ່ສະໜິດສະໜົມລະຫວ່າງປະທານາທິບໍດີອາເມລິກາ Barak Obama ແລະ ທ່ານປະທານກູບາ Raul Castro ຈະເຮັດໃຫ້ຄວາມເປັນປໍລະປັກໃນການພົວພັນລະຫວ່າງອາເມລິກາ ແລະ ກູບາຜ່ອນຄາຍລົງຫຼືບໍ່?. ແຕ່ໃນສະພາບການປຸຈຸບັນ, ຂະນະທີ່ປະທານາທິບໍດີອາເມລິກາ Barak Obama ເອງ ກໍພວມຖືກຮັບກຳລັງດັນ ແລະ ການຕຳໜິຕິຕຽນຫຼາຍຢ່າງ ເມື່ອຊອກຫາບາດກ້າວບຸກທະລຸໃນການພົວພັນກັບ ອີຣານນັ້ນ, ນະໂຍບາຍປົວແປງການພົວພັນກັບ ກູບາ ອາດຈະຖືກຢຸດຢູ່ໃນບັນດາບາດກ້າວເດີນທຳອິດຄືໃນປະຈຸບັນ ແລະ ປະທານາທິບໍດີອາເມລິກາ Barak Obama ອາດຈະຕ້ອງປະເຊີນໜ້າກັບການຄັດຄ້ານຈາກສະພາແຫ່ງຊາດອາເມລິກາ ຊຶ່ງແມ່ນບ່ອນທີ່ບັນດາສະມາຊິກສະພາສູງ ສັງກັດພັກປະຊາທິປະໄຕ ເດັດດຽວຮັກສາທັດສະນະໂດຍຖືວ່າ ອາເມລິກາຄວນສ້າງການພົວພັນໂດຍຈຳກັດກັບກູບາ. ແຜນການທີ່ເປັນຂີດໝາຍສະເພາະໃນອາຍຸການຂອງຕົນ ແມ່ນ ຈາກຄູ່ຕໍ່ສູ້ຫັນມາເປັນຄູ່ຮ່ວມມືຂອງ ປະທານາທິບໍດີອາເມລິກາ Barak Obama ອາດຈະບໍ່ປະສົບຜົນສຳເລັດ .