(vovworld)- ໃນເວລາກວ່າ 1 ເດືອນຜ່ານມາ ນັບແຕ່ເມື່ອສານອະນຸຍາໂຕຕຸລາການ ຂອງ ສປຊ (PCA ໄດ້ອອກຄຳຕັດສິນກ່ຽວກັບເລື່ອງ ຟິລີບປີນ ຮ້ອງຟ້ອງຈີນ ກ່ຽວຂ້ອງເຖິງການອະທິບາຍ ແລະ ນຳໃຊ້ ສົນທິສັນຍາ ສປຊ ກ່ຽວກັບກົດໝາຍວ່າດ້ວຍທະເລປີ 1982, ສິ່ງທີ່ຫາງສຽງມີຄວາມສົນໃຈນັ້ນແມ່ນ ຄວາມສາມາດຫັນຄຳຕັດສິນ ຂອງສານອະນຸຍາໂຕຕຸລາການໃຫ້ປະກົດຜົນເປັນຈິງ. ເຖິງວ່າ ໄລຍະປະຕິບັດຄຳຕັດສິນຂອງສານ PCA ຍັງແມ່ນໄລຍະຍາວ, ຫຍຸ້ງຍາກ ແຕ່ຫາງສຽງສາກົນ ລ້ວນແຕ່ເຫັນດີໂດຍຖືວ່າ PCA ແມ່ນເຄື່ອງມືດ້ານນິຕິທຳ ຊ່ວຍແກ້ໄຂບັນດາບັນຫາພຶດຕິກຳຕົວຈິງຢູ່ທະເລຕາເວັນອອກໃນໄລຍະຈະມາເຖິງ.
ສານອະນຸຍາໂຕຕຸລາການ
ພາບ:baomoi.com
|
ກ່ອນອື່ນ ອາດຈະຢັ້ງຢືນວ່າ ວິວັດການດຳເນີນຄະດີຮ້ອງຟ້ອງ ແລະ ໂຕ້ແຍ້ງໃນສານບແຕ່ປີ 2013 ເມື່ອຟິລີບປີນ ໄດ້ສົ່ງສຳນວນຄະດີຂຶ້ນ ສານອະນຸຍາໂຕຕຸລາການ ແມ່ນສອດຄ່ອງກັບບັນດາການກຳນົດຂອງສົນທິສັນຍາ ຂອງ ສປຊ ກ່ຽວກັບ ກົດໝາຍວ່າດ້ວຍທະເລ ເມື່ອປີ 1982 (UNCLOS 1982). ຕາມນັ້ນແລ້ວ, ຄຸນຄ່າດ້ານນິຕິທຳຂອງ PCA ໄດ້ຮັບການຮັບຮູ້ຈາກປະຊາຄົມສາກົນ, ມີລັກສະນະຜູກຮັດສຳລັບບັນດາຄູ່ຄວາມໂດຍກົງຂອງຄະດີຮ້ອງຟ້ອງ, ເຖິງວ່າມີພຽງຝ່າຍດຽວປະຕິເສດການເຂົ້າຮ່ວມຄະດີຮອ້ງຟ້ອງ.
ຄວາມມານະພະຍາຍາມຊອກຫາມາດຕະການສັນຕິ
ເລື່ອງຟິລີບປີນ ຮ້ອງຟ້ອງຈີນ ບໍ່ແມ່ນການກະທຳເຮັດໃຫ້ສະພາບການສັບສົນເທົ່ານັ້ນ ຫາກໄດ້ຮັບຖືວ່າແມ່ນຄວາມມານະພະຍາຍາມຊອກຫາມາດຕະການແຫ້ໄຂການຂັດແຍ້ງຜ່ານການເຈລະຈາ ດ້ວຍຈິດໃຈສັນຕິພາບ, ບໍ່ນຳໃຊ້ ແລະ ນາບຂູ່ການນຳໃຊ້ອາວຸດໃນການແກ້ໄຂບັນດາການຂັດແຍ້ງສາກົນ. ຄະດີຮ້ອງຟ້ອງ ໄດ້ປະກອບສ່ວນເຊີດຊູຄຸນຄ່າ ແລະ ຄວາມໝາຍຂອງສາກົນ ແລະ ປະສິດທິຜົນຂອງຄະດີຮ້ອງຟ້ອງຈະເປັນການພິສູດໃຫ້ເຫັນຄວາມມານະພະຍາຍາມຂອງປະຊາຄົມສາກົນ ແລະພາກພື້ນ. ເມື່ອຕັດສິນໃຈພ້ອມກັນປຶກສາຫາລື ແລະ ເອກະພາບ ເພື່ອປະກາດໃຊ້ລະບົບມາດຖານສາກົນ, ບັນດາຝ່າຍລ້ວນແຕ່ມີພັນທະຕ້ອງປັບປຸງການກະທຳຂອງຕົນໃນບັນດາບັນຫາກ່ຽວຂ້ອງເຖິງການຂີດຂັ້ນເຂດນ່ານທະເລ.
ນີ້ເປັນຄັ້ງທຳອິດ, ຄຳຕັດສິນຂອງອົງການຈັດຕັ້ງສາກົນມີສິດອຳນາດກ່ຽວຂ້ອງເຖິງການຂັດແຍ້ງຢູ່ທະເລຕາເວັນອອກໄດ້ຍົກອອກມາ. ຄຳຕັດສິນຂອງສານອະນຸຍາໂຕຕຸລາການ ໄດ້ສ້າງຄວາມເຂົ້າໃຈລວມກ່ຽວກັບບັນດາມາດຕາຍັງບໍ່ທັນລະອຽດ, ບໍ່ທັນຈະແຈ້ງຂອງສົນທິສັນຍາຂອງ ສປຊ ກ່ຽວກັບກົດໝາຍວ່າດ້ວຍທະເລປີ 1982 ຊື່ງບັນດາຝ່າຍໃນຄະດີຮ້ອງຟ້ອງທີ່ມີສ່ວນກ່ຽວຂ້ອງ, ໄດ້ແກ້ຄວາມ ແລະ ຍົກອອກການສະຫລຸບກ່ຽວກັບບັນດາໂຄງສ້າງຢູ່ໝູ່ເກາະ ເຈື່ອງຊາ. ເພາະວ່າ ເມື່ອບັນດາມາດຕາໄດ້ຮັບການອະທິບາຍຢ່າງຈະແຈ້ງ ນັ້ນແມ່ນບັນດາພະຍານຫລັກຖານດ້ານນິຕິທຳເພື່ອສາມາດນຳໃຊ້ເຂົ້າໃນບັນດາກໍລະນີອື່ນທີ່ຄ້າຍຄືກັນ, ຈາກນັ້ນບັນດາຝ່າຍດັດປັບການກະທຳຂອງຕົນ.
ຄວາມເປັນໄປໄດ້ຂອງ PCA
ຕາມການໄຈ້ແຍກຂອງບັນດາຜູ້ຊ່ຽວຊານແລ້ວ, PCA ມີພື້ນຖານຢ່າງຄົບຖ້ວນເພື່ອເຂົ້າສູ່ພຶດຕິກຳຕົວຈິງ. ທີຫນຶ່ງ PCA ເຄື່ອນໄຫວຕາມສົນທິສັນຍາ ສປຊ ກ່ຽວກັບກົດໝາຍວ່າດ້ວຍທະເລ (UNCLOS). ຄຳຕັດສິນຂອງສານອະນຸຍາໂຕຕຸລາການມີລັກສະນະວິຊາສະເພາະ ແລະ ຕ້ອງໄດ້ຮັບການເຄົາລົບ. ສານບໍ່ຕັດສິນການຂັດແຍ້ງຜືນແຜ່ນດິນ ແຕ່ກຳນົດລັກສະນະຖືກຕ້ອງກັບກົດໝາຍຂອງການກະທຳ ແລະ ບາງກໍລະນີຢັ້ງຢືນອະທິປະໄຕຜືນແຜ່ນດິນຂອງບັນດາປະເທດແຄມທະເລທີ່ແຕກຕ່າງກັນ. ທີສອງ, ດ້ວຍຖານະແມ່ນປະເທດສະມາຊິກຂອງ UNCLOS 1982, ທັງຈີນ, ຟີລີບປີນ ແລະ ບັນດາປະເທດກ່ຽວຂ້ອງລ້ວນແຕ່ມີພັນທະຕ້ອງເຄົາລົບບັນດາຄຳຕັດສິນຂອງ PCA. ປະເທດດຽວບໍ່ສາມາດຮັກສາສັນຕິພາບ, ສະຖຽນລະພາບຢູ່ພາກພື້ນໄດ້ ເມື່ອປະຕິເສດບັນດາມາດຕາຊື່ງຕົນເອງໄດ້ໃຫ້ສັດຕະຍາບັນ. ສຸດທ້າຍ ດ້ວຍບົດບາດແມ່ນປະເທດໃຫຍ່ໃນພາກພື້ນ, ໃນຫລາຍປີຜ່ານມາ ຈີນ ຍາມໃດກໍມານະພະຍາຍາມໂຄສະນາກ່ຽວກັບທິດສະດີ “ພັດທະນາສັນຕິພາບ”. ເພາະສະນັ້ນ ບໍ່ມີສາຍເຫດໃດ ຈີນພັດໄປຝືນກັບແນວທາງ ຊື່ງໃນຫລາຍອາຍຸການການນຳປະເທດນີ້ໄດ້ຕັດສິນໃຈເດີນຕາມ.
ຄວາມຈິງມາຮອດປະຈຸບັນ, ໃນເວລາກວ່າຫນຶ່ງເດືອນ ນັບແຕ່ເມື່ອ ສານອະນຸຍາໂຕຕຸລາການ ປະກາດຄຳຕັດສິນສຸດທ້າຍກ່ຽວກັບຄະດີຮ້ອງຟ້ອງ, ນອກຈາກບັນດາຄຳຖະແຫລງຢ່າງແຮງທີ່ຢ້ຳຄືນ ຄຳຕັດສິນຂອງສານແມ່ນ “ບໍ່ມີຄຸນຄ່າ ແລະ ບໍ່ມີຜົນສັກສິດ”, ວົງການນັກໄຈ້ແຍກຖືວ່າ ປັກກີ່ງ ນອກເຫນືອຄຳຖະແຫລງດັ່ງກ່າວ ບໍ່ມີຄຳຖະແຫລງໃດຕື່ມອີກ. 2 ປີກ່ອນນີ້ ປະຊາຄົມສາກົນ ເຄີຍໄດ້ເຫັນບັນດາການປ່ຽນແປງໃນການກະທຳຂອງປັກກີ່ງ ຢູ່ ທະເລຕາເວັນອອກ ຈາກກໍລະນີດຳເນີນການຂຸດເຈາະນ້ຳມັນຢູ່ເຂດອ້ອມແອ້ມ ໝູ່ເກາະ ຮ່ວາງຊາ ຊື່ງຫວຽດນາມ ກໍຖະແຫລງປະກາດອະທິປະໄຕ. ການກະທຳຂອງຈີນ ຖືກຫາງສຽງຄັດຄ້ານຢ່າງແຮງ, ໄດ້ສົ່ງຜົນສະທ້ອນເຖິງການພົວພັນໃນພາກພື້ນຂອງປະເທດນີ້ ໄດ້ເຮັດໃຫ້ຈີນ ມີຄວາມລະມັດລະວັງກວ່າ. ນັບແຕ່ນັ້ນມາຮອດປະຈຸບັນ, ບໍ່ມີກໍລະນີໃດຄ້າຍຄືກັນໃນເຂດເສດຖະກິດຈຳເພາະ ຊື່ງບັນດາປະເທດກ່ຽວຂ້ອງໃນພາກພື້ນຖະແຫລງປະກາດອະທິປະໄຕ.
PCA ເປີດກາລະໂອກາດເຈລະຈາ
ໃນທຸກກໍລະນີ, ການເຈລະຈາຍັງຄົງແມ່ນຂໍ້ກຸນແຈຊ່ວຍແກ້ໄຂຄວາມເຄັ່ງຕຶງ. ໂດຍຮັບຮູ້ໄດ້ສິ່ງດັ່ງກ່າວ ໃນຄວາມຈິງ ຫວ່າງແລ້ວນີ້ ທັງຟີລີບຟີນ ແລະ ຈີນ ລ້ວນແຕ່ພວມສະແດງເຈດຕະນາດີປາດຖະຫນາພ້ອມແລ້ວເຈລະຈາ ພາຍຫລັງຄຳຕັດສິນຂອງສານ PCA. ໃນບົດກ່າວປາໄສທີ່ພິທີສາບານຕົວຮັບດຳລົງຕຳແຫນ່ງ, ປະທານາທິບໍດີ ຟີລີບປີນ Rodrigo Duterte ສະແດງຄວາມຫວັງ ອາດຈະຫລຸດຜ່ອນຄວາມເຄັ່ງຕຶງໃນການຂັດແຍ້ງກັບຈີນ ຢູ່ ທະເລຕາເວັນອອກ. ທີ່ການພົບປະຫວ່າງແລ້ວນີ້ ລະຫວ່າງນັການທູດຂອງ ມານີລາ ແລະ ປັກກີ່ງ ນັ້ນແມ່ນ ອະດີດປະທານາທິບໍດີ ຟິລີບປີນ Ramos ແລະ ອະດີດຮອງລັດຖະມົນຕີການຕ່າງປະເທດຈີນຟູຢິງ , ສອງຝ່າຍລ້ວນແຕ່ບໍ່ເຕື້ອງເຖິງບັນຫາອະທິປະໄຕສຳລັບຫລາຍເຂດທີ່ພວມຂັດແຍ້ງຢູ່ທະເລຕາເວັນອອກ ແລະ ເນັ້ນຫນັກວ່າ ບັນດາການປຶກສາຫາລືບໍ່ເປັນທາງການ ໄດ້ສຸມໃສ່ເຂົ້າໃນຄວາມຕ້ອງການການເຈລະຈາທີ່ສ້າງຄວາມໄວ້ເນື້ອເຊື່ອໃຈ ແລະ ຫລຸດຜ່ອນຄວາມເຄັ່ງຕຶງ ເພື່ອເປີດຊ່ອງທາງໃຫ້ແກ່ການຮ່ວມມືເວົ້າລວມ.
ຕາມບັນດານັກໄຈ້ແຍກແລ້ວ, ພາຍຫລັງ ຄຳຕັດສິນຂອງສານອະນຸຍາໂຕຕຸລາການ ກ່ຽວກັບບັນຫາທະເລຕາເວັນອອກ, ບໍ່ຄວນເຊື່ອໝັ້ນວ່າ ສະພາບການໃນພາກພື້ນ ຈະມີຄວາມສະຖຽນລະພາບ . ເຖິງຢ່າງໃດກໍຕາມ ຄຳຕັດສິນຂອງສານອະນຸຍາໂຕຕຸລາການ ແນ່ນອນວ່າ ໄດ້ສ້າງກາລະໂອກາດເພື່ອໃຫ້ບັນດາຝ່າຍປຶກສາຫາລືນຳກັນ, ຫລຸດຜ່ອນຄວາມເຄັ່ງຕຶງ. PCA ສາມາດຊ່ວຍບັນດາຝ່າຍດັດປັບການກະທຳ, ບໍ່ມີການກະທຳຕາມລຳພັງຝ່າຍດຽວ ໂດຍບໍ່ຫົວຊາຕໍ່ກົດໝາຍສາກົນ.