(vovworld) – ວັນທີ 19/12 ກ່ອນນີ້ 70 ປີ, ປະທານ ໂຮ່ຈີມິນ ໄດ້ອອກຄຳຮຽກຮ້ອງທົ່ວປະເທດທຳການຕໍ່ຕ້ານ. ເນື່ອງໃນໂອກາດສະເຫຼີມສະຫຼອງເຫດການສຳຄັນຍິ່ງນີ້ຄົບຮອບ 70 ປີ, ທ່ານປະທານປະເທດ ເຈີ່ນດ້າຍກວາງ ມີບົດຂຽນ: “ເສີມຂະຫຍາຍນ້ຳໃຈທົ່ວປະເທດທຳການຕໍ່ຕ້ານ, ຍູ້ແຮງພາລະກິດຫັນປະເທດຊາດເປັນປະເທດອຸດສາຫະກຳ ແລະ ທັນສະໄໝ, ປົກປັກຮັກສາປະເທດ ຫວຽດນາມ ສັງຄົມນິຍົມຢ່າງໝັ້ນຄົງ”. ບົດຂຽນຢັ້ງຢືນວ່າ ມາຮອດປະຈຸບັນບົດຮຽນກ່ຽວກັບການເສີມຂະຫຍາຍກຳລັງແຮງທົ່ວປະເທດທຳການຕໍ່ຕ້ານ, ທົ່ວປວງຊົນທຳການຕໍ່ຕ້ານຢ່າງຮອບດ້ານ ຍັງຮັກສາຄຸນຄ່າເດີມໄວ້ຄືເກົ່າ. ວິທະຍຸກະຈາຍສຽງ ຫວຽດນາມ ຂໍຄັດສະເໜີເນື້ອໃນຕົ້ນຕໍບົດຂຽນຂອງທ່ານປະທານປະເທດ ເຈີ່ນດ້າຍກວາງ.
ພາບປະກອບ ທ່ານປະທານປະເທດ ເຈີ່ນດ້າຍກວາງ
|
ພາຍຫຼັງການປະຕິວັດເດືອນສິງຫາ (ປີ 1945) ປະສົບຜົນສຳເລັດ, ປະເທດ ສາທາລະນະລັດ ປະຊາທິປະໄຕ ຫວຽດນາມ ຫາກໍ່ໄດ້ຮັບການກຳເນີດ ຕ້ອງປະເຊີນໜ້າກັບ “ສັດຕູທັງພາຍໃນ ແລະ ພາຍນອກ”, ໄພອຶດຫິວນັ້ນ. ດ້ວຍກົນອຸບາຍຮຸກຮານຢ່າງໂຫດຮ້າຍສາມານ ຫວຽດນາມ ອີກເທື່ອໜຶ່ງ, ພວກລ່າເມືອງຂຶ້ນ ຝຣັ່ງ ໄດ້ເຂົ້າມາ, ອັນໄດ້ບັງຄັບໃຫ້ປະຊາຊົນ ຫວຽດນາມ ຕ້ອງຈັບປືນປົກປັກຮັກສາປະເທດຊາດ. ຄ່ຳຄືນວັນທີ 19/12/1946, ຂະບວນການຕໍ່ຕ້ານໃນທົ່ວປະເທດໄດ້ລະເບີດ. ປະທານ ໂຮ່ຈີມິນ ໄດ້ອອກຄຳຮຽກຮ້ອງທົ່ວປະເທດທຳການຕໍ່ຕ້ານ, ຊຸກຍູ້ໃຫ້ທົ່ວປວງຊົນລຸກຂຶ້ນກູ້ຊາດ. ນີ້ແມ່ນທິດທາງຍຸດທະສາດສຳລັບທົ່ວປວງຊົນນັບແຕ່ເມື່ອເລີ່ມຕົ້ນການຕໍ່ຕ້ານຕ້ານພວກລ່າເມືອງຂຶ້ນ ຝຣັ່ງ ມາຮຸກຮານ.
ຄຳຮຽກຮ້ອງກູ້ຊາດ
ຄຳຮຽກຮ້ອງທົ່ວປະເທດທຳການຕໍ່ຕ້ານຂອງປະທານ ໂຮ່ຈີມິນ ໄດ້ຊີ້ແຈ້ງວ່າ: “ພວກເຮົາຢາກມີສັນຕິພາບ, ພວກເຮົາຕ້ອງຜ່ອນສັ້ນຜ່ອນຍາວ. ແຕ່ເມື່ອພວກເຮົາຍິ່ງຜ່ອນສັ້ນຜ່ອນຍາວເທົ່ານັ້ນ, ພວກລ່າເມືອງຂຶ້ນຍິ່ງບຽບຍືນເທົ່ານັ້ນຍ້ອນ ພວກມັນຕັດສິນໃຈຢຶດຄອງປະເທດເຮົາອີກຄັ້ງໜຶ່ງ! ບໍ່! ພວກເຮົາຍອມເສຍສະຫຼະທັງໝົດ, ຫາກບໍ່ຍອມເສຍປະເທດ, ບໍ່ຍອມເປັນຂ້ອຍຢ່າງເດັດຂາດ. ໃຜມີປືນແມ່ນໃຊ້ປືນ, ໃຜມີດາບແມ່ນໃຊ້ດາບ, ບໍ່ມີດາບ ກໍ່ໃຊ້ວົກ, ໃຊ້ສຽມ, ໃຊ້ໄມ້ຄ້ອນ. ໃຜໆກໍ່ຕ້ອງອອກແຮງຕ້ານພວກລ່າເມືອງຂຶ້ນ ຝຣັ່ງ ເພື່ອກູ້ຊາດ.”
ຕາມທ່ານປະທານປະເທດ ເຈີ່ນດ້າຍກວາງ ແລ້ວ, ຄຳຮຽກຮ້ອງທົ່ວປະເທດທຳການຕໍ່ຕ້ານຂອງປະທານ ໂຮ່ຈີມິນ ແມ່ນສຽງຂອງບ້ານເກີດເມືອງນອນປະເທດຊາດ, ແມ່ນຄຳຮຽກຮ້ອງກູ້ຊາດ, ປຸກລຸກນ້ຳໃຈເອກອ້າງທະນົງໃຈຂອງຊາດແມ່ນ, ມູນເຊື້ອວິລະຊົນ, ອົງອາດກ້າຫານ ບໍ່ຍອມຈຳນົນຂອງປະຊາຊົນ ຫວຽດນາມ, ກະຕຸກຊຸກຍູ້ໃຫ້ທົ່ວປະເທດລຸກຂຶ້ນທຳການຕໍ່ສູ້, ເພື່ອເອກະລາດ, ເສລີພາບທີ່ສັກກະລະບູຊາຂອງປະເທດຊາດ. ເພື່ອຕອບສະໜອງຄຳຮຽກຮ້ອງນີ້, ກອງທັບ ແລະ ປະຊາຊົນໃນທົ່ວປະເທດໄດ້ພ້ອມກັນລຸກຂຶ້ນດຳເນີນການຕໍ່ຕ້ານຕ້ານພວກລ່າເມືອງຂຶ້ນ ຝຣັ່ງ ຜູ້ຮຸກຮານ, ເປີດສາກແມ່ນການຕໍ່ສູ້ຂອງກອງທັບ ແລະ ປະຊາຊົນນະຄອນຫຼວງ ຮ່າໂນ້ຍ. ຈາກນັ້ນ ໄດ້ແຜ່ຂະຫຍາຍອອກສູ່ທ້ອງຖິ່ນຕ່າງໆໃນທົ່ວປະເທດ. ພາຍຫຼັງການຕໍ່ສູ້ຢ່າງອົງອາດກ້າຫານມາເປັນເວລາ 9 ປີ, ກອງທັບ ແລະ ປະຊາຊົນ ຫວຽດນາມ ໄດ້ຕີເອົາໄຊຊະນະພວກລ່າເມືອງຂຶ້ນຝຮັ່ງ ແລະ ການແຊກແຊງຂອງ ອາເມລິກາ ເຊິ່ງຈຸດສູງສຸດແມ່ນໄຊຊະນະ ດ້ຽນບຽນຝູ ປະຫວັດສາດ “ໂດ່ງດັງໄປທົ່ວ 5 ທະວີບ, ສັ່ນສະເທືອນໃນທົ່ວໂລກ”. ໄຊຊະນະຂອງການຕໍ່ຕ້ານຕ້ານລ່າເມືອງຂຶ້ນ ຝຣັ່ງ ມາຮຸກຮານ ແລະ ການແຊກແຊງຂອງ ອາເມລິກາ ແມ່ນມີຄວາມໝາຍປະຫວັດສາດອັນຍິ່ງໃຫຍ່, ບັງຄັບໃຫ້ພວກລ່າເມືອງຂຶ້ນ ຝຣັ່ງ ຕ້ອງຮັບຮອງເອກະລາດ, ອະທິປະໄຕ, ຜືນແຜ່ນດິນອັນຄົບຖ້ວນຂອງ ຫວຽດນາມ.
ບົດຂຽນໄດ້ຢັ້ງຢືນສາຍເຫດພື້ນຖານ, ຕັດສິນໃຈໄຊຊະນະແມ່ນແນວທາງນະໂຍບາຍການປະຕິວັດ, ແນວທາງສົງຄາມປະຊາຊົນເອກະລາດ, ເປັນເຈົ້າຕົນເອງ, ຖືກຕ້ອງ, ມີຫົວຄິດປະດິດສ້າງ ແລະ ມີການຊີ້ນຳ, ນຳພາທີ່ສະຫຼາດສ່ອງໄສ, ມີຄວາມປິຊາສາມາດຂອງພັກກອມມູນິດ ຫວຽດນາມ, ເຊິ່ງນຳໜ້າແມ່ນປະທານ ໂຮ່ຈີມິນ. ນັ້ນແມ່ນໄຊຊະນະຂອງກຳລັງແຮງຕໍ່ຕ້ານທົ່ວປວງຊົນ, ຮອບດ້ານ, ທົ່ວປະເທດເປັນຈິດໜຶ່ງໃຈດຽວ, ທົ່ວປວງຊົນຕີສັດຕູ, ແມ່ນພູມປັນຍາ ແລະ ຄຸນນະທາດຂອງຊາວ ຫວຽດນາມ, ກຳລັງແຮງຂອງແນວໜ້າ ແລະ ແນວຫຼັງ, ວັດຖຸ ແລະ ຈິດໃຈ, ທັນສະໄໝ ແລະ ມູນເຊື້ອ, ພາຍໃນປະເທດ ແລະ ສາກົນ, ຄວາມສາມັກຄີຂອງທົ່ວປວງຊົນທີ່ເຕົ້າໂຮມໃນແນວໂຮມເອກະພາບແຫ່ງຊາດຢ່າງກ້ວາງຂວາງ.
ບົດຮຽນອັນລ້ຳຄ່າເພື່ອຍູ້ແຮງພາລະກິດປ່ຽນໃໝ່ຢ່າງຮອບດ້ານ, ຄົບຊຸດ
ບົດຂຽນຢືນຢັນບັນດາບົດຮຽນກ່ຽວກັບການເສີມຂະຫຍາຍກຳລັງແຮງທົ່ວປະເທດທຳການຕໍ່ຕ້ານ, ທົ່ວປວງຊົນທຳການຕໍ່ຕ້ານ, ມາຮອດປະຈຸບັນຍັງຄົງຮັກສາຄຸນຄ່າເດີມຢູ່. ໃນພາລະກິດຫັນເປັນປະເທດອຸດສາຫະກຳ ແລະ ທັນສະໄໝ, ປົກປັກຮັກສາປະເທດຫວຽດນາມສັງຄົມນິຍົມຢ່າງໝັ້ນຄົງນັ້ນ, ທົ່ວພັກ, ທົ່ວກອງທັບ, ທົ່ວປວງຊົນ ຄວນເສີມຂະຫຍາຍຄວາມຕັດສິນໃຈດ້ານການເມືອງຢ່າງສູງ, ສືບຕໍ່ຍູ້ແຮງພາລະກິດປ່ຽນໃໝ່ຢ່າງຮອບດ້ານ, ຄົບຊຸດ. ປັບປຸງ, ເພີ່ມທະວີກຳລັງແຮງແຫ່ງຄວາມມະຫາສາມັກຄີທົ່ວປວງຊົນທັງຊາດ ສົມທົບກັບກຳລັງແຮງຂອງຍຸກສະໄໝ, ສ້າງເປັນກຳລັງແຮງສັງລວມອັນໃຫຍ່ຫຼວງຂອງຊາດ. ເລື່ອງກໍ່ສ້າງບັນດາກົນໄກ, ນະໂຍບາຍເພື່ອແນໃສ່ສ້າງວັດທະນະທຳຕິດພັນຢ່າງແໜ້ນແຟ້ນກັບການພັດທະນາມະນຸດ, ການພັດທະນາວັດທະນະທຳກັບການພັດທະນາເສດຖະກິດສັງຄົມ, ການພັດທະນາເສດຖະກິດກັບການປົກປັກຮັກສາສິ່ງແວດລ້ອມຢ່າງແໜ້ນແຟ້ນ, ສິ່ງດັ່ງກ່າວຕ້ອງໄດ້ຮັບການເອົາໃຈໃສ່ເປັນພິເສດ. ເລື່ອງເຄົາລົບ ແລະ ເສີມຂະຫຍາຍສິດເປັນເຈົ້າຂອງປະຊາຊົນຕ້ອງຕິດພັນກັບການຍົກສູງຄວາມຮັບຜິດຊອບ, ພັນທະຂອງພົນລະເມືອງ ແລະ ການເຄົາລົບຄວາມເປັນລະບຽບວິໄນ, ປະຕິບັດກົດໝາຍໃນທຸກຂົງເຂດຂອງຊີວິດສັງຄົມ. ພິເສດ, ແມ່ນຍົກສູງບົດບາດເປັນເຈົ້າຂອງປະຊາຊົນໃນການຄຸ້ມຄອງລັດ, ຄຸ້ມຄອງສັງຄົມ, ການກໍ່ສ້າງອົງການຈັດຕັ້ງພັກ, ອົງການລັດໃຫ້ປອດໃສ, ໝັ້ນຄົງ, ເຂັ້ມແຂງ.
ໃນບົດຂຽນ, ທ່ານປະທານປະເທດ ເຈິ່ນດ້າຍກວາງ ເນັ້ນໜັກເຖິງຄວາມສຳຄັນຂອງການຖືຜົນປະໂຫຍດແຫ່ງຊາດ - ຊົນຊາດເປັນຕົ້ນ, ເຊີດຊູຄັນທຸງສັນຕິພາບ, ຄວາມເປັນທຳ, ເໝາະສົມກັບບັນດາຄຸນຄ່າລວມຂອງມວນມະນຸດ; ແກ້ໄຂຜົນປະໂຫຍດຂອງຊາດກັບຜົນປະໂຫຍດຂອງປະເທດຕ່າງໆໃນພາກພື້ນ ແລະ ໃນໂລກຢ່າງກົມກຽວ, ເໝາະສົມກັບບັນດາຫຼັກການພື້ນຖານຂອງກົດໝາຍສາກົນ. ເປີດກວ້າງ, ເຮັດໃຫ້ການພົວພັນຮ່ວມມືກັບສາກົນນັບມື້ນັບເລິກເຊິ່ງ, ໝັ້ນຄົງ; ສືບຕໍ່ຍົກສູງທີ່ຕັ້ງຂອງປະ
ເທດໃນເວທີສາກົນ. ເພີ່ມທະວີການກໍ່ສ້າງກຳລັງກອງທັບປະຊາຊົນ, ຕຳຫຼວດປະຊາຊົນປະຕິວັດໃຫ້ເປັນກຳລັງຫຼວງ, ຍອດຢ້ຽມ, ນັບມື້ນັບທັນສະໄໝ, ແລະ ຫັນບັນດາກຳລັງສຳຄັນຍິ່ງເປັນທັນສະໄໝໂດຍກົງ. ມີນະໂຍບາຍສະກັດກັ້ນບໍ່ໃຫ້ສົງຄາມ, ການປະທະກັນເກີດຂຶ້ນ, ຄົ້ນພົບ ແລະ ດັບສູນບັນດາປັດໃຈບໍ່ເປັນປະໂຫຍດ, ບໍ່ໃຫ້ຕົກຢູ່ໃນທ່າຮັບ, ເກີດຂຶ້ນໂດຍບັງເອີນ ບໍ່ວ່າໃນສະພາບການໃດ. ເດັດດ່ຽວຕໍ່ສູ້ປົກປັກຮັກສາເອກະລາດ, ອະທິປະໄຕ, ເອກະພາບ ແລະ ຜືນແຜ່ນດິນອັນຄົບຖ້ວນ, ປົກປັກຮັກສາຊາຍແດນ ແລະ ອະທິປະໄຕທະເລ, ເກາະ, ເຂດນ່ານຟ້າຂອງປະເທດຊາດຢ່າງໝັ້ນຄົງ; ພ້ອມທັງຮັກສາສະພາບແວດລ້ອມສັນຕິພາບ, ສະຖຽນລະພາບເພື່ອພັດທະນາປະເທດຊາດຢ່າງໝັ້ນຄົງ.
ບົດຂຽນຢືນຢັນວ່າ, ຫວນຄືນນ້ຳໃຈທົ່ວປະເທດທຳການຕໍ່ຕ້ານ, ດ້ວຍຄວາມເອກອ້າງທະນົງໃຈ, ເຊື່ອໝັ້ນຕໍ່ການຊີ້ນຳນຳພາຢ່າງຖືກຕ້ອງ, ສະຫຼາດສະຫຼຽວຂອງພັກ. ຍິ່ງກວ່າເວລາໃດໝົດ, ທົ່ວພັກ, ທົ່ວກອງທັບ ແລະ ທົ່ວປວງຊົນ ຄວນຍົກສູງນ້ຳໃຈຮັກຊາດ, ກຳແໜ້ນກາລະໂອກາດ, ປະຕິບັດພາລະກິດປ່ຽນໃໝ່ຢ່າງມີໄຊ, ນຳພາລະກິດປະຕິວັດຂອງຊາດເຖິງຈຸດສູງໄຊຊະນະໃໝ່.