(vovworld)- ກະຊວງການຄ້າອາເມລິກາ(DOC) ຫາກໍມີຄຳຕັດສິນສຸດທ້າຍປແມ່ນຮັກສາອັດຕາພາສີຕ້ານການຂາຍບຸບລາຄາສຳລັບກຸ້ງຫວຽດນາມ ສົ່ງໄປຂາຍຢູ່ອາເມລິກາ ຕາມຂໍ້ຕົກລົງໃນເບື້ອງຕົ້ນໄລຍະສຳຫລວດກວດກາຄັ້ງທີ 8. ສະນັ້ນ ບັນດາວິສາຫະກິດສົ່ງອອກກຸ້ງຂອງຫວຽດນາມ ຈະຕ້ອງເສຍ ພາສີດ້ວຍອັດຕາສູງສຸດນັບແຕ່ກ່ອນມາຮອດປະຈຸບັນ ເມື່ອນຳຜະລິດຕະພັນນີ້ເຂົ້າຕະຫລາດ ອາເມລິກາ. ເລື່ອງຈັດວາງອັດຕາພາສີສຳລັບບັນດາຜະລິດຕະພັນກຸ້ງຂອງຫວຽດນາມ ແມ່ນບໍ່ມີຄວາມຍຸຕິທຳ, ບໍ່ເໝາະສົມກັບການພົວພັນຄູ່ຮ່ວມມືຮອບດ້ານລະຫວ່າງ ຫວຽດນາມ ແລະ ອາເມລິກາ.
ປຸງແຕ່ງກຸ້ງເພື່ອສົ່ງອອກ
ພາບ:internet
|
ຕາມໝາກຜົນສຸດທ້າຍກ່ຽວກັບການຈັດວາງອັດຕາພາສີຕ້ານການຂາຍບຸບລາຄາກຸ້ງຂອງຫວຽດນາມ ໄລຍະ 1/2/2012-31/12/2013(POR8) ຊື່ງກະຊວງການຄ້າ ອາເມລິກາ (DOC) ຫາກໍປະກາດ, ມີ ບໍລິສັດສົ່ງອອກກຸ້ງຂອງຫວຽດນາມ 32 ແຫ່ງ ຖືກຈັດວາງອັດຕາພາສີໃນລະດັບສູງສຸດນັບແຕ່ກ່ອນມາຮອດປະຈຸບັນ. ໃນນັ້ນ, ກຸ່ມບໍລິສັດສິນໃນນ້ຳ ມີງຟູ ຖືກເສຍພາສີໃນລະດັບ 4,98%, ບໍລິສັດຫຸ້ນສ່ວນສິນໃນນ້ຳ ຊອກຈັງ (STAPIMEX) 9,7% ແລະ ບໍລິສັດອື່ນ 6,37%. ອັດຕາພາສີລວມໃຫ້ທົ່ວປະເທດແມ່ນ 25,76%. ຕາມຂໍ້ກຳນົດແລ້ວ, ວິສາຫະກິດຫວຽດນາມ ມີ 30 ວັນເພື່ອຟ້ອງຮ້ອງຂໍ້ຕົກລົງຂອງ DOC ອອກສູ່ສານການຄ້າສາກົນອາເມລິກາ.
ຄຳຕັດສິນບໍ່ມີຄວາມຍຸຕິທຳ, ບໍ່ອີງໃສ່ສະພາບຕົວຈິງ.
ເມື່ອເດືອນ 3/2014, ພາຍຫລັງເມື່ອໝາກຜົນໃນເບື້ອງຕົ້ນຂອງການພິຈານະນາດ້ານບໍລິຫານຄັ້ງທີ 8 (POR8) ກ່ຽວກັບອັດຕາພາສີຕ້ານການຂາຍບຸບລາຄາກຸ້ງສົ່ງໄປຂາຍຢູ່ຕະຫລາດ ອາເມລິກາ ຖືກປະກາດ, ບັນດາວິສາຫະກິດຫວຽດນາມ ລ້ວນແຕ່ໃຫ້ຮູ້ວ່າ: ເຂົາເຈົ້າຄັດຄ້ານຄຳຕັດສິນດັ່ງກ່າວຂອງ DOC. ຄວາມຈິງແລ້ວ, ບັນດາວິສາຫະກິດຫວຽດນາມ ບໍ່ໄດ້ຮັບບໍ່ວ່າການຫນູນຊ່ວຍໃດໆຈາກລັດຖະບານໃນວິວັດການຜະລິດກຸ້ງສົ່ງອອກ. ລາຄາກຸ້ງສົ່ງອອກຂອງຫວຽດນາມ ຖືກກວ່າກຸ້ງຂອງອາເມລິກາ ຍ້ອນວ່າບັນດາວິສາຫະກິດ ຫວຽດນາມ ໄດ້ຮັບບຸລິມະສິດກ່ຽວກັບທຳມະຊາດ ສະນັ້ນ ລາຍຈ່າຍໃຫ້ແກ່ການຜະລິດແມ່ນຕ່ຳກວ່າ, ພາໄປເຖິງລາຄາຖືກກວ່າ. ທ່ານ ຫງວຽນຫືວຢູງ, ຮອງປະທານສະຫະສະມາຄົມປຸງແຕ່ງ ແລະ ສົ່ງອອກສິນໃນນ້ຳຫວຽດນາມ (Vasep) ຢືນຢັນວ່າ:
“ກຸ້ງຂອງຫວຽດນາມ ແລະ ກຸ້ງຂອງອາເມລິກາ ແມ່ນ ສິນຄ້າສອງປະເພດແຕກຕ່າງກັນກ່ຽວກັບເຕັກໂນໂລຊີການຜະລິດ, ບໍ່ຄືກັນ. ກຸ້ງຂອງອາເມລິກາ ແມ່ນກຸ້ງທີ່ຫາຢູ່ທະເລ, ສ່ວນ ກຸ້ງຂອງຫວຽດນາມ ແມ່ນກຸ້ງລ້ຽງຢູ່ເຂດທົ່ງພຽງຂອງຕົນ. ສອງກໍລະນີດັ່ງກ່າວບໍ່ກ່ຽວຂ້ອງກັນ, ບໍ່ແມ່ນຜະລິດຕະພັນແກ້ງແຍ້ງໂດຍກົງນຳກັນ. ສະນັ້ນ ເລື່ອງນີ້ແມ່ນເລຫລ່ຽມຂອງບໍລິສັດຜະລິດຢູ່ອາເມລິກາ ທີ່ຢາກປົກປ້ອງດ້ວຍກົດໝາຍຂອງອາເມລິກາ.”
ບໍ່ປົກປ້ອງຫາກພຽງແຕ່ກໍ່ຄວາມເສຍຫາຍໃຫ້ແກ່ຜູ້ໃຊ້ສອຍອາເມລິກາ
ຄວາມຈິງແລ້ວ, ເປັນທີ່ຈະແຈ້ງແລ້ວວ່າ ກຸ້ງລ້ຽງຂອງຫວຽດນາມສົ່ງໄປຂາຍຢູ່ ອາເມລິກາ ແລະ ກຸ້ງທີ່ຫາມາໄດ້ຢູ່ທະເລອາເມລິກາ ແມ່ນ 2 ຜະລິດຕະພັນທີ່ແຕກຕ່າງກັນ. ກຸ້ງລ້ຽງມີບັນດາຈຸດເດັ່ນ ຫາກກຸ້ງທີ່ຫາມາໄດ້ຢູ່ທະເລບໍ່ມີ ຄື: ສະພັດຕະພາບເປັນປົກກະຕິ, ຄຸນນະພາບສະໝ່ຳສະເຫມີ ແລະ ຮັບປະກັນໄລຍະເວລາສົ່ງສິນຄ້າ. ສຳລັບຜູ້ໃຊ້ສອຍແລ້ວ, ເລື່ອງຮັບປະກັນແຫລ່ງສະຫນອງເປັນປົກກະຕິ, ຄຸນນະພາບກໍຄືຂະຫນາດສະໝ່ຳສະເຫມີຂອງຜະລິດຕະພັນ ແມ່ນບັນຫາສຳຄັນ ແລະ ສິ່ງນີ້ລື່ນກາຍຄວາມສາມາດຂອງບັນດາບໍລິສັດສະຫນອງກຸ້ງຢູ່ພາຍໃນປະເທດ. ຕະຫລາດສົ່ງອອກນັບມື້ນັບເປັນຫລາຍຮູບຫລາຍແບບ ເຮັດໃຫ້ອາເມລິກາ ບໍ່ແມ່ນສະຖານທີ່ດູດດື່ມສຳລັບບັນດາບໍລິສັດສົ່ງອອກກຸ້ງອີກ. ສິ່ງດັ່ງກ່າວເຮັດໃຫ້ການສົ່ງອອກກຸ້ງເຂົ້າຕະຫລາດ ອາເມລິກາ ຫລຸດລົງ ແລະ ລາຄາຜະລິດຕະພັນກໍ່ເພີ່ມຂຶ້ນກະໂດດຂັ້ນ ແລະ ພາໃຫ້ ຜູ້ໃຊ້ສອຍອາເມລິກາ ຈະຖືກເສຍຫາຍ.
ຍິ່ງກວ່ານັ້ນ, ໃນຈຸດເວລາ DOC ອອກຄຳຕັດສິນສຳລັບບັນດາວິສາຫະກິດສົ່ງອອກກຸ້ງຂອງຫວຽດນາມ ສະພາບການຜະລິດ, ດຳເນີນທຸລະກິດຂອງຂະແຫນງອຸດສາຫະກຳກຸ້ງຂອງອາເມລິກາ ພວມມີຄວາມສະດວກພໍສົມຄວນ. ສະນັ້ນ ຂະແຫນງກຸ້ງຂອງອາເມລິກາ ບໍ່ຖືກເສຍຫາຍຢ່າງໃດເລີຍ ແລະ ກຸ້ງສົ່ງອອກຂອງຫວຽດນາມ ບໍ່ແມ່ນສາຍເຫດເພື່ອໃຫ້ DOC ຈັດວາງອັດຕາພາສີຕ້ານການຂາຍບຸບລາຄາ. ເປັນອັນວ່າ ເລື່ອງບັນດາບໍລິສັດ ຫວຽດນາມ ສົ່ງອອກກຸ້ງເຂົ້າຕະຫລາດອາເມລິກາ ດ້ວຍລາຄາຖືກກວ່າ ພຽງແຕ່ມີຜົນປະໂຫຍດໃຫ້ແກ່ຜູ້ໃຊ້ສອຍອາເມລິກາ ຫາກບໍ່ກໍ່ຄວາມເສຍຫາຍ ແລະນາບຂູູ່ເຖິງຄວາມເສຍຫາຍກ່ຽວກັບດ້ານວັດຖຸໃຫ້ແກ່ຂະແຫນງອຸດສາຫະກຳກຸ້ງອາເມລິກາ.
ບໍ່ສອດຄອ່ງກັບເນື້ອໃນຈິດໃຈດ້ານການຄ້າເສລີ
ຂະແຫນງຜະລິດປຸງແຕ່ງ ແລະ ສົ່ງອອກກຸ້ງ ໄດ້ສ້າງວຽກເຮັດງານທຳໂດຍກົງ ຫລື ທາງອ້ອມໃຫ້ແກ່ຄົນງານປະມານ 3,5 ລ້ານຄົນ ແລະ ລາຍຮັບຈາກການປຸງແຕ່ງ ແລະ ຜະລິດກຸ້ງສົ່ງອອກກວມປະມານ 3% GDP ຂອງຫວຽດນາມ. ເລື່ອງ DOC ຈັດວາງອັດຕາພາສີຕ້ານການຂາຍບຸບລາຄາສຳລັບວິສາຫະກິດຫວຽດນາມ ແມ່ນກໍ່ຄວາມເສຍຫາຍຢ່າງຫນັກຫນ່ວງສຳລັບບັນດາວິສາຫະກິດຜະລິດກຸ້ງສົ່ງອອກ, ສົ່ງຜົນສະທ້ອນໂດຍກົງເຖິງຊີວິດຂອງຄົນງານ ກວ່າ 600.000 ຄົນ. ນີ້ຍັງແມ່ນວຽກງານບໍ່ມີຄວາມຍຸຕິທຳ, ໄປຝືນກັບເນື້ອໃນຈິດໃຈການຄ້າເສລີກໍຄືການພົວພັນດ້ານເສດຖະກິດ, ການຄ້າພວມພັດທະນາອັນດີງາມລະຫວ່າງສອງປະເທດຄື ອາເມລິກາ ແລະ ຫວຽດນາມ.
ຫວຽດນາມ ແລະ ອາເມລິກາ ພວມມີການພົວພັນຄູ່ຮ່ວມມືຮອບດ້ານ. ສະນັ້ນ ບັນດາການເຄື່ອນໄຫວດ້ານການຄ້າລະຫວ່າງສອງປະເທດເວົ້າລວມ ແລະ ເລື່ອງຈັດວາງອັດຕາພາສີຕ້ານການຂາຍບຸບລາຄາສຳລັບກຸ້ງສົ່ງອອກຂອງຫວຽດນາມ ເຂົ້າຕະຫລາດອາເມລິກາ ຄວນໄດ້ຮັບພິຈາລະນາຢ່າງພາວະວິໄສ, ຍຸຕິທຳ, ເພື່ອປົກປ້ອງສິດຜົນປະໂຫຍດອັນຊອບທຳຂອງບັນດາຜູ້ລ້ຽງ, ປູກ, ຜະລິດ ແລະ ປຸງແຕ່ງ ແລະ ສົ່ງອອກກຸ້ງຫວຽດນາມ ກໍຄືຜົນປະໂຫຍດຂອງຜູ້ໃຊ້ສອຍ ແລະ ບັນດາວິສາຫະກິດນຳເຂົ້າ, ຈຳຫນ່າຍກຸ້ງຂອງອາເມລິກາ.