ບັນດາ ສສຊ ໄດ້ລົງຄະແນນສຽງດ້ວຍການກົດປຸ່ມຮັບຮອງເອົາ
ລັດຖະທຳມະນູນຂອງປະເທດ ສສ ຫວຽດນາມ ສະບັບປັບປຸງ
(ພາບ: TTXVN)
|
(vovworld)- ຫວ່າງແລ້ວນີ້, ກອງປະຊຸມສະໄຫມສາມັນເທື່ອທີ 6 ສະພາແຫ່ງຊາດຫວຽດນາມ ຊຸດທີ 13 ໄດ້ຮັບຮອງເອົາລັດຖະທຳມະນູນຂອງປະເທດ ສສ ຫວຽດນາມ ສະບັບປັບປຸງ ດ້ວຍຄະແນສຽງເຫັນດີ 97,59% ຈາກ ສະມາຊິກສະພາແຫ່ງຊາດ. ທ່ານປະທານສະພາແຫ່ງຊາດຫວຽດນາມ ຫງວຽນຊີງຮຸ່ງ ຫາກໍລົງລາຍເຊັນໃສ່ລັດຖະທຳມະນູນ ສະບັບປັບປຸງ ແລະ ມີຜົນສັກສິດນັບແຕ່ວັນທີ 1/1/2014 ເປັນຕົ້ນໄປ. ພາຍຫລັງ 21 ປີ, ຈາກ ລັດຖະທຳມະນູນປີ 1992, ປະເທດຫວຽດນາມ ມີ ລັດຖະທຳມະນູນປັບປຸງສະບັບໃຫມ່, ລັດຖະທຳມະນູນຂອງໄລຍະເຊື່ອມໂຍງ, ໄລຍະປ່ຽນແປງໃຫມ່. ລັດຖະທຳມະນູນ ຂອງປະເທດຊາດນັບມື້ນັບພັດທະນາ, ປະຊາທິປະໄຕ, ສີວິໄລ. ຫວນຄືນວິວັດທະນາການຮຽບຮຽງ, ຮັບເອົາຄຳເຫັນ, ດັດແກ້, ລັດຖະທຳມະນູນສະບັບປັບປຸງມີບັນດາຈຸດໝາຍດັ່ງນີ້:
ຈຸດໃຫມ່ກ່ຽວກັບຮູບການ
ດ້ວຍຖານະແມ່ນສະມາຊິກຂອງຄະນະຮຽບຮຽງ ລັດຖະທຳມະນູນ ໄດ້ຍົກໃຫ້ເຫັນບັນດາຈຸດໃຫມ່ຂອງຮ່າງລັດຖະທຳມະນູນສະບັບປັບປຸງຄັ້ງນີ້ ລວມມີ: 11 ພາກ 120 ມາດຕາ, ເມື່ອທຽບໃສ່ ລັດຖະທຳມະນູນປີ 1992 ແມ່ນຫລຸດຜ່ອນ 27 ມາດຕາ, ຮ່າງລັດຖະທຳມະນູນ ຮັກສາພຽງ 7 ມາດຕາ, ເພີ່ມເຕີມ 12 ມາດຕາໃຫມ່ ແລະ ປັບປຸງ 101 ມາດຕາ.ໃນນັ້ນ ມີການສັບຊ້ອນບັນດາໝວດ, ຄື ພາກທີ 11 ກ່ຽວກັບເຄື່ອງໝາຍຊາດ, ທຸງຊາດ, ເພງຊາດ, ນະຄອນຫລວງ ຖືກນຳເຂົ້າພາກທີ 1. ກ່ຽວກັບລະບອບການເມືອງ ຢູ່ພາກທີ 5 ໃນລັດຖະທຳມະນູນປະຈຸບັນ, ກ່ຽວກັບສິດ ແລະ ພັນທະພື້ນຖານຂອງພົນລະເມືອງ ແມ່ນຖືກນຳເຂົ້າພາກທີ 2 ດ້ວຍຊື່ເອີ້ນໃຫມ່ວ່າ: ສິດທິມະນຸດ, ສິດພັນທະພື້ນຖານຂອງພົນລະເມືອງ; ມີຫນຶ່ງພາກແມ່ນໃຫມ່ອ່ຽມ ນັ້ນແມ່ນພາກທີ 10, ກຳນົດກ່ຽວກັບບັນດາລະບອບບັນຍັດເອກະລາດ.
ຈຸດໃຫມ່ກ່ຽວກັບເນື້ອໃນ
ນັບແຕ່ຄຳນຳ, ລັດຖະທຳມະນູນໄດ້ຮັບການປັບປຸງຕາມທິດສັງເຂບ, ໂດຍຫຍໍ້ ຍາວພຽງ 1/3 ເມື່ອທຽບໃສ່ຄຳນຳຂອງລັດຖະທຳມະນູນປະຈຸບັນ. ທີສອງ, ກ່ຽວກັບອະທິປະໄຕປະຊາຊົນ ແມ່ນສະແດງໃຫ້ເຫັນຢ່າງຈະແຈ້ງ ແລະ ສະເຫມີຕົ້ນສະເຫມີປາຍໃນຮ່າງລັດຖະທຳມະນູນປີ 1992 ສະບັບປັບປຸງ, ຊີ້ໃຫ້ເຫັນບົດບາດຂອງປະຊາຊົນ, ໂດຍປະຊາຊົນ ແລະ ເພື່ອປະຊາຊົນ. ຈຸດໃຫມ່ ທີ 4 ແມ່ນເນື້ອໃນເສດຖະກິດ, ວັດທະນະທຳ, ສັງຄົມ, ການສຶກສາ, ວິທະຍາສາດເຕັກໂນໂລຊີ, ສິ່ງແວດລ້ອມໄດ້ສະແດງໃຫ້ເຫັນຕາມທິດກະທັດລັດຢ່າງຈະແຈ້ງແລະ ມີລັກສະນະຫລັກການ, ຮັບປະກັນລັກສະນະຍາວນານຂອງລັດຖະທຳມະນູນ, ເນື້ອໃນນີ້, ກ່ອນນີ້ ແມ່ນ 2 ພາກ, ຢູ່ ພາກທີ 2 ແລະ ພາກທີ 3, ປະຈຸບັນ ໄດ້ໂຮມເຂົ້າເປັນພາກໃຫມ່ ນັ້ນແມ່ນພາກທີ 3. ຈຸດໃຫມ່ທີ 5 ແມ່ນການສະຫງວນ 1 ພາກ ກ່ຽວກັບລະບອບບັນຍັດ ເອກະລາດ, ມີ 2 ມາດຕາ, ຢູ່ ພາກທີ 10 ກຳນົດ ກ່ຽວກັບສະພາເລືອກຕັ້ງແຫ່ງຊາດ ແລະ ກວດສອບແຫ່ງລັດ.
ສະມາຊິກສະພາແຫ່ງຊາດສຸດຈິດສຸດໃຈປະກອບຄຳເຫັນໃສ່ລັດຖະທຳມະນູນສະບັບປັບປຸງ
ຈຸດໃຫມ່ຂອງລັດຖະທຳມະນູນຈາກຄຳເຫັນຂອງ ສະມາຊິກສະພາແຫ່ງຊາດ: ສສຊ 448 ທ່ານ ແມ່ນຕົວແທນໃຫ້ແກ່ຄວາມມຸ່ງມາດປາດຖະຫນາຂອງປະຊາຊົນ ໄດ້ສຸດຈິດສຸດໃຈ, ສຸມພູມປັນຍາ ແລະ ເວລາປຶກສາຫາລືຢູ່ຕາມຫນ່ວຍ, ຢູ່ ຫໍປະຊຸມ, ເພື່ອໄຈ້ແຍກ, ປຶກສາຫາລືຢ່າງລະອຽດ, ລອບຄອບຖິ່ຖ້ວນ, ວິທະຍາສາດ, ໄດ້ປະກອບຄຳເຫັນໃສ່ຮ່າງລັດຖະທຳມະນູນສະບັບປັບປຸງ. ຜ່ານນັ້ນໃຫ້ເຫັນວ່າ ສສຊ ມີຄວາມເຂົ້າໃຈຢ່າງລະອຽດເຖິງບົດບາດ, ຫນ້າທີ່ຄວາມຮັບຜິດຊອບຂອງຕົນຕໍ່ຜູ້ມີສິດເລືອກຕັ້ງ, ຕໍ່ປະເທດຊາດ. ສິ່ງທີ່ໃໝ່ອຽມຂອງບັນດາ ສສຊ ທີ່ກອງປະຊຸມຄັ້ງນີ້ ແມ່ນຍັງຢູ່ບ່ອນວ່າ : ບໍ່ພຽງແຕ່ເຫັນໄດ້ເຖິງບົດບາດ, ໜ້າທີ່ຮັບຜິດຊອບຂອງຕົນ ຕໍ່ໜ້າທີ່ມີລັກສະນະປະຫວັດສາດເທົ່ານັ້ນ, ຫາກຍັງຮັບຮູ້ຢ່າງຈະແຈ້ງກ່ຽວກັບຄວາມໝາຍ, ເນື້ອໃນຂອງແຕ່ລະພາກ, ແຕ່ລະມາດຕາຂອງລັດຖະທຳມະນູນ. ບັນດາ ສສຊ ໄດ້ມີເວລາ ເພື່ອຊອກຮູ້, ເຂົ້າໃຈ ແລະ ເຫັນໄດ້ເຖິງໜ້າທີຄວາມ ຮັບຜິດຊອບ, ຄວາມເປັນກຽດ, ຄວາມເອກອ້າງທະນົງໃຈ, ຄວາມຜາສຸກ ເພາະໄດ້ເຂົ້າຮ່ວມ, ແລກປ່ຽນ, ປະກອບຄຳເຫັນ ແລະ ຕົກລົງກ່ຽວກັບລັດຖະທຳມະນູນສະບັບປັບປຸງ ຄັ້ງນີ້ດ້ວຍການກົດປຸ່ມຮັບຮອງເອົາໃນຈຸເວລາທີ່ສຳຄັນ. ໜ້າທີ່ຮັບຜິດຊອບ, ຄວາມເປັນກຽດນີ້ ແມ່ນການໂຮມຍອດຍິ່ງທາງດ້ານເຈດຈຳນົງ, ຄວາມມຸ່ງມາດປາດຖະໜາຂອງຜູ້ມີສິດເລືອກຕັ້ງທີ່ໄດ້ຝາກຝັງນຳບັນດາ ສສຊ, ພ້ອມກັນນັ້ນ, ກໍແມ່ນຄວາມຮຽກຮ້ອງໂດຍພາວະວິໄສທີ່ຕ້ອງເປັນໄປໃນໄລຍະໃໝ່ຂອງການປະຕິວັດຫວຽດນາມ.
ປະຊາຊົນ ແລະ ຜູ້ມີສິດເລືອກຕັ້ງໃນທົ່ວປະເທດຮ່ວມແຮງຮ່ວມໃຈປັບປຸງ ລັດຖະທຳມະນູນ
ສິ່ງທີ່ໃໝ່ອຽມຂອງລັດຖະທຳມະນູນຈາກແງ່ມຸມ ປະຊາຊົນ ແລະ ຜູ້ມີສິດເລືອກຕັ້ງໃນທົ່ວປະເທດ : ລັດຖະທຳມະນູນ ສະບັບທຳອິດໄດ້ຮັບການປະກາດໃຊ້ເມື່ອປີ 1946, ຫຼັງຈາກນັ້ນແມ່ນ ລັດຖະທຳມະນູນປີ 1959, 1980, 1992. ລັດຖະທຳມະນູນ ແຕ່ລະສະບັບລ້ວນແຕ່ມີບົດບາດ,ພາລະກຳປະຫວັດສາດສະເພາະຂອງຕົນ. ແຕ່ໃນຄັ້ງນີ້, ຜ່ານໄລຍະເວລາເກືອບ 1 ປີ ດ້ວຍຄຳເຫັນນັບລ້ານໆຂໍ້, ກອງປະຊຸມນັບພັນຄັ້ງຂອງປະຊາຊົນທຸກຊັ້ນວັນນະໃນສັງຄົມ, ຈຶ່ງເຫັນວ່າ ປະຊາຊົນ, ຜູ້ມີສິດເລືອກຕັ້ງ, ບັນດານັກວິທະຍາສາດ, ນັກຄຸ້ມຄອງ...ມີຄວາມເອົາໃຈໃສ່ທີ່ສຸດ ແລະ ໄດ້ປະກອບເຫື່ອແຮງ ສະຕິປັນຍາເພື່ອປັບປຸງລັດຖະທຳມະນູນ, ຊຶ່ງໄດ້ສະແດງໃຫ້ເຫັນວ່າ ປະຊາຊົນສ່ວນຫຼວງຫຼາຍ ແລະ ສະພາແຫ່ງຊາດໄດ້ເຫັນດີຢ່າງສູງກັບການ ປັບປຸງ ລັດຖະທຳມະນູນຄັ້ງນີ້.
ລັດຖະທຳມະນູນ ສະບັບປັບປຸງຄັ້ງນີ້ ໄດ້ສະແດງໃຫ້ເຫັນການສືບທອດບັນດາ ລັດຖະທຳມະນູນ ສະບັບກ່ອນໆ, ສະແດງໃຫ້ເຫັນຢ່າງເຕັມສ່ວນທາງດ້ານເຈດຈຳນົງ, ສິ່ງທີ່ຍອດຍິ່ງ, ຄວາມມຸ່ງມາດປາດຖະໜາຂອງປະຊາຊົນ ແລະ ຜູ້ມີສິດເລືອກຕັ້ງໃນທົ່ວປະເທດ,ແມ່ນລັດຖະທຳມະນູນຂອງປະຊາຊົນ, ມາຈາກປະຊາຊົນ ແລະ ເພື່ອປະຊາຊົນ.