( vovworld ) – ໂດຍຕອບສະໜອງຕາມຄຳເຊີນຂອງປະທານາທິບໍດີລັດເຊຍ Vladimir Putin , ວັນທີ 26/7 ທ່ານປະທານປະເທດຫວຽດນາມ Truong Tan Sang ໄດ້ນຳໜ້າຄະນະຜູ້ແທນຂັ້ນສູງຫວຽດນາມເລີ່ມຕົ້ນການຢ້ຽມຢາມສະຫະພັນລັດເຊຍຢ່າງເປັນທາງການໃນເວລາ 5 ວັນ. ນີ້ແມ່ນການຢ້ຽມຢາມເອີລົບເປັນຄັ້ງທຳອິດໃນຖານະຕຳແໜ່ງໃໝ່ຂອງທ່ານປະທານປະເທດ Truong Tan Sang ແລະກໍແມ່ນປະມຸກລັດຄົນທຳອິດໃນອາຊີໄປຢ້ຽມຢາມສະຫະພັນລັດເຊຍຢ່າງເປັນທາງການ ນັບຕັ້ງແຕ່ ທ່ານ Vladimir Putin ຮັບໄຊຊະນະເປັນປະທານາທິບໍດີລັດເຊຍໃນອາຍຸການໃໝ່.
ວັນທີ 30/1/1950, ຫວຽດນາມ ແລະ ອະດີດສະຫະພາບໂຊຫວຽດ ໄດ້ສ້າງການພົວພັນທາງການທູດຢ່າງເປັນທາງການ. ນັບຕັ້ງແຕ່ນັ້ນເປັນຕົ້ນມາ, ໂດຍຜ່ານການຜັນແປຫຼາຍຢ່າງ, ການພົວພັນຫວຽດນາມ -ລັດເຊຍໄດ້ຮັບການປັບປຸງຢ່າງບໍ່ຢຸດຢັ້ງ ແລະ ນັບມື້ນັບຂະຫຍາຍຕົວຢ່າງແຂງແຮງ. ເດືອນ 6/1994, ຫວຽດນາມ ແລະ ລັດເຊຍໄດ້ເຊັນສົນທິສັນຍາກ່ຽວກັບບັນດາຫຼັກການພື້ນຖານຂອງສາຍພົວພັນມິດຕະພາບ; ເດືອນ 3/2001 ໃນການຢ້ຽມຢາມຫວຽດນາມຂອງ ປະທານາທິບໍດີລັດເຊຍ Vladimir Putin, 2 ປະເທດໄດ້ສ້າງຕັ້ງ ການພົວພັນຄູ່ຮ່ວມມືຍຸດທະສາດ, ອັນໄດ້ສ້າງພື້ນຖານດ້ານກົດໝາຍໃຫ້ແກ່ການພົວພັນໃນໄລຍະພັດທະນາໃໝ່.
ຫວຽດນາມ ແລະ ອະດີດສະຫະພາບໂຊຫວຽດ ໄດ້ສ້າງການພົວພັນທາງການທູດໃນວັນທີ 30/1/1950,
(ພາບ: dantri.com.vn)
ໂດຍໄດ້ກຳນົດການຮ່ວມມືທາງດ້ານເສດຖະກິດແມ່ນຈຸດໃຈກາງໃນສາຍພົວພັນລະຫວ່າງ 2 ປະເທດ, ນັບແຕ່ປີ 2007, 2 ຝ່າຍໄດ້ສົບທົບກັນຮຽບຮຽງ ແລະ ເປັນເອກະພາບກັນປະຕິບັດບັນດາໜ້າທີ່ຮັບບຸລິມາສິດຊຸກຍູ້ການພົວພັນຄູ່ຮ່ວມມືຍຸດທະສາດ. ວົງເງິນການຄ້າ 2 ຝ່າຍໄດ້ເພີ່ມຂຶ້ນໃນແຕ່ລະປີ. ປີ 2011 ບັນລຸ 1,98 ຕື້ USD. ໃນ 6 ເດືອນຕົ້ນປີນີ້, ວົງເງິນການຄ້າ 2 ຝ່າຍບັນລຸເກືອບ 1ຕື້ USD, ເພີ່ມຂຶ້ນ 45% ເມື່ອທຽບໃສ່ໄລຍະດຽວກັນຂອງປີກາຍ. ນີ້ແມ່ນຕົວເລກທີ່ໜ້າຈົດຈຳໃນສະພາບວິກິດການເສດຖະກິດທົ່ວໂລກ. ຕາມການຄາດຄະເນແລ້ວ, ວົງເງິນຂາອອກຂາເຂົ້າລະຫວ່າງ 2 ປະເທດຈະບັນລຸ 3 ຕື້ USD ໃນປີນີ້ ແລະ 2 ຝ່າຍວາງຈຸດໝາຍຍົກວົງເງິນການຄ້າ 2 ຝ່າຍໃຫ້ຂຶ້ນສູ່ລະດັບ 5 ຕື້ USD ໃນປີ 2013. ເປັນໜ້າສົນໃຈວ່າ ປີນີ້ກໍແມ່ນປີທຳອິດທີ່ຫວຽດນາມບັນລຸວົງເງິນສົ່ງອອກເກີນດູນສຳລັບຕະຫຼາດລັດເຊຍ. ພ້ອມກັບບັນດາທ່າແຮງທາງດ້ານສິນຄ້າທີ່ມີຢູ່ແລ້ວນັ້ນ, ການພົວພັນທາງດ້ານການຄ້າລະຫວ່າງຫວຽດນາມ - ລັດເຊຍມີຄວາມສະດວກຕື່ມອີກຫຼາຍຢ່າງຂະນະທີ່ໃນມໍ່ໆມານີ້ລັດເຊຍໄດ້ເຂົ້າເປັນສະມາຊິກ WTO ຢ່າງເປັນທາງການ. ດ້ວຍບັນດາເງື່ອນໄຂສະດວກພື້ນຖານນີ້, ພວກເຮົາມີຄວາມປາດທະໜາວ່າການພົວພັນທາງດ້ານເສດຖະກິດ-ການຄ້າລະຫວ່າງ ຫວຽດນາມ - ລັດເຊຍໃນຊຸມປີທີ່ຈະມາເຖິງຈະມີບັນດາບາດກ້າວຂະຫຍາຍຕົວໃໝ່ ນັບທັງທາງດ້ານການຄ້າ ກໍຄືການຮ່ວມມືລົງທຶນ.
ນຳການພົວພັນຫວຽດນາມ-ລັດເຊຍຂຶ້ນສູ່ລະດັບສູງໃໝ່
(ພາບ:qdnd.vn)
ນອກຈາກເລື່ອງເປັນສະມາຊິກຂອງ WTO, ສະຫະພັນລັດເຊຍ ຍັງແມ່ນສະມາຊິກຂອງພັນທະພາບພາສີລັດເຊຍ-ເບລາຣຸດ-ກາຊັກຊະຖານ. ປະຈຸບັນ, ຫວຽດນາມ ແລະ ພັນທະພາບພາສີລັດເຊຍ-ເບລາຣຸດ-ກາຊັກຊະຖານ ພວມດຳເນີນການເຈລະຈາກ່ຽວກັບສັນຍາການຄ້າເສລີ (FTA). ຖ້າຫາກວ່າ FTA ໄດ້ຮັບການລົງນາມ, ສິນຄ້າຂອງຫວຽດນາມ ຈະຖືກຍົກເວັ້ນພາສີທັງໝົດ ຫຼືໄດ້ຫລຸດຜ່ອນໃນລະດັບຕ່ຳສຸດ. ນີ້ແມ່ນໂອກາດເພື່ອໃຫ້ສິນຄ້າຫວຽດນາມ ສາມາດແກ່ງແຍ້ງຢ່າງສະເໝີພາບໃນດ້ານລາຄາ ແລະ ຄຸນນະພາບ, ກໍ່ຄືກວມເອົາອັດຕາສ່ວນຫຼາຍກ່ວາໃນຕະຫຼາດລັດເຊຍ. ກ່ຽວກັບບັນຫານີ້,, ທ່ານ Andrey Kovtun ເອກອັກຄະລັດຖະທູດລັດເຊຍ ປະຈຳຫວຽດນາມ ຖືວ່າ: “ລັດເຊຍ ແລະ ຫວຽດນາມ ໄດ້ລົງນາມໃນຂໍ້ຕົກລົງຮ່ວມມືຫຼາຍສະບັບ ແລະ ປີ 2012 ນີ້, ສອງຝ່າຍພວມສືບຕໍ່ປະຕິບັດ. ໃນໄລຍະຜ່ານມາ, ລັດເຊຍ ແລະ ຫວຽດນາມ ໄດ້ປະຕິບັດໂຄງການກ່ຽວຂ້ອງເຖິງໂຮງງານໄຟຟ້ານິວເຄຼຍແຫ່ງທຳອິດຢູ່ຫວຽດນາມ ສຳເລັດຜົນ ແລະ ຈະສືບຕໍ່ຍູ້ແຮງໂຄງການນີ້. ປີນີ້, ລັດເຊຍ ເປັນປະທານ APEC, ການຮ່ວມມືລະຫວ່າງລັດເຊຍ, ຫວຽດນາມ ແລະ ປະເທດຕ່າງໆເຂົ້າຮ່ວມພັນທະພາບພາສີ ຈະປະກອບສ່ວນຫັນລະບຽບການດ້ານການຄ້າລະຫວ່າງສອງປະເທດເປັນງ່າຍດາຍ “.
ໃນເດືອນ 5 ທີ່ຜ່ານມາ, ບັນດາອົງການມີໜ້າທີ່ຮັບຜິດຊອບສອງປະເທດ ໄດ້ເລີ່ມລົງມືກໍ່ສ້າງ “ສູນຮ່າໂນ້ຍ-ມົດສະກູ“ ຊື່ງຄາດວ່າຈະກໍ່ສ້າງສຳເລັດໃນເດືອນ 5/2013 ຊື່ງໄດ້ປະກອບສ່ວນປັບປຸງ ເພິ່ມທະວີການພົວພັນອັນເປັນມູນເຊື້ອ, ການຮ່ວມມືລະຫວ່າງສອງນະຄອນຫຼວງ, ສອງປະເທດ, ພ້ອມທັງແມ່ນຂົວເຊື່ອມຕໍ່ນັກທະລຸກິດສອງປະເທດ, ເພື່ອແນໃສ່ຊຸກຍູ້ການສົ່ງສິນຄ້າຂອງຫວຽດນາມ ໄປລັດເຊຍ.
ການບຳລຸງສ້າງແຫຼ່ງຊັບພະຍາກອນມະນຸດກໍ່ແມ່ນທ່າແຮງໃນການພົວພັນລະຫວ່າງຫວຽດນາມ-ສະຫະພັນລັດເຊຍ. ປະຈຸບັນ, ມີນັກສຶກສາຫວຽດນາມປະມານກ່ວາ 5000 ຄົນພວມຮຽນຢູ່ລັດເຊຍ. ພິເສດ, ຫວຽດນາມ ນັບມື້ນັບກາຍເປັນຈຸດນັດພົບທີ່ນິຍົມຊົມຊອບຈາກຊາວລັດເຊຍ ແລະ ກົງກັນຂ້າມ. ນາງ Nguyen Thi Mai ຜູ້ຕາງໜ້າບໍລິສັດທ່ອງທ່ຽວ AMITOR ຢູ່ມົດສະກູ ໃຫ້ຮູ້ວ່າ: “ໃນໄລຍະມໍ່ໆມານີ້, ຫວຽດນາມ ກາຍເປັນຈຸດນັດພົບທີ່ດຶງດູດໃຈນັກທ່ອງທ່ຽວລັດເຊຍ. ບັນດາບໍລັດທ່ອງທ່ຽວລ້ວນແຕ່ພະຍາຍາມເພື່ອໂຄສະນາພາບພົດຂອງຫວຽດນາມ. ຜ່ານການຈັດບັນດາງານຕະຫຼາດນັດ, ງານວາງສະແດງ, ຫວັງວ່າ ຈະມີຫຼາຍຄົນຮູ້ຈັກເຖິງປະເທດຫວຽດນາມ ແລະ ໄປທ່ອງທ່ຽວຫວຽດນາມ ຫຼາຍກ່ວາ“.
ຄາດວ່າ, ໃນການຢ້ຽມຢາມລັດເຊຍ ຄັ້ງນີ້ຂອງທ່ານປະທານປະເທດຫວຽດນາມ Truong Tan Sang, ສອງຝ່າຍຈະລົງນາມໃນບັນດາເອກະສານຮ່ວມມືສອງຝ່າຍ, ແລກປ່ຽນບັນດາບັນຫາສາກົນທີ່ຕ່າງຝ່າຍມີຄວາມສົນໃຈ. ເຮັດໃຫ້ສາຍພົວພັນມິດຕະພາບອັນເປັນມູນເຊື້ອອັນຈົບງາມລະຫວ່າງຫວຽດນາມ-ສະຫະພັນລັດເຊຍ ມີປະສິດທິຜົນ, ແທດຈິງ ແມ່ນຄວາມປາດຖະໜາລວມຂອງການນຳສອງປະເທດ ແລະ ການຢ້ຽມຢາມສະຫະພັນລັດເຊຍ ຢ່າງເປັນທາງການຄັ້ງນີ້ຂອງທ່ານປະທານປະເທດຫວຽດນາມ Truong Tan Sang ອີກເທື່ອ 1 ໄດ້ຢັ້ງຢືນນະໂຍບາຍສະເໝີຕົ້ນສະເໝີປາຍຂອງຫວຽດນາມ ນັ້ນແມ່ນຍາມໃດກໍ່ຖືສາຍພົວພັນອັນເປັນມູນເຊື້ອເປັນສຳຄັນ, ເພີ່ມທະວີການພົວພັນຄູ່ຮ່ວມມືຍຸດທະສາດຫວຽດນາມ-ສະຫະພັນລັດເຊຍ ໃຫ້ດີຍິ່ງໆຂຶ້ນ.