(vovworld) - ວັນທີ 8/12, ທ່ານນາງປະທານສະພາແຫ່ງຊາດ ຫວຽດນາມ ຫງວຽນທິກິມເງິນ ໄດ້ເລີ່ມຕົ້ນການຢ້ຽມຢາມ ສ. ອິນເດຍ ຢ່າງເປັນທາງການ ຕາມຄຳເຊື້ອເຊີນຂອງທ່ານ Mohamad Hamid Ansarin, ປະທານສະພາສູງ ສ. ອິນເດຍ, ທ່ານ Sumitra Mahajan, ປະທານສະພາຕ່ຳ ສ. ອິນເດຍ. ການຢ້ຽມຢາມໄດ້ປະກອບສ່ວນເຮັດໃຫ້ການພົວພັນມິດຕະພາບ, ທີ່ເປັນມູນເຊື້ອ ແລະ ຄູ່ຮ່ວມມືຍຸດທະສາດຮອບດ້ານລະຫວ່າງ ຫວຽດນາມ ແລະ ອິນເດຍ ເລິກເຊິ່ງຂຶ້ນຕື່ມ.
ອິນເດຍ ມີພື້ນຖານເສດຖະກິດຫາກໍ່ເດັ່ນຂຶ້ນໃນໂລກ, ມີເນື້ອທີກ້ວາງໃຫຍ່, ມີແຫຼ່ງຊັບພະຍາກອນທຳມະຊາດອຸດົມສົມບູນ, ມີກຳລັງຄວາມສາມາດດ້ານເສດຖະກິດ ແລະ ລະດັບວິທະຍາສາດເຕັກໂນໂລຢີກ້າວໜ້າໃນໂລກ. ນະໂຍບາຍ “ມຸ່ງໄປສູ່ທິດຕາເວັນອອກ” ແມ່ນນະໂຍບາຍການທູດຍຸດທະສາດສຳຄັນພາຍຫຼັງທີ່ ອິນເດຍ ເລີ່ມປະຕິບັດການປະຕິຮູບດ້ານເສດຖະກິດ, ຫັນການຄ້າເປັນເສລີໃນຕົ້ນທົດສະວັດທີ 90 ຂອງສະຕະວັດທີ 20. ໃນນະໂຍບາຍ “ມຸ່ງໄປສູ່ທິດຕາເວັນອອກ” ຂອງ ອິນເດຍ, ຫວຽດນາມ ໄດ້ຮັບຖືວ່າແມ່ນໜຶ່ງໃນບັນດາເສົາຄຳ້ສຳຄັນ.
ພື້ນຖານການພົວພັນມິດຕະພາບທີ່ເປັນມູນເຊື້ອ
ຫວຽດນາມ ແລະ ອິນເດຍ ມີການພົວພັນມິດຕະພາບທີ່ເປັນມູນເຊື້ອ, ສະໜິດຕິດພັນກັນມາແຕ່ດົນນານແລ້ວ, ໂດຍການນຳລຸ້ນຕ່າງໆຂອງ 2 ປະເທດ ຮັກສາ, ເພີ່ມພູນຄູນສ້າງ ແລະ ໄດ້ຮັບການພັດທະນາຂຶ້ນສູ່ລະດັບສູງໃໝ່ຢ່າງຕໍ່ເນື່ອງ. ຈາກຊຸມປີ 50 ຂອງສັດຕະວັດກ່ອນ, ທ່ານປະທານ ໂຮ່ຈີມິນ ແລະ ທ່ານນາຍົກລັດຖະມົນຕີ Jawaharlal Nehru ໄດ້ຢັ້ງຢືນນ້ຳໃຈມິດຕະພາບອັນບໍລິສຸດຜຸດຜ່ອງຂອງ 2 ຊາດ. ທ່ານນາຍົກລັດຖະມົນຕີ ອິນເດຍ Jawaharlal Nehru ແມ່ນໜຶ່ງໃນບັນດາແຂກສາກົນຄົນທຳອິດທີ່ມາ ຢ້ຽມຢາມ ຫວຽດນາມ ພາຍຫຼັງ ຫວຽດນາມ ຍາດໄດ້ໄຊຊະນະໃນການຕໍ່ສູ້ຕ້ານພວກລ່າເມືອງຂຶ້ນ ຝຣັ່ງ (ປີ 1954). ປີ 1958, ປະທານ ໂຮ່ຈີມິນ ໄດ້ໄປຢ້ຽມຢາມ ອິນເດຍ ແລະ ຫຼັງຈາກນັ້ນໜຶ່ງປີ, ປະທານາທິບໍດີ ອິນເດຍ ກໍ່ໄດ້ມາຢ້ຽມຢາມ ຫວຽດນາມ.
ວັນທີ 7/1/1972, ຫວຽດນາມ ແລະ ອິນເດຍ ໄດ້ສ້າງຕັ້ງການພົວພັນທາງການທູດ, ເປີດໜ້າປະຫວັດສາດໃໝ່ໃນການພົວພັນມິດຕະພາບ, ການຮ່ວມມືລະຫວ່າງ 2 ປະເທດ. ໃນຊຸມປີຕົ້ນສະຕະວັດທີ 21, ການພົວພັນ ຫວຽດນາມ - ອິນເດຍ ໄດ້ຄ່ອຍໆກ້າວເຂົ້າສູ່ລວງເລິກ ແລະ ກາຍເປັນຮູບແບບໃຫ້ແກ່ການຮ່ວມມືສັນຕິພາບ, ມິດຕະພາບລະຫວ່າງ 2 ປະເທດ, 2 ຊາດ, ພ້ອມກັນຮ່ວມມືພັດທະນາ ເພື່ອຄວາມວັດທະນາຖາວອນຂອງແຕ່ລະປະເທດ. ເດືອນ 7/2007, ອິນເດຍ ແລະ ຫວຽດນາມ ໄດ້ສ້າງຕັ້ງການພົວພັນຄູ່ຮ່ວມມືຍຸດທະສາດຢ່າງເປັນທາງການ.
ໃນຊຸມປີມໍ່ໆມານີ້, ສາຍພົວພັນ ຫວຽດນາມ - ອິນເດຍ ນັບມື້ນັບພັດທະນາກ່ວາອີກ ໃນຂະນະທີ່ ການພົບປະຂັ້ນສູງລະຫວ່າງການນຳ 2 ປະເທດນັບມື້ນັບຫຼາຍ. ຫວ່າງແລ້ວນີ້, ແມ່ນການຢ້ຽມຢາມ ອິນເດຍ ຂອງທ່ານນາຍົກລັດຖະມົນຕີ ຫງວຽນເຕີນຢູ້ງ ເມື່ອປີ 2014 ແລະ ການຢ້ຽມຢາມ ຫວຽດນາມ ຂອງທ່ານນາຍົກລັດຖະມົນຕີ ອິນເດຍ Narendra Modi ເມື່ອເດືອນ 9/2016. ໃນການຢ້ຽມຢາມຄັ້ງນີ້, 2 ຝ່າຍໄດ້ນຳການພົວພັນລະຫວ່າງ 2 ປະເທດໃຫ້ຂຶ້ນສູ່ລະດັບສູງໃໝ່ - ການພົວພັນຄູ່ຮ່ວມມືຍຸດທະສາດຮອບດ້ານ.
ປະທານສະພາແຫ່ງຊາດ ຫງວຽນທິກິມເງິນ ຕ້ອນຮັບນາຍົກລັດຖະມົນຕີ ອິນເດຍ Narendra Modi ຢ້ຽມຢາມ ຫວຽດນາມ ໃນວັນທີ 3/9
(ພາບ: TTXVN)
|
ປະສິດທິຜົນແທດຈິງຂອງການພົວພັນ ຫວຽດນາມ - ອິນເດຍ
ການພົວພັນດ້ານເສດຖະກິດ, ການຄ້າລະຫວ່າງ ຫວຽດນາມ ແລະ ອິນເດຍ ມີບັນດາການຫັນປ່ຽນຢ່າງຕັ້ງໜ້າທີ່ສຸດ. ປະຈຸບັນ, ອິນເດຍ ໄດ້ກາຍເປັນຫນຶ່ງໃນ 10 ຄູ່ຮ່ວມມືການຄ້າໃຫຍ່ທີ່ສຸດຂອງ ຫວຽດນາມ, ໃນຂະນະນັ້ນ ຫວຽດນາມ ກໍ່ແມ່ນຄູ່ຮ່ວມມືບຸລິມະສິດແຖວໜ້າໃນນະໂຍບາຍ “ມຸ່ງໄປສູ່ທິດຕາເວັນອອກ” ຂອງອິນເດຍ. ວົງເງິນການຄ້າ 2 ສົ້ນຄ່ອຍໆເພີ່ມຂຶ້ນໃນແຕ່ລະປີ, ປີ 2013 ບັນລຸ 5,23 ຕື້ USD, ປີ 2014 ບັນລຸ 5,6 ຕື້ USD ແລະ 9 ເດືອນຕົ້ນປີ 2016 ບັນລຸ 3,9 ຕື້ USD, 2 ຝ່າຍພວມມຸ່ງໄປເຖິງຄາດໝາຍບັນລຸ 15 ຕື້ USD ໃນປີ 2020. ອິນເດຍ ຢືນອັນດັບທີ 28 ໃນຈຳນວນ 116 ປະເທດ ແລະ ເຂດແຄ້ວນລົງທຶນເຂົ້າ ຫວຽດນາມ. ປະຈຸບັນ, ອິນເດຍ ມີ 118 ໂຄງການລົງທຶນຍັງມີຜົນສັກສິດຢູ່ ຫວຽດນາມ ດ້ວຍຍອດວົງເງິນຈົດທະບຽນ 590 ລ້ານ USD.
ກ່ຽວກັບດ້ານການສຶກສາ - ບຳລຸງສ້າງ, ອິນເດຍ ພວມຊ່ວຍ ຫວຽດນາມ ບຳລຸງສ້າງແຫຼ່ງຊັບພະຍາກອນມະນູດຄຸນນະພາບສູງໃນຫຼາຍຂົງເຂດຄື: ເຕັກໂນໂລຢີຂໍ້ມູນຂ່າວສານ, ເສດຖະກິດ, ກົດໝາຍ, ພາສາອັງກິດ… ຜ່ານການສະໜອງທຶນສຶກສາໄລຍະສັ້ນ ແລະ ໄລຍະຍາວ.
ການພົວພັນລະຫວ່າງບັນດາອົງການນິຕິບັນຍັດ 2 ປະເທດ ໃນຊຸມປີຜ່ານມາໄດ້ຮັບການປັບປຸງ ແລະ ພັດທະນາຢ່າງຕັ້ງໜ້າ, ປະກອບສ່ວນສຳຄັນເຂົ້າໃນການພັດທະນາການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງ ອິນເດຍ ແລະ ຫວຽດນາມ. ສະພາແຫ່ງຊາດ 2 ປະເທດເພີ່ມທະວີການແລກປ່ຽນຂໍ້ມູນຂ່າວສານ, ແລກປ່ຽນບັນດາຄະນະຜູ້ແທນຂັ້ນສູງ, ຂັ້ນກຳມາທິການ, ບັນດາສະມາຊິກສະພາແຫ່ງຊາດ, ກຸ່ມສະມາຊິກສະພາແຫ່ງຊາດ ເພື່ອແບ່ງປັນບົດຮຽນໃນການເຄື່ອນໄຫວ, ສະໜັບສະໜູນ ແລະ ສ້າງເງື່ອນໄຂກ່ຽວກັບດ້ານນະໂຍບາຍ, ກົດໝາຍໃນການພົວພັນມິດຕະພາບ, ການຮ່ວມມື 2 ຝ່າຍ, ພິເສດແມ່ນບັນດາບັນຫາທີ່ທັງ 2 ຝ່າຍຕ່າງມີຄວາມສົນໃຈ, ມີຜົນປະໂຫຍດແທດຈິງ ກ່ຽວກັບດ້ານການເມືອງ, ການປ້ອງກັນຊາດ - ປ້ອງກັນຄວາມສະຫງົບ ແລະ ວິທະຍາສາດ - ເຕັກໂນໂລຢີ.
ທີ່ບັນດາເວທີປາໄສລັດຖະສະພາສາກົນ ແລະ ພາກພື້ນ, ບັນດາຄະນະສະມາຊິກສະພາແຫ່ງຊາດຂອງ 2 ປະເທດໄດ້ແບ່ງປັນ ແລະ ສະໜັບສະໜູນບັນດາທັດສະນະເຊິ່ງການນຳ 2 ປະເທດໄດ້ເປັນເອກະພາບນຳກັນກ່ຽວກັບສະພາບການສາກົນ, ພິເສດແມ່ນທັດສະນະກ່ຽວກັບທະເລຕາເວັນອອກ. ສະພາແຫ່ງຊາດ ອິນເດຍ ໄດ້ສະໜັບສະໜູນສະພາແຫ່ງຊາດ ຫວຽດນາມ ເປັນປະທານຈັດຕັ້ງກອງປະຊຸມໃຫຍ່ສະຫະພັນລັດຖະສະພາສາກົນຄັ້ງທີ 132 (IPU – 132) ໃນປີ 2015.
ການຢ້ຽມຢາມ ສ. ອິນເດຍ ຢ່າງເປັນທາງການຂອງທ່ານນາງປະທານສະພາແຫ່ງຊາດ ຫງວຽນທິກິມເງິນ ມີຄວາມໝາຍສຳຄັນ, ເຮັດໃຫ້ການພົວພັນລະຫວ່າງ ຫວຽດນາມ ແລະ ອິນເດຍ ເລິກເຊິ່ງຂຶ້ນຕື່ມ, ຫັນການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງ 2 ປະເທດເປັນລະອຽດ, ປັບປຸງ ແລະ ເພີ່ມທະວີການຮ່ວມມືຫຼາຍດ້ານລະຫວ່າງ ຫວຽດນາມ - ອິນເດຍ ໃນສະພາບທີ່ 2 ປະເທດ ມຸ່ງໄປເຖິງການສະເຫຼີມສະຫຼອງ 45 ປີແຫ່ງວັນສ້າງຕັ້ງການພົວພັນທາງການທູດ (1972 – 2017) ແລະ 10 ປີແຫ່ງວັນສ້າງຕັ້ງການພົວພັນຄູ່ຮ່ວມມືຍຸດທະສາດ (2007 – 2017). ການຢ້ຽມຢາມກໍ່ເພື່ອແນໃສ່ຊຸກຍູ້ການພົວພັນລະຫວ່າງສະພາແຫ່ງຊາດ ຫວຽດນາມ ແລະ ບັນດາອົງການນິຕິບັນຍັດ ອິນເດຍ ໃຫ້ເລິກເຊິ່ງ, ກ້ວາງຂວາງຂຶ້ນຕື່ມ, ສ້າງພື້ນຖານຢ່າງໜັກແໜ້ນໃຫ້ແກ່ການພົວພັນມີສະຖຽນລະພາບໃນໄລຍະຍາວນານ ກັບ ອິນເດຍ, ໃນສະພາບການທີ່ ຫວຽດນາມ ພວມເຊື່ອມໂຍງນັບມື້ນັບເລິກເຊິ່ງ, ກ້ວາງຂວາງເຂົ້າກັບພາກພື້ນ ແລະ ໂລກ.