(vovworld),vov- ຄືດັ່ງພວກເຮົາໄດ້ໃຫ້ຂ່າວໄປແລ້ວ, ວັນທີ 23/9 ທ່ານນາຍົກລັດຖະມົນຕີ ຫງວຽນເຕີນຢູງ ແລະ ພັນລະຍາເລີ່ມຕົ້ນການຢ້ຽມຢາມ ສຝລ່ັງ ຢ່າງເປັນທາງການ ແຕ່ວັນທີ 24 - 26/9/2013. ການຢ້ຽມຢາມ ຝລັ່ງຂອງທ່ານນາຍົກລັດຖະມົນຕີຫວຽດນາມ ຫງວຽນເຕີນຢູງ ຄັ້ງນີ້ ໄດ້ຮັບການຕີລາຄາວ່າ ແມ່ນການຢ້ຽມຢາມຄັ້ງປະຫວັດສາດ, ສ້າງພື້ນຖານອັນໝັ້ນແກ່ນກວ່າ ເພື່ອໃຫ້ຫວຽດນາມ ແລະ ຝລັ່ງ ຊຸກຍູ້ການພົວພັນຮ່ວມມືສອງຝ່າຍໃນທຸກຂົງເຂດຢ່າງແຂງແຮງກວ່າ ແລະ ຄວາມແທດຈິງ.
ທ່ານນາຍົກລັດຖະມົນຕີ ຫງວຽນເຕີນຢູງ ແລະ ທ່ານFrancois Hollande ປະທານາທິບໍດີ ຝລັ່ງ
ພາບ:internet
|
ຫວຽດນາມ ແລະ ຝລ່ັງ ສ້າງສາຍພົວພັນທາງການທູດເມື່ອວັນທີ 12/4/1973. ໃນຕະຫລອດ 40 ປີຜ່ານມາ, ຫວຽດນາມ ແລະ ຝລັ່ງ ບໍ່ພຽງແຕ່ແລກປ່ຽນຄະນະຜູ້ແທນຂັ້ນສູງຫລາຍຄະນະເພື່ອເພີ່ມທະວີການພົວພັນດ້ານການເມືອງທີ່ໄວ້ເນື້ອເຊື່ອໃຈ, ຮັດແຫນ້ນຄວາມເຂົ້າອົກເຂົ້າໃຈເຊິ່ງກັນ ແລະກັນ ເທົ່ານັ້ນ ຫາກຍັງສ້າງຫລາຍກົນໄກຮ່ວມມືສອງຝ່າຍ ນັບທັງການເຈລະຈາຂັ້ນຍຸດທະສາດ ແລະ ການເຈລະຈາຂັ້ນສູງປະຈຳປີໃນທຸກຂົງເຂດຄື: ເສດຖະກິດ, ການປ້ອງກັນຊາດ, ປ້ອງກັນຄວາມສະຫງົບ. ມາຮອດປະຈຸບັນ, ຝລັ່ງ ໄດ້ກາຍເປັນຄູ່ຄ້າເອີລົບລາຍໃຫຍ່ທີ 3 ຂອງຫວຽດນາມ ດ້ວຍວົງເງິນການຄ້າສອງສົ້ນບັນລຸ 3,2 ຕື້ USD ໃນປີ 2012, ໃນນັ້ນ ຫວຽດນາມສົ່ງອອກບັນດາປະເພດສິນຄ້າຕົ້ນຕໍຄື: ເກີບຫນັງ, ເຄື່ອງຕຳ່ແຜ່ນຕັດຫຍິບ, ເຄື່ອງໃຊ້ໃນຄອບຄົວ, ສິນໃນນ້ຳ, ກົນຈັກອຸປະກອນ, ເຄື່ອງອາໄຫລ່ເອເຕັກໂຕນິກ, ສ່ວນປະເພດສິນຄ້າທີ່ນຳເຂົ້າຈາກ ຝລ່ັງ ນັ້ນແມ່ນ: ອຸປະກອນການບິນ, ການຢາ, ຜະລິດຕະພັນກົນຈັກ, ຜະລິດຕະພັນເອເລັກໂຕນິກ, ເຄມີ ແລະ ເຄື່ອງດື່ມ. ໄລ່ມາຮອດທ້າຍປີ 2012, ຝລັ່ງ ຢືນອັນດັບ 2 ໃນບັນດາປະເທດ ເອີລົບ ແລະ ຢືນອັນດັບທີ 15 ໃນຍອດຈຳນວນ 92 ປະເທດ ແລະ ເຂດແຄ້ວນລົງທຶນເຂົ້າ ຫວຽດນາມ ດ້ວຍ 375 ໂຄງການ ແລະ ຈຳນວນທຶນຂຶ້ນເຖິງ 3,1 ຕື້ USD. ຍາມໃດ ຝລັ່ງ ກໍຮັກສາທີ່ຕັ້ງນັກອຸປະຖຳເອີລົບສອງຝ່າຍ ODA ໃຫຍ່ສຸດຂອງຫວຽດນາມ ດ້ວຍຍອດຈຳນວນທຶນອຸປະຖຳ 2,5 ຕື້ USD ແມ່ນສຸມໃສ່ບຸລິມະສິດເຂົ້າຂົງເຂດກໍ່ສ້າງພື້ນຖານໂຄງລ່າງເສດຖະກິດ ສັງຄົມ, ຖ່າຍທອດເຕັກໂນໂລຊີ, ກະສິກຳ, ອຸດສາຫະກຳ ແລະ ການເງິນ. ເມື່ອຕອບສຳພາດຕໍ່ນັກຂ່າວວິທະຍຸກະຈາຍສຽງຫວຽດນາມ ປະຈຳຝລັ່ງ,ທ່ານ ເອກອັກຄະລັດຖະທູດ ເຢືອງຈີຢູງ ໃຫ້ຮູ້ວ່າ:
“ປະຈຸບັນ, ກ່ຽວກັບການສຶກສາ, ບຳລຸງສ້າງ, ພວກເຮົາມີນັກຮຽນ, ນັກສຶກສາກວ່າ 7000 ຄົນ ພວມຮຳ່ຮຽນຢູ່ ຝລັ່ງ. ໃນຂົງເຂດສາທາລະນະສຸກ, ປະເທດ ຝລັ່ງ ຊ່ວຍບຳລຸງສ້າງທ່ານໝໍ, ສາດສະດາຈານຂະແຫນງຕົ້ນຕໍ ໃຫ້ແກ່ພວກເຮົາກວ່າ 2500 ຄົນ ແລະ ມາຮອດປະຈຸບັນ ກຳລັງແກ່ນສານຂອງຖັນແຖວການແພດ ຂອງພວກເຮົາ ສ່ວນຫລາຍແມ່ນຮຳ່ຮຽນ, ເຮັດວຽກ ແລະ ເຕີບໃຫຍ່ຢູ່ ຝລັ່ງ. ນອກນັ້ນ ປະຈຸບັນ ມີ 50 ທ້ອງຖິ່ນຂອງຝລັ່ງ ແລະ ຫວຽດນາມ ໄດ້ຮ່ວມມືກັນຢ່າງແຫນ້ນແຟ້ນໃນຫລາຍບັນຫາຄື: ຄຸ້ມຄອງຕົວເມືອງ, ການວາງແຜນຜັງ, ປົກປັກຮັກສາສິ່ງແວດລ້ອມ. ການຮ່ວມມືນັ້ນແມ່ນສຳຄັນ ເພາະວ່າ ການຮ່ວມມືຈາກຮາກຖານ, ຈະສ້າງຄວາມຕິດພັນ ແລະ ການຮ່ວມມືລະຫວ່າງສອງປະເທດ, ສອງລັດຖະບານ.”
ກ່ອນນີ້ 20 ປີ, ການຢ້ຽມຢາມຫວຽດນາມ ຂອງທ່ານປະທານາທິບໍດີ ຝລ່ັງ Mitterrand ເມື່ອປີ 1993 ໄດ້ເປັນຂີດໝາຍສຳຄັນ, ເປີດໄລຍະໃຫມ່ໃນການພົວພັນ ແລະ ຊຸກຍູ້ການຮ່ວມມືລະຫວ່າງສອງປະເທດ, ການຢ້ຽມຢາມ ຝລັ່ງ ຄັ້ງນີ້ຂອງທ່ານນາຍົກລັດຖະມົນຕີ ຫງວຽນເຕີນຢູງ ດຳເນີນໄປໃນໄລຍະການພົວພັນລະຫວ່າງສອງປະເທດ ຫວຽດນາມ ແລະ ຝລັ່ງ ພວມພັດທະນາຢ່າງເລິກເຊິ່ງ ແລະ ກວ້າງຂວາງ ແລະ ຮອດເວລາກ້າວໄປເຖິງການສ້າງສາຍພົວພັນຄູ່ຮ່ວມມືຍຸດທະສາດ. ນີ້ເປັນຂີດໝາຍສຳຄັນໃນຈຸດເວລາທີ່ສອງປະເທດສະເຫລີມສະຫລອງ 40 ປີແຫ່ງວັນສ້າງສາຍພົວພັນທາງການທູດລະຫວ່າງສອງຝ່າຍ. ເມື່ອຕອບສຳພາດຕໍ່ນັກຂ່າວວິທະຍຸກະຈາຍສຽງຫວຽດນາມປະຈຳ ປາຣີ, ທ່ານ Claude Blanchemaison ອະດີດເອກອັກຄະລັດຖະທູດ ຝລັ່ງ ປະຈຳຫວຽດນາມ ໄດ້ຊີ້ແຈ້ງວ່າ:
“ຢູ່ ອາຊີ, ຫວ່າງແລ້ວນີ້ ຫວຽດນາມ ໄດ້ລົງນາມໃນຂໍ້ຕົກລົງຄູ່ຮ່ວມມືຍຸດທະສາດກັບສິງກະໂປ, ສ່ວນຢູ່ ເອີລົບ ພາຍຫລັງລົງນາມກັບເຢຍລະມັນ ແລະ ອັງກິດ, ຫວຽດນາມໄດ້ລົງນາມກັບ ແດນມາກ. ຄວາມຈິ່ງດັ່ງກ່າວສະແດງໃຫ້ເຫັນຄວາມຂະຫຍັນຂັນເຄື່ອນ ແລະ ລັກສະນະດູດດື່ມຂອງຫວຽດນາມ ສຳລັບໂລກ. ສຳລັບ ຝລ່ັງ, ຫວຽດນາມ ແລະ ຝລັ່ງ ມີສາຍພົວພັນມາແຕ່ດົນນານ ແລະ ມີຫລາຍຈຸດທີ່ຄ້າຍຄືກັນກ່ຽວກັບວັດທະນະທຳ, ສອງຝ່າຍຕັດສິນໃຈພ້ອມກັນທະວີຄູນການຮ່ວມມືໃນທຸກຂົງເຂດ. ນັ້ນແມ່ນພື້ນຖານສ້າງສາຍພົວພັນຄູ່ຮ່ວມມືຍຸດທະສາດລະຫວ່າງສອງປະເທດພວກເຮົາ. ”
ສະນັ້ນ ການຢ້ຽມຢາມຝລ່ັງຄັ້ງນີ້ ຂອງທ່ານນາຍົກລັດຖະມົນຕີ ຫງວຽນເຕີນຢູງ ຈະພ້ອມກັບບັນດາການນຳ ຝລ່ັງ ສົ່ງສານຢ່າງຈະແຈ້ງກ່ຽວກັບບົດບາດ,ທີ່ຕັ້ງຂອງຫວຽດນາມ ແລະ ຝລັ່ງ ກໍຄືເຫັນດີເປັນເອກະພາບຕໍ່ບັນດາມາດຕະການລະອຽດ ເພື່ອປະຕິບັດການພົວພັນຄູ່ຮ່ວມມືຍຸດທະສາດລະຫວ່າງສອງປະເທດໃຫ້ປະກົດຜົນເປັນຈິງ, ເປັນຕົ້ນແມ່ນຍູ້ແຮງການຮ່ວມມືເສດຖະກິດເຂົ້າສູ່ລວງເລິກ, ສ້າງບາດກ້າວບຸກທະລຸໃນການພັດທະນາດ້ານການຄ້າ, ການຮ່ວມມືລົງທຶນ, ວິທະຍາສາດເຕັກໂນໂລຊີ, ການສຶກສາບຳລຸງສ້າງ ແລະ ວັດທະນະທຳລະຫວ່າງສອງປະເທດ. ການພົວພັນຄູ່ຮ່ວມມືຍຸດທະສາດຈະແມ່ນກົນໄກເພື່ອໃຫ້ຫວຽດນາມ ແລະ ຝລັ່ງ ຫຍັບໃກ້ກັນກວ່າ, ແລກປ່ຽນບັນດາບັນຫາຍຸດທະສາດ, ບັນຫາການຮ່ວມມືຢ່າງແທດຈິງກວ່າ ເພື່ອພ້ອມກັນພັດທະນາ, ພອ້ມກັນປະກອບສ່ວນໃຫ້ແກ່ສັນຕິພາບ, ສະຖຽນລະພາບ, ມິດຕະພາບ ແລະ ວັດທະນາຖາວອນໃນໂລກ.