(vovworld)- ໂດຍໄດ້ຮັບຄຳເຊີນຂອງທ່ານປະທານປະເທດຫວຽດນາມ ເຈືອງເຕິນຊາງ, ທ່ານປະທານາທິບໍດີມົງໂກນ Tsakhiagin Elbegdorja ໄດ້ມາຢ້ຽມຢາມຫວຽດນາມ ທາງລັດຖະກິດແຕ່ວັນທີ 21-24/11/2013. ການຢ້ຽມຢາມຫວຽດນາມ ຂອງຜູ້ນຳລັດມົງໂກນ ດຳເນີນໄປໃນສະພາບການສອງປະເທດພວມກະກຽມສະເຫຼີມສະຫຼອງ 60 ປີແຫ່ງວັນສ້າງຕັ້ງສາຍພົວພັນທາງການທູດ (17/11/1954-17/11/2014) ຈະປະກອບສ່ວນຊຸກຍູ້ການພົວພັນຮ່ວມມືລະຫວ່າງຫວຽດນາມ ແລະ ມົງໂກນ, ໂດຍສະເພາະແມ່ນໃນໄລຍະສ້າງສາ, ພັດທະນາປະເທດຊາດ, ເຊື່ອມໂຍງເຂົ້າກັບພາກພື້ນ ແລະ ສາກົນຢູ່ແຕ່ລະປະເທດໃນປະຈຸບັນ.
ທ່ານປະທານາທິບໍດີມົງໂກນ Tsakhiagin Elbegdorja
(ພາບ: ກະຊວງການຕ່າງປະເທດ)
ປະເທດມົງໂກນນອນໃນເຂດອາຊີກາງ, ເສດຖະກິດຂອງມົງໂກນ ຂຶ້ນກັບຂະແໜງຂຸດຄົ້ນບໍ່ແຮ່ ແລະ ລ້ຽງສັດເປັນຕົ້ນ. ມົງໂກນ ແມ່ນ 1 ໃນຈຳນວນ 10 ປະເທດມີແຫຼ່ງໂລຫະຫຼາຍກ່ວາໝູ່ໃນໂລກ ແລະ ຂະແໜງອຸດສາຫະກຳຕົ້ນຕໍແມ່ນຂຸດຄົ້ນໂລຫະ. ໃນຊຸມປີມໍ່ໆມານີ້, ການເຕີບໂຕເສດຖະກິດຍາມໃດກໍ່ຮັກສາໃນລະດັບ 2 ຕົວເລກ, ປີ 2012, ລາຍຮັບສະເລ່ຍຕໍ່ຫົວຄົນແມ່ນກ່ວາ 3500 ໂດລາສະຫະລັດ. ປະຈຸບັນ, ມົງໂກນ ມີການພົວພັນດ້ານການຄ້າກັບ 120 ປະເທດ ແລະ ເຂດແຄ້ວນ.
ພື້ນຖານການພົວພັນມິດຕະພາບທີ່ເປັນມູນເຊື້ອອັນດີງາມ
ວັນທີ 17/11/1954, ການພົວພັນທາງການທູດລະຫວ່າງຫວຽດນາມ-ມົງໂກນ ໄດ້ຮັບການສ້າງຕັ້ງຂຶ້ນ. ການຢ້ຽມຢາມມົງໂກນ ຢ່າງເປັນທາງການເມື່ອເດືອນ 7/1955 ຂອງຄະນະຜູ້ແທນຂັ້ນສູງພັກ ແລະ ລັດຖະບານຫວຽດນາມ ໂດຍປະທານໂຮ່ຈິມິນ ນຳໜ້າ ແລະ ການຢ້ຽມຢາມຫວຽດນາມ ຂອງທ່ານເລຂາຜູ້ທີໜຶ່ງສູນກາງພັກ ປຊຊ ປະຕິວັດມົງໂກນ Iu.Sedenban ເມື່ອເດືອນ 9/1959 ໄດ້ສ້າງພື້ນຖານອັນໝັ້ນຄົງໃຫ້ແກ່ສາຍພົວພັນມິດຕະພາບລະຫວ່າງສອງປະເທດ.
ໃນເກືອບ 60 ປີຜ່ານມາ, ຍາມໃດ ຫວຽດນາມ ແລະ ມົງໂກນ ກໍ່ໄດ້ສະຫນັບສະໜູນ ແລະ ສົມທົບກັນຢ່າງແໜ້ນແຟ້ນບົນເສັ້ນທາງສ້າງສາ ແລະພັດທະນາປະເທດຊາດ. ມົງໂກນ ໄດ້ຕັ້ງໜ້າສະໜັບສະໜູນ ປຊຊ ຫວຽດນາມ ໃນໄລຍະຕໍ່ຕ້ານຕ້ານຈັກກະພັດອາເມລິກາ ແລະ ຊ່ວຍບຳລຸງສ້າງພະນັກງານວິທະຍາສາດເຕັກນິກ, ສັດຕະວະແພດ, ລ້ຽງສັດ… ສ່ວນຫວຽດນາມ ໄດ້ຕັ້ງໜ້າຊ່ວຍມົງໂກນ ໃນວຽກງານຕ່າງໆຄື: ສົ່ງຜູ້ຊ່ຽວຊານໄປມົງໂກນ ສຳຫຼວດ ແລະ ພັດທະນາຄົມມະນາຄົມ, ປູກຕົ້ນໄມ້, ສ້ອມແປງເຮືອນຢູ່ ແລະ ບູລະນະບັນດາປູສະນີຍະສະຖານປະຫວັດສາດ. ຫວຽດນາມ ຍັງອຸປະຖຳດ້ານທັນຍາຫານ ແລະ ການເງິນເພື່ອໃຫ້ມົງໂກນ ແກ້ໄຂຜົນຮ້າຍຈາກໄພທຳມະຊາດ, ຮັບ ແລະ ບຳລຸງສ້າງນັກສຶກສາມົງໂກນ ໃນຫຼາຍຂະແໜງແຕ່ງກັນ.
ວາລະປະຊຸມຄັ້ງທີ 15 ຄະນະກຳມະການ
ລະຫວ່າງລັດຖະບານຫວຽດນາມ-ມົງໂກນ
(ພາບ: ven.vn)
ເພື່ມທະວີການຮ່ວມມືໃນໄລຍະໃໝ່
ໃນໄລຍະຜ່ານມາ, ການຢ້ຽມຢາມ ແລະ ພົບປະລະຫວ່າງການນຳຂັ້ນສູງສອງປະເທດຄັ້ງຕ່າງໆສືບຕໍ່ໄດ້ຮັບການຮັກສາໄວ້. ການພົບປະແລກປ່ຽນລະຫວ່າງບັນດາກະຊວງ, ຂະແໜງການໄດ້ດຳເນີນເປັນປະຈຳ, ການຮ່ວມມືດ້ານປ້ອງກັນຊາດ ປ້ອງກັນຄວາມສະຫງົບມີຄວາມຄຶບໜ້າຫຼາຍຢ່າງ. ຍາມໃດ, ມົງໂກນ ກໍ່ຖືການພົວພັນມິດຕະພາບອັນເປັນມູນເຊື້ອກັບຫວຽດນາມ ເປັນສຳຄັນ, ຖືວ່າ, ຫວຽດນາມ ແມ່ນໜຶ່ງໃນບັນດາຄູ່ຮ່ວມມືສຳຄັນຢູ່ພາກພື້ນອາຊີ-ປາຊີຟິກ.
ປະເທດມົງໂກນ
(ພາບ: khamphaviet.vn)
ເດືອນ 12/2012, ຫວຽດນາມ ແລະ ມົງໂກນ ໄດ້ຮັບຮອງກັນມີຂໍ້ກຳນົດເສດຖະກິດການຕະຫຼາດຄົບຖ້ວນ. ແຕ່ເຖິງແນວ ນັ້ນກໍ່ຕາມ, ການພົວພັນຮ່ວມມືດ້ານເສດຖະກິດລະຫວ່າງຫວຽດນາມ-ມົງໂກນ ບໍ່ທັນມີການພັດທະນາດັ່ງຄວາມປາດຖະໜາເທື່ອ. ການຄ້າສອງຝ່າຍຮັກສາໃນລະດັບຕ່ຳ: ວົງເງິນການຄ້າສອງສົ້ນປີ 2012 ບັນລຸ 16,3 ລ້ານໂດລາສະຫະລັດ. ສອງຝ່າຍຍັງຮັກສາກົນໄກຄະນະກຳມະການລະຫວ່າງລັດຖະບານຫວຽດນາມ-ມົງໂກນ ເປັນປະຈຳ.
ກ່ຽວກັບການຮ່ວມມືດ້ານການສຶກສາ, ສອງຝ່າຍໄດ້ລົງນາມໃນສັນຍາກ່ຽວກັບການຮ່ວມມືດ້ານການສຶກສາໄລຍະ 2013-2016, ຕາມນັ້ນແລ້ວ, ແຕ່ລະປີ, ຫວຽດນາມ ຮັບບຳລຸງສ້າງນັກສຶກສາມົງໂກນ 15 ຄົນ ແລະ ມົງໂກນ ບຳລຸງສ້າງນັກສຶກສາຫວຽດນາມ 5 ຄົນ. ປະຈຸບັນ, ມີນັກສຶກສາຫວຽດນາມ 20 ຄົນພວກຮ່ຳຮຽນຢູ່ມົງໂກນ ແລະ ນັກສຶກສາມົງໂກນ ກ່ວາ 500 ຄົນພວມຮ່ຳຮຽນຢູ່ຫວຽດນາມ. ສອງປະເທດຍັງມີການຮ່ວມມືກັນເປັນຢ່າງດີຢູ່ບັນດາເວທີປາໄສຂອງສະຫະປະຊາຊາດ.
ໃນວິວັດແຫ່ງການສ້າງສາ ແລະ ພັດທະນາປະເທດຊາດ, ເຊື່ອມໂຍງເຂົ້າກັບພາກພື້ນ ແລະ ສາກົນປະຈຸບັນ, ຫວຽດນາມ ແລະ ມົງໂກນ ຍັງສືບຕໍ່ໜູນຊ່ວຍຊື່ງກັນ ແລະ ກັນໃນທຸກຂົງເຂດ. ພື້ນຖານຂອງສາຍພົວພັນຮ່ວມມືມິດຕະພາບລະຫວ່າງສອງປະເທດ ໄດ້ຮັບການທົດສອບໃນເກືອບ 60 ປີຜ່ານມາ ແມ່ນກຳລັງໜູນເພື່ອໃຫ້ສອງປະເທດສືບຕໍ່ຮ່ວມມືກັນບົນເສັ້ນທາງສ້າງສາ, ພັດທະນາຢູ່ແຕ່ລະປະເທດ. ການຢ້ຽມຢາມຫວຽດນາມ ຄັ້ງນີ້ຂອງປະທານາທິບໍດີມົງໂກນ Tsakhiagin Elbegdorja ເພື່ອແນໃສ່ຜັນຂະຫຍາຍນະໂຍບາຍການຕ່າງປະເທດຂອງມົງໂກນ ທີ່ມີຕໍ່ພາກພື້ນອາຊີ-ປາຊີຝິກ, ເປີດກ້ວາງການພົວພັນກັບບັນດາປະເທດອາຊຽນ, ໃນນັ້ນມີຫວຽດນາມ, ພ້ອມທັງນຳການພົວພັນຫວຽດນາມ-ມົງໂກນ ພັດທະນາຢ່າງເລິກເຊິ່ງກ້ວາງຂວາງໃນໄລຍະຈະມາເຖິງ./.