(vovworld)- ວັນທີ 4/11, ປະທານາທິບໍດີ ສາທາລະນະລັດ ໄອແລນ, Olafur Ragnar Grimsson ແລະ ພັນລະຍາ ໄດ້ເລີ່ມຕົ້ນບັນດາການເຄື່ອນໄຫວ ໃນການຢ້ຽມຢາມທາງລັດຖະກິດ ຫວຽດນາມ ແຕ່ວັນທີ 4-6/11 ຕາມຄຳເຊີນຂອງທ່ານປະທານປະເທດຫວຽດນາມ ເຈືອງເຕີນຊາງ. ການຢ້ຽມຢາມຂອງທ່ານ ປະທານາທິບໍດີ Olafur Ragnar Grimsson ເປັນຂີດໝາຍສຳຄັນໃນການພົວພັນສອງຝ່າຍ, ເປີດບັນດາກາລະໂອກາດຂຸດຄົ້ນຄວາມສາມາດບົ່ມຊ້ອນການຮ່ວມມືລະຫວ່າງສອງປະເທດຢ່າງສຸດຂີດ. ບົດຂຽນຂອງນັກຂ່າວ ແອງຮ່ວຽນ.
ປະທານາທິບໍດີ ສາທາລະນະລັດ Iceland
Olafur Ragnar Grimsson
|
ໄອແລນ ແມ່ນປະເທດຂຶ້ນກັບ ເອີລົບເຫນືອ, ມີລາຍຮັບສະເລ່ຍໃສ່ຫົວຄົນ51.000 ກວ່າ USD/ປີ ນອນໃນກຸ່ມບັນດາປະເທດມີລາຍຮັບສູງກວ່າໝູ່ໃນໂລກ. ການເຕີບໂຕເສດຖະກິດຢູ່ໃນລະດັບສູງແຖວຫນ້າຂອງໂລກໃນໄລຍະຍາວ ໄດ້ເຮັດໃຫ້ ໄອແລນ ຈາກປະເທດມີລາຍຮັບຕ່ຳຂອງເອີລົບ ກາຍເປັນປະເທດອຸດສາຫະກຳພັດທະນາ, ໄດ້ຮັບຖືວ່າ ແມ່ນແບບຢ່າງໃຫ້ບັນດາປະເທດພວມພັດທະນາ ເພື່ອຄົ້ນຄ້ວາ, ຖອດຖອນບົດຮຽນ. ໂດຍແມ່ນປະເທດພວມພັດທະນາຢູ່ ອາຊີຕາເວັນອອກສ່ຽງໃຕ້, ຫວຽດນາມ ແລະ ໄອແລນ ມີຄວາມສາມາດບົ່ມຊ້ອນຫລາຍຢ່າງ ແລະ ກາລະໂອກາດຮ່ວມມືເສດຖະກິດ, ແລກປ່ຽນການຄ້າ ແລະ ການລົງທຶນ.
ການພົວພັນສອງຝ່າຍພັດທະນາອັນດີງາມ
ຫວຽດນາມ ແລະ ໄອແລນ ຮັກສາການພົວພັນມິດຕະພາບອັນດີງາມ ນັບແຕ່ເມື່ອສ້າງຕັ້ງການພົວພັນທາງການທູດໃນປີ 1973. ສອງປະເທດພວມຮັກສາການພົວພັນສອງຝ່າຍຢ່າງຕັ້ງຫນ້າ. ສອງປະເທດໄດ້ແລກປ່ຽນຄະນະຜູ້ແທນຂັ້ນສູງເປັນຫລາຍຄັ້ງ. ເດືອນ 6/1995, ທ່ານນາຍົກລັດຖະມົນຕີ ຫວໍວັນກຽດ ໄປຢ້ຽມຢາມ ໄອແລນ ແລະ ເດືອນ 9/2002, ນາຍົກລັດຖະມົນຕີ ຟານວັນຂາຍ ໄປຢ້ຽມຢາມ ໄອແລນ. ສ່ວນທ່ານນາຍົກລັດຖະມົນຕີ ໄອແລນ ມາຢ້ຽມຢາມ ຫວຽດນາມ ເມື່ອເດືອນ 4/2002, ຫວ່າງແລ້ວນີ້ ທ່ານຮອງນາຍົກລັດຖະມົນຕີ ຮ່ວາງຈູງຫາຍ ຢ້ຽມຢາມ ໄອແລນ ເມື່ອເດືອນ 9/2011.
ສອງປະເທດ ໄດ້ລົງນາມໃນສັນຍາຫລີກລ້ຽງການເກັບພາສີຊ້ອນ, ສັນຍາສົ່ງເສີມ ແລະ ອາລັກຂາການລົງທຶນ,ສັນຍາຂົນສົ່ງທາງອາກາດ. ເຖິງຢ່າງໃດກໍຕາມ, ມາຮອດປະຈຸບັນ, ການພົວພັນດ້ານການຄ້າ ລະຫວ່າງ ຫວຽດນາມ ແລະ ໄອແລນ ຍັງຢູ່ໃນລະດັບຕ່ຳ, ການພົວພັນຄ້າຂາຍສິນຄ້າລະຫວ່າງສອງປະເທດ ຍັງຈຳກັດຢູ່. ຫວຽດນາມ ສົ່ງອອກສິນຄ້າໄປຍັງ ໄອແລນ ສ່ວນຫລາຍແມ່ນ ຜະລິດຕະພັນໄມ້, ເຄື່ອງຕ່ຳແຜ່ນຕັດຫຍິບ, ຜັກໝາກໄມ້… ໃນຂະນະນັ້ນ, ໄອແລນ ສົ່ງອອກສິນທະເລ ແລະ ກົນຈັກຈຳນວນຫນ້ອຍໄປຍັງຫວຽດນາມ. ວົງເງິນການຄ້າສອງສົ້ນປີ 2014 ບັນລຸພຽງ 6 ລ້ານ USD, 6 ເດືອນຕົ້ນປີ 2015 ບັນລຸ 9 ລ້ານ USD. ຈາກຄວາມຈິງນັ້ນ, ດ້ວຍຄວາມສາມາດບົ່ມຊ້ອນຂອງແຕ່ລະປະເທດ, ການຮ່ວມມືດ້ານເສດຖະກິດ ການຄ້າ ລະຫວ່າງຫວຽດນາມ ແລະ ໄອແລນ ຍັງມີກາລະໂອກາດເພື່ອພັດທະນາ.
ໃນຂົງເຂດຮ່ວມມືພັດທະນາ, ຫວຽດນາມ ແມ່ນຫນຶ່ງໃນ 9 ປະເທດ ໄດ້ຮັບການຊ່ວຍເຫລືອພັດທະນາຂອງ ໄອແລນ. ປີ 2005, ໄອແລນ ໃຫ້ຄຳໝັ້ນສັນຍາ ສະຫນອງທຶນ ODA 3,5 ລ້ານ ເອີໂຣ ໃຫ້ຫວຽດນາມ ແລະ ລ້ວນແຕ່ເພີ່ມຂຶ້ນແຕ່ລະປີ, ໂດຍສຸມໃສ່ບັນດາຂົງເຂດບຸລິມະສິດຂອງຫວຽດນາມ ນັ້ນຄື: ການລົບລ້າງຄວາມອຶດຫິວຫລຸດຜ່ອນຄວາມທຸກຍາກ, ສາທາລະນະສຸກ, ຍົກສູງກຳລັງຄວາມສາມາດລະບອບນະໂຍບາຍ, ພັດທະນາເສດຖະກິດພາກເອກະຊົນ, ປະຕິຮູບບໍລິຫານ, ຮັບມືກັບການປ່ຽນແປງຂອງດິນຟ້າອາກາດ. ກ່ຽວກັບການພົວພັນດ້ານປ້ອງກັນຊາດ, ຫວຽດນາມ ແລະ ໄອແລນ ພວມຜັນຂະຫຍາຍແຜນການຮ່ວມມືໃນບັນດາຂົງເຂດແກ້ໄຂຜົນຮ້າຍຢ້ອນຫລັງຈາກລູກລະເບີດບໍ່ທັນແຕກຍັງຕົກຄ້າງຢູ້ຫວຽດນາມ ຫລັງສົງຄາມ, ການຮ່ວມມືແກ້ໄຂຜົນຮ້າຍຢ້ອນຫລັງຈາກທາດພິດສີສົ້ມ, ຊອກຫາກູ້ໄພກູ້ຊີບ.
ມີຄວາມສາມາດບົ່ມຊອ້ນຫລາຍຢ່າງເພື່ອຮ່ວມມື
ຫວຽດນາມ ແລະ ບັນດາປະເທດໃນກຸ່ມ EFTA, ໃນນັ້ນ ມີໄອແລນ ພວມເຈລະຈາສັນຍາການຄ້າເສລີ, ສູ້ຊົນສຳເລັດໃນປີ 2015. ປະຈຸບັນ ຫວຽດນາມ ແລະ ໄອແລນ ໄດ້ລົງນາມໃນສັນຍາຫລີກລ້ຽງການເກັບພາສີຊ້ອນ, ຖະແຫລງການບັນດາຜົນປະໂຫຍດເຊິ່ງກັນ ແລະກັນໃນການສ້າງຄວາມສະດວກໃຫ້ການພົວພັນດ້ານການຄ້າລະຫວ່າງຫວຽດນາມ ແລະ ໄອແລນ, ສັນຍາສົ່ງເສີມ ແລະ ອາລັກຂາການລົງທຶນ, ສັນຍາຂົນສົ່ງທາງອາກາດ. ໄອແລນ ກໍໄດ້ຮັບຮອງເອົາໂຄງການຮ່ວມມືກັບຫວຽດນາມ ກ່ຽວກັບສິນໃນນ້ຳ, ໃນນັ້ນ ຮັບເອົາພະນັກງານຫວຽດນາມ ໄປຮ່ຳຮຽນຢູ່ ໂຮງຮຽນສິນໃນນ້ຳຂອງ ສປຊ ທີ່ ໄອແລນ, ສົ່ງຜູ້ຊ່ຽວຊານມາຫວຽດນາມ ຈັດຕັ້ງກອງປະຊຸມສຳມະນາ, ເປີດຊຸດອົບຮົມ.. ນີ້ແມ່ນບັນດາພື້ນຖານດ້ານນິຕິທຳສຳຄັນ ເພື່ອໃຫ້ສອງຝ່າຍຊຸກຍູ້ການຮ່ວມມືດ້ານການຄ້າ ແລະ ການລົງທຶນ. ຄຽງຄູ່ກັນນັ້ນ ປະຊາຄົມຊາວຫວຽດນາມ ຢູ່ ໄອແລນ ປະຈຸບັນ ມີປະມານ 1.000 ຄົນ ສ່ວນຫລາຍແມ່ນດຳລົງຊີວິດຢູ່ ນະຄອນຫລວງ Reykjavik ມີວຽກເຮັດງານທຳເປັນປົກກະຕິ, ຍາມໃດກໍເຄົາລົບກົດໝາຍຂອງປະເທດປະຈຳຖິ່ນ. ການພົວພັນອັນດີງາມລະຫວ່າງປະຊາຄົມຊາວຫວຽດນາມ ອາໄສ ຢູ່ ໄອແລນ ກັບອຳນາດການປົກຄອງ ແລະ ປະຊາຊົນໄອແລນ ເປັນຂົວຕໍ່ສຳຄັນເພື່ອໃຫ້ຫວຽດນາມ ແລະ ໄອແລນ ຊຸກຍູ້ການຮ່ວມມືໃນທຸກຂົງເຂດໃນໄລຍະຈະມາເຖິງ.
ບົນພື້ນຖານການພົວພັນອັນດີງາມນັ້ນ, ການຢ້ຽມຢາມຫວຽດນາມຂອງ ປະທານາທິບໍດີ ສາທາລະນະລັດ ໄອແລນ, Olafur Ragnar Grimsson ແມ່ນໂອກາດດີເພື່ອໃຫ້ສອງປະເທດຊຸກຍູ້ການຂຸດຄົ້ນບັນດາທ່າແຮງ ແລະ ຄວາມສາມາດບົ່ມຊ້ອນການຮ່ວມມື, ສ້າງເງື່ອນໄຂໃຫ້ວິສາຫະກິດສອງຝ່າຍຊອກຫາກາລະໂອກາດທຳມາຫາກິນ, ຊູກຍູ້ ການເຈລະຈາສັນຍາການຄ້າເສລີ ລະຫວ່າງ ຫວຽດນາມ ແລະ ກຸ່ມການຄ້າເສລີ ເອີລົບ (EFTA) ໃຫ້ສິ້ນສຸດ ໂດຍໄວ ຊື່ງ ໄອແລນ ເປັນສະມາຊິກ ພ້ອມທັງ ແລກປ່ຽນບັນດາບັນຫາຂອງພາກພື້ນ ແລະ ສາກົນ ຊື່ງຕ່າງຝ່າຍຕ່າງມີຄວາມສົນໃຈ. ການຢ້ຽມຢາມຫວຽດນາມຂອງທ່ານ ປະທານາທິບໍດີ ສາທາລະນະລັດ ໄອແລນ, Olafur Ragnar Grimsson ຈະຊຸກຍູ້ການຮ່ວມມືຢ່າງແຮງ, ນຳ ມາເຊິ່ງຜົນປະໂຫຍດແທດຈິງໃຫ້ປະຊາຊົນສອງປະເທດ.