(vovworld)-ສືບຕໍ່ຜັນຂະຫຍາຍແນວທາງການຕ່າງປະເທດເຊື່ອມໂຍງເຂົ້າກັບສາກົນ, ຄຽງຄູ່ກັບການຊຸກຍູ້ຮ່ວມມືໃນບັນດາກົນໄກຫລາຍຝ່າຍ, ຈຸດສຸມການເຄື່ອນໄຫວການຕ່າງປະເທດຂອງຫວຽດນາມ ໃນປີ 2015 ແມ່ນຕັ້ງຫນ້ານຳການພົວພັນກັບບັນດາຄູ່ຮ່ວມມືຍຸດທະສາດ, ຄູ່ຮ່ວມມືຮອບດ້ານເຂົ້າສູ່ລວງເລິກ, ມີປະສິດທິຜົນ, ເປີດກວ້າງ ແລະ ເຮັດໃຫ້ຂອບເຂດການພົວພັນກັບບັນດາຄູ່ຮ່ວມມືທີ່ເປັນມູນເຊື້ອ, ບັນດາປະເທດບ້ານໃກ້ເຮືອນຄຽງເລິກເຊິ່ງຂຶ້ນຕື່ມ.
ທ່ານນາຍົກລັດຖະມົນຕີ ຫງວຽນເຕີນຢູງ ແລະ
ທ່ານປະທານາທິບໍດີ ອາເມລິກາ B.Obama
ຢູ່ນອກກອງປະຊຸມ EAS9
ພາບ:tinmoi.vn
|
ນຳການພົວພັນລະຫວ່າງ ຫວຽດນາມ ແລະ ອາເມລິກາ ຂຶ້ນສູ່ລະດັບສູງໃຫມ່
ນັບແຕ່ເມື່ອສ້າງຂອບເຂດການພົວພັນຄູ່ຮ່ວມມືຮອບດ້ານປີ 2013, ໃນກວ່າ 1 ປີຜ່ານມາ, 9 ຂົງເຂດບຸລິມະສິດທີ່ໄດ້ວາງອອກໃນຂອບເຂດການພົວພັນນີ້ ໂດຍຫວຽດນາມ ແລະ ອາເມລິກາ ຜັນຂະຫຍາຍແມ່ນຕັ້ງຫນ້າທີ່ສຸດ ແລະ ບັນລຸໄດ້ໝາກຜົນຈຳນວນຫນຶ່ງຢ່າງແນ່ນອນ. ເຖິງຢ່າງໃດກໍຕາມ, ຕາມການຕີລາຄາຈາກທັງສອງຝ່າຍ, ຄວາມສາມາດບົ່ມຊ້ອນການຮ່ວມມືຍັງໃຫຍ່ຫລວງຢູ່. ສະນັ້ນ ປີ 2015 ໝັ້ນໝາຍສ້າງບາດກ້າວບຸກທະລຸໃນການພົວພັນສອງຝ່າຍ, ເປັນຕົ້ນແມ່ນຂົງເຂດເສດຖະກິດ, ການຄ້າ ແລະ ການລົງທຶນ ເມື່ອສັນຍາຄູ່ຮ່ວມມືຂ້າມປາຊີຟີກ(TPP) ຊື່ງທັງຫວຽດນາມ ແລະ ອາເມລິກາ ລ້ວນແຕ່ແມ່ນສະມາຊິກ, ສຳເລັດການເຈລະຈາ ໃນປີນີ້. ຄາດວ່າ ວົງເງິນການຄ້າສອງຝ່າຍ ຫວຽດນາມ ແລະ ອາເມລິກາ ຈະລື່ນກາຍຕົວເລກ 35-36 ຕື້ USD ຂອງປີ 2014. ແງ່ຫວັງນີ້ ແມ່ນມີພື້ນຖານ ເພື່ອມີຄວາມເຊື່ອໝັ້ນເພາະວ່າ ປີ 2015 ແມ່ນປີມີຄວາມໝາຍພິເສດໃນການພົວພັນລະຫວ່າງ ຫວຽດນາມ ແລະ ອາເມລິກາ, ເປັນຂີດໝາຍໄລຍະ 20 ປີ ຫວຽດນາມ ແລະ ອາເມລິກາ ສ້າງການພົວພັນເປັນປົກກະຕິ. ຕາມທ່ານ ຟ້າມກວາງວີງ, ເອກອັກຄະລັດຖະທູດ ຫວຽດນາມ ປະຈຳ ອາເມລິກາ ແລ້ວ, ຄວາມໄວ້ເນື້ອເຊື່ອໃຈດ້ານການເມືອງລະຫວ່າງສອງປະເທດ ບໍ່ທັນມີໄລຍະໃດແມ່ນດີງາມຄືປະຈຸບັນ ແລະ ຈຸດພົ້ນເດັ່ນໃນການຮ່ວມມື ລະຫວ່າງຫວຽດນາມ ແລະ ອາເມລິກາ ໃນປີ 2015 ນັ້ນແມ່ນບັນດາການເຄື່ອນໄຫວແລກປ່ຽນຄະນະຜູ້ແທນໃນຕະຫລອດປີ, ໃນນັ້ນ ນັບທັງການຢ້ຽມຢາມຂັ້ນສູງ.
“ໄລຍະມໍ່ໆມານີ້, ທ່ານ John Kerry ລັດຖະມົນຕີວ່າການກະຊວງການຕ່າງປະເທດ ອາເມລິກາ ໄດ້ສົ່ງສານຂອງອຳນາດການປົກຄອງ ອາເມລິກາ ເຊື້ອເຊີນທ່ານ ເລຂາທິການໃຫຍ່ ຫງວຽນຟູຈ້ອງ ໄປຢ້ຽມຢາມ ອາເມລິກາ ໃນປີ 2015. ພວກເຮົາ ກໍລໍຄອຍທ່ານປະທານາທິບໍດີ Obama ຈະມາຢ້ຽມຢາມຫວຽດນາມ ໃນປີ ສະເຫລີມສະຫລອງເຫດການດັ່ງກ່າວ. ຖ້າຫາກວ່າການຢ້ຽມຢາມຂອງການນຳສອງທ່ານນັ້ນໄດ້ຮັບການປະຕິບັດ ແນ່ນອນວ່າ ຈະມີບັນດາໝາກຜົນສຳຄັນ ແລະ ຈະສ້າງທ່າຊຸກຍູ້ການພົວພັນລະຫວ່າງສອງປະເທດກວ່າອີກ.”
ປະຈຸບັນ, ສອງປະເທດພວມຕັ້ງຫນ້າຜັນຂະຫຍາຍການຮ່ວມມືໃນຂົງເຂດສຶກສາ,ວັດທະນະທຳ, ພິເສດແມ່ນການປ້ອງກັນຊາດ ປ້ອງກັນຄວາມສະຫງົບ ເມື່ອເປັນຄັ້ງທຳອິດ ອາເມລິກາ ຜັນຂະຫຍາຍບ້ວງຫນູນຊ່ວຍ 18 ລ້ານ USD ໃຫ້ແກ່ຫວຽດນາມ ເພື່ອຍົກສູງກຳລັງຄວາມສາມາດການເດີນທະເລ.
ຫັນການພົວພັນລະຫວ່າງຫວຽດນາມ ແລະ ຈີນ ໃຫ້ປອດໃສ
ປີ 2015 ກໍແມ່ນປີສະເຫລີມສະຫລອງ 65 ປີແຫ່ງວັນສ້າງຕັ້ງສາຍພົວພັນທາງການທູດ ລະຫວ່າງຫວຽດນາມ ແລະ ຈີນ. ນີ້ແມ່ນໂອກາດສຳຄັນເພື່ອໃຫ້ສອງປະເທດຍົກການພົວພັນມິດຕະພາບທີ່ເປັນມູນເຊື້ອ ແລະ ຄູ່ຮ່ວມມື ຍຸດທະສາດຮອບດ້ານຂຶ້ນສູ່ລະດັບໃຫມ່. ຍາມໃດຫວຽດນາມ ກໍຖື ຈີນ ທັງແມ່ນປະເທດບ້ານໃກ້ເຮືອນຄຽງໃຫຍ່, ທັງແມ່ນປະເທດສັງຄົມນິຍົມ ແລະ ແມ່ນຄູ່ຮ່ວມມືສຳຄັນຂອງຫວຽດນາມ. ເຖິງວ່າສະພາບການຢູ່ພາກພື້ນ ແລະ ໂລກ ມີການປ່ຽນແປງຫລາຍຢ່າງ, ການພົວພັນລະຫວ່າງສອງປະເທດຍັງປະສົບກັບຄວາມຫຍຸ້ງຍາກ, ແຕ່ຫວຽດນາມ ຍາມໃດກໍຖືການພັດທະນາການພົວພັນຄູ່ຮ່ວມມືການຮ່ວມມືຍຸດທະສາດຮອບດ້ານກັບຈີນ ເປັນສຳຄັນ ພ້ອມທັງປາດຖະຫນາຢາກ ຈີນ ຖື ຫວຽດນາມ ມີສະຖຽນລະພາບ, ວັດທະນາຖາວອນເປັນກາລະໂອກາດສຳລັບຈີນ. ເລື່ອງແລກປ່ຽນ ແລະ ພົບປະຄະນະຜູ້ແທນຂັ້ນສູງສອງປະເທດ ໄດ້ຮັບການກຳນົດແມ່ນຈຸດສຸມໃນປີ 2015 ເພື່ອຮັກສາການພົວພັນລະຫວ່າງຫວຽດນາມ ແລະ ຈີນ ໄປຖືກທິດ, ພັດທະນາເປັນປົກກະຕິ ແລະ ປອດໃສ. ຕາມທ່ານ ຫງວຽນວັນເທິ, ເອກອັກຄະລັດຖະທູດ ຫວຽດນາມ ປະຈຳ ຈີນ ແລ້ວ, ນັບແຕ່ຕົ້ນປີ 2015, ທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟູຈ້ອງ ແລະ ທ່ານເລຂາທິການໃຫຍ່, ປະທານປະເທດຈີນ ສີຈິ້ນຜິງ ໄດ້ໂອ້ລົມທາງໂທລະສັບ, ກຳນົດທິດແຜນການຈຳນວນຫນຶ່ງຊຸກຍູ້ການພົວພັນຮ່ວມມືລະຫວ່າງ ຫວຽດນາມ ແລະ ຈີນ ໃນປີ 2015. ກ່ຽວກັບບັນດາການກຳນົດທິດຮ່ວມມືປີ 2015, ທ່ານເອກອັກຄະລັດຖະທູດ ຫງວຽນວັນເທີ ໃຫ້ຮູ້ວ່າ:
“ເພີ່ມທະວີການພົບປະແລກປ່ຽນຂັ້ນສູງລະຫວ່າງສອງປະເທດ ພ້ອມທັງພະຍາຍາມຊອກຫາວິທີແກ້ໄຂບັນດາບັນຫາຍັງຄົງຄ້າງ, ພິເສດແມ່ນບັນຫາທະເລຕາເວັນອອກ. ໃນຂະນະຊອກຫາບາງມາດຕະການພື້ນຖານຍາວນານໃຫ້ແກ່ບັນຫາຍັງຄົງຄ້າງດັ່ງກ່າວ, ສອງຝ່າຍ ຄວນພະຍາຍາມຮັກສາສັນຕິພາບ, ຄວາມໝັ້ນຄົງຢູ່ທະເລຕາເວັນອອກ, ຮັກສາສະພາບເດີມຢູ່ທະເລຕາເວັນອອກ, ປະຕິບັດ DOC ເປັນຢ່າງດີ ແລະ ກ້າວໄປເຖິງການສ້າງປະມວນຂໍ້ກຳນົດການປະພຶດກ່ຽວກັບທະເລຕາເວັນອອກ (COC).”
ປັບປຸງການພົວພັນຄູ່ຮ່ວມມືທີ່ເປັນມູນເຊື້ອ
ປີ 2015 ກໍແມ່ນປີ ຫວຽດນາມ ສະເຫລີມສະຫລອງ 65 ປີແຫ່ງວັນສ້າງຕັ້ງສາຍພົວພັນທາງການທູດກັບ ສເຊັກ, ແມ່ນຫນຶ່ງໃນບັນດາປະເທດເພື່ອນມິດທີ່ເປັນມູນເຊື້ອຢູ່ ເອີລົບຕາເວັນອອກ. ປະຈຸບັນ, ເຊັກ ກຳນົດວ່າ ຫວຽດນາມ ແມ່ນຫນຶ່ງໃນ 12 ຄູ່ຮ່ວມມືອັນດັບຫນຶ່ງກ່ຽວກັບການພົວພັນດ້ານການຄ້າ. ສ່ວນ ຫວຽດນາມ ກໍກຳນົດ ເຊັກ ແມ່ນຄູ່ຮ່ວມມື, ແມ່ນປະຕູເພືື່ອໃຫ້ຫວຽດນາມ ເຂົ້າອີຢູ. ສະນັ້ນ ການຂຸດຄົ້ນຄວາມສາມາດບົ່ມຊ້ອນ, ທ່າແຮງຂອງກັນ ຢ່າງສຸດຂີດ ເພື່ອຍົກສູງວົງເງິນດ້ານການຄ້າສອງສົ້ນ ແມ່ນຈຸດໝາຍຊື່ງສອງປະເທດພວມມຸ່ງໄປເຖິງ. ທ່ານ ເຈືອງແມ້ງເຊີນ, ເອກອັກຄະລັດຖະທູດ ຫວຽດນາມ ປະຈຳ ສເຊັກ ເນັ້ນຫນັກວ່າ:
“ປະຈຸບັນ ກ່ຽວກັບການແລກປ່ຽນດ້ານການຄ້າ ແລະ ການລົງທຶນ ບໍ່ທັນສົມກັບຄວາມສາມາດບົ່ມຊ້ອນ. ພວກຂ້າພະເຈົ້າຈະຍູ້ແຮງການຮ່ວມມືລະຫວ່າງບັນດາອົງການວິຊາສະເພາະ ລະຫວ່າງສອງປະເທດ ເພື່ອເຮັດແນວໃດໃນໄລຍະຈະມາເຖິງ ເພີ່ມວົງເງິນການຄ້າລະຫວ່າງສອງປະເທດ ແລະ ຍູ້ແຮງການລົງທຶນຂອງເຊັກ ເຂົ້າຫວຽດນາມ ກໍຄື ຂອງຫວຽດນາມ ໄປຍັງ ເຊັກ ໃນໄລຍະຈະມາເຖິງ.”
ປີ 2015 ໄດ້ຮັບຖືວ່າ ແມ່ນປີບານພັບຂອງຫວຽດນາມ ໃນວິວັດການເຊື່ອມໂຍງເຂົ້າກັບສາກົນ. ຄຽງຄູ່ກັບການຊົມໃຊ້ບັນດາຜົນປະໂຫຍດຈາກບັນດາສັນຍາການຄ້າສອງຝ່າຍ, ຫລາຍຝ່າຍ, ເລື່ອງຊຸກຍູ້ການຮ່ວມມືກັບບັນດາຄູ່ຮ່ວມມືຫລັກແຫລ່ງໃນພາກພື້ນ ແລະ ໂລກໃຫ້ມີປະສິດທິຜົນກວ່າອີກ ຈະຫນູນຊ່ວຍໃຫ້ແກ່ຈຸດໝາຍພັດທະນາເສດຖະກິດຂອງຫວຽດນາມ ພ້ອມທັງຍົກສູງ ບົດບາດທີ່ຕັ້ງຂອງຫວຽດນາມໃນເວທີສາກົນ.