ວັນທີ 11/12, ທ່ານປະທານສະພາແຫ່ງຊາດຫວຽດນາມ ຫງວຽນຊິງຮູ່ງ ແລະ ບັນດາສະມາຊິກໃນຄະນະຜູ້ແທນຂັ້ນສູງສະພາແຫ່ງຊາດຫວຽດນາມ ໄດ້ກັບຄືນເມືອຮອດຮ່າໂນ້ຍ, ສິ້ນສຸດການຢ້ຽມຢາມສັນຖະວະໄມຕີລາຊະອານາຈັກ ແບນຊິກ, ລັດຖະສະພາເອີລົບ ແລະ ລາຊະອານາຈັກອັງກິດຢ່າງເປັນທາງການ. ການຢ້ຽມຢາມດັ່ງກ່າວໄດ້ເປັນການຢັ້ງຢືນຄວາມຕັດສິນໃຈຂອງຫວຽດນາມໃນການຊຸກຍູ້ການຮ່ວມມືກັບບັນດາປະເທດໃນສະຫະພາບເອີລົບອີກຄັ້ງໜຶ່ງ, ເພື່ອແນໃສ່ສ້າງສາ ແລະ ພັດທະນາປະເທດຊາດ.
ໃນການພົບປະຄັ້ງຕ່າງໆກັບຄະນະຜູ້ແທນຂັ້ນສູງຫວຽດນາມ, ບັນດາການນຳອົງການນິຕິບັນຍັດ ແລະ ເຈົ້າຫນ້າທີ່ລັດຖະບານແບນຊິກ, ອັງກິດ ແລະ ລັດຖະສະພາເອີລົບຫລາຍທ່ານ ໄດ້ຕີລາຄາສູງການພັດທະນາຂອງສາຍພົວພັນມິດຕະພາບ ການຮ່ວມມືກັບຫວຽດນາມ. ໃນການເຈລະຈາຕ່າງໆ, ສອງຝ່າຍໄດ້ເຫັນດີຫລາຍມາດຕະການຢ່າງເລິກເຊິ່ງ ແລະ ກວ້າງຂວາງ ເພື່ອເພີ່ມທະວີການພົວພັນລັດຖະສະພາ ແລະ ການຮ່ວມມືເສດຖະກິດ, ການຄ້າ ແລະ ການລົງທຶນ, ພ້ອມທັງລົງນາມໃນສັນຍາຮ່ວມມືຫລາຍສະບັບໃນຫລາຍຂົງເຂດ. ການນຳຂັ້ນສູງຂອງແບນຊິກ, ອັງກິດ ແລະ ລັດຖະສະພາເອີລົບ ລ້ວນແຕ່ຖືວ່າ: ການຢ້ຽມຢາມຂອງປະທານສະພາແຫ່ງຊາດຫວຽດນາມ ຫງວຽນຊິງຮູ່ງ ໄດ້ປະກອບສ່ວນຢ່າງແທດຈິງເຂົ້າໃນການຊຸກຍູ້ບັນດາສາຍພົວພັນທີ່ມີຢູ່ແລ້ວ ແລະ ຢືນຢັນ ຈະເພີ່ມທະວີການພົວພັນຮ່ວມມືກັບຫວຽດນາມ ໃນຮັບການສອງຝ່າຍ ແລະ ຫລາຍຝ່າຍ ກໍ່ຄືໃນບັນດາເວທີປາໄສສາກົນ.
ໃນວາລະປະຊຸມລັດຖະສະພາເອີລົບ ຄັ້ງທີ 9, ທ່ານ Werner Langen ປະທານຄະນະຜູ້ແທນຂອງລັດຖະສະພາເອີລົບ ກ່ຽວກັບການພົວພັນກັບບັນດາປະເທດອາຊີຕາເວັນອອກສຽງໃຕ້ ແລະ ອາຊຽນ ໄດ້ຕີລາຄາສູງບັນດາຄວາມມານະພະຍາຍາມຂອງສະພາແຫ່ງຊາດຫວຽດນາມ ໃນການສ້າງລະບົບກົດໝາຍໃຫ້ສົມບູນແບບ ເພື່ອຕອບສະຫນອງຄວາມຮຽກຮ້ອງຕ້ອງການຂອງການເຊື່ອມໂຍງເຂົ້າກັບສາກົນ. ພ້ອມກັນນັ້ນ, ຍັງສະເຫນີໃຫ້ສະພາແຫ່ງຊາດຫວຽດນາມ ແລະ ລັດຖະສະພາເອີລົບ ສືບຕໍ່ແລກປ່ຽນຄະນະຜູ້ແທນຂັ້ນສູງ ເພື່ອເພີ່ມທະວີການປ່ຽນແປງຂໍ້ມູນຂ່າວສານ, ບົດຮຽນດ້ານນິຕິບັນຍັດ, ປະກອບສ່ວນຊຸກຍູ້ການພົວພັນຮ່ວມມືລະຫວ່າງສອງປະເທດ, ພິເສດແມ່ນໃນດ້ານເສດຖະກິດ, ການຄ້າ ແລະ ການລົງທຶນ.ທ່ານ Werner Langen ເວົ້າວ່າ:
“ພວກຂ້າພະເຈົ້າຕີລາຄາສູງຕໍ່ເລື່ອງ ຫວຽດນາມ ໄດ້ດຳເນີນການປ່ຽນແປ່ງໃຫມ່.ອີຢູ ໃຫ້ຄຳໝັ້ນສັນຍາຈະຍູ້ແຮງການພົວພັນກັບຫວຽດນາມ ກວ່າອີກ ແລະ ຈະຫນູນຊ່ວຍຫວຽດນາມ ໃນການລົບລ້າງຄວາມອຶດຫິວ ຫລຸດຜ່ອນຄວາມທຸກຍາກ. ພວກຂ້າພະເຈົ້າປາດຖະຫນາຢາກ ດຳເນີນການເຈລະຈາດ້ານການຄ້າເສລີສອງຝ່າຍລະຫວ່າງ ຫວຽດນາມ ແລະ ອີຢູ. ພວກຂ້າພະເຈົ້າເຫັນວ່າ ບັນດາຄວາມສາມາດບົ່ມຊ້ອນຂອງສອງຝ່າຍຈະສືບຕໍ່ໄດ້ຮັບການເສີມຂະຫຍາຍ ຖ້າຫາກສອງຝ່າຍມີຂໍ້ຕົກລົງທີ່ຂັນແຂງກວ່າ ແລະ ມີລະດັບສູງກວ່າເພື່ອປະຕິບັດບັນດາຄຳໝັ້ນສັນຍາດັ່ງກ່າວ”
ທີ່ລາຊະອານາຈັກແບນຊິກ, ບັນດາການນຳສະພາແຫ່ງຊາດ ແລະ ລັດຖະບານແບນຊິກ ຢືນຢັນວ່າ: ການພົວພັນລະຫວ່າງສອງປະເທດ ຫວຽດນາມ ແລະ ແບນຊິກ ພວມພັດທະນາຢ່າງດີງາມ. ແຕ່ເຖິງຢ່າງໃດກໍຕາມ, ສອງຝ່າຍຄວນມານະພະຍາຍາມກວ່າອີກເພື່ອລື່ນກາຍບັນດາຂອບເຂດການຮ່ວມມືທີ່ມີຢູ່ແລ້ວ. ໃນນັ້ນ, ຄວນຍູ້ແຮງການການພົບປະແລກປ່ຽນລະຫວ່າງວິສາຫະກິດ ແລະ ປະຊາຊົນສອງປະເທດຢ່າງແຂງແຮງກວ່າ ເພື່ອຍູ້ແຮງການຮ່ວມມືດ້ານເສດຖະກິດ ແລະ ການຄ້າ. ທ່ານ Mark Eyskens ລັດຖະມົນຕີການຕ່າງປະເທດ ແບນຊິກ ໄດ້ເນັ້ນຫນັກວ່າ:
“ໃນໄລຍະທີ່ຜ່ານມາ, ຫວຽດນາມ ມີຄວາມມານະພະຍາຍາມໃນການຊຸກຍູ້ການພົວພັນຮ່ວມມືດ້ານເສດຖະກິດກັບບັນດາປະເທດ, ໃນນັ້ນ ມີແບນຊິກ ແລະ ເພີ່ມທະວີການໝູນໃຊ້ວິທະຍາສາດເຕັກໂນໂລຊີໃຫມ່. ບັນດານັກລົງທຶນ ແລະ ບັນດາວິສາຫະກິດແບນຊິກ ຕີລາຄາສູງສະພາບແວດລ້ອມແຫ່ງການດຳເນີນທຸລະກິດຂອງຫວຽດນາມ ກໍ່ຄືບັນດາກາລະໂອກາດດຳເນີນທຸລະກິດຢູ່ ຫວຽດນາມ. ພວກຂ້າພະເຈົ້າປາດຖະຫນາວ່າ: ການຮ່ວມມືລະຫວ່າງ ຫວຽດນາມ ແລະ ແບນຊິກ ຈະນັບມື້ນັບພັດທະນາຢ່າງແຂງແຮງກວ່າອີກ”
ທີ່ລາຊະອານາຈັກ ອັງກິດ, ທ່ານ Lindsay Hoyle ໄດ້ເຫັນດີສະເຫນີຕໍ່ບັນດາອົງການນິຕິບັນຍັດສອງປະເທດ ຊຸກຍູ້ສອງລັດຖະບານແກ້ໄຂບັນດາບັນຫາທີ່ຍັງຄົງຄ້າງໃນການພົວພັນດ້ານເສດຖະກິດການຄ້າ ແລະ ການລົງທຶນ, ເພື່ອບັນລຸໄດ້ຈຸດໝາຍທີ່ສອງລັດໄດ້ລົງນາມໃນຖະແຫລງການຮ່ວມກ່ຽວກັບຄູ່ຮ່ວມມືຍຸດທະສາດ. ພ້ອມກັນນັ້ນ ເປັນເອກະພາບຕໍ່ທັດສະນະມູ້ງໄປເຖິງການສ້າງຕັ້ງຄະນະກຳມະການປະສົມຂອງສອງປະເທດ ບົນພື້ນຖານສ້າງວິວັດການ, ເນື້ອໃນລະອຽດ ເພື່ອບັນລຸໄດ້ຄວາມເຫັນດີເຫັນພ້ອມລະຫວ່າງສະຫະພັນວິສາຫະກິດ ອັງກິດ ແລະ ຫວຽດນາມ, ເພື່ອແກ້ໄຂສະພາບຂາດຂໍ້ມູນຂ່າວສານ, ຊຶ່ງແມ່ນຫນຶ່ງໃນບັນດາສາຍເຫດທີ່ພາໃຫ້ວົງເງິນການຄ້າສອງສົ້ນລະຫວ່າງສອງປະເທດຖືກຫລຸດລົງ. ທ່ານ Lindsay Hoyle ເວົ້າວ່າ:
“ນີ້ແມ່ນການຢ້ຽມຢາມທີ່ມີຄວາມສຳຄັນຍິ່ງສຳລັບສາຍພົວພັນຮ່ວມມືອັນດີງາມ ລະຫວ່າງ ຫວຽດນາມ ແລະ ອັງກິດ. ອາດເວົ້າໄດ້ວ່າ: ຖະແຫລງການຮ່ວມກ່ຽວກັບການສ້າງຄູ່ຮ່ວມມືຍຸດທະສາດລະຫວ່າງ ຫວຽດນາມ ແລະ ອັງກິດ ຊຶ່ງໄດ້ຮັບການລົງນາມໃນປີ 2010 ກໍເປັນຂີດໝາຍສຳຄັນທີ່ສຸດ ແລະ ການປະຕິບັດສາຍພົວພັນຄູ່ຮ່ວມມືຍຸດທະສາດຂອງພວກເຮົາ ກໍພັດທະນາຢ່າງຈົບງາມໃນ 12 ເດືອນຜ່ານມາ. ຂ້າພະເຈົ້າປາດຖະຫນາວ່າ ຈະໄດ້ສືບຕໍ່ສ້າງສາຍພົວພັນຍາວນານກັບຫວຽດນາມ ແລະ ເພີ່ມທະວີການຮ່ວມມືກັບຫວຽດນາມໃນທຸກຂົງເຂດຄື: ເສດຖະກິດ, ການເມືອງ, ການຄ້າ, ວິທະຍາສາດເຕັກໂນໂລຊີ ແລະ ຮັບມືກັບການປ່ຽນແປງຂອງດິນຟ້າອາກາດຢ່າງມີປະສິດທິຜົນ. ຂ້າພະເຈົ້າປາດຖະຫນາວ່າ: ສາຍພົວພັນຮ່ວມມືນີ້ ລ້ວນແຕ່ເພື່ອຜົນປະໂຫຍດລວມຂອງສອງປະເທດ”
ຕາມທ່ານ ເຈີນວັນຮັ່ງ, ຫົວຫນ້າກຳມາທິການການຕ່າງປະເທດຂອງສະພາແຫ່ງຊາດຫວຽດນາມ ແລ້ວ, ນອກຈາກການຊຸກຍູ້ການພົວພັນຮ່ວມມື, ຜ່ານການຢ້ຽມຢາມຄັ້ງນີ້ ຄະນະຜູ້ແທນຫວຽດນາມ ກໍຊອກຮູ້ບັນດາສາຍເຫດ, ຂໍ້ຈຳກັດໃນການຮ່ວມມືເສດຖະກິດ, ການຄ້າຕື່ມອີກ ເພື່ອຊອກຫາມາດຕະການແກ້ໄຂ. ທ່ານ ເຈີນວັນຮັ່ງ ໄດ້ເນັ້ນຫນັກວ່າ:
“ຂ້າພະເຈົ້າມີຄວາມແປກປະຫລາດໃຈຕໍ່ໝາກຜົນທີ່ບັນລຸໄດ້ແມ່ນສູງກວ່າເມື່ອທຽບກັບຄາດໝາຍທີ່ໄດ້ວາງອອກ. ບັນດາປະເທດມີຄວາມເອົາໃຈໃສ່ທີ່ສຸດເຖິງການພັດທະນາເສດຖະກິດ. ໝາກຜົນແຫ່ງການຢ້ຽມຢາມຄັ້ງນີ້ນັ້ນແມ່ນ ພວກເຮົາໄດ້ຈັດຕັ້ງບັນດາຫນ່ວຍເພື່ອນມິດຂອງຫວຽດນາມໃນ ອີຢູ ນັ້ນແມ່ນບັນດາເພື່ອນມິດທີ່ສຸດຈິດສຸດໃຈ, ສັດຊື່ບໍລິສຸດ, ເຕົ້າໂຮມກັນເພື່ອເຮັດແນວໃດຊຸກຍູ້ການພົວພັນຮ່ວມມືກັບຫວຽດນາມ.“
ແລະກໍ່ໃນການຢ້ຽມຢາມຄັ້ງນີ້ ຄະນະຜູ້ແທນສະພາແຫ່ງຊາດຫວຽດນາມ ໄດ້ມີໂອກາດແລກປ່ຽນບົດຮຽນໃນບັນດາຂົງເຂດການເຄື່ອນໄຫວຂອງສະພາແຫ່ງຊາດ ແລະ ຮັດແຫນ້ນການຮ່ວມມືທີ່ສະໜິດຕິດພັນ ແລະ ສາຍພົວພັນຮ່ວມມືລະຫວ່າງການນຳສະພາແຫ່ງຊາດຫວຽດນາມ ກັບການນຳລັດຖະສະພາແບນຊິກ, ອັງກິດ ແລະ ລັດຖະສະພາເອີລົບກ່ວາອີກ, ຈາກນັ້ນ ສ້າງຄວາມສະດວກໃຫ້ແກ່ການຮ່ວມມືລະຫວ່າງບັນດາອົງການນິຕິບັນຍັດຫວຽດນາມ ກັບບັນດາປະເທດດັ່ງກ່າວ.
ຊົງທາວ