(vovworld)- ໃນວັນທີ 22 ແລະ 23/6, ທ່ານນາຍົກລັດຖະມົນຕີ ຫງວຽນເຕີນຢູງ ນຳຫນ້າຄະນະຜູ້ແທນຫວຽດນາມ ເຂົ້າຮ່ວມກອງປະຊຸມສຸດຍອດການຮ່ວມມື ກຳປູເຈຍ - ລາວ - ມຽນມາ- ຫວຽດນາມ ຄັ້ງທີ 7 ແລະ ກອງປະຊຸມສຸດຍອດ ຍຸດທະສາດເສດຖະກິດ Ayeyawady – ChaoPhraya- Mekong (ເອຢາວາດີ -ເຈົ້າພະຍາ- ແມ່ນ້ຳຂອງ) ຄັ້ງທີ 6 ທີ່ມຽນມາ. ເຂົ້າຮ່ວມບັນດາກອງປະຊຸມດັ່ງກ່າວ, ຫວຽດນາມ ຢືນຢັນຄວາມຕັດສິນໃຈ ຍູ້ແຮງ ແລະ ເພີ່ມທະວີການຮ່ວມມືໃນບັນດາຂົງເຂດຄື: ການຄ້າ ແລະ ການລົງທຶນ, ເຊື່ອມຈອດພາກພື້ນ, ພັດທະນາແຫລ່ງຊັບພະຍາກອນມະນຸດ ແລະ ປັບປຸງການພົວພັນກັບບັນດາປະເທດໃນພາກພື້ນ.
ທ່ານນາຍົກລັດຖະມົນຕີ ຫງວຽນເຕີນຢູງ ນຳຫນ້າຄະນະຜູ້ແທນຫວຽດນາມ ເຂົ້າຮ່ວມກອງປະຊຸມສຸດຍອດການຮ່ວມມື ກຳປູເຈຍ - ລາວ - ມຽນມາ- ຫວຽດນາມ ຄັ້ງທີ 7 ຢູ່ ມຽນມາ
ພາບ:baomoi.com
|
ຄວາມຈິງ, ໃນ 10 ປະເທດສະມາຊິກ ອາຊຽນ, GDP ຂອງກຸ່ມ 6 ປະເທດສະມາຊິກເກົ່າ ລວມມີ: ອິນໂດເນເຊຍ, ບຣູໄນ, ໄທ, ມາເລເຊຍ, ສິງກະໂປ, ຟິລີບປີນ ແລະ 4 ປະເທດ ສະມາຊິກໃຫມ່ ລວມມີ: ກຳປູເຈຍ, ລາວ, ມຽນມາ, ຫວຽດນາມ ມີຄວາມຜິດດ່ຽງໃຫຍ່ພໍສົມຄວນ. ຄຽງຄູ່ກັນນັ້ນ, ຂອບຂະຫນາດຕະຫລາດ ແລະ ໂຄງປະກອບຂອງບັນດາຂະແຫນງເສດຖະກິດໃນບັນດາປະເທດ ອາຊຽນ ກໍມີຄວາມແຕກຕ່າງ ແລະ ຄວາມຜິດດ່ຽງ. ເພາະສະນັ້ນ, ຄວາມຜິດໂຕນການພັດທະນາລະຫວ່າງບັນດາປະເທດສະມາຊິກພວມເປັນສິ່ງກີດຂວາງຕົ້ນຕໍສຳລັບອະນາຄົດແຫ່ງການພັດທະນາຂອງອາຊຽນ, ເປັນຕົ້ນໃນສະພາບການ ອາຊຽນ ສຳເລັດຄາດໝາຍສ້າງປະຊາຄົມອາຊຽນໃນທ້າຍປີນີ້. ສະນັ້ນ ກົນໄກການຮ່ວມມື ກຳປູເຈຍ -ລາວ -ມຽນມາ-ຫວຽດນາມ ແມ່ນຫນຶ່ງໃນບັນດາຄວາມມານະພະຍາຍາມຕອບສະຫນອງຄວາມຮຽກຮ້ອງຕ້ອງການຢ່າງພາວະວິໄສຂອງການເຊື່ອມໂຍງເຂົ້າກັບອະນຸພາກພື້ນແມ່ນ້ຳຂອງ ແລະ ອາຊຽນ.
ກົນໄກຮ່ວມມືພວມເສີມຂະຫຍາຍຢ່າງມີປະສິດທິຜົນ
ກອງປະຊຸມສຸດຍອດການຮ່ວມມື ກຳປູເຈຍ - ລາວ -ມຽນມາ- ຫວຽດນາມ ຄັ້ງທຳອິດແມ່ນຈັດຂຶ້ນຢູ່ ນະຄອນຫລວງ ວຽງຈັນ ໃນທ້າຍປີ 2004 ແລະ ຕໍ່ມາແມ່ນດຳເນີນຢູ່ ມາເລເຊຍ, ຟິລິບປີນ, ຫວຽດນາມ, ກຳປູເຈຍ, ລາວ, ສ່ວນ ກອງປະຊຸມຄັ້ງທີ 7 ນີ້ ແມ່ນຖືກຈັດຂຶ້ນຢູ່ ມຽນມາ. ອາດຈະເຫັນໄດ້ວ່າ ຈຸດພົ້ນເດັ່ນຜ່ານກອງປະຊຸມຄັ້ງຕ່າງໆ ແມ່ນຄຳໝັ້ນສັນຍາດ້ານການເມືອງຢ່າງແຮງຂອງບັນດາປະເທດກ່ຽວຂ້ອງ, ຍູ້ແຮງການຮ່ວມມືໃນບັນດາຂົງເຂດເຊື່ອມຕໍ່ຄົມມະນາຄົມຂົນສົ່ງ, ກະສິກຳ, ອຸດສາຫະກຳ, ການທ່ອງທ່ຽວ, ສາທາລະນະສຸກ, ສິ່ງແວດລ້ອມ, ພະລັງງານ, ບຳລຸງສ້າງແຫລ່ງຊັບພະຍາກອນມະນຸດ.
ສຳລັບ ກວ່າ 200 ໂຄງການ ພວມໄດ້ຮັບການປະຕິບັດ, ສຸມໃສ່ເຂົ້າໃນບັນດາຂົງເຂດພັດທະນາພຶ້ື້ນຖານໂຄງລ່າງ, ຄົມມະນາຄົມຂົນສົ່ງ, ພັດທະນາພື້ນຖານເຊື່ອມໂຍງດ້ານເສດຖະກິດ, ເຕັກໂນໂລຊີຂໍ້ມູນຂ່າວສານ ແລະ ໂທລະຄົມມະນາຄົມ, ພັດທະນາແຫລ່ງຊັບພະຍາກອນມະນຸດ, ກຸ່ມ 4 ປະເທດ: ຫວຽດນາມ - ລາວ -ມຽນມາ - ກຳປູເຈຍ ໄດ້ ແລະ ພວມບັນລຸຫລາຍໝາກຜົນໃນການລົບລ້າງຄວາມອຶດຫິວຫລຸດຜ່ອນຄວາມທຸກຍາກ, ປັບປຸງສະພາບແວດລ້ອມ ແລະ ຊຸກຍູ້ການທ່ອງທ່ຽວພາຍໃນກຸ່ມ. ເຖິງຢ່າງໃດກໍຕາມ, ເພື່ອໃຫ້ບັນດາປະເທດດັ່ງກ່າວພັດທະນາຢ່າງວ່ອງໄວ, ເຊື່ອມໂຍງຢ່າງເລິກເຊິ່ງ, ກວ້າງຂວາງ ຄວນຍາດແຍ່ງຄວາມສາມາດບົ່ມຊ້ອນການຮ່ວມມືພາຍໃນກຸ່ມຢ່າງສຸດຂີດ. ກອງປະຊຸມສຸດຍອດການຮ່ວມມື ກຳປູເຈຍ - ລາວ -ມຽນມາ- ຫວຽດນາມ ຄັ້ງທີ 7 ຖືກຈັດຂຶ້ນຢູ່ ມຽນມາ ຄັ້ງນີ້ ແມ່ນສຸມໃສ່ສຳຫລວດກວດຄືນສະພາບການຜັນຂະຫຍາຍບັນດາແຜນການ, ປຶກສາຫາລືບາງຂົງເຂດຮ່ວມມືລະອຽດ ກໍຄື ທິດທາງຍູ້ແຮງການຮ່ວມມືໃນອະນຸພາກພື້ນແມ່ນ້ຳຂອງ. ໂດຍມີການເຂົ້າຮ່ວມຂອງທ່ານນາຍົກລັດຖະມົນຕີບັນດາປະເທດດັ່ງກ່າວ, ກອງປະຊຸມຄັ້ງນີ້ແມ່ນໂອກາດເພື່ອໃຫ້ບັນດາການນຳຕັດສິນຫລາຍບັນຫາໃຫຍ່ ແລະ ເປັນເອກະພາບກຳນົດທິດການຮ່ວມມືໃນໄລຍະຈະມາເຖິງ, ເປັນຕົ້ນແມ່ນສຸມໃສ່ເຂົ້າໃນຂົງເຂດເສດຖະກິດ, ການຄ້າ, ການລົງທຶນ, ຄົມມະນາຄົມຂົນສົ່ງ, ກະສິກຳ, ອຸດສາຫະກຳ ແລະ ພະລັງງານ, ການທ່ອງທ່ຽວ, ພັດທະນາແຫລ່ງຊັບພະຍາກອນມະນຸດ ຜ່ານບັນດາໂຄງການຮ່ວມມືໃນແຕ່ລະຂົງເຂດກໍຄືສົ່ງເສີມ, ດຶງດູດບັນດາແຫລ່ງກຳລັງສາກົນເຂົ້າຮ່ວມວິວັດການຮ່ວມມືພັດທະນາ.
ຫວຽດນາມຕັ້ງຫນ້າຊຸກຍູ້ການຮ່ວມມືອະນຸພາກພື້ນແມ່ນ້ຳຂອງ
ໃນໄລຍະຜ່ານມາ, ຫວຽດນາມ ໄດ້ເປັນເຈົ້າການ ແລະຕັ້ງຫນ້າເຂົ້າຮ່ວມບັນດາການເຄື່ອນໄຫວຮ່ວມມືຂອງກົນໄກນີ້, ສວມບົດບາດຫລັກແຫລ່ງໃນການສ້າງບັນດາໂຄງການດຳເນີນງານປະຈຳປີຂອງການຮ່ວມມືອະນຸພາກພື້ນແມ່ນ້ຳຂອງ, ສະເຫນີບາງຂໍ້ລິເລິ່ມ ເພື່ອເພີ່ມທະວີການຮ່ວມມືຢ່າງມີປະສິດທິຜົນ. ພິເສດ ປີ 2013-2014, ຫວຽດນາມ ຮັບບົດບາດເປັນປະທານກຸ່ມວຽກງານ Marketing ແລະ ສື່ສານ ໃນການເຊື່ອມຕໍ່ພື້ນຖານໂຄງລ່າງທ່ອງທ່ຽວອາຊຽນ.
ທີ່ກອງປະຊຸມຄັ້ງນີ້, ທ່ານນາຍົກລັດຖະມົນຕີ ຫວຽດນາມ ຫງວຽນເຕີນຢູງ ພ້ອມກັບບັນດາການນຳ ຈະສຳຫລວດກວດຄືນວິວັດການຜັນຂະຫຍາຍ 10 ກົນໄກຮ່ວມມືແມ່ນ້ຳຂອງ ຕິດພັນກັບວິວັດການຮ່ວມມືສອງຝ່າຍລະຫວ່າງບັນດາປະເທດ ແລະ ຊຸກຍູ້ການພັດທະນາແບບຍືນຍົງຂອງທັງ ອະນຸພາກພື້ນແມ່ນ້ຳຂອງ, ຕີລາຄາບັນດາກົນໄກຮ່ວມມືກັບບັນດາຄູ່ຮ່ວມມືຄື: ອາເມລິກາ, ຍີ່ປຸ່ນ, ສເກົາຫລີ, ທະນາຄານພັດທະນາ ອາຊີ (ADB).
ແລະ ຢູ່ ມຽນມາ, ທ່ານນາຍົກລັດຖະມົນຕີ ຫງວຽນເຕີນຢູງ ຈະເຂົ້າຮ່ວມກອງປະຊຸມສຸດຍອດ ຍຸດທະສາດເສດຖະກິດ Ayeyawady – ChaoPhraya- Mekong (ACMECS). ນີ້ແມ່ນຂອບເຂດການຮ່ວມມືເສດຖະກິດລວມມີ 5 ປະເທດຄື: ກຳປູເຈຍ, ລາວ, ມຽນມາ, ໄທ ແລະ ຫວຽດນາມ ເພື່ອເພີ່ມທະວີການຮ່ວມມືເສດຖະກິດຮ່ວມ ແລະ ສອງຝ່າຍ ແນໃສ່ຂຸດຄົ້ນ ແລະ ເສີມຂະຫຍາຍທ່າໄດ້ປຽບການປຽບທຽບລະຫວ່າງບັນດາເຂດ, ບັນດາປະເທດສະມາຊິກ, ຍົກສູງກຳລັງແກ້ງແຍ້ງ ແລະ ຮັດແຄບຊ່ອງຫວ່າງແຫ່ງການພັດທະນາ. ທ່ານນາຍົກລັດຖະມົນຕີ ຫງວຽນເຕີນຢູງພ້ອມກັບບັນດາການນຳ ກຳປູເຈຍ, ລາວ, ມຽນມາ ແລະ ໄທ ຕີລາຄາໝາກຜົນການປະຕິບັດໂຄງການດຳເນີນງານ ACMECS ໄລຍະ 2013-2015 ໃນບັນດາຂົງເຂດຮ່ວມມືຄື: ອຸດສາຫະກຳ, ພະລັງງານ, ການທ່ອງທ່ຽວ, ການຄ້າ, ການລົງທຶນ, ກະສິກຳ, ພັດທະນາແຫລ່ງຊັບພະຍາກອນມະນຸດ, ເຊື່ອມຕໍ່ຄົມມະນາຄົມ, ສາທາລະນະສຸກ, ຮັບປະກັນຊີວິດສັງຄົມ ແລະ ສິ່ງແວດລ້ອມ ເພື່ອຕິດພັນການຮ່ວມມື ACMECS ກັບວິວັດການສ້າງປະຊາຄົມເສດຖະກິດ ອາຊຽນ 2015 ແລະ ປະຕິບັດແຜນການສັງລວມກ່ຽວກັບການເຊື່ອມຈອດ ອາຊຽນ. ບົນພື້ນຖານນີ້ ທ່ານນາຍົກລັດຖະມົນຕີ ຈະພ້ອມກັບບັນດາການນຳເປັນເອກະພາບທິດທາງ, ຄາດໝາຍ ແລະ ບັນດາຂົງເຂດ, ໂຄງການບຸລິມະສິດຄວນຍູ້ແຮງການຮ່ວມມືລະຫວ່າງບັນດາປະເທດກໍຄືກັບບັນດາຄູ່ຮ່ວມມືພັດທະນາ, ເປັນຕົ້ນໃນສະພາບການປະຊາຄົມອາຊຽນສ້າງຕັ້ງສຳເລັດໃນທ້າຍປີນີ້.
ເຂົ້າຮ່ວມບັນດາກອງປະຊຸມ, ຫວຽດນາມບໍ່ພຽງແຕ່ສະແດງໃຫ້ເຫັນຄວາມຕັດສິນໃຈປະຕິບັດບັນດາກົນໄກຮ່ວມມືສຳຄັນນີ້ ຫາກຍັງ ຍູ້ແຮງການຮ່ວມມືດ້ານການຄ້າ, ການລົງທຶນ, ການເຊື່ອມຕໍ່ພາກພື້ນ, ຮັກສາແຫລ່ງນ້ຳ, ພັດທະນາແຫ່ລງຊັບພະຍາກອນມະນຸດລະຫວ່າງບັນດາປະເທດ, ປະກອບສ່ວນຍົກສູງບົດບາດ, ທີ່ຕັ້ງຂອງຫວຽດນາມ, ສືບຕໍ່ສະແດງໃຫ້ເຫັນບົດບາດຊຸກຍູ້ການຮ່ວມມືແມ່ນ້ຳຂອງກໍຄືປັບປຸງການພົວພັນ ຮ່ວມມືກັບບັນດາປະເທດໃນພາກພື້ນເວົ້າລວມ ແລະ ກັບ ມຽນມາ ເວົ້າສະເພາະ.