(vovworld)- ວັນທີ 23/3, ໂດຍຮັບຄຳເຊີນຂອງທ່ານ ຈູມມາລີ ໄຊຍະສອນ, ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ, ປະທານປະເທດລາວ ແລະ ພັນລະຍາ, ທ່ານປະທານປະເທດຫວຽດນາມ ເຈືອງເຕີນຊາງ ພ້ອມດ້ວຍພັນລະຍາ ເລີ່ມຕົ້ນການຢ້ຽມຢາມ ສປປ ລາວ. ນີ້ແມ່ນເຫດການມີຄວາມໝາຍໃນການພົວພັນລະຫວ່າງສອງປະເທດ, ປະກອບສ່ວນປັບປຸງ ແລະຮັດແຫນ້ນສາຍພົວພັນມິດຕະພາບແບບພິເສດ ຫວຽດນາມ - ລາວ. ບົດຂຽນຂອງນັກຂ່າວວິທະຍຸກະຈາຍສຽງຫວຽດນາມ ທີ່ມີຫົວຂໍ້ວ່າ: ຊຸກຍູ້ການຮ່ວມມືຮອບດ້ານຫວຽດນາມ -ລາວ
ທ່ານເລຂາທິການໃຫຍ່, ປະທານປະເທດລາວຈູມມາລີ
ໄຊຍະສອນ ແລະ ທ່ານປະທານປະເທດຫວຽດນາມ
ເຈືອງເຕີນຊາງໃນການຢ້ຽມຢາມສປປລາວເມື່ອປີ 2012
ພາບ:vov
|
ນີ້ແມ່ນການຢ້ຽມຢາມ ສປປ ລາວ ຄັ້ງທີ 3 ຂອງທ່ານປະທານປະເທດ ຫວຽດນາມ ເຈືອງເຕີນຊາງ, ພາຍຫລັງການຢ້ຽມຢາມເມື່ອເດືອນ 2/2012 ແລະ ເດືອນ 11/2013. ການຢ້ຽມຢາມແມ່ນຢັ້ງຢືນການພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີແບບພິເສດ, ການຮ່ວມມືຮອບດ້ານ ຫວຽດນາມ - ລາວ, ພ້ອມທັງຍູ້ແຮງການຮ່ວມມືລະຫວ່າງສອງປະເທດໃນທຸກຂົງເຂດ ຈາກການເມືອງ, ການປ້ອງກັນຊາດປ້ອງກັນຄວາມສະຫງົບ, ການຄ້າ, ການລົງທຶນຕະຫລອດຮອດວັດທະນະທຳ, ການສຶກສາບຳລຸງສ້າງ.
ມູນເຊື້ອມິດຕະພາບໝັ້ນຄົງສະຫນິດແຫນ້ນ
ຫວນຄືນໄລຍະກວ່າເຄິ່ງສັດຕະວັດ ນັບແຕ່ເມື່ອສອງປະເທດສ້າງການພົວພັນທາງການທູດໃນວັນທີ 5/9/1962, ສາຍພົວພັນທີ່ເປັນມູນເຊື້ອແບບພິເສດຫວຽດນາມ - ລາວ ໂດຍທ່ານປະທານໂຮ່ຈິມີນ ແລະ ທ່ານປະທານ ໄກສອນ ພົມວິຫານ ກໍ່ຕັ້ງ ແລະ ການສືບທອດນຳລຸ້ນຕ່າງຂອງສອງພັກ, ສອງລັດ ພ້ອມກັບປະຊາຊົນສອງປະເທດ, ເພີ່ມພູນຄູນສ້າງ. ກວ່າ 50 ປີຜ່ານມາ, ສາຍພົວພັນສະຫນິດຕິດພັນນັ້ນ ໄດ້ກາຍເປັນແບບຢ່າງກ່ຽວກັບຄວາມສັດຊື່ບໍລິສັດຜຸດຜ່ອງ ກ່ຽວກັບຄວາມສາມັກຄີແບບພິເສດ, ການຮ່ວມມືຮອບດ້ານ ແລະ ນັບມື້ນັບເຂົ້າສູ່ລວງເລິກ. ທ່ານຮອງນາຍົກລັດຖະມົນຕີ ຫງວຽນຊວນຟຸກ ໄດ້ເນັ້ນຫນັກວ່າ:
“ການພົວພັນລະຫວ່າງຫວຽດນາມ ແລະ ລາວ ໄດ້ຮັບການສ້າງຂຶ້ນດ້ວຍເລືອດເນື້ອຂອງຫລາຍລຸ້ນຄົນ ແລະ ໄດ້ກາຍເປັນຊັບສົມບັດອັນລ້ຳຄ່າຂອງສອງຊາດພວກເຮົາ. ເຖິງວ່າ ສະພາບການໂລກມີການປ່ຽນແປງຫລາຍຢ່າງຄືແນວໃດກໍຕາມ, ຍາມໃດຫວຽດນາມ ກໍສະຫນັບສະຫນູນ ລາວ ແລະ ສະຫງວນອາລົມຈິດພິເສດ. ການພົວພັນລະຫວ່າງ ຫວຽດນາມ ແລະ ລາວ ຍາມໃດກໍຢືນອັນດັບຫນຶ່ງໃນນະໂຍບາຍການຕ່າງປະເທດຂອງພັກ, ລັດຫວຽດນາມ.”
ໃນຊຸມປີມໍ່ໆມານີ້, ພ້ອມກັບການຍູ້ແຮງການແລກປ່ຽນບັນດາຄະນະຜູ້ແທນທຸກຂັ້ນ, ສອງຝ່າຍ ພວມຕັ້ງຫນ້າສົມທົບກັນຜັນຂະຫຍາຍບັນດາຂໍ້ຕົກລົງຂອງການນຳຂັ້ນສູງສອງປະເທດ ແລະ ໝາກຜົນຂອງກອງປະຊຸມຄັ້ງທີ 37 ຂອງຄະນະກຳມາທິການລະຫວ່າງລັດຖະບານ ຫວຽດນາມ - ລາວ (1/2015) ຢ່າງມີປະສິດທິຜົນ. ພົ້ນເດັ່ນ, ການຮ່ວມມືດ້ານເສດຖະກິດ, ການລົງທຶນ, ການຄ້າ ລະຫວ່າງສອງປະເທດ ດີສົມຄວນ. ວົງເງິນການຄ້າສອງສົ້ນປີ 2014 ບັນລຸປະມານ 1,4 ຕື້ USD, ເພີ່ມຂຶ້ນ 24,5% ເມື່ອທຽບໃສ່ປີ 2013. ສອງຝ່າຍສູ້ຊົນນຳການເຕີບໂຕວົງເງິນສົ່ງອອກເພີ່ມຂຶ້ນ 40% ເມື່ອທຽບໃສ່ປີ 2014 ເພື່ອສາມາດສຳເລັດຄາດໝາຍນຳວົງເງິນດ້ານການຄ້າສອງຝ່າຍບັນລຸ 2 ຕື້ USD ໃນປີ 2015. ປີ 2015 ນີ້, ສອງຝ່າຍ ສູ້ຊົນຊຸກຍູ້ການຜັນຂະຫຍາຍບາງໂຄງການໃຫຍ່ຄື: ເຊື່ອມຕໍ່ຄົມມະນາຄົມ, ໃນນັ້ນ ກໍ່ສ້າງເສັ້ນທາງຄວາມໄວສູງ ຫວຽດນາມ - ລາວ, ໂຄງການກໍ່ສ້າງທໍ່ສົ່ງນ້ຳມັນຈາກ ທ່າກຳປັ່ນ ຮ່ອນລາ, ຮ່ວາບີງ ເຖິງ ແຂວງຄຳມ່ວນ.
ພ້ອມກັບດ້ານເສດຖະກິດ, ການຮ່ວມມືດ້ານການສຶກສາ ຍາມໃດກໍແມ່ນຂົງເຂດບຸລິມະສິດຕົ້ນຕໍໃນການພົວພັນຮ່ວມມືລະຫວ່າງສອງປະເທດ. ສອງຝ່າຍພວມຕັ້ງຫນ້າຜັນຂະຫຍາຍ “ແຜນຮ່າງຍົກສູງຄຸນນະພາບ ແລະ ປະສິດທິຜົນການຮ່ວມມື ຫວຽດນາມ - ລາວ ໃນຂົງເຂດການສຶກສາ ແລະ ພັດທະນາແຫລ່ງຊັບພະຍາກອນມະນຸດໄລຍະ 2011-2020”. ການຮ່ວມມືປ້ອງກັນຊາດ, ປ້ອງກັນຄວາມສະຫງົບ ແລະບັນຫາຊາຍແດນສອງປະເທດ ໄດ້ຮັບການເພີ່ມທະວີ ແລະ ຜັນຂະຫຍາຍເປັນຢ່າງດີໃນທຸກຂົງເຂດ. ສອງຝ່າຍ ຍູ້ແຮງການໂຄສະນາ, ສຶກສາໃນປະຊາຊົນ, ເປັນຕົ້ນແມ່ນລຸ້ນຫນຸ່ມສອງປະເທດ ກ່ຽວກັບມູນເຊື້ອການພົວພັນແບບພິເສດ ຫວຽດນາມ - ລາວ. ການຮ່ວມມືລະຫວ່າງບັນດາທ້ອງຖິ່ນສອງປະເທດກໍໄດ້ຮັບຄວາມເອົາໃຈໃສ່ຊຸກຍູ້. ບັນດາທ້ອງຖິ່ນຢູ່ເຂດຊາຍແດນສອງປະເທດ ໄດ້ເພີ່ມທະວີການພົວພັນສາມັກຄີ, ການຮ່ວມມືທີ່ເປັນມູນເຊື້ອ, ຮັບປະກັນຄວາມສະຫງົບປອດໄພ, ສັງຄົມ ຢູ່ເຂດຊາຍແດນ, ແກ້ໄຂບັນດາກໍລະນີເກີດຂຶ້ນເປັນຢ່າງດີ ເພື່ອກໍ່ສ້າງເສັ້ນຊາຍແດນແຫ່ງສັນຕິພາບ, ສະຖຽນລະພາບ ແລະ ພັດທະນາ.
ສືບຕໍ່ເສີມຂະຫຍາຍສາຍພົວພັນມິດຕະພາບທີ່ເປັນມູນເຊື້ອໃນສະພາບການໃຫມ່
ບັນດາຜົນງານທີ່ບັນລຸໄດ້ນັ້ນ ຍ້ອນສອງຝ່າຍຮັກສາບັນດາກົນໄກປະຊຸມປະຈຳປີຢູ່ທຸກຂັ້ນລະຫວ່າງສອງປະເທດເປັນປະຈຳ. ຕໍ່ຫນ້າສະພາບການໂລກ, ພາກພື້ນ ມີການຜັນແປໃຫມ່ຫລາຍຢ່າງ, ສອງປະເທດ ລ້ວນແຕ່ສືບຕໍ່ຢັ້ງຢືນຄວາມສຳຄັນ ແລະ ຄວາມໝາຍຍຸດທະສາດຂອງການນັບມື້ນັບ ປັບປຸງ ແລະພັດທະນາສາຍພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານຫວຽດນາມ - ລາວ ໃນສະພາບການໃຫມ່, ປ່ຽນໃຫມ່ຈີນຕະນາການ, ເນື້ອໃນ ແລະ ຮູບການຮ່ວມມື, ແກ້ໄຂບັນດາບັນຫາເກີດຂຶ້ນກ່ຽວຂ້ອງເຖິງຜົນປະໂຫຍດ, ຄວາມສະຫງົບປອດໄພ ແລະ ການພັດທະນາຂອງແຕ່ລະປະເທດຢ່າງທັນການ. ທ່ານ ວິໄລວົງ ບຸດດາຄຳ ເລຂາທີຫນຶ່ງສູນກາງຊາວຫນຸ່ມ ປະຊາຊົນປະຕິວັດລາວ, ຮອງປະທານສູນກາງສະມາຄົມມິດຕະພາບ ລາວ- ຫວຽດນາມ ຖືວ່າ:
“ໃນໄລຍະໂລກາພິວັດ ແລະ ເຊື່ອມໂຍງເຂົ້າກັບສາກົນປະຈຸບັນ, ພວກເຮົາ ຍິ່ງຕ້ອງເພີ່ມທະວີ ແລະ ຮັກສາສາຍພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີແບບພິເສດ ແລະ ການຮ່ວມມືລະຫວ່າງສອງພັກ, ສອງລັດ ແລະ ປະຊາຊົນສອງປະເທດ, ເປັນຕົ້ນແມ່ນລຸ້ນຫນຸ່ມສອງປະເທດ, ຕ້ອງເພີ່ມທະວີການສຶກສາກ່ຽວກັບມູນເຊື້ອ.”
ການຢ້ຽມຢາມ ແລະ ເຮັດວຽກຢູ່ ລາວ ຂອງທ່ານປະທານປະເທດ ເຈືອງເຕີນຊາງ ຄັ້ງນີ້ ແມ່ນໂອກາດເພື່ອໃຫ້ສອງຝ່າຍສຸມໃສ່ແລກປ່ຽນກ່ຽວກັບບັນດາມາດຕະການເພີ່ມທະວີ ແລະ ປັບປຸງການພົວພັນແບບພິເສດ, ສະຫນິດຕິດພັນ, ໄວ້ເນື້ອເຊື່ອໃຈລະຫວ່າງສອງພັກ, ສອງລັດໃນໄລຍະໃຫມ່. ຫວນຄືນໄລຍະປະຫວັດສາດຜ່ານມາ, ສອງຝ່າຍ ມີພື້ນຖານຢ່າງສົມບູນເພື່ອຢັ້ງຢືນ ສາຍພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ ແລະ ປະຊາຊົນສອງປະເທດ ຫວຽດນາມ - ລາວ ຈະສືບຕໍ່ເປີດໄລຍະພັດທະນາໃຫມ່, ຂະຫຍັນຂັນເຄື່ອນ, ມີປະສິດທິຜົນ, ແທດຈິງ ເພື່ອຜົນປະໂຫຍດຂອງປະຊາຊົນແຕ່ລະປະເທດ, ເພື່ອສັນຕິພາບ, ສະຖຽນລະພາບ, ວັດທະນາຖາວອນຂອງພາກພື້ນ.