( vovworld ) – ພ້ອມກັບການຕີລາຄາສະພາບເສດຖະກິດສັງຄົມໃນເດືອນ 7 ແລະ 7 ເດືອນຜ່ານມາ, ໃນວາລະປະຊຸມປະຈຳເດືອນ 7/2012 ຂອງລັດຖະບານຫວຽດນາມ ຊື່ງຖືກຈັດຂຶ້ນໃນວັນທີ 30-31/7/2012, ລັດຖະບານໄດ້ສະຫງວນເວລາສ່ວນຫຼາຍເພື່ອປຶກສາຫາລືກ່ຽວກັບບັນດາມາດຕະການຊຸກຍູ້ ແລະ ຮັກສາການເຕີບໂຕຢູ່ໃນລະດັບເໝາະສົມ, ໝັ້ນຄົງໃນໄລຍະທີ່ຈະມາເຖິງ. ລັດຖະບານກໍ່ໄດ້ວາງຈຸດໝາຍຮັກສາລະດັບການເຕີບໂຕແຕ່ບໍ່ເຮັດໃຫ້ເສດຖະກິດມະຫາພາກ ຂາດສະຖຽນລະພາບ ກໍ່ຄືບໍ່ເຮັດໃຫ້ອັດຕາໄພເງິນເຟີ້ຂຶ້ນສູງຄືນໃໝ່. ຕໍ່ໄປແມ່ນບົດຂຽນຂອງນັກຂ່າວ Thu Hoa ທີ່ພາດຫົວເລື່ອງວ່າ: ຊຸກຍູ້ການເຕີບໂຕຕິດພັນກັບການຄວບຄຸມໄພເງິນເຟີ້
(ພາບປະກອບ:vnexpress.net)
ໃນວາລະປະຊຸມຄັ້ງນີ້, ບັນດາສະມາຊິກລັດຖະບານລ້ວນແຕ່ເຫັນດີເປັນເອກະສັນນຳກັນວ່າ, ສະພາບເສດຖະກິດສັງຄົມໃນເດືອນ 7 ແລະ 7 ເດືອນຜ່ານມາສືບຕໍ່ມີການຜັນແປຢ່າງຕັ້ງໜ້າ, ຖືກທິດ, ຖືກຕ້ອງຕາມຈຸດໝາຍທີ່ໄດ້ວາງອອກ ແລະ ຄາດວ່ານັບມື້ນັບດີກ່ວາ, ຕັ້ງໜ້າກ່ວາໃນທຸກຂົງເຂດ. ແຕ່ເຖິງຢ່າງໃດກໍ່ຕາມ, ຄວາມຫຍຸ້ງຍາກ, ການທ້າທາຍຍັງມີຫຼາຍຢູ່, ໃນນັ້ນພົ້ນເດັ່ນຂຶ້ນແມ່ນລະດັບການເຕີບໂຕຕ່ຳກ່ວາເມື່ອທຽບກັບໄລຍະດຽວກັນຂອງປີກາຍ ແລະ ເພື່ອບັນລຸໄດ້ລະດັບການເຕີບໂຕ GDP ແຕ່ 5,2-5,7% ໃນປີ 2012 ແມ່ນຍາກທີ່ສຸດ. ສະນັ້ນຄວາມຮຽກຮ້ອງລວມແມ່ນຊຸກຍູ້ລະດັບເຕີບໂຕຕ້ອງໄປຄຽງຄູ່ກັບການຄວບຄຸມໄພເງິນເຟີ້, ຮັກສາເສດຖະກິດມະຫາພາກເປັນປົກກະຕິ. ກ່ຽວກັບບັນດາມາດຕະການລະອຽດ, ລັດຖະບານເນັ້ນໜັກເຖິງການແກ້ໄຂຄວາມຫຍຸ້ງຍາກດ້ານທຶນຮອນໃຫ້ແກ່ບັນດາວິສາຫະກິດ, ເສີມຂະຫຍາຍປະສິດທິຜົນບັນດາແຫຼ່ງສິນເຊື່ອເຂົ້າໃນຂົງເຂດກະສິກຳ, ວິສາຫະກິດສົ່ງອອກ, ວິສາຫະກິດຂະໜາດກາງ ແລະ ນ້ອຍ, ວິສາຫະກິດນຳໃຊ້ຄົນງານຫຼາຍ. ກ່ຽວກັບເລື່ອງຮັກສາເສດຖະກິດມະຫາພາກເປັນປົກກະຕິ,ທະນາຄານແຫ່ງລັດໄດ້ຮີບເຮັ່ງສ້າງໂຄງປະກອບຫນີ້ສິນຄືນໃໝ່, ຫລຸດຜ່ອນໜີ້ເສຍດ້ວຍຫຼາຍມາດຕະການຕິດພັນກັບການສ້າງໂຄງປະກອບທະນາຄານຄືນໃໝ່. ທ່ານ Nguyen Van Binh ຜູ້ວ່າການທະນາຄານແຫ່ງລັດຫວຽດນາມ ໄດ້ໃຫ້ຄຳໝັ້ນສັນຍາຈະປະຕິບັດບັນດາເນື້ອໃນກ່ຽວກັບການສ້າງໂຄງປະກອບລະບົບທະນາຄານຄືນໃໝ່ຢ່າງຄົບຖ້ວນໃນແຜນການປີນີ້:
“ມາຮອດປະຈຸບັນ, ພວກຂ້າພະເຈົ້າໄດ້ແກ້ໄຂ ແລະ ກ້າວໄປເຖິງການສ້າງໂຄງປະກອບທັງ 9 ອົງການສິນເຊື່ອຄືນໃໝ່. ວິທີການໃຫ້ແກ່ທະນາຄານແຕ່ລະແຫ່ງພວມຢູ່ໃນໄລຍະສ້າງສຳເລັດ. ພວກຂ້າພະເຈົ້າໄດ້ສ້າງເງື່ອນໄຂ, ຕໍ່ກຳນົດເວລາ, ແຕ່ຖ້າຫາກບັນດາອົງການສິນເຊື່ອບໍ່ສາມາດປະຕິບັດຕາມວິທີການຊັບຊ້ອນເອງໄດ້, ພວກຂ້າພະເຈົ້າຈະມີວິທີການເພື່ອຮັບປະກັນຄວາມປອດໄພຂອງລະບົບ“
ວາລະປະຊຸມເດືອນ 7/2012 ຂອງລັດຖະບານ
(ພາບ: ອິນເຕີແນັດ)
ເລື່ອງກວດກາ, ສ້າງໂຄງປະກອບລັດວິສາຫະກິດຄືນໃໝ່ຢ່າງຮີບເຮັ່ງ ແລະ ຕັ້ງໜ້າ ເພື່ອຍົກສູງປະສິທິຜົນໃນການຜະລິດດຳເນີນທຸລະກິດໃນບັນດາຂະແໜງວິຊາຊີບຕົ້ນຕໍຂອງວິສາຫະກິດ ກໍ່ແມ່ນມາດຕະການທີ່ສຳຄັນຊື່ງລັດຖະບານໄດ້ມຸ້ງໄປເຖິງ. ພ້ອມກັນນັ້ນກໍ່ແມ່ນການຍູ້ແຮງລະດັບຄວາມໄວໃນການປ່ອຍເງິນບັນດາແຫຼ່ງທຶນ ODA, ທຶນຈາກງົບປະມານແຫ້ງລັດ, ທຶນໂດຍກົງຈາກຕ່າງປະເທດ. ທ່ານ Vu Duc Dam ລັດຖະມົນຕີ ຫົວໜ້າຫ້ອງວ່າການລັດຖະບານໃຫ້ຮູ້ວ່າ: ລັດຖະບານໄດ້ມີຂໍ້ຕົກລົງບໍລິຫານຢ່າງມີໄຫວພິບໃນຈຸດເວລາປະຈຸບັນ:
“ລັດຖະບານໄດ້ຕົກລົງວ່າ ນອກຈາກການນຳໃຊ້ທຶນຕາມແຜນການປີ 2012 ແລ້ວ, ກິດຈະກຳສຳຄັນ, ຮີບດ່ວນ, ມີຄວາມໝາຍສຳຄັນຕໍ່ຊີວິດສັງຄົມ ແລະ ການຜະລິດຈຳນວນ 1 ຖ້າມີເງິນຈະຖືກຍູ້ໄວ ເພື່ອກໍ່ສ້າງໃຫ້ສຳເລັດໃນປີ 2012 ນີ້ ຫລືວ່າ ໃນຕົ້ນປີ 2013 . ນີ້ກໍ່ແມ່ນແງ່ 1 ຂອງບັນຫາສ້າງໂຄງປະກອບການລົງທຶນຂອງລັດຄືນໃໝ່“
ຄວບຄຸມໄພເງິນເຟີ້, ຮັກສາເສດຖະກິດເປັນປົກກະຕິ
(ພາບ:tapchitaichinh.vn)
ໄປຄຽງຄູ່ກັບການຮັກສາລະດັບເຕີບໂຕແບບຍືນຍົງ, ຄວບຄຸມໄພເງິນເຟີ້, ການປະຕິບັດນະໂຍບາຍຊີວິດສັງຄົມ, ບັນດາໂຄງການຈຸດໝາຍແຫ່ງຊາດໃຫ້ດີກ່ວາອີກ ກໍ່ໄດ້ຮັບຄວາມເອົາໃຈໃສ່ຊີ້ນຳຈາກລັດຖະບານ. ຕາມນັ້ນແລ້ວ, ບັນດາຂັ້ນ, ຂະແໜງການຕອ້ງເອົາໃຈໃສ່ເປັນພິເສດເຖິງວຽກງານສອນວິຊາຊີບ, ສ້າງວຽກເຮັດງານທຳໃຫ້ຜູ້ອອກແຮງງານ, ເອົາໃຈໃສ່ເບິ່ງແຍງໃຫ້ບັນດາເປົ້າໝາຍນະໂຍບາຍ, ຜູ້ມີຄຸນງາມຄວາມດີຕໍ່ປະເທດຊາດ. ທ່ານ Trinh Dinh Dung ລັດຖະມົນຕີວ່າການກະຊວງກໍ່ສ້າງຫວຽດນາມ ໃຫ້ຮູ້ວ່າ: ທາງກະຊວງມີທິດຍູ້ແຮງການກໍ່ສ້າງເຮືອນຢູ່ສັງຄົມ, ທັງປະກອບສ່ວນກະຕຸກຊຸກຍູ້ຄວາມຕ້ອງການ, ຊຸກຍູ້ເສດຖະກິດ, ທັງແກ້ໄຂບັນຫາເຮືອນຢູ່ໃຫ້ເປົ້າໝາຍມີລາຍຮັບຕ່ຳເພື່ອຮັບປະກັນຊີວິດສັງຄົມ:
”ພວກເຮົາໄດ້ປະຕິບັດການກໍ່ສ້າງເຮືອນຢູ່ໃຫ້ແກ່ຜູ້ທຸກຍາກຢູ່ຊົນນະບົດດີທີ່ສຸດ, ແຕ່ເຮືອນຢູ່ໃຫ້ຜູ້ທຸກຍາກໃນເຂດຕົວເມືອງຍັງປະສົບກັບຄວາມຫຍຸ້ງຍາກຫຼາຍຢ່າງ. ພວກຂ້າພະເຈົ້າຈະຂໍຄຳເຫັນຈາກທ່ານນາຍົກລັດຖະມົນຕີ ເພື່ອມີອັດຕາດອກເບັ້ຍຕ່ຳເພື່ອໜູນຊ່ວຍບັນດາວິສາຫະກິດກໍ່ສ້າງເຮືອນຢູ່ສັງຄົມ ນອກຈາກການໜູນຊ່ວຍຂອງລັດຄືຍົກເວັ້ນຄ່ານຳໃຊ້ທີ່ດິນ ແລະ ບາງນະໂຍບາຍອື່ນ”
ແລະ ກໍ່ໃນວາລະປະຊຸມປະຈຳເດືອນ 7/2012, ທ່ານນາຍົກລັດຖະມົນຕີໄດ້ຮຽກຮ້ອງໃຫ້ບັນດາຂະແໜງການ, ຂັ້ນຕ່າງໆ ຈົ່ງເພີ່ມທະວີວຽກງານປະຕິຮູບດ້ານບໍລິຫານ, ປ້ອງກັນ, ຕ້ານໄພສໍ້ລາດບັງຫຼວງ, ການຟູມເຟືອຍ, ສືບຕໍ່ປະຕິບັດວຽກງານໂຄສະນາເຜີຍແຜ່ຢ່າງມີປະສິດທິຜົນ, ສ້າງຄວາມເຫັນດີເຫັນພ້ອມ ແລະ ເສີມຂະຫຍາຍກຳລັງແຮງຂອງທົ່ວສັງຄົມໃນການປະຕິບັດຈຸດໝາຍຊຸກຍູ້ການເຕີບໂຕ ຕິດພັນກັບການຄວບຄຸມໄພເງີນເຟີ້, ຮັກສາເສດຖະກິດມະຫາພາກເປັນປົກກະຕິ.