(vovworld)-ກອງປະຊຸມລັດຖະມົນຕີກ່ຽວກັບການພັດທະນາແຫລ່ງຊັບພະຍາກອນມະນຸດເວທີປາໄສການຮ່ວມມືເສດຖະກິດ ອາຊີ -ປາຊີຟີກ(APEC) ຄັ້ງທີ 6 ໂດຍຫວຽດນາມເປັນເຈົ້າພາບຈັດຕັ້ງຂຶ້ນ ຫາກໍ່ອັດລົງຢູ່ ຮ່າໂນ້ຍ ພາຍຫລັງເຮັດວຽກມາເປັນເວລາ 2 ວັນ. ກອງປະຊຸມ ແມ່ນຫນຶ່ງໃນບັນດາການເຄື່ອນໄຫວ ເປັນຂີດໝາຍ 25 ປີແຫ່ງການສ້າງຕັ້ງ ແລະ ພັດທະນາຂອງ APEC, ກະກຽມ ໃຫ້ແກ່ເລື່ອງຫວຽດນາມ ເປັນເຈົ້າພາບຈັດຕັ້ງກອງປະຊຸມ APEC ຄັ້ງທີ 25 ໃນປີ 2017. ຜົນສຳເລັດຂອງກອງປະຊຸມ ອີກຄັ້ງຫນຶ່ງ ຢືນຢັນ: ຫວຽດນາມ ໄດ້, ພວມ ແລະ ຈະຮ່ວມມືຢ່າງຕັ້ງຫນ້າພ້ອມກັບ APEC ເພື່ອຊຸກຍູ້ບັນດາກົນໄກຮ່ວມມື, ຮ່ວມສຳພັນດ້ານເສດຖະກິດເປັນຫລາຍຮູບຫລາຍແບບ, ໄຫວພິບ, ປະສິດທິຜົນ, ສອດຄ່ອງກັບສະພາບແວດລ້ອມແຫ່ງການແກ້ງແຍ້ງສາກົນໃຫມ່.
ທ່ານນາຍົກລັດຖະມົນຕີ ຫງວຽນເຕີນຢູ້ງ ກ່າວຄຳເຫັນທີ່ວາລະໄຂກອງປະຊຸມ
ກອງປະຊຸມລັດຖະມົນຕີ APEC ຄັ້ງທີ 6 ກ່ຽວກັບການພັດທະນາ ແຫລ່ງຊັບພະຍາກອນມະນຸດ ໄດ້ສຸມໃສ່ປຶກສາຫາລື 3 ຫົວເລ່ືອງກ່ຽວຂ້ອງເຖິງການຫນູນຊ່ວຍການເຕີບໂຕຢ່າງສະໝຳ່ສະເຫມີ ແລະ ໝັ້ນຄົງ ເພື່ອແກ້ໄຂບັນດາແງ່ມູມຂອງວິວັດການໂລກາພິວັດ; ຍົກສູງຄຸນນະພາບແຫລ່ງຊັບພະຍາກອນມະນຸດ ເພື່ອຕອບສະຫນອງຄວາມຮຽກຮ້ອງຕ້ອງການລະບົບສະຫນອງ ແລະ ຊຸກຍູ້ການຍົກຍ້າຍຄົນງານ ແລະ ພັດທະນາທັກສະ. ກອງປະຊຸມແມ່ນຫນຶ່ງໃນບັນດາການເຄື່ອນໄຫວສຳຄັນ ເພື່ອຫັນບັນດາເນື້ອໃນຂອງຖະແຫລງການຮ່ວມຂອງບັນດາການນຳ APEC ໃຫ້ປະກົດຜົນເປັນຈິງ, ເພີ່ມທະວີການຮ່ວມມືພັດທະນາ ແຫລ່ງຊັບພະຍາກອນມະນຸດ ບໍ່ພຽງແຕ່ໃນ APEC ເທົ່ານັ້ນ ຫາກກັບບັນດາຄູ່ຮ່ວມມືພາຍນອກ ອີກດ້ວຍ, ຊື່ງໄດ້ຮັບຮອງເອົາທີ່ກອງປະຊຸມສຸດຍອດ APEC ຄັ້ງທີ 21
ແຫລ່ງຊັບພະຍາກອນມະນຸດ ປະກອບສ່ວນໃຫ້ແກ່ການເຕີບໂຕ APEC
ອາດຈະຢືນຢັນໄດ້ວ່າ, ຜ່ານໄລຍະ 25 ປີແຫ່ງການພັດທະນາ, APEC ໄດ້ມີຄວາມເອົາໃຈໃສ່ເປັນພິເສດເຖິງປະສິດທິຜົນແຫລ່ງຊັບພະຍາກອນມະນຸດຢ່າງອຸດົມສົມບູນ ດ້ວຍລະດັບຄວາມຮູ້, ທັກສະນັບມື້ນັບສູງ ຄຽງຄູ່ກັບການພັດທະນາຂອບເຂດ, ລະບອບນະໂຍບາຍສອດຄ່ອງ, ເຊີດຊູຄຸນຄ່າວັດທະນະທຳມະນຸດ, ປົກປ້ອງ ແລະ ເຊື່ອມຕໍ່ມະນຸດກັບມະນຸດ.
ເຖິງຢ່າງໃດກໍຕາມ, ທ່າອ່ຽງໂລກາພິວັດ ແລະຫັນເປັນເສລີ ນັບມື້ນັບເລິກເຊິ່ງກວ້າງຂວາງ, ຮູບການຮ່ວມມື, ຮ່ວມສຳພັນເສດຖະກິດເປັນຫລາຍຮູບຫລາຍແບບ, ສ້າງກາລະໂອກາດໃຫມ່ຫລາຍຢ່າງ, ແຕ່ກໍ່ວາງອອກບັນດາສິ່ງທ້າທາຍໃຫມ່ສຳລັບໂລກເວົ້າລວມ ແລະ ແຕ່ລະປະເທດສະມາຊິກ APEC ເວົ້າສະເພາະ. ນີ້ກໍແມ່ນສິ່ງທີ່ ທ່ານນາຍົກລັດຖະມົນຕີຫວຽດນາມ ຫງວຽນເຕີນຢູງ ເນັ້ນຫນັກທີ່ວາລະໄຂກອງປະຊຸມລັດຖະມົນຕີ APEC ຄັ້ງທີ 6 ກ່ຽວກັບການພັດທະນາ
ແຫລ່ງຊັບພະຍາກອນມະນຸດ.
“ໃນສະພາບການເສດຖະກິດໂລກຍັງປະສົບກັບຄວາມຫຍຸ້ງຍາກ, ສິ່ງທ້າທາຍຫລາຍຢ່າງພວມວາງອອກສຳລັບແຕ່ລະປະເທດສະມາຊິກພວກເຮົາຄື: ການຟື້ນຕົວການເຕີບໂຕຍັງຊັກຊ້າ, ຂາດຄວາມໝັ້ນຄົງ, ຈຳນວນຜູ້ວ່າງງານຍັງຫລາຍ, ຂາດຄວາມດຸ່ນດ່ຽງກ່ຽວກັບການສະຫນອງ ແລະ ຄວາມຕ້ອງການຄົນງານມີສີມືສູງ, ຂາດສະຖຽນລະພາບທາງສັງຄົມ. ນີ້ແມ່ນບັນດາບັນຫາຄວນໄດ້ຮັບການແກ້ໄຂຢູ່ລະດັບຊາດ, ພາກພື້ນ ແລະ ທົ່ວໂລກ. ຄວາມຕັດສິນໃຈ ແລະ ຄວາມມານະພະຍາຍາມຂອງແຕ່ລະພື້ນຖານເສດຖະກິດ ແມ່ນຈຳເປັນທີ່ສຸດ, ແຕ່ບໍ່ທັນຄົບຖ້ວນ.”
ກາລະໂອກາດ ແລະ ສິ່ງທ້າທາຍໂດຍທ່າອ່ຽງຂົນຂວາຍໃນ APEC ນຳມາໃຫ້ ໂດຍຮັບຮູ້ຢ່າງລະອຽດວ່າ ມີແຫຼ່ງຊັບພະຍາກອນມະນຸດທີ່ມີຄຸນນະພາບສູງແມ່ນຂໍ້ກຸນແຈເປີດປະຕູ ແລະ ຮັບປະກັນການພັດທະນາແບບຍືນຍົງ ແລະ ຮອບດ້ານໃນສະພາບການໂລກາພິວັດ ແລະ ຫັນເປັນເສລີນັບມື້ນັບເລິກເຊິ່ງກ້ວາງຂວາງ, ຫວຽດນາມ ໄດ້ສ້າງໃຫ້ຕົນເອງບັນດາທ່າແຮງສະເພາະ ໃນການພັດທະນາແຫຼ່ງຊັບພະຍາກອນມະນຸດຂອງຕົນເພື່ອເຂົ້າຮ່ວມໃນວິວັດທະນາການສັບຊ້ອນວຽກງານ ແລະ ຫັນຄົນງານມີວິຊາສະເພາະໃນຂອບເຂດທົ່ວໂລກຄືໃນປະຈຸບັນ. ແຕ່ວ່າ, ກໍ່ຄືບັນດາປະເທດສະມາຊິກ APEC ແລ້ວ, ຄຽງຄູ່ກັບບັນດາກາລະໂອກາດທີ່ນຳມາເຊິ່ງນັ້ນ, ຫວຽດນາມ ພວມຕ້ອງປະເຊີນໜ້າກັບບັນດາການທ້າທາຍບໍ່ແມ່ນໜ້ອຍ, ນັ້ນແມ່ນ ເຮັດແນວໃດຕ້ອງແກ້ໄຂບັນດາຄຳໝັ້ນສັນຍາໃນບັນດາລະບອບພາກພື້ນ ແລະ ທົ່ວໂລກຢ່າງມີປະສິດທິຜົນສູງສຸດ, ນຳມາເຊິ່ງຜົນປະໂຫຍດໃຫ້ແກ່ການພັດທະນາເສດຖະກິດຂອງປະເທດຊາດ. ອະດີດຮອງນາຍົກລັດຖະມົນຕີ ຫວູຄວານ, ຖືວ່າ:
“ຖ້າຫາກວ່າກ່ອນນີ້, ລະບອບ APEC ແມ່ນເອກະສິດ, ແຕ່ປະຈຸບັນໄດ້ປະກົດອອກມີຫຼາຍລະບອບອື່ນໆອີກ, ເຊິ່ງໃນນັ້ນພົ້ນເດັ່ນແມ່ນການຮ່ວມມື TPP (ສັນຍາຄູ່ຮ່ວມມືເສດຖະກິດຂ້າມ ປາຊີຟິກ), ການຮ່ວມມື ອາຊີ ຕາເວັນອອກ ຫຼື ບັນດາລະບອບເສລີ 2 ຝ່າຍອື່ນ. ດັ່ງນັ້ນ APEC ຕ້ອງກຳນົດຄືແນວໃດໃນລະບອບນີ້, ເພື່ອລີກຫຼ້ຽງການກ້າວກ່າຍ”
ຕັ້ງຫນ້າຊຸກຍູ້ບັນດາກົນໄກຮ່ວມມືໃນ APEC
ໃນໄລຍະ 16 ປີແຫ່ງການເຂົ້າຮ່ວມເວທີປາໄສ APEC, ຫວຽດນາມ ໄດ້ຮ່ວມມືຢ່າງຕັ້ງຫນ້າ ແລະ ຈະສືບຕໍ່ພ້ອມກັບບັນດາປະເທດສະມາຊິກ APEC ຊຸກຍູ້ບັນດາກົນໄກຮ່ວມມື, ຮ່ວມສຳພັນດ້ານເສດຖະກິດເປັນຫລາຍຮູບຫລາຍແບບ, ໄຫວພິບ, ມີປະສິດທິຜົນ ສອດຄ່ອງກັບສະພາບແວດລ້ອມແຫ່ງການແກ້ງແຍ້ງສາກົນໃຫມ່. ກອງປະຊຸມລັດຖະມົນຕີ APEC ກ່ຽວກັບການພັດທະນາແຫລ່ງຊັບພະຍາກອນມະນຸດ ຄັ້ງນີ້ ປະກອບສ່ວນຮັດແຫນ້ນສາຍກ່ຽວພັນ, ການຮ່ວມມືໃນພາກພື້ນຢ່າງມີປະສິດທິຜົນ ດ້ວຍເລື່ອງວາງອອກຂໍ້ສະເຫນີແນະ, ຂໍ້ລິເລີ່ມໃຫມ່ຫລາຍຂໍ້, ບັນດາມາດຕະການປະສິດທິຜົນຖືມະນຸດເປັນໃຈກາງ, ຈຳກັດບັນດາການເຄື່ອນໄຫວຫຍໍ້ທໍ້ຂອງໂລກາພິວັດ.
ໃນໄລຍະຈະມາເຖິງ, ຫວຽດນາມ ພວມຕັ້ງຫນ້າ ກະກຽມໃຫ້ແກ່ເຫດການກອງປະຊຸມ APEC ຄັ້ງທີ 25 ຈັດຂຶ້ນຢູ່ ຫວຽດນາມ ໃນປີ 2017. ທ່ານ David Dodwell, ຜູ້ຕາງຫນ້າສະພາເສດຖະກິດ APEC ຖືວ່າ:
“ຫວຽດນາມ ຈະເປັນເຈົ້າພາບຈັດຕັ້ງກອງປະຊຸມ APEC ໃນປີ 2017, ເພາະສະນັ້ນ ຂ້າພະເຈົ້າຖືວ່າ ນີ້ແມ່ນບາດກ້າວກະກຽມຂອງຫວຽດນາມ ເປັນຢ່າງດີ, ຮັບປະກັນໃຫ້ແກ່ຜົນສຳເລັດຂອງປີ APEC ປີ 2017. ບັນດາການເຄື່ອນໄຫວຢ່າງຕັ້ງຫນ້າຂອງຫວຽດນາມ ໃນ APEC ແມ່ນບາດກ້າວເລີ່ມຕົ້ນໃຫ້ວິວັດການສືບຕໍ່ເຈລະຈາ ແລະ ເຊື່ອມໂຍງເຂົ້າກັບສາກົນຂອງ ຫວຽດນາມ ໃນໄລຍະຈະມາເຖິງ.”
ພາຍຫລັງ 30 ປີ ແຫ່ງການປ່ຽນແປງໃຫມ່, ປະຈຸບັນ ຫວຽດນາມ ພວມໃນໄລຍະອັດຕາສ່ວນພົນລະເມືອງຫນຸ່ມຢູ່ໃນລະດັບສູງ, ກຳລັງແຮງງານອຸດົມສົມບູນ ແລະ ມີຄວາມສາມາດບົ່ມຊ້ອນຫລາຍຢ່າງ. ໄລຍະນີ້ຈະແກ່ຍາວອີກ 30 -35 ປີ ຕາມການຄາດຄະເນຂອງບັນດານັກວິທະຍາສາດ. ບັນດາມາດຕະການເໝາະສົມໃນການສອນວິຊາຊີບ, ນຳໃຊ້ກຳລັງຄົນງານຢ່າງເໝາະສົມ, ພິເສດແມ່ນການຮ່ວມມືຢ່າງຕັ້ງຫນ້າໃນບັນດາກົນໄກສຳຄັນທົ່ວໂລກຄື: APEC, ແມ່ນບັນດາເງື່ອນໄຂສະດວກເພ່ືອໃຫ້ຫວຽດນາມ ຍູ້ແຮງລະດັບການພັດທະນາເສດຖະກິດສັງຄົມ.