(vovworld) - ປີນີ້, ເຖິງວ່າພື້ນຖານເສດຖະກິດປະສົບກັບຄວາມຫຍຸ້ງຍາກຫລາຍຢ່າງກໍຕາມ, ແຕ່ລັດຖະບານ ຫວຽດນາມ ຍັງຄົງສະຫງວນຄວາມເອົາໃຈໃສ່ເປັນພິເສດໃຫ້ແກ່ຜູ້ທຸກຍາກ, ເປັນຕົ້ນໃນໂອກາດບຸນປີໃຫມ່ປະຈຳຊາດ (ບຸນເຕັດ). ການເອົາໃຈໃສ່ເບິ່ງແຍງເພື່ອໃຫ້ຜູ້ທຸກຍາກໄດ້ຕ້ອນຮັບບຸນເຕັດຢ່າງຄົບຖ້ວນ ໄດ້ກາຍເປັນຂະບວນການຂອງທົ່ວສັງຄົມ, ແມ່ນຫນ້າທີ່ຈຸດສຸມຂອງທຸກຂະແຫນງການ, ທ້ອງຖິ່ນ, ວິສາຫະກິດ ແລະ ວົງຄະນາຍາດ, ທັງແມ່ນຫນຶ່ງໃນບັນດາແຜນນະໂຍບາຍໃຫຍ່ໃນບັນດານະໂຍບາຍຮັບປະກັນຊີວິດສັງຄົມຂອງ ຫວຽດນາມ.
ກ່ອນນີ້ສອງສາມເດືອນ, ທຸກຂະແຫນງການ, ທ້ອງຖິ່ນໄດ້ກະກຽມບຸນເຕັດ ໃຫ້ແກ່ບັນດາຄອບຄົວທຸກຍາກ. ທ່ານນາງ ຟ້າມທິຫາຍຈ່ວຽນ ລັດຖະມົນຕີກະຊວງແຮງງານ, ທະຫານເສຍອົງຄະ ແລະ ສັງຄົມ ຫວຽດນາມ ໃຫ້ຮູ້ວ່າ: ທາງກະຊວງໄດ້ສະເຫນີຕໍ່ທ່ານປະທານປະເທດ ຍົກລະດັບການຫນູນຊ່ວຍໃຫ້ແກ່ຜູ້ທີ່ມີຄຸນງາມຄວາມດີໃນໂອກາດ ບຸນເຕັດປີນີ້ ໃຫ້ສູງກວ່າປີກ່ອນ ດ້ວຍແຫລ່ງງົບປະມານເກືອບ 400 ຕື້ດົ່ງ, ເພີ່ມຂຶ້ນ 3,5 ຕື້ດົ່ງ. ຈາກຄຳສະເຫນີຂອງບັນດາທ້ອງຖິ່ນ, ກະຊວງແຮງງານທະຫານເສຍອົງຄະ ແລະ ສັງຄົມ ກໍໄດ້ສະເຫນີຕໍ່ລັດຖະບານ ຫນູນຊ່ວຍເຂົ້າສານ 23.000 ໂຕນເພື່ອໃຫ້ຜູ້ທຸກຍາກຕ້ອນຮັບ ບຸນເຕັດ. ຕາມ ທ່ານນາງ ຟ້າມທິຫາຍຈ່ວຽນ ລັດຖະມົນຕີກະຊວງແຮງງານ, ທະຫານເສຍອົງຄະ ແລະ ສັງຄົມ ຫວຽດນາມ ແລ້ວ, ນີ້ແມ່ນຄວາມມານະພະຍາຍາມອັນໃຫຍ່ຫລວງຂອງພັກ, ລັດ ໃນເງື່ອນໄຂເສດຖະກິດ, ສັງຄົມຍັງປະສົບກັບຄວາມຫຍຸ້ງຍາກຫລາຍຢ່າງ.
“ລັດຖະບານໄດ້ຊີ້ນຳໜູນຊ່ວຍເຂົ້າສານໃຫ້ແກ່ຄອບຄົວທຸກຍາກ, ຖ້າຫາກຄອບຄົວໃດເກືອບຢູ່ໃນລະດັບທຸກຍາກ. ອຳນາດການປົກຄອງຈະພິຈາລະນາຫນູນຊ່ວຍເພື່ອຕ້ອນຮັບບຸນເຕັດໃນຄວາມອົບອຸ່ນ. ຫວຽດນາມ ແມ່ນຫນື່ງໃນບັນດາປະເທດສະມາຊິກ ອາຊຽນ ທີ່ມີຫລາຍນະໂຍບາຍຮັບປະກັນຊີວິດສັງຄົມ ແລະ ໄດ້ຮັບການຕີລາຄາວ່າໄດ້ປະຕິບັດນະໂຍບາຍນີ້ເປັນຢ່າງດີ, ໃນນັ້ນ ມີຫລາຍນະໂຍບາຍສຳລັບຜູ້ທຸກຍາກ. ສະເພາະໂອກາດບຸນເຕັດ, ລັດຖະບານໄດ້ຮຽກຮ້ອງໃຫ້ບັນດາແຂວງຈົ່ງກວດກາຄືນບັນດາເປົ້າໝາຍຄອບຄົວທຸກຍາກເພື່ອຮັບປະກັນໃຫ້ທຸກຄົນລ້ວນແຕ່ໄດ້ຕ້ອນຮັບບຸນເຕັດຢ່າງຄົບຖ້ວນ. ທາງກະຊວງກໍໄດ້ຮຽບຮຽງ ແລະ ຍື່ນສະເຫນີຕໍ່ລັດຖະບານ ເພື່ອຫນູນຊ່ວຍບັນດາເປົ້າໝາຍດັ່ງກ່າວ.”
ມອບຂອງຂວັນໃຫ້ແກ່ຜູ້ທຸກຍາກໃນໂອກາດບຸນເຕັດ
ພາບ:internet |
ໃນໂທລະເລກທາງການຊີ້ນຳການຜັນຂະຫຍາຍວຽກງານຮັບໃຊ້ບຸນເຕັດ, ທ່ານນາຍົກລັດຖະມົນຕີ ຫງວຽນເຕີນຢູງ ສະເຫນີໃຫ້ບັນດາອົງການກ່ຽວຂ້ອງ ຕ້ອງເອົາໃຈໃສ່ເປັນພິເສດເຖິງການສະຫນອງສິນຄ້າໃຫ້ເຂດຊົນນະບົດ, ເຂດຫ່າງໄກສອກຫລີກ, ເຂດຊົນເຜ່ົາສ່ວນຫນ້ອຍ, ເຂດຊາຍແດນ ທະເລໝູ່ເກາະ. ທ່ານນາຍົກລັດຖະມົນຕີ ກໍສະເຫນີ ບັນດາຂະແຫນງການກ່ຽວຂ້ອງຕ້ອງປະຕິບັດບັນດາລະບອບນະໂຍບາຍຂອງພັກ ແລະ ລັດຢ່າງທັນການ, ສົມທົບກັບການຢື້ຢາມຖາມຂ່າວລະດົມທາງດ້ານວັດຖຸ, ຈິດໃຈໃຫ້ບັນດາຄອບຄົວທຸກຍາກ, ຄອບຄົວໃນເປົ້າໝາຍນະໂຍບາຍໃນທ້ອງຖີ່ນ. ທ່ານນາງ ຟ້າມທິຫາຍຈ່ວຽນ ລັດຖະມົນຕີກະຊວງແຮງງານ, ທະຫານເສຍອົງຄະ ແລະ ສັງຄົມ ຫວຽດນາມ ໃຫ້ຮູ້ວ່າ:
“ປີນີ້, ລັດຖະບານ, ນາຍົກລັດຖະມົນຕີ ໄດ້ມີໂທລະເລກທາງການສະເຫນີວ່າ: ທີຫນຶ່ງ ຕ້ອງປະຕິບັດນະໂຍບາຍທີ່ມີຕໍ່ບັນດາເປົ້າໝາຍດັ່ງກ່າວໃນໂອກາດບຸນເຕັດຢ່າງຄົບຖ້ວນ, ທັນການ. ທີສອງ ຈັດຕັ້ງການຢື້ຢາມຖາມຂ່າວ, ລະດົມກຳລັງໃຈເຂົາເຈົ້າ. ທີສາມ ແມ່ນລະດົມທຸກແຫລ່ງກຳລັງ, ອົງການຈັດຕັ້ງການເມືອງ ສັງຄົມ, ອົງການຈັດຕັ້ງມະຫາຊົນ, ວິສາຫະກິດ ເພື່ອມີແຫລ່ງກຳລັງເບີ່ງແຍງດູແລ, ຫນູນຊ່ວຍໃຫ້ແກ່ຄອບຄົວທຸກຍາກ. ມາຮອດປະຈຸບັນ, ຂອງຂວັນໄດ້ສົ່ງເຖິງບັນດາຄອບຄົວທີ່ທຸກຍາກແລ້ວ.”
ພ້ອມກັບການຫນູນຊ່ວຍຜູ້ທຸກຍາກຕ້ອນຮັບບຸນເຕັດແລ້ວ, ປີນີ້ ຄະນະປະຈຳຄະນະກຳມະການສູນກາງແນວໂຮມປະເທດຊາດ ຫວຽດນາມ ໄດ້ຈັດແບ່ງກອງທຶນເພື່ອຜູ້ທຸກຍາກສູນກາງ ດ້ວຍຈຳນວນເງິນ 3 ຕື້ດົ່ງ, ເທົ່າກັບ ຂອງຂວັນ 11.000 ພູດ. ຈຳນວນເງິນດັ່ງກ່າວໄດ້ສົ່ງເຖີງແນວໂຮມປະເທດຊາດບັນດາແຂວງ, ນະຄອນ, ເຫລົ່າທັບເຮືອ ແລະ ອົງການສະມາຊິກຈຳນວນຫນຶ່ງ ເພື່ອສົ່ງເຖິງຄອບຄົວທຸກຍາກ, ເປັນຕົ້ນບັນດາຄອບຄົວທຸກຍາກຢູ່ເຂດຫ່າງໄກສອກຫລີກ, ເຂດຊາຍແດນ, ທະເລ ແລະ ໝູ່ເກາະ. ທ່ານ ຮູ່ນດ໋າມ, ປະທານຄະນະກຳມະການສູນກາງແນວໂຮມປະເທດຊາດ ຫວຽດນາມ ໃຫ້ຮູ້ວ່າ: ແນວໂຮມປະເທດຊາດ ຫວຽດນາມ ໄດ້ຕັ້ງຫນ້າຂົນຂວາຍບັນດາອົງການ, ສ່ວນບຸກຄົນພ້ອມກັນເຂົ້າຮ່ວມການເອົາໃຈໃສ່ເບິ່ງແຍງໃຫ້ແກ່ຜູ້ທຸກຍາກ.
“ປີນີ້, ແນວໂຮມປະເທດຊາດ ຫວຽດນາມ ສືບຕໍ່ຂົນຂວາຍບັນດາອົງການຈັດຕັ້ງ, ສ່ວນບຸກຄົນຮ່ວມແຮງຮ່ວມໃຈຊ່ວຍເຫລືອຜູ້ທຸກຍາກຢ່າງມີປະສິດທິຜົນ ແລະ ແທດຈິງກວ່າ, ໃກ້ຊິດຕິດແທດກັບສະພາບປະຈຸບັນ. ສະນັ້ນ ມີຫລາຍອົງການ, ສ່ວນບຸກຄົນໄດ້ຈົດທະບຽນສະຫນັບສະຫນູນຜູ້ທຸກຍາກ. ໃນສະພາບເສດຖະກິດປະສົບກັບຄວາມຫຍຸ້ງຍາກຫລາຍຢ່າງນັ້ນ, ການກະທຳນີ້ແມ່ນມີຄວາມໝາຍຢ່າງເລິກເຊິ່ງ.”
ຊ່ວຍຄອບຄົວທຸກຍາກໄດ້ຕ້ອນຮັບບຸນເຕັດຢ່າງອົບອຸ່ນ
ພາບ:internet
|
ໃນໂອກາດນີ້, ກະຊວງອຸດສາຫະກຳ ແລະ ການຄ້າ ຫວຽດນາມ ພ້ອມກັບບັນດາວິສາຫະກິດ, ອົງການດຳເນີນທຸລະກິດ ການຄ້າ ໄດ້ສົ່ງສິນຄ້າເຖິງເຂດຊົນນະບົດ, ເປັນຕົ້ນແມ່ນເຂດຫ່າງໄກສອກຫລີກ ດ້ວຍລາຄາເໝາະສົມ ເພື່ອຮັບໃຊ້ຜູ້ທຸກຍາກ, ຜູ້ມີລາຍຮັບຕ່ຳ. ທ່ານ ຫວູຮູຍຮວ່າງ, ລັດຖະມົນຕີກະຊວງອຸດສາຫະກຳ ແລະ ການຄ້າ ຫວຽດນາມ ໃຫ້ຮູ້ວ່າ: ບັນດາມາດຕະການຮັບປະກັນປະລິມານສິນຄ້າທີ່ສະຫນອງໃຫ້ແກ່ປະຊາຊົນໄດ້ຮັບການຜັນຂະຫຍາຍຢ່າງຕັ້ງຫນ້າຈາກທ້ອງຖິ່ນຕ່າງໆ.
“ໃນໄລຍະກາງປີ, ບັນດາທ້ອງຖິ່ນໄດ້ເປັນເຈົ້າການກະກຽມງົບປະມານຫນູນຊ່ວຍບັນດາວິສາຫະກິດການຄ້າ ເພື່ອເກັບຊື້, ສະສົມສິນຄ້າເພື່ອຮັບໃຊ້ໃຫ້ແກ່ບຸນເຕັດ. ດ້ວຍບ້ວງເງິນຫນູນຊ້ວຍກວ່າ 1000 ຕື້ດົ່ງ. ອາດຈະຢືນຢັນໄດ້ວ່າ ບັນດາທ້ອງຖິ່ນ ໄດ້ເຮັດຈົນສຸດຄວາມສາມາດຂອງຕົນ. ສະນັ້ນ ແຫລ່ງສະຫນອງສິນຄ້າຈຶ່ງໄດ້ຮັບປະກັນ.”
ດ້ວຍເລື່ອງບັນດາຂະແຫນງການ, ທ້ອງຖິ່ນໄດ້ມີການກະກຽມຢ່າງລອບຄອບຖີ່ຖ້ວນ ແລະ ຜັນຂະຫຍາຍວຽກງານເອົາໃຈໃສ່ເບິ່ງແຍງເພື່ອໃຫ້ຜູ້ທຸກຍາກຕ້ອນຮັບບຸນປີໃໝ່ຢ່າງຕັ້ງຫນ້ານັ້ນ ໄດ້ຫນູນຊ່ວຍບັນດາຄອບຄົວທຸກຍາກຢ່າງທັນການໃນໂອກາດບຸນເຕັດປີນີ້. ສິ່ງດັ່ງກ່າວໄດ້ປະກອບສ່ວນປະຕິບັດຫນຶ່ງໃນບັນດາແຜນນະໂຍບາຍໃຫຍ່ໃນລະບົບນະໂຍບາຍຮັບປະກັນຊີວິດສັງຄົມຂອງ ຫວຽດນາມ ນັ້ນແມ່ນຮັບປະກັນໃຫ້ຜູ້ທຸກຍາກໝົດທຸກຄົນລ້ວນແຕ່ໄດ້ຕ້ອນຮັບບຸນເຕັດຢ່າງອົບອຸ່ນ.