ວັນທີ 11/7, ປະທານາທິບໍດີລັດເຊຍ Vladimir Putin ເລີ່ມຕົ້ນການເດີນທາງຢ້ຽມຢາມ 3 ປະເທດອາເມລິກາລາຕີງຄື ກູບາ, ອັກຊັງຕີນ ແລະ ບຣາຊິນ. ໂດຍຖືກດຳເນີນໃນສະພາວະທີ່ມົດສກູພວມຊອກຫາວິທີຮັບມືກັບຄວາມຕົກຢູ່ໂດດດ່ຽວທີ່ນັບມື້ນັບເພີ່ມຂຶ້ນຂອງສາກົນຊຶ່ງກ່ຽວຂ້ອງເຖິງວິກິດການຢູ່ຢູແກຼນ, ການຢ້ຽມຢາມຄັ້ງນີ້ໄດ້ຮັບການສັງເກດຈາກວົງການນັກໄຈ້ແຍກວ່າ ແມ່ນເພື່ອແນໃສ່ຈຸດປະສົງຊອກຫາການສະໜັບສະໜູນຈາກບັນດາປະເທດໃນພາກພື້ນອາເມລິກາລາຕີງ, ພິເສດແມ່ນເປີດບັນດາຕະຫຼາດ, ກາລະໂອກາດຮ່ວມມືໃໝ່ກັບທະວີບ ໜຶ່ງທີ່ມີປະຊາກອນຫຼວງຫຼາຍ ແລະ ອຸດົມຮັ່ງມີ.
ປະທານາທິບໍດີລັດເຊຍ Vladimir Putin
|
ກູບາແມ່ນປະເທດທຳອິດໃນການເດີນທາງຢ້ຽມຢາມ 3 ປະເທດອາເມລິກາລາຕີງເປັນເວລາ 6 ວັນ. ຢູ່ປະເທດນີ້, ປະທານາທິບໍດີລັດເຊຍ Vladimir Putinຈະມີການພົບປະກັບທ່ານປະທານ Raul Castro ແລະ ຜູ້ນຳ Fidel Castro ເພື່ອປຶກສາຫາລືບັນຫາຮ່ວມມືໃນບັນດາຂົງເຂດພະລັງງານ, ຄົມມະນາຄົມ, ການບິນ, ອາວະກາດ ແລະ ສາທາລະນະສຸກ. ຫຼັງຈາກນັ້ນ, ປະທານາທິບໍດີ ລັດເຊຍ Vladimir Putinຈະໄປເຖິງອັກຊັງຕີນເພື່ອປຶກສາຫາລືບັນຫາການຄ້າ ແລະ ພະລັງງານກັບ ປະທານາທິບໍດີ Cristina Kirchner ກ່ອນທີ່ເດີນທາງເຂົ້າຮ່ວມກອງປະຊຸມສຸດຍອດຂອງກຸ່ມບັນດາປະເທດພວມພັດທະນາ BRICS ຢູ່ບຣາຊິນ .
ແກ້ໄຂທ່າໂດດດ່ຽວຢູ່ເອີລົບ.
ນັບແຕ່ເມື່ອ ວິກິດການຢູ່ຢູແກຼນລະເບີດຂຶ້ນ, ການພົວພັນລະຫວ່າງລັດເຊຍ ແລະ ຝ່າຍຕາເວັນຕົກມີຄວາມເຄັ່ງຕຶງທີ່ສຸດ, ຊ້ຳບໍໜຳແມ່ນຢູ່ໃນທ່າສູ້ຢັນກັນໂດຍກົງ. ການພົວພັນນັບມື້ນັບຊົ່ວຮ້າຍລົງຂະນະທີ່ລັດເຊຍໂຮມ Crimea ເຂົ້າເຂດດິນແດນສະຫະພັນເມື່ອເດືອນ 4, ອັນໄດ້ກໍ່ໃຫ້ເກີດກະແສຟອງຕຳໜິຕິຕຽນຢ່່າງຮຸນແຮງ. ຕາມຂໍ້ກ່າວຫາຈາກອາເມລິກາ ແລະ ຝ່າຍຕາເວັນຕົກ, ສະພາບຂາດສະຖຽນລະພາບຢູ່ ຢູແກຼນໃນປະຈຸບັນກໍຍ້ອນເລື່ອງລັດເຊຍໜູນຫຼັງແກ່ກຳລັງຝ່າຍຄ້ານຢູ່ພາກຕາເວັນອອກ. ອາເມລິກາ ແລະ EU ໄດ້ຈັດວາງຫຼາຍຄຳສັ່ງຫ້າມອອກວິຊາ ແລະ ປິດລ້ອມຊັບສົມບັດສຳລັບບັນດາບໍລິສັດ ແລະ ບັນດາສ່ວນບຸກຄົນຂອງລັດເຊຍ. ລັດເຊຍຍັງຖືກປັດເຂ່ຍອອກຈາກກຸ່ມ G8 . ຫວ່າງຕົ້ນເດືອນ 6, ເປັນຄັ້ງທຳອິດໃນຮອບ 17 ປີ, ກຸ່ມບັນດາປະເທດອຸດສາຫະກຳພັດທະນາ G7 ໄດ້ດຳເນີນກອງປະຊຸມສຸດຍອດຢູ່ແບນຊິກ ໂດຍບໍ່ມີການເຂົ້າຮ່ວມຂອງລັດເຊຍ.
ເຖິງວ່າໃນໄລຍະມໍ່ໆມານີ້, ລັດເຊຍໄດ້ມີບັນດາການກະທຳເພື່ອບັນເທົ່າຄວາມເຄັ່ງຕຶງກັບຝ່າຍຕາເວັນຕົກໃນບັນຫາ ຢູແກຼນຄື ໄດ້ລົບລ້າງມະຕິສະບັບໜຶ່ງອະນຸຍາດໃຫ້ສ່ົງກຳລັງທະຫານໄປຍັງຢູແກຼນ, ຖອນກຳລັງທະຫານທີ່ປະຈຳການຢູ່ມໍ່ກັບຊາຍແດນ ຢູແກຼນເກືອບທັງໝົດ; ປຶກສາຫາລືກັບບັນດາການນຳເອີລົບກ່ຽວກັບບັນດາວິທີຢຸດຕິ ວິກິດການ, ຮຽກຮ້ອງໃຫ້ໜູນຊ່ວຍມະນຸດສະທຳໃຫ້ແກ່ບັນດາຜູ້ຮັບເຄາະຮ້າຍຍ້ອນສົງຄາມກໍ່ຂຶ້ນ....ແຕ່ລັດເຊຍຍັງຄົງມີຄວາມວິຕົກກັງວົນກ່ຽວກັບເລື່ອງຖືກອາເມລິກາ ແລະ ເອີລົບຈັດວາງບັນດາຄຳສັ່ງລົງໂທດ ແລະ ເລື່ອງເອີລົບຕັດສິນໃຈຢ່າງແຂງແຮງຫຼຸດຜ່ອນການອາໄສລັດເຊຍໃນຂົງເຂດພະລັງງານ ທີ່ພວມພາໃຫ້ລັດເຊຍຕ້ອງຊອກຫາບັນດາທິດຮ່ວມມືໃໝ່, ຊອກຫາບ່ອນອີງດ້ານເສດຖະກິດທົດແທນການສູ້ຢັນກັບເອີລົບ.
ໃນມໍ່ໆມານີ້, ລັດເຊຍເອງກໍໄດ້ຍອມຮັບວ່າ ບັນດາຄຳສັ່ງຂວ້ຳບາດຂອງຝ່າຍຕາເວັນຕົກແນໃສ່ລັດເຊຍ ໄດ້ຊ່ວຍໃຫ້ມົດສກູເຫັນໄດ້ເຖິງບັນດາຂໍ້ຄວາມຈຳກັດໃນຂົງເຂດການເງິນ, ເສດຖະກິດຂອງຕົນ. ນີ້ກໍຖືກຖືວ່າແມ່ນກາລະໂອກາດເພື່ອໃຫ້ລັດເຊຍຄຳນຶງເຖິງວິທີຮັກສາຄວາມໝັ້ນຄົງດ້ານເສດຖະກິດ, ຫຼຸດຜ່ອນການຂຶ້ນກັບບັນດາຄູ່ຮ່ວມມືພາຍນອກ.
ການຈັບມືລະຫວ່າງລັດເຊຍ-ຈີນ ແລະ ສັນຍາລວມມູນຄ່າ 400 ຕື້ USD ໃນຂົງເຂດພະລັງງານເມື່ອເດືອນແລ້ວນີ້ ກໍແມ່ນຂີດໝາຍການປ່ຽນແປງຍຸດທະສາດຮ່ວມມືຂອງມົດສກູ. ແຕ່ເມື່ອສັງເກດໃນຍາວນານ, ປັກກິງບໍ່ແມ່ນຄູ່ຮ່ວມມືພາໃຫ້ມົດສກູມີຄວາມໄວ້ເນື້ອເຊື່ອໃຈຢ່າງສິ້ນເຊິ່ງຍ້ອນຄວາມບໍ່ລົງລອຍກັນລະຫວ່າງ 2 ຝ່າຍຍັງຫຼາຍຢູ່ ແລະ ຝ່າຍຕາເວັນຕົກພຽງແຕ່ແມ່ນຂໍ້ອ້າງອີງເພື່ອເຮັດໃຫ້ 2 ຝ່າຍຕ້ອງມາຫາກັນໃນຫຼາຍບັນຫາ. ເພາະສະນັ້ນ, ການຊອກທາງໄປຍັງທະວີບ ອາເມລິກາລາຕີງນັ້ນ, ລັດເຊຍສາມາດທຳລາຍທ່າໂດດດ່ຽວກ່ຽວກັບເສດຖະກິດ, ທັງເພີ່ມທະວີຜົນສະທ້ອນຕໍ່ພາກພື້ນທີ່ມີຄຸນຄ່າດ້ານພູມສາດ ແລະ ການເມືອງນີ້.
ການເດີນທາງຢ້ຽມຢາມດ້ວຍໜ້າທີ່ສຳຄັນຫຼາຍປະການ.
ການເດີນທາງຢ້ຽມຢາມ 3 ປະເທດອາເມລິກາລາຕີງຂອງ ປະທານາທິບໍດີ ລັດເຊຍ Vladimir Putin ໃນຄັ້ງນີ້ແມ່ນມີ ໜ້າທີ່ສຳຄັນຫຼາຍປະການຄື ເປີດບັນດາຕະຫຼາດ, ກາລະໂອກາດຮ່ວມມືໃໝ່ກັບທະວີບ ໜຶ່ງທີ່ມີປະຊາກອນຫຼວງຫຼາຍ ແລະ ອຸດົມຮັ່ງມີ.
ອາດຈະເຫັນໄດ້ວ່າ ໃນການເດີນທາງຢ້ຽມຢາມຄັ້ງນີ້, ທ່ານປະທານາທິບໍດີ ລັດເຊຍ Vladimir Putin ມຸ່ງໄປສູ່ 2 ກຸ່ມປະເທດຄື ບັນດາປະເທດທີ່ມີການຮ່ວມມືມາແຕ່ດົນນານ ແລະ ບັນດາປະເທດຊຶ່ງຮັບຖືວ່າແມ່ນດ້ານຫຼັງຂອງອາເມລິກາ. ຕາມວົງການນັກໄຈ້ແຍກແລ້ວ, ການເດີນທາງຢ້ຽມຢາມຂອງປະທານາທິບໍດີ ລັດເຊຍ Vladimir Putin ແນ່ນອນວ່າຈະຮັບໝາກຜົນຕາມຄວາມມຸ່ງຫວັງ. ກ່ອນການຢ້ຽມຢາມພຽງ 2 ວັນ, ມົດສກູໄດ້ຕັດສິນລົບລ້າງ 90% ໜີ້ສິນຕາມບັນດາບ້ວງສິນເຊື່ອທີ່ໄດ້ຮັບການສະໜອງຈາກສະໄໝອະດີດສະຫະພາບໂຊຫວຽດ ໃຫ້ແກ່ກູບາ. ຄາດຄະເນວ່າ ຍອດໜີ້ສິນຂອງກູບາກັບລັດເຊຍ ຕາມບັນດາບ້ວງສິນເຊື່ອແມ່ນ 35,2 ຕື້ USD. 10% ທີ່ຍັງເຫຼືອ ແມ່ນຈະຖືກຊຳລະໃນຮອບ 10 ປີ, ແນໃສ່ອຸປະຖຳໃຫ້ແກ່ບັນດາໂຄງການລົງທຶນຂອງລັດເຊຍໃນເຂດດິນແດນ ກູບາ. ແນ່ນອນວ່າ, ການກະທຳນີ້ຈະເຮັດໃຫ້ການພົວພັນລັດເຊຍ-ກູບາເພີ່ມຄວາມອົບອຸ່ນຂຶ້ນ, ເປີດຊ່ອງທາງໃຫ້ຫຼາຍຂົງເຂດຮ່ວມມືທີ່ສຳຄັນອື່ນໆໃນໄລຍະທີ່ຈະມາເຖິງ.
ໃນຂະນະນັ້ນ, ສຳລັບອັກຊັງຕິນ, ໃນຂະນະທີ່ການພົວພັນ ອາເມລິກາ-ອັກຊັງຕິນ ພວມດຳເນີນດ້ວຍສິ່ງກີດຂວາງບາງຢ່າງ, ລະອຽດແມ່ນກ່ຽວຂ້ອງເຖິງການຕັດສິນຂອງສານສູງສຸດອາເມລິກາເມື່ອມໍ່ໆມານີ້, ບັງຄັບໃຫ້ອັກຊັງຕິນຊຳລະບ້ວງໜີ້ຂຶ້ນເຖິງ 1,3 ຕື້ USD ນັ້ນ, ອາດແມ່ນວ່າ ລັດເຊຍຈະຮັບຖືຄືດັ່ງຄູ່ຮ່ວມມືໃໝ່, ໜ້າໄວ້ເນື້ອເຊື່ອໃຈ ຊ່ວຍໃຫ້ອັກຊັງຕິນຫຼຸດພົ້ນຈາກສະພາບລົ້ມລະລາຍ.
ບໍ່ແມ່ນວ່າ ມາຮອດປະຈຸບັນ, ລັດເຊຍຈຶ່ງມີບັນດາການພົວພັນກັບບັນດາປະເທດອາເມລິກາລາຕີງ, ແຕ່ເປັນທີ່ຈະແຈ້ງແລ້ວວ່າ ພາຍຫຼັງການຜັນແປດ້ານການເມືອງຢູ່ຢູແກຼນນັ້ນ, ການເປີດກ້ວາງສາຍພົວພັນຫຼາຍດ້ານຂອງລັດເຊຍກັບອາເມລິກາລາຕີງ ກໍແມ່ນໜ້າທີ່ສຳຄັນຂອງ ປະທານາທິບໍດີລັດເຊຍ Vladimir Putin ດ້ວຍຈຸດໝາຍຟື້ນຟູປະເທດຊາດ. ດ້ວຍ ການເດີນທາງຢ້ຽມຢາມຄັ້ງນີ້, ມົດສກູພວມພິສູດໃຫ້ເຫັນການສົ່ງຜົນສະທ້ອນຂອງຕົນ, ແກ້ໄຂທ່າໂດດດ່ຽວຈາກອາເມລິກາ ແລະ ຝ່າຍຕາເວັນຕົກ, ຊອກຫາການສະໜັບສະໜູນຈາກບັນດາຄູ່ຮ່ວມມືຢູ່ນອກທະວີບເອີລົບ.