ທ່ານນາຍົກລັດຖະມົນຕີ ອີຣັກ Nouri al – Maliki
(ພາບ: AP)
|
ທ່ານນາຍົກລັດຖະມົນຕີ ອີຣັກ Nouri al – Maliki ພວມທຳການຢ້ຽມຢາມ ອາເມລິກາເປັນເວລາ 3 ວັນເພື່ອແນໃສ່ຊອກຫາການໜູນຊ່ວຍດ້ານການທະຫານໃນສະພາວະທີ່ອີຣັກ ພວມຕົກຢູ່ໃນ ແປວໄຟແຫ່ງການໃຊ້ຄວາມຮຸນແຮງ. ນີ້ອາດຈະແມ່ນວິທີການແກ້ໄຂ ທີ່ສະຫຼາດສະຫຼຽວເພື່ອ ໃຫ້ທ່ານ ທ່ານ Nouri al – Maliki ປັບປຸງສິດອຳນາດ ແລະ ນຳປະເທດຊາດຫຼຸດພົ້ນອອກຈາກສະພາບ ການປະຈຸບັນຫຼືບໍ່?
ກ່າວຄຳເຫັນກັບວົງການນັກຂ່າວ ກ່ອນທີ່ເດີນທາງໄປຢ້ຽມຢາມອາເມລິກາ, ທ່ານນາຍົກລັດຖະມົນຕີ ອີຣັກ Nouri al – Maliki ຢືນຢັນວ່່າ ກຳລັງ ອານກີດາ ພວມດຳເນີນບັ້ນເຄື່ອນໄຫວກໍ່ການຮ້າຍຕ້ານປະຊາຊົນອີຣັກ ແລະ ທ່່ານບໍ່ຢາກໃຫ້ປະເທດຂອງທ່ານກາຍເປັນຖານທີ່ໝັ້ນຂອງພວກກໍ່ການຮ້າຍນີ້. ເພາະສະນັ້ນ, ບັນດາການໜູນຊ່ວຍດ້ານການທະຫານຂອງ ອາເມລິກາຄື ເຮືອບິນ, ອາວຸດຍຸດທະພັນ ແມ່ນຈຳເປັນເພື່ອຕ້ານຄືນລັດທິ ກໍ່ການຮ້າຍ ແລະ ກວາດລ້າງບັນດາກຸ່ມປະກອບອາວຸດ. ທ່ານຈະຍົກຂໍ້ສະເໜີນີ້ອອກມາທີ່ການເຈລະຈາກັບປະທານາທິບໍດີອາເມລິກາ Barak Obama .
ແຕ່ເຈດຈຳນົງຂອງທ່ານນາຍົກລັດຖະມົນຕີ ອີຣັກ Nouri al – Maliki ໄດ້ຖືກຄັດຄ້ານຈາກບັນດາສະມາຊິກສະພາແຫ່ງ ອາເມລິກາບໍ່ແມ່ນໜ້ອຍ. ບັນດາສະມາຊິກສະພາສູງຜູ້ທີ່ມີຊື່ສຽງ, ໃນນັ້ນມີທ່ານ John McCain , Carl Levin, Robert Menendez ແລະ Lindsey Graham ໄດ້ສົ່ງຈົດໝາຍເຖິງປະທານາທິບໍດີອາເມລິກາ Barak Obama ເພື່ອສະແດງຄວາມວິຕົກກັ່ງວົນທີ່ສຸດຕໍ່ສະພາບການທີ່ພວມຂີ້ຮ້າຍໄປຢູ່ອີຣັກ. ທ່ານສະມາຊິກສະພາສູງທ່ານນີ້ແລ້ວ, ຍ້ອນການນຳພາຂອງທ່ານ Nouri al – Maliki ເອງ ໄດ້ກໍ່ການແບ່ງແຍກຊົນຊາດຊົນເຜົ່າຢູ່ອີຣັກ, ປະກອບສ່ວນເຮັດໃຫ້ເພີ່ມທະວີການຈະລາຈົນຂະນະທີ່ທ່ານເອົາໃຈໃສ່ຫຼາຍເກີນໄປເຖິງການເດີນຕາມການນຳພາແບບຜະເດັດການ ແລະ ມີລັກສະນະພັກຝ່າຍ, ບໍ່ໃຫ້ຊາວມຸດສະລິມນິກາຍຊັນນີຊົມໃຊ້ບັນດາສິດຜົນປະໂຫຍດ, ໝິ່ນປະໝາດຊາວເຄີດ ແລະ ປິດລ້ອມ ແລະ ເຮັດໃຫ້ຊາວມຸດສະລິມນິກາຍຊີອະ ບັນດາຜູ້ຫວັງມີປະເທດອີຣັກປະຊາທິປະໄຕຖືກຕົກຢູ່ໂດດດຽວ. ເພາະສະນັ້ນ, ການເພີ່ມເຕີມອາວຸດຍຸດທະພັນໃຫ້ແກ່ອີຣັກ ແມ່ນບໍ່ຕ່າງຫຍັງກັບການຖອກນ້ຳມັນໃສ່ແປວໄຟຕື່ມອີກ ແລະ ຈະບໍ່ອາດແກ້ໄຂສະພາບຂາດສະຖຽນລະພາບຢູ່ປະເທດນີ້ເຖິງຮາກເຖິງເຫງົ້າໄດ້.
ຄວາມຈິງ ຢູ່ອີຣັກ, ການປະທະກັນທີ່ນອງເລືອດແມ່ນນັບມື້ນັບເປັນໜ້າວິຕົກກ່ັງວົນ. ຕາມຄະນະເຈົ້າໜ້າທີ່ສະຫະປະຊາຊາດປະຈຳອີຣັກແລ້ວ, ນັບແຕ່ຕົ້ນປີ 2013 ມາຮອດປະຈຸບັນ, ມີສາມັນຊົນປະມານ 6.000 ຄົນຖືກເສຍຊີວິດ ແລະ ອີກ 14.000 ຄົນໄດ້ຮັບບາດເຈັບ ຍ້ອນການວາງລະເບີດແບບສະຫຼະຊີບຢູ່ປະເທດນີ້. ຈຳນວນຜູ້ຮັບບາດເຈັບລົ້ມຕາຍນີ້ ແມ່ນເທົ່າກັບລະດັບສະຖີຕິໄລຍະ 2006-2007, ຂະນະທີ່ສົງຄາມກາງເມືອງຢູ່ອີຣັກພວມຢູ່ໃນຍອດສູງ.ໃນ 5 ເດືອນທີ່ຜ່ານມາ, ມື້ໃດຢູ່ອີຣັກກໍເກີດມີການບຸກໂຈມຕີທີ່ກໍຄວາມໃບາດເຈັບລົ້ມຕາມຢ່າງໜ້ອຍ 2 ຄັ້ງ. ລະເບີດໄດ້ແຕກຂຶ້ນຢູ່ທຸກຫົນແຫ່ງ, ບໍ່ນັບວ່ານັ້ນແມ່ນເຂດຕະຫຼາດ, ໂບດ ຫຼືໃນງານດອງ, ງານສົບໃນນະຄອນຫຼວງແບກແດດຫຼືທ້ອງຖິ່ນອື່ນໆ. ເປັນໜ້າວິຕົກກັ່ງວົນກ່ວານັ້ນ, ແມ່ນຄວາມຂັດແຍ້ງລະຫວ່າງລັດຖະບານຂອງ ທ່ານນາຍົກລັດຖະມົນຕີ ອີຣັກ Nouri al – Maliki ໂດຍຊາວມຸດສະລິມນິກາຍຊີອາຍກວມເປັນສ່ວນຫຼາຍ ແລະ ກຸ່ມຊົນໜ້ອຍ ຊາວຊັນນີ ໄດ້ເຮັດໃຫ້ປະຊາຊົນຈຳນວນຫຼາຍເລີ່ມກັບຄືນສູ່ການສະໜັບສະໜູນບັນດາກຸ່ມປະກອບອາວຸດຫົວຮຸນແຮງທີ່ມີສາຍພົວພັນກັບເຄືອຂ່າຍກໍ່ການຮ້າຍອານກີດາ.
ຕໍ່ໜ້າສະພາບການດັ່ງກ່າວ, ລັດຖະບານ ອີຣັກໄດ້ດຳເນີນບັນດາບັ້ນກວາດລ້າງພວກກະບົດໃນວົງກ້ວາງ, ເພີ່ມທະວີການຄັດເລືອກຮັບເອົາທະຫານໃໝ່ເພື່ອປັບປຸງກຳລັງຕ້ານບັນດາມືປືນອານກີດາ, ປະກາດກົດໄອຍະການເສິກ. ແຕ່ສິ່ງດັ່ງກ່າວແມ່ນຍັງບໍ່ທັນພຽງພໍເທື່ອ. ນີ້ພຽງແຕ່ແມ່ນບັນດາມາດຕະການທີ່ມີລັກສະນະໄລຍະສັ້ນ. ເພື່ອເປັນການຢຸດຕິສະພາບການໃຊ້ຄວາມຮຸນແຮງປີນຂັ້ນໄດ, ອຳນາດການປົກຄອງອີຣັກ ຄວນມີບັນດາບາດກ້າວເດີນທີ່ຍາວໄກກ່ວາເພາະທາດແທ້ຂອງກະແສຟອງໃຊ້ຄວາມຮຸນແຮງຢູ່ອີຣັກໃນປະຈຸບັນ ແມ່ນບັນດາຄວາມຂັດແຍ້ງລະຫວ່າງບັນດາກຸ່ມເຜົ່າພັນ ທີ່ນັບມື້ນັບຮ້າຍແຮງພາຍຫຼັງການແຊກແຊງທາງທະຫານເມື່ອປີ 2003. ບັນດາການຍາດຊິງ, ຈັດແບ່ງສິດອຳນາດຍັງຄົງບໍ່ທັນຮອດວັນສິ້ນສຸດ ແລະ ພຽງແຕ່ສາມາດແກ້ໄຂໄດ້ໂດຍຜ່ານການເຈລະຈາ. ໃນສະພາບການນີ້, ສິ່ງທີ່ທ່ານນາຍົກລັດຖະມົນຕີ ອີຣັກ Nouri al – Maliki ຄວນປະຕິບັດນັ້ນ, ແມ່ນເລັ່ງໃສ່ການປົວແປງທີ່ຕັ້ງບົດບາດຂອງ ຊາວມຸດສະລິມນິກາຍຊັນນີ ກໍຄືຊອກຫາມາດຕະການຈັດແບ່ງສິດອຳນາດລະຫວ່າງບັນດາກຸ່ມເຜົ່າພັນ ແລະ ສາສະໜາແທ່ນທີ່ການເພີ່ມທະວີປະກອບອາວຸດຍຸດທະພັນ.
ການໃຊ້ຄວາມຮຸນແຮງຢູ່ອີຣັກແມ່ນຍ້ອນຂາດສະຖຽນລະພາບທາງດ້ານການເມືອງ, ຄວາມຂັດແຍ້ງກັນດ້ານສິດຜົນປະໂຫຍດລະຫວ່າງເຜົ່າພັນ. ເພື່ອເຮັດໃຫ້ສະພາບການເມືອງໃນປະຈຸບັນມີສະຖຽນລະພາບນັ້ນ, ການປະກອບອາວຸດຕື່ມອີກແມ່ນ ບາດກ້າວເດີນທີ່ຜະຈົນໄພ , ພຽງແຕ່ເຮັດໃຫ້ປະເທດນີ້ເພີ່ມຄວາມສັບສົນວຸ່ນວາຍຂຶ້ນເທົ່ານັ້ນ. ເປັນອັນວ່າ ໜຶ່ງໃນບັນດາຈຸດປະສົງ ຂອງທ່ານ ນາຍົກລັດຖະມົນຕີ ອີຣັກ Nouri al – Maliki ໄປຢ້ຽມຢາມ ອາເມລິກາຄັ້ງນີ້ ແມ່ນບໍ່ແທ້ຈິງໃນການຊ່ວຍອີຣັກຫຼຸດພົ້ນອອກຈາກສະພາບການໃຊ້ຄວາມຮຸນແຮງ.