(vovworld) - ໃນຊຸມມື້ນີ້ ຊາວ ຫວຽດນາມ ອາໄສຢູ່ຕ່າງປະເທດ ພວມກັບຄືນເມືອ ຫວຽດນາມ ເພື່ອຕ້ອນຮັບບຸນປີໃຫມ່ປະຈຳຊາດ (ບຸນເຕັດ). ນີ້ແມ່ນໂອກາດພິເສດເພື່ອໃຫ້ພໍ່ແມ່ປະຊາຊົນຊາວ ຫວຽດນາມອາໄສຢູ່ຕ່າງປະເທດກັບມາເຕົ້າໂຮມກັບຄອບຄົວຢ່າງຄົບຫນ້າພໍ້ຕາ, ໄດ້ເຈືອຈານເຂົ້າກັບຮີດຄອງປະເພນີ ແລະ ໄດ້ເຫັນປະຈັກຕາການປ່ຽນແປງໃຫມ່ຂອງປະເທດຊາດ ກໍຄືມຸ້ງຫວັງຕໍ່ການປະກອບສ່ວນຂອງຕົນໃຫ້ແກ່ບ້ານເກີດເມືອງນອນ.
ຊາວ ຫວຽດນາມ ອາໄສ ຢູ່ ອົດສະຕາລີ ຕ້ອນຮັບບຸນປີໃຫມ່ມະເສງ 2013
ພາບ: internet
|
ເມື່ອໄດ້ກັບເມືອຕ້ອນຮັບບຸນເຕັດຢູ່ ຫວຽດນາມ, ຊາວຫວຽດນາມ ອາໄສຢູ່ຕ່າງປະເທດ ທຸກຄົນລ້ວນແຕ່ຮູ້ສຶກເບິກບານມ່ວນຊື່ນ ແລະ ມີຄວາມຜາສຸກ. ພໍ່ຕູ້ ເລວັນຢວຽນ, ອາຍຸ 83 ປີ ດຳລົງຊີວິດຢູ່ ອາເມລິກາ ກວ່າ 30 ປີ ແລ້ວໃຫ້ຮູ້ວ່າ: ປີໃດພໍ່ຕູ້ກໍ່ກັບຄືນເມືອຕ້ອນຮັບບຸນເຕັດ ຢູ່ ຫວຽດນາມ ແລະ ໃນແຕ່ລະເທື່ອ ເມື່ອໄດ້ພົບປະກັບຍາດຕິພີ່ນ້ອງໃນຄອບຄົວ, ວົງຕະກູນ, ພໍ່ຕູ້ກໍຮູ້ສຶກວ່າ ຕົນເອງພວມໄດ້ດຳລົງຊີວິດໃນບັນຍາກາດອັນອົບອຸ່ນ ດ້ວຍອະນູສອນ ຢູ່ ບ້ານເກີດເມືອງນອນ .
“ພວກຂ້າພະເຈົ້າກັບຄືນບ້ານເກີດເມືອງນອນ ໄດ້ພົບປະກັບໝູ່ເພື່ອນ ແມ່ນຮູ້ສຶກອົບອຸ່ນຫລາຍ. ສະເພາະຂ້າພະເຈົ້າ ເອງ, ເຖິງວ່າຫ່າງຈາກບ້ານເກີດເມືອງນອນ ແຕ່ພັດບໍ່ຫ່າງຈາກປະເທດຊາດ. ກົກເຄົ້າເຫງົ້າກໍຂອງຂ້າພະເຈົ້າແມ່ນປະເທດຊາດ. ນັ້ນແມ່ນທັດສະນະຂອງຂ້າພະເຈົ້າ. ຍາມໃດພວກຂ້າພະເຈົ້າ ກໍຮັກສາຮີດຄອງປະເພນີຂອງຊາດ ແລະ ເດັດຂາດບໍ່ຫລົງລືມວັດທະນະທຳຂອງ ຊາວ ຫວຽດນາມໄດ້.”
ລາຍການສະແດງສິລະປະຊົມເຊີຍຊາວ ຫວຽນາມ ອາໄສຢູ່ ຕ່າງປະເທດ ກັບຄືນເມືອຕ້ອນຮັບບຸນເຕັດຢູ່ບ້ານເກີດເມືອງນອນ
ພາບ:TTXVN
|
ຕ່າງກັບພໍ່ຕູ້ ເລວັນຢວຽນ, ປີນີ້ແມ່ນປີທຳອິດພາຍຫລັງເຄິ່ງສັດຕະວັດ ທີ່ລຸງ ຫງວຽນດີກດ່ວານ, ຊາວ ຫວຽດນາມ ອາໄສຢູ່ ຍີ່ປຸ່ນ ໄດ້ກັບຄືນເມືອຕ້ອນຮັບບຸນເຕັດຢູ່ ບ້ານເກີດເມືອງນອນ. ລຸງດວ່ານ ໃຫ້ຮູ້ວ່າ:
“ ຊາວ ຫວຽດນາມ ມີຄວາມຮູ້ສຶກພິເສດ ສຳລັບບຸນເຕັດ. ນັ້ນແມ່ນມື້ເຕົ້າໂຮມທຸກຄົນໃນຄອບຄົວຢ່າງຄົບຫນ້າພໍ່ຕາ ແລະ ກໍແມ່ນມື້ເພື່ອໃຫ້ພວກເຮົາຫວນຄືນອະນຸສອນແຫ່ງຍາມເຍົາໄວ. ນັບແຕ່ເມື່ອຂ້າພະເຈົ້າໄປຮຽນຢູ່ຕ່າງປະເທດເມື່ອປີ 1965 ມາຮອດປະຈຸບັນ, ຂ້າພະເຈົ້າຈ່ຶ່ງມີໂອກາດກັບຄືນເມືອຕ້ອນຮັບບຸນເຕັດຢູ່ ຫວຽດນາມ. ຂ້າພະເຈົ້າຮູ້ສຶກຕື້ນຕັນໃຈຫລາຍ. ເພາະວ່າ ຕ້ອນຮັບບຸນເຕັດຢູ່ ບ້ານເກີດເມືອງນອນແມ່ນມີສີສັນສະເພາະກວ່າ, ຕົນເອງໄດ້ເຈືອຈານໃນບັນຍາກາດຢ່າງຟົດຟື້ນ, ເຈືອຈານກັບທິວທັດທຳມະຊາດ, ຮີດຄອງປະເພນີ. ນັ້ນແມ່ນສິ່ງທີ່ດູດດື່ມ.”
ເຈືອຈານກັບບັນຍາກາດຕ້ອນຮັບບຸນເຕັດຢ່າງຟົດຟື້ນມ່ວນຊື່ນຢູ່ ບ້ານເກີດເມືອງນອນ, ຊາວຫວຽດນາມ ອາໄສຢູ່ຕ່າງປະເທດ ຫລາຍຄົນ ກໍຮູ້ສຶກດີໃຈຫລາຍຕໍ່ການປ່ຽນແປງຂອງປະເທດ. ເອື້ອຍ ຫງວຽນທິຮວ່າຍ, ຊາວ ຫວຽດນາມ ອາໄສຢູ່ ຢູແກຼນ ໃຫ້ຮູ້ວ່າ:
“ຂ້າພະເຈົ້າ ໄດ້ກັບຄືນເມືອ ຫວຽດນາມ ຕ້ອນຮັບບຸນເຕັດພ້ອມກັບຄອບຄົວ 5, 6 ເທື່ອແລ້ວ ແລະ ເຫັນວ່າປະເທດຊາດຮັ່ງມີເຂັ້ມແຂງກວ່າເກົ່າ. ຊີວິດການເປັນຢູ່ຂອງປະຊາຊົນກໍດີຂຶ້ນຫລາຍແລ້ວ. ລັດມີຄວາມເອົາໃຈໃສ່ເຖິງພໍ່ແມ່ປະຊາຊົນຊາວ ຫວຽດນາມ ອາໄສຢູ່ຕ່າງປະເທດ, ສະນັ້ນ ພວກຂ້າພະເຈົ້າຮູ້ສຶກບໍ່ມີຊ່ອງຫວ່າງກັບປະຊາຊົນພາຍໃນປະເທດ. ປະຈຸບັນ ພາຫະນະໄປມາກໍສະດວກຫລາຍແລ້ວ ແລະ ພາຫະນະສື່ມວນຊົນກໍທັນສະໄຫມ,ວ່ອງໄວ ສະນັ້ນ ຂ້າພະເຈົ້າບໍ່ຮູ້ສຶກວ່າຕົນເອງພວມຢູ່ໃກ້ກັບບ້ານເກີດເມືອງນອນ.”
ສຳລັບຊາວ ຫວຽດນາມ ອາໄສຢູ່ຕ່າງປະເທດ ບໍ່ມີເງື່ອນໄຂກັບຄືນເມືອບ້ານເກີດເມືອງນອນ, ໃນໂອກາດບຸນເຕັດ ເຂົາເຈົ້າເຄີຍເຂົ້າຮ່ວມງານອວຍພອນລະດູບານໃຫມ່ ໂດຍສະຖານທູດ ຫວຽດນາມ ປະຈຳປະເທດນັ້ນຈັດຕັ້ງຂຶ້ນ.
ທ່ານ ຮອງລັດຖະມົນຕີການຕ່າງປະເທດ ຫວຽດນາມ ຫງວຽນແທນເຊີນ ພ້ອມກັບ ຊາວຫວຽດນາມ ອາໄສຢູ່ ໄທ ຕ້ອນຮັບບຸນປີໃຫມ່ມະເສງ
|
ຍາມໃດບຸນປີໃຫມ່ປະຈຳຊາດ ກໍມີຄວາມໝາຍສຳຄັນສຳລັບ ຊາວຫວຽດນາມ ແຕ່ລະຄົນ. ສະເພາະ ວົງຄະນາຍາດຊາວ ຫວຽດນາມ ອາໄສຢູ່ຕ່າງປະເທດ, ຊຸມມື້ບຸນເຕັດນີ້ ຍິ່ງມີຄວາມໝາຍ ແລະ ກັບຄືນເມືອຕ້ອນຮັບບຸນເຕັດຢູ່ບ້ານເກີດເມືອງນອນ ແມ່ນຄວາມຜາສຸກສຳລັບ ຊາວຫວຽດນາມ ອາໄສຢູ່ຕ່າງປະເທດຫລາຍຄົນ ແລະ ບຸນເຕັດກໍແມ່ນຂົວເຊື່ອມຕໍ່ເພື່ອໃຫ້ພໍ່ແມ່ປະຊາຊົນໃກ້ຊິດຕິດແທດກັບປະເທດຊາດ, ກັບບ້ານເກີດເມືອງນອນກວ່າ.