ວັນທີ 26/12, ທ່ານເລຂາທິການໃຫ່ຍຄະນະບໍລິຫານງານສູນກາງພັກປະຊາຊົນປະຕິວັດລາວ, ປະທານປະເທດ ສປປລາວ ຈູມມາລີ ໄຊຍະສອນ ພ້ອມດ້ວຍພັນລະຍາ ໄດ້ເລີ່ມຕົ້ນການຢ້ຽມຢາມສັນຖະວະໄມຕີຫວຽດນາມ ຢ່າງເປັນທາງການແຕ່ວັນທີ 26-28/12/2012 ຕາມຄຳເຊີນຂອງທ່ານເລຂາທິການໃຫ່ຍຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟູຈ້ອງ ແລະ ປະທານປະເທດເຈືອງເຕີນຊາງ. ການມາຢ້ຽມຢາມຫວຽດນາມ ຂອງທ່ານເລຂາທິການໃຫ່ຍ, ປະທານປະເທດລາວ ໄດ້ດຳເນີນໄປໃນຊຸມວັນທ້າຍປີສາມັກຄີມິດຕະພາບຫວຽດນາມ-ລາວ 2012, ແມ່ນເຫດການສຳຄັນ, ປະກອບສ່ວນປັບປຸງ ແລະ ພັດທະນາການພົວພັນມິດຕະພາບອັນເປັນມູນເຊື້ອ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານຫວຽດນາມ-ລາວ.
ທ່ານເລຂາທິການໃຫ່ຍ, ປະທານປະເທດລາວ ຈູມມາລີ ໄຊຍະສອນ
(ພາບ:ຂ່າວສານຫວຽດນາມ)
ປີ 2012 ແມ່ນປີພິເສດຂອງສາຍພົວພັນພິເສດລະຫວ່າງສອງປະເທດຫວຽດນາມ-ລາວ. ນີ້ແມ່ນປີສາມັກຄີ, ມິດຕະພາບຫວຽດນາມ-ລາວ ສະເຫຼີມສະຫຼອງ50 ປີແຫ່ງວັນສ້າງຕັ້ງສາຍພົວພັນທາງການທູດ (5/9/1962-5/9/2012) ແລະ 35 ປີແຫ່ງວັນເຊັນສົນທິສັນຍາທິດຕະພາບ ແລະ ການຮ່ວມມືຫວຽດນາມ-ລາວ (18/7/1977-18/7/2012) ດ້ວຍບັນດາການເຄືອ່ນໄຫວແທດຈິງ, ມີຄວາມໝາຍ, ຊື່ງສະແດງໃຫ້ເຫັນນ້ຳໃຈສາມັກຄີມິດຕະພາບແບບພິເສດ ແລະ ການຮ່ວມມືຮອບດ້ານລະຫວ່າງສອງປະເທດຢ່າງມີຊີວິດຊີວາ….ການຢ້ຽມຢາມຫວຽດນາມ ຂອງທ່ານເລຂາທິການໃຫ່ຍ, ປະທານປະເທດລາວ ຈູມມາລີ ໄຊຍະສອນ ໄດ້ດຳເນີນໃນຈຸດເວລາສະຫລຸບປີສາມັກຄີມິດຕະພາບຫວຽດນາມ-ລາວ ດ້ວຍບັນດາຜົນງານອັນຈົບງາມ. ຕອບສຳພາດຕໍ່ນັກຂ່າວວິທະຍຸກະຈາຍສຽງຫວຽດນາມ ກ່ອນການຢ້ຽມຢາມ, ທ່ານນາງສູນທອນ ໄຊຍະຈັກ, ຮອງລັດຖະມົນຕີການຕ່າງປະເທດລາວ ຢືນຢັນວ່າ:
“ພວກຂ້າພະເຈົ້າຕີລາຄາສູງການຢ້ຽມຢາມຂັ້ນສູງຄັ້ງຕ່າງໆຂອງການນຳສອງປະເທດ. ໃນຕົ້ນປີນີ້, ປະທານປະເທດເຈືອງເຕີນຊາງ ໄດ້ມາຢ້ຽມຢາມລາວ ແລະ ໃນເວລາທ້າຍປີແມ່ນການໄປຢ້ຽມຢາມຫວຽດນາມຂອງທ່ານເລຂາທິການໃຫ່ຍ, ປະທານປະເທດລາວ ຈູມມາລີ ໄຊຍະສອນ. ບັນດາການຢ້ຽມຢາມເຫຼົ່ານັ້ນໄດ້ສ້າງບາດລ້ຽວໃໝ່ໃຫ້ແກ່ການພົວພັນສອງປະເທດ. ການພົວພັນດ້ານການເມືອງອັນດີງາມແມ່ນພື້ນຖານໃຫ້ແກ່ການພົວພັນດ້ານອື່ນໆ“.
ນັບແຕ່ດົນນານມາແລ້ວ, ສອງຊາດຫວຽດນາມ ແລະ ລາວ ໄດ້ພ້ອມກັນຮ່ວມສຸກຮ່ວມທຸກນຳກັນ, ເພີ່ມພູນຄູນສ້າງນ້ຳໃຈສາມັກຄີມິດຕະພາບອັນເປັນມູເຊື້ອ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ, ກາຍເປັນຊັບສົມບັດອັນລ້ຳຄ່າ ແລະ ແມ່ນປັດໄຈສຳຄັນທີ່ສຸດ, ຮັບປະກັນຜົນສຳເລັດຂອງການປະຕິວັດໃນແຕ່ລະປະເທດ. ໃນໄລຍະປະຈຸບັນ, ການນຳຂັ້ນສູງສອງປະເທດຢັ້ງຢືນຈະສືບຕໍ່ພັດທະນາການພົວພັນລະຫວ່າງຫວຽດນາມ-ລາວ ໃຫ້ນັບມື້ນັບເຂົ້າສູ່ລວງເລິກ, ແທດຈິງ ແລະ ມີປະສິດທີຜົນໃນທຸກຂົງເຂດ, ດ້ວຍບັນດາຮູບການຮ່ວມມືທີ່ອຸດົມສົມບູນ, ຫຼາຍຮູບຫຼາຍແບບຢູ່ທັງຂັ້ນສູນກາງ ແລະ ທ້ອງຖິ່ນ; ທັງຮ່ວມມືຫຼາຍຝ່າຍ ແລະ ສອງຝ່າຍ. ກ່ອນການຢ້ຽມຢາມ, ຄະນະກຳມະການຮ່ວມມືລະຫວ່າງລັດຖະບານຫວຽດນາມ-ລາວ ໄດ້ຈັດການປະຊຸມເປັນເວລາ 5 ວັນຢູ່ຫວຽດນາມ ເພື່ອແນໃສ່ຊຸກຍູ້ການພົວພັນຮອບດ້ານລະຫວ່າງສອງປະເທດໃນປີ 2013. ທ່ານຮອງນາຍົກລັດຖະມົນຕີຫວຽດນາມ ຫງວຽນຊວນຟຸກ, ປະທານອະນຸກຳມະການຮ່ວມມືຫວຽດນາມ-ລາວ ໃຫ້ຮູ້ວ່າ:
“ປີ 2012, ມີປະຊາຊົນຫວຽດນາມ ແລະ ລາວ ນັບໝື່ນໆຄົນໄດ້ພົບປະແລກປ່ຽນນຳກັນ, ລະຫວ່າງບັນດາກະຊວງ, ຂະແໜງການ, ທ້ອງຖິ່ນ, ກໍ່ໄດ້ຈັດຕັ້ງບັນດາງານໂຮມຊຸມນຸມມິດຕິງ, ໄທລະພາບຖ່າຍທອດສົດ, ການເສັງຕ່າງໆໂດຍມີການເຂົ້າຮ່ວມຂອງນັບລ້ານໆຄົນ. ປີ 2013, ພວກເຮົາຈະເພີ່ມທະວີການພົວພັນດ້ານການເມືອງ ແລະ ການທູດ ແລະ ຕ້ອງຍູ້ແຮງການຮ່ວມມືດ້ານເສດຖະກິດຊື່ງລວມມີການລົງທຶນ ແລະ ການຄ້າ“
(ພາບ:congluan.vn)
ໃນສະພາບການເສດຖະກິດປະສົບກັບຄວາມຫຍຸ້ງຍາກ, ຫວຽດນາມ ແລະ ລາວ ໄດ້ພະຍາຍາມສຸມແຫຼ່ງກຳລັງເພື່ອສ້າງ 11 ໂຄງການ, ກິດຈະກຳຈຸດສຸມໃນປີ 2012 ສຳເລັດ. ການລົງທຶນຂອງຫວຽດນາມ ເຂົ້າລາວ ກໍ່ບັນລຸລະດັບສູງ, ໃນນັ້ນ, ມີບັນດາໂຄງການຂະໜາດໃຫ່ຍຄືປູກ ແລະ ປຸງແຕ່ງຢ່າງພາລາ, ໂທລະຄົມ, ທະນາຄານ…. ປະຈຸບັນ, ຫວຽດນາມ ມີ 440 ໂຄງການລົງທຶນຢູ່ລາວ ດ້ວຍຍອດຈຳນວນທຶນກ່ວາ 5,38 ຕື້ໂດລາສະຫະລັດ, ຢືນອັນດັບທີ 2 ໃນຈຳນວນບັນດາປະເທດລົງທຶນເຂົ້າລາວ, ວົງເງິນການຄ້າສອງສົ້ນບັນລຸເກືອບ 1 ຕື້ໂດລາສະຫະລັດ. ການຮ່ວມມືດ້ານການສຶກສາ, ບຳລຸງສ້າງ, ການພັດທະນາ ແຫຼ່ງຊັບພະຍາກອນມະນຸດມີບັນດາການຫັນປ່ຽນຢ່າງຕັ້ງໜ້າ. ສອງປະເທດກໍ່ໄດ້ຮ່ວມມືກັນຢ່າງແໜ້ນແຟ້ນໃນຂົງເຂດການປ້ອງກັນຊາດ, ປ້ອງກັນຄວາມສະຫງົບ ແລະ ໃນບັນດາເວທີສາກົນ….
ກອງປະຊຸມໃຫ່ຍຄັ້ງທີ 11 ຂອງພັກກອມມູນິດຫວຽດນາມ ແລະ ກອງປະຊຸມໃຫ່ຍຄັ້ງທີ 9 ຂອງພັກປະຊາຊົນປະຕິວັດລາວ ໄດ້ຢັ້ງຢືນແນວທາງ, ນະໂຍບາຍພິເສດ, ຖືເປັນສຳຄັນ ແລະ ປັບປຸງ, ເພີ່ມທະວີການພົວພັນອັນເປັນມູນເຊື້ອ, ນ້ຳໃຈສາມັກຄີມິດຕະພາບແບບພິເສດ ແລະ ການຮ່ວມມືຮອບດ້ານລະຫວ່າງສອງປະເທດຫວຽດນາມ-ລາວ ຢ່າງບໍ່ຢຸດຢັ້ງ, ຖືວ່າ, ນັ້ນແມ່ນຊັບສົບບັດອັນລ້ຳຄ່າຂອງທັງສອງຊາດ, ແມ່ນກົດເກນພັດທະນາ, ແມ່ນໜຶ່ງໃນບັນດາປັດໄຈຮັບປະກັນພາລະກິດ ສ້າງສາ ແລະ ປົກປັກຮັກສາປະເທດຊາດຂອງແຕ່ລະປະເທດ. ການຢ້ຽມຢາມສັນຖະວະໄມຕີຫວຽດນາມ ຢ່າງເປັນທາງການຂອງທ່ານເລຂາທິການໃຫ່ຍ, ປະທານປະເທດ ສປປລາວ ຈູມມາລີ ໄຊຍະສອນ ຈະປະກອບສ່ວນຮັດແໜ້ນສາຍພົວພັນຫວຽດນາມ-ລາວ ກ່ວາອີກ, ຍົກການພົວພັນຮ່ວມມືຮອບດ້ານລະຫວ່າງຫວຽດນາມ-ລາວ ຂຶ້ນສູ່ລະດັບສູງໃໝ່, ຄືດັ່ງຄຳເວົ້າຂອງທ່ານເລຂາທິການໃຫ່ຍຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟູຈ້ອງ ທີ່ວ່າ “ນີ້ແມ່ນສາຍພົວພັນບໍ່ຄືກັນກັບການພົວພັນໃດໆໃນປະຫວັດສາດໂລກຍຸກປະຈຸປັນ, ໄດ້ຮັບການເພີ່ມພູນຄູນສ້າງ ແລະ ພັດທະນາດ້ວຍກຳລັງເຫື່ອແຮງ, ເລືອດເນື້ອຂອງນັກປະວັດຫວຽດນາມ ແລະ ລາວ ລຸ້ນຕ່າງໆໃນຕະຫຼອດໄລຍະແຫ່ງປະຫັວດສາດ“.