(vovworld)- ຕອນບ່າຍວັນທີ 6/12, ເມື່ອເຂົ້າຮ່ວມ ແລະ ຊີ້ນຳກອງປະຊຸມທົ່ວປະເທດກ່ຽວກັບການຜັນຂະຫຍາຍວຽກງານສັບຊ້ອນ, ປ່ຽນໃຫມ່ລັດວິສາຫະກິດໄລຍະ 2016-2020, ທ່ານນາຍົກລັດຖະມົນຕີ ຫວຽດນາມ ຫງວຽນຊວນຟຸກ ໄດ້ຢືນຢັນວ່າ: ການສັບຊ້ອນ, ຫັນລັດວິສາຫະກິດເປັນຫຸ້ນສ່ວນ ແມ່ນຫນ້າທີ່ການເມືອງສຳຄັນໃນປີ 2017. ໃນສະພາບການ ຈຳນວນເງິນ 5.000.000 ຕື້ດົງພວມຢູ່ໃນຊັບສິນ ແລະ ແຫລ່ງທຶນຢູ່ບັນດາລັດວິສາຫະກິດ, ເລື່ອງຍູ້ແຮງການ ຫັນລັດວິສາຫະກິດເປັນຫຸ້ນສ່ວນ ບໍ່ພຽງແຕ່ຊ່ວຍໃຫ້ບັນດາວິສາຫະກິດປ່ຽນແປງວິທີການບໍລິຫານເທົ່ານັ້ນ ຫາກຍັງຊ່ວຍຫລຸດຜ່ອນຫນີ້ສາທາລະນະ, ສ້າງການຫັນປ່ຽນໃຫ້ແກ່ວິວັດການສ້າງໂຄງປະກອບພື້ນຖານເສດຖະກິດຄືນໃຫມ່ໃນໄລຍະຈະມາເຖິງ.
ທ່ານນາຍົກລັດຖະມົນຕີຫງວຽນຊວນຟຸກກ່າວຄຳເຫັນທີ່
ກອງປະຊຸມຜັນຂະຫຍາຍວຽກງານສັບຊ້ອນ, ປ່ຽນໃຫມ່ລັດວິສາຫະກິດ
|
ພາຍຫລັງ 15 ປີແຫ່ງການສັບຊ້ອນຄືນໃຫມ່, ໄລ່ມາຮອດເດືອນ 10/2016, ຈຳນວນລັດວິສາຫະກິດບາງແຫ່ງໄດ້ຫລຸດລົງຢ່າງແຮງ ຈາກ 6.000 ວິສາຫະກິດ ລົງເຫລືອພຽງ 718 ວິສາຫະກິດ. ກ່ອນນີ້, ລັດວິສາຫະກິດເຄື່ອນໄຫວກວ່າ 60 ຂະແຫນງ, ຂົງເຂດ ມາຮອດປະຈຸບັນ ພຽງແຕ່ສຸມໃສ່ຢູ່ໃນ 19 ຂະແຫນງ,ຂົງເຂດ ແລະ ສ່ວນຫລາຍແມ່ນວິສາຫະກິດຂະຫນາດກາງ ແລະ ຂະຫນາດໃຫຍ່. ເຖິງວ່າ ຈຳນວນລັດວິສາຫະກິດຫລຸດລົງກໍຕາມ ແຕ່ອັດຕາສ່ວນລັດວິສາຫະກິດຫັນເປັນຫຸ້ນສ່ວນແມ່ນຢູ່ໃນລະດັບຕ່ຳ ມີພຽງ 8%ຈຳນວນທຶນໄດ້ຮັບການຫັນເປັນຫຸ້ນສ່ວນ.
ບົດຮຽນຖອດຖອນມາໄດ້ນັ້ນແມ່ນ ຄວນສັບຊ້ອນຄືນໃຫມ່, ຕ້ອງ ຫັນລັດວິສາຫະກິດເປັນຫຸ້ນສ່ວນ ຖືກກັບວິວັດການ, ຖືກກັບວິທີເຮັດເພ່ອປ່ຽນແປງການບໍລິຫານວິສາຫະກິດ, ສ້າງເງື່ອນໄຂໃຫ້ວິສາຫະກິດພາກເອກະຊົນພ້ອມກັນພັດທະນາ, ປະກອບສ່ວນໃນການປ້ອງກັນ ແລະ ຕ້ານການສໍ້ລາດບັງຫລວງ.
ຄຳຮຽກຮ້ອງໃຫຍ່ 3 ປະການກ່ຽວກັບການສ້າງໂຄງປະກອບລັດວິສາຫະກິດຄືນໃຫມ່
ຄວາມຈິງໃນການຜັນຂະຫຍາຍໄດ້ສະແດງໃຫ້ເຫັນວ່າ ການສ້າງໂຄງປະກອບລັດວິສາຫະກິດຄືນໃຫມ່ໃນໄລຍະຜ່ານມາ ແມ່ນຊັກຊ້າ ຍ້ອນສາຍເຫດພາວະວິໄສ, ອັດຕະວິໄສ. ສາຍເຫດພາວະວິໄສ ນັ້ນແມ່ນຂໍ້ຕິດຂັດກ່ຽວກັບລະບອບລະບຽບການນະໂຍບາຍ, ກ່ຽວກັບວິທີເຮັດ. ສາຍເຫດອັດຕະວິໄສ ນັ້ນແມ່ນສະແຫວງຫາຜົນປະໂຫຍດເປັນກຸ່ມ, ການສ້າງແຜນຮ່າງຊັກຊ້າ, ການກວດຜ່ານກໍຊັກຊ້າ, ການສົມທົບລະຫວ່າງບັນດາກະຊວງ, ຄະນະ, ຂະແຫນງການໃນການຫັນເປັນຫຸ້ນສ່ວນ, ສ້າງລະບອບລະບຽບການນະໂຍບາຍໃຫ້ສົມບູນແບບ, ບາງນະໂຍບາຍຍັງບໍ່ທັນຮັດກຸ່ມ, ບໍ່ທັນເໝາະສົມ, ບໍ່ທັນການ. ອີກສາຍເຫດຫນຶ່ງນັ້ນແມ່ນ ຮູບແບບ, ການຈັດຕັ້ງ, ກົນໄກປະຕິບັດບົດບາດຫນ້າທີ່ຂອງເຈົ້າຂອງກຳມະສິດລັດຍັງກະແຈກກະຈາຍ.
ຕໍ່ຫນ້າຄວາມຈິງດັ່ງກ່າວໄດ້ວາງອອກຄຳຮຽກຮ້ອງ 3 ປະການ ກ່ຽວກັບການສ້າງໂຄງປະກອບລັດວິສາຫະກິດຄືນໃຫມ່. ທ່ານນາຍົກລັດຖະມົນຕີ ຫງວຽນຊວນຟຸກ ຊີ້ແຈ້ງວ່າ:
“ຄວນສ້າງກຳລັງຫນູນຢ່າງແຮງໃນການຊຸກຍູ້ການຫັນເປັນຫຸ້ນສ່ວນ ແລະ ສ້າງສະພາບແວດລ້ອມແຫ່ງການແກ້ງແຍ້ງທັງຢູ່ຕະຫລາດສົ້ນເຂົ້າ ແລະ ສົ້ນອອກ ໃນການເຄື່ອນໄຫວຂອງລັດວິສາຫະກິດ. ຄຳຮຽກຮ້ອງທີ 2, ຈຳນວນລັດວິສາຫະກິດຕ້ອງຮັດແຄບກວ່າ, ລັດວິສາຫະກິດແຕ່ລະແຫ່ງຕ້ອງເຂັ້ມແຂງ ແຕ່ປະສິດທິຜົນແມ່ນສູງກວ່າ. ທຶນແຫ່ງລັດຕ້ອງໄດ້ຮັບປະກັນ, ເສີມຂະຫຍາຍຄູນປະໂຫຍດເປັນຢ່າງດີກວ່າ. ປະຈຸບັນ ແຫລ່ງທຶນຂອງລັດກວມກອັດຕາສ່ວນສູງ, ໃນຂະນະທີ່ພວກເຮົາພວມປະສົບກັບຄວາມຫຍຸ້ງຍາກ, ຖ້າປະໃຫ້ແຫລ່ງທຶນຍັງຄ້າງຢູ່ນຳລັດວິສາຫະກິດ ຈະພາໄປເຖິງຫນີ້ສາທາລະນະ, ຫນີ້ເສຍເພີ່ມຂຶ້ນ.”
ທ່ານນາຍົກລັດຖະມົນຕີ ກໍຢືນຢັນວ່າ: ການສ້າງໂຄງປະກອບລັດວິສາຫະກິດຄືນໃຫມ່ເພື່ອໃຫ້ການເຕີບໂຕດ້ານເສດຖະກິດຢ່າງວ່ອງໄວ, ໝັ້ນທ່ຽງກວ່າ ຂົງເຂດໃດຊື່ງພາກເອກະຊົນປະຕິບັດເປັນຢ່າງດີ ລັດຈະຄ່ອຍໆຖອນຕົວອອກ. ເຖິງຢ່າງໃດກໍຕາມ, ລັດ ຕ້ອງກວມອັດຕາສ່ວນສູງກວ່າໃນບັນດາຂົງເຂດຄື: ການປ້ອງກັນຊາດ, ໄຟຟ້າ, ສະບຽງອາຫານ, ທະນາຄານ.
ຜັນຂະຫຍາຍ 3 ໝວດຫນ້າທີ່
ໃນຄຳຮຽກຮ້ອງໃຫຍ່ 3 ປະການດັ່ງກ່າວ ເພື່ອສ້າງໂຄງປະກອບລັດວິສາຫະກິດຄືນໃຫມ່, ໃນໄລຍະ 2016 -2020, ລັດຖະບານກຳນົດ 3 ໝວດຫນ້າທີ່ຕົ້ນຕໍ. ທຳອິດ ແມ່ນກຳນົດຂົງເຂດໃດຊື່ງລັດຄວນຄຸ້ມຄອງ, ຂົງເຂດໃດລັດຄວນຖອນອອກຈາກ. ຕາມນັ້ນແລ້ວ ຂົງເຂດສາທາລະນະປະໂຫຍດ ແລະ ບາງຂົງເຂດຊື່ງບໍ່ມີໃຜເຮັດ ຫລື ເປັນຜູກຂາດ, ລັດຄຸ້ມຄອງ ແລະ ມີບົດບາດຄອບງຳ, ສ່ວນບັນດາຂົງເຂດຍັງເຫລືອ ລັດ ຄວນຖອນອອກ ຕາມອັດຕາສ່ວນເໝາສົມ ຫລື ຖອນ 100% ເພື່ອໃຫ້ຕະຫລາດຈັດແບ່ງແຫລ່ງກຳລັງໃຫ້ມີປະສິດທິຜົນກວ່າ.
ໃນການຫັນເປັນຫຸ້ນສ່ວນ, ຄາດໝາຍສຳຄັນທີ່ສຸດ ນັ້ນແມ່ນ ຕ້ອງຮັບປະກັນຜົນປະໂຫຍດຢ່າງສູງສຸດໃຫ້ແກ່ລັດ, ໝາຍຄວາມວ່າ ຂາຍແມ່ນເໝາະສົມກັບລາຄາຕະຫລາດໃນຈຸດເວລາຈ່າວຂາຍ. ທ່ານ ເຈີນວັນຮຽວ, ຮອງລັດຖະມົນຕີກະຊວງການເງິນ ຢືນຢັນວ່າ:
“ຄາດໝາຍໃນນະໂຍບາຍນັ້ນແມ່ນການຫັນເປັນຫຸ້ນສ່ວນສຳເລັດຢ່າງສຸດຂີດ ຕາມຫລັກການຕະຫລາດ, ມີຄວາມເປີດເຜີຍ, ໂປ່ງໃສ ແລະ ຮັບປະກັນການຄຸ້ມຄອງດີສຸດ, ຫລີກລ້ຽງການຮົ່ວໄຫລດ້ວຍລະດັບວ່ອງໄວທີ່ສຸດ.”
ເພື່ອປະຕິບັດຄາດໝາຍນີ້, ຄວນເຊື້ອເຊີນຜູ້ໃຫ້ຄຳປືກສາຂອງສາກົນ ແລະ ຢູ່ພາຍໃນປະເທດທີ່ມີອິດທິພົນຊື່ສຽງ, ມີລະດັບຄວາມຮູ້ເຂົ້າຮ່ວມວິວັດການນີ້. ບັນດາວິສາຫະກິດ, ກຸ່ມບໍລິສັດ, ບໍລິສັດໃຫຍ່ ຄວນມີກົນໄກບຸກທະລຸໃນການກຳນົດຈ້າງຜູ້ໃຫ້ຄຳປຶກສາ, ກຳນົດມູນຄ່າຂອງວິສາຫະກິດ, ແກ້ໄຂບ້ວງຫນີ້, ວິທີຈ່າວຂາຍຕາມທິດນຳມາເຊິ່ງຜົນປະໂຫຍດສູງສຸດໃຫ້ແກ່ລັດ, ນັບທັງເຄື່ອງໝາຍການຄ້າ. ໄປຄຽງຄູ່ກັນນັ້ນ ໃນວິວັດການຫັນເປັນຫຸ້ນສ່ວນ ຕ້ອງເພີ່ມທະວີການກວດກາ, ຕິດຕາມກວດກາ, ກວດສອບ ເພື່ອບໍ່ໃຫ້ທຶນຂອງລັດຖືກຮົ່ວໄຫລ.
ກ່ຽວກັບຫນ້າທີ່ການບໍລິຫານພາຍຫລັງຫັນເປັນຫຸ້ນສ່ວນ, ລັດຖະບານ ຮຽກຮ້ອງປະຕິບັດລະບອບຕິດຕາມກວດກາດ້ານການເງິນຢ່າງເຂັ້ມງວດ, ຕີລາຄາການເຄື່ອນໄຫວຢ່າງມີປະສິດທິຜົນ ແລະ ຂໍ້ມູນຂ່າວກ່ຽວກັບດ້ານການເງິນຕ້ອງເປີດເຜີຍ; ເດັດດ່ຽວ ແລະ ແກ້ໄຂບັນດາວິສາຫະກິດດຳເນີນທຸລະກິດຖືກລຸບທຶນ, ບັນດາໂຄງການລົງທຶນມີປະສິດທິຜົນຕ່ຳ ຕາມກົນໄກການຕະຫລາດ, ເພີ່ມທະວີການຄຸ້ມຄອງຕິດຕາມການກູ້ຢືມ ແລະ ນຳໃຊ້ແຫລ່ງທຶນຂອງລັດວິສາຫະກິດຢ່າງແຫນ້ນແຟ້ນ, ເປັນຕົ້ນແມ່ນການກູ້ຢືມທຶນຂອງຕ່າງປະເທດ, ຈຳກັດການຄ້ຳປະກັນຂອງລັດຖະບານທີ່ມີຕໍ່ບ້ວງກູ້ຢືມໃຫມ່.
ເລື່ອງລັດຖະບານກຳນົດສັບຊ້ອນ, ຫັນລັດວິສາຫະກິດເປັນຫຸ້ນສ່ວນ ນັ້ນແມ່ນຫນ້າທີ່ດ້ານການເມືອງຈຸດສຸມໃນປີ 2017 ຊີ້ໃຫ້ເຫັນວ່າ ຄວາມຕັດສິນໃຈສ້າງການຫັນປ່ຽນໃນຂົງເຂດນີ້ຂອງລັດຖະບານ. ຜ່ານນັ້ນ ຈະສ້າງບາດກ້າວບຸກທະລຸ, ດຶງດູດບັນດາແຫລ່ງກຳລັງທັງຢູ່ພາຍໃນ ແລະ ຕ່າງປະເທດ ເຂົ້າຮ່ວມວິວັດການບໍລິຫານ ແລະ ພັດທະນາວິສາຫະກິດ, ສ້າງພື້ນຖານການພັດທະນາເສດຖະກິດ ສັງຄົມ ພ້ອມທັງສ້າງການຫັນປ່ຽນໃຫ້ແກ່ວິວັດການສ້າງໂຄງປະກອບພື້ນຖານເສດຖະກິດຄືນໃຫມ່ໃນໄລຍະຈະມາເຖິງ.