ສ້າງໂຄງປະກອບຂະແໜງກະສີກຳຄືນໃໝ່ຕາມທິດຍົກສູງມູນຄ່າເພີ່ມ
(ພາບ: new.socbay.com)
ການສ້າງໂຄງປະກອບການຜະລິດຄືນໃໝ່ໂດຍສຸມໃສ່ບັນດາຂະແໜງຜະລິດເປັນ ສິນຄ້າທີ່ມີມູນຄ່າສູງກ່ວາ, ນັ້ນແມ່ນທິດກ້າວເດີນຂອງຂະແໜງກະສີກຳຫວຽດນາມ ໃນປີ 2012. ນີ້ທັງແມ່ນຈຸດໝາຍໄລຍະຍາວຂອງຂະແໜງນັບແຕ່ນີ້ຮອດປີ 2020.
ສະຫຼຸບດ້ານເສດຖະກິດຂອງຫວຽດນາມໃນປີ 2011, ກະສີກຳໄດ້ຮັບຖືວ່າແມ່ນຈຸດສະຫວ່າງສະໄຫວທີ່ສຸດດ້ວຍບັນດາຕົວເລກທີ່ໜ້າປະທັບໃຈ. ຍອດປະລິມານການຜະລິດສະບຽງອາຫານບັນລຸ 42 ລ້ານໂຕນ, ການສົ່ງອອກເຂົ້າສານບັນລຸກ່ວາ 7 ລ້ານໂຕນ, ຊຶ່ງແມ່ນຕົວເລກສູງສຸດນັບແຕ່ກອ່ນເປັນຕົ້ນມາ. ມີສິນຄ້າ 4 ປະເພດບັນລຸມູນຄ່າການສົ່ງອອກ ກ່ວາ 3 ຕື້ USD, ວົງເງິນສົ່ງອອກເກີນດູນ ແມ່ນ 9,2 ຕຶ້USD, ອັນໄດ້ປະກອບສ່ວນຫຼຸດຜ່ອນວົງເງິນນຳເຂົ້າເກີຍດູນໃຫ້ແກ່ທົ່ວປະເທດ. ແຕ່ໃນຕົວຈິງ, ເຖິງວ່າ ປະລິມານການຜະລິດສິນຄ້າຂອງ ຂະແໜງກະສີກຳເພີ່ມຂຶ້ນສູງກໍຕາມ, ແຕ່ມູນຄ່າເພີ່ມຂອງ ຂະແໜງກະສີກຳພັດພວມມີທ່າອຽງຫຼຸດລົງ. ການເຕີບໂຕດ້ານກະສີກຳໃນໄລຍະທີ່ຜ່ານມາ, ຕົ້ນຕໍ່ແມ່ນເລັ່ງໃສ່ລ່ວງກ້ວາງໂດຍຜ່ານການເພີ່ມເນື້ອທີ່ປູກຝັງ, ເພີ່ມລະດູການຜະລິດ ແລະອີງໃສ່ບັນດາປັດໃຈວັດຖຸສົ້ນເຂົ້າໃຫ້ແກ່ການຜະລິດຄື: ແຮງງານ, ທຶນ, ວັດຖຸ....ຮູບແບບການເຕີບໂຕດ້ານກະສີກຳໃນໄລຍະທີ່ຜ່ານມາ, ພຽງແຕ່ສາມາດຜະລິດອອກເປັນຈຳນວນຫຼາຍແລະ ລາຄາຖືກ, ແຕ່ມີມູນຄ່າຕ່ຳ, ປະສິດທິຜົນການນຳໃຊ້ທີ່ດິນ ແລະ ຊັບພະຍາກອນຍັງບໍ່ທັນສູງເທຶ່ອ. ຕາມທ່ານ ກາວດຶກຟາດ ລັດຖະມົນຕີກະຊວງກະສີກຳ ແລະ ພັດທະນາຊົນນະບົດ ແລ້ວ, ນີ້ແມ່ນບັນຫາທີ່ກ່ຽວຂ້ອງເຖິງໂຄງປະກອບຂອງ ຂະແໜງກະສີກຳ ແລະ ຄວນມີກຳນົດທິດພັດທະນາ. ເພາະສະນັ້ນ, ໃນການ ກຳນົດທິດສ້າງໂຄງປະກອບ ຂະແໜງກະສີກຳຄືນໃໝ່, ປະຈຸບັນ, ກະຊວງກະສີກຳ ແລະ ພັດທະນາຊົນນະບົດຫວຽດນາມພວມເລັ່ງໃສ່ຍົກສູງອັດຕາສ່ວນບັນດາຂະແໜງການປູກຝັງ, ລ້ຽງສັດ ແລະ ສິນໃນນ້ຳ. ສຳລັບ ການສ້າງໂຄງປະກອບການຜະລິດຄືນໃໝ່ນັ້ນ, ຂະແໜງກະສີກຳຈະຍູ້ແຮງຮູບແບບການພັດທະນາເສດຖະກິດຄອບຄົວຕາມທິດຜະລິດເປັນສິນຄ້າທີ່ມີຂອບຂະໜາດໃຫຍ່ກໍຄືປະຕິບັດການຊັບ ຊ້ອນປ່ຽນແປງໃໝ່ລັດວິສາຫະກິດທີ່ຂຶ້ນກັບ ກະຊວງກະສີກຳ ແລະ ພັດທະນາຊົນນະບົດໃຫ້ສຳເລັດໃນປີ 2012 . ທ່ານ ກາວດຶກຟາດ ກ່າວວ່າ:
“ ພວກເຮົາຕ້ອງເຮັດແນວໃດ ເພື່ອໃຫ້ການຜະລິດຍັງຄົງສືບຕໍ່ເພີ່ມຂຶ້ນ, ແຕ່ລາຍຮັບຂອງປະຊາຊົນຕ້ອງເພີ່ມໄວກ່ວາ. ຂ້າພະເຈົ້າສະເໜີວ່າ : ພວກເຮົາຄວນສຸມໃສ່ຂົງເຂດສິນໃນນ້ຳ, ການລ້ຽງສັດຫຼາຍກ່ວາ ແທນທີ່ສຸມໃສ່ຂົງເຂດອື່ນໆ. ໃນແຕ່ລະຂົງເຂດ, ກໍຕ້ອງຊອກຫາບັນດາແນວປູກສັດລ້ຽງ ທີ່ມີມູນຄ່າເພີ່ມສູງກ່ວາເພື່ອສຸມໃສ່ຜະລິດ. ນອກນັ້ນ, ກໍນຳໃຊ້ວິທະຍາສາດ ເທັກໂນໂລຢີສູງ, ນຳໃຊ້ລະບົບການຜະລິດໂດຍມີການຢັ້ງຢືນ ເພືອສາມາດຜະລິດອອກຜະລິດຕະພັນທີ່ມີຄຸນນະພາບສູງກ່ວາ ແລະ ລາຕາກໍສູງກ່ວາ ”
ໃນຮອບ 10 ປີທີ່ຈະມາເຖິງ, ຂະແໜງກະສີກຳວາງຈຸດໝາຍບັນລຸການເຕີບໂຕຢ່າງໜ້ອຍ 20%. ດ້ວຍປະເພດສິນຄ້າທີ່ມີທ່າແຮງຂອງຫວຽດນາມຄືເຂົ້າສານນັ້ນ, ຂະແໜງກະສີກຳໄດ້ກຳນົດວ່າ ຈະຫັນມານຳໃຊ້ເຄື່ອງກົນຈັກ ແລະ ຄວາມກ້າວໜ້າທາງດ້ານເຕັກນິກໃນການຜະລິດເຂົ້າຕາມແບບຍືນຍົງ,ຫຼຸດຜ່ອນຄ່າໃຊ້ຈາຍໃນການຜະລິດ, ເອົາໃຈໃສ່ເຖິງດ້ານສະມັດທະພາບ ແລະ ຄຸນນະພາບເຂົ້າສານ, ທັງເປັນການຮັບປະກັນຄວາມໝັ້ນຄົງດ້ານສະບຽງອາຫານ, ທັງຮັກສາທີ່ຕັ້ງບົດບາດມແມ່ນປະເທດສົ່ງອອກເຂົ້າສານແຖວໜ້າຂອງໂລກ. ຕາມນັ້ນແລ້ວ, ສູ້ຊົນຍົກມູນຄ່າເພີ່ມຂອງເຂົ້າສານສົ່ງອອກເພີ່ມຕື່ມ 15% ໃນປີ 2015 ແລະ ແຕ່ 20-25% ໃນປີ 2020. ຕາມການຄາດຄະເນຂອງບັນດາອົງການສາກົນ, ໃນຮອບເວລາ 20-30ປີຂ້າງໜ້າ, ລາຄາຜະລິດຕະພັນກະເສດໃນໂລກຈະສືບຕໍ່ເພີ່ມຂຶ້ນໄວຍ້ອນຄວາມຕ້ອງການບໍລິໂພກສະບຽງອາຫານເພີ່ມຂຶ້ນ. ເລື່ອງສືບຕໍ່ຂຸດຄົ້ນທ່າແຮງການຜະລິດເຂົ້າສານຫວຽດນາມຍັງຄົງແມ່ນທິດກ້າວເດີນຢ່າງຖືກຕ້ອງ ແລະ ຈຳເປັນ.
ໃນຂົງເຂດການລ້ຽງສັດ, ປີ 2012 ຈະຄ່ອຍໆຫັນປ່ຽນຈາກການລ້ຽງສັດຂະໜາດນ້ອຍ, ກະແຈກກະຈາຍມາຂະຫຍາຍການລ້ຽງສັດດ້ວຍຮູບແບບຟາມຕາມແບບອຸດສາຫະກຳ, ນຳໃຊ້ເທັກໂນໂລຢີສູງ, ຄົ້ນຄ້ວາພັດທະນາໃນຂອບຂະໜາດພໍດີ, ແທດເໝາະກັບຄວາມສາມາດດ້ານການເງິນ, ຄຸ້ມຄອງ ແລະ ສິ່ງແວດລ້ອມ, ສົ່ງເສີມຮູບແບບການຜະລິດແບບຄົບວົງຈອນ, ຮ່ວມສຳພັນໃນການຜະລິດ. ທ່ານ ຮ່ວາງກິມຢາວ ຫົວໜ້າກົມລ້ຽງສັດສັງກັດ ກະຊວງກະສີກຳ ແລະ ພັດທະນາຊົນນະບົດຫວຽດນາມຖືວ່າ:
“ ຕາມການສະຖີຕິໃນປະຈຸບັນ, ຄາດວ່າມີພຽງ 7,5 ລ້ານຄອບຄົວມີສ່ວນກ່ຽວຂ້ອງເຖິງການລ້ຽງສັດ. ໃນໄລຍະປະຈຸບັນ, ພວກເຮົາບໍ່ອາດປະປ່ອຍໄດ້, ຫາກຕ້ອງນຳພວກເຂົາເຈົ້າເຂົ້າເຄື່ອນໄຫວຄຸ້ມຄອງການຜະລິດຜະລິດຕະພັນ, ຊ່ວຍເຂົາເຈົ້າສ້າງຕັ້ງບັນດາສະຫະກອນ, ໜ່ວຍ, ກອງ, ສະຫະພັນ....ໃນສາຍສຳພັນນັ້ນ, ກໍຖືເອົາບັນດາວິສາຫະກິດເປັນຫົວໜ່ວຍຕົ້ນຕໍ່ ”
ການກຳນົດທິດສ້າງໂຄງປະກອບປະເພດສິນຄ້າຂອງຂະແໜງກະສີກຳ ຍັງຖືສິນໃນນ້ຳແມ່ນຂົງເຂດປາຍແຫຼມຄວນສຸມໃສ່ລົງທຶນ. ທາງກະຊວງຈະເອົາໃຈໃສ່ເຖິງຮູບແບບການລ້ຽງແບບອຸດສາຫະກຳ, ກະເສດສຸມ, ໃຫ້ສະມັດຕະພາບສູງ, ເທັກໂນໂລຢີສະອາດຕາມທາດຖານສາກົນ, ນຳໃຊ້ຢ່າງກ້ວາງຂວາງ, ທ່າແຮງສຸມໃສ່ກຸ້ງ, ປາຈາ, ຫອຍກີ້, ນຳໃຊ້ເທັກໂນໂລຢີສູງ, ຮັບປະກັນຫຼັກອະນາໄມຄວາມປອດໄພດ້ານອາຫານ.
ອາດຈະເຫັນໄດ້ວ່າ: ຕໍ່ໜ້າວິກິດການສະບຽງອາຫານ ແລະ ວິທີສັງເກດໃໝ່ກ່ຽວກັບການພັດທະນານັ້ນ, ກະສີກຳພວມກາຍເປັນຂົງເຂດບໍ່ພຽງແຕ່ມີຄວາມສຳຄັນເທົ່ານັ້ນ, ຫາກຍັງມີຄວາມດູດດື່ມທີ່ສຸດໃນແງ່ມຸມການລົງທຶນ. ຂະແໜງກະສີກຳຫວຽດນາມມີຄວາມສາດບົ່ມຊ້ອນ ແລະ ທ່າໄດ້ປຽບຫຼາຍຢ່າງ ເພື່ອນຳມາຊຶ່ງມູນຄ່າດ້ານເສດຖະກິດທີ່ໃຫຍ່ຫຼວງກ່ວາ. ເພື່ອເຮັດໄດ້ສິ່ງດັ່ງກ່າວ, ຂະແໜງກະສີກຳພວມມີການການປ່ຽນໃໝ່ຢ່າງແຂງແຮງກ່ຽວກັບລະບອບລະບຽບການ, ສ້າງເງື່ອນໄຂທີ່ດີທີ່ສຸດ ເພື່ອໃຫ້ບັນດາວິສາຫະກິດລົງທຶນເຂົ້າຂົງເຂດກະສີກຳ, ຍູ້ແຮງມູນຄ່າເພີ່ມຂອງສິນຄ້າ. ແລະ ສຳຄັນກ່ວາໝູ່ແມ່ນການປ່ຽນໃໝ່ຈະສ້າງບັນດາກາລະໂອກາດທີ່ດີໃຫ້ແກ່ຊາວກະສີກອນເພື່ອຍົກສູງລາຍຮັບ. ທ່ານດອກເຕີ ດັ້ງກິມເຊີນ ຫົວໜ້າສະຖາບັນນະໂຍບາຍ ແລະ ຍຸດທະສາດພັດທະນາກະສີກຳຊົນນະບົດ ເນັ້ນໜັກວ່າ :
“ ໄລຍະທີ່ຈະມາເຖິງ, ຄວາມທ້າທາຍແມ່ນໃຫຍ່ຫຼວງທີ່ສຸດ, ແຕ່ກາລະໂອກາດກໍມີຫຼາຍທີ່ສຸດ ແລະ ແມ່ນໂອກາດທີ່ບໍ່ເຄີຍມີມາ. ຂ້າພະເຈົ້າເຊື່ອແນວ່າ ຊາວກະສີກອນຫວຽດນາມດ້ວຍທ່າທີຮັບມືກັບການຕະຫຼາດຢ່າງຖືກຕ້ອງ, ມີຄວາມຫ້າວຫັນໃນການເຮັດວຽກ ແລະ ມີຫົວຄິດປະດິດສ້າງນັ້ນ, ຊາວກະສີກອນຈະເປັນຜູ້ທຳອິດສາມາດກຳໄດ້ກາລະໂອກາດນີ້, ແລະ ນຳມາຊຶ່ງປະສິດທິຜົນໃຫ້ແກ່ປະເທດຊາດ ”
ດ້ວຍບັນດາວິທີການແກ້ໄຂຖືກຍັກອອກມາໃນແຜນຮ່າງສ້າງໂຄງປະກອບຂະແໜງກະສີກຳຄືນໃໝ່ໃນປີ 2012ນັ້ນ, ພວກເຮົາປາດຖະໜາວ່າ ຈະເປັນການສ້າງທ່ວງທ່າໃຫ້ແກ່ຂະແໜງກະສີກຳພັດທະນາຢ່າງກ້າວກະໂດດຂັ້ນ, ພ້ອມກັນນັ້ນ ກໍນຳມາຊຶ່ງບັນດາກາລະໂອກາດເພື່ອຊ່ວຍໃຫ້ຊາວກະສີກອນຍົກສູງລາຍຮັບ, ສາມາດສ້າງຄວາມຮັ່ງມີຢູ່ບ້ານເກີດເມືອງນອນຂອງຕົນ.