ໃນໄລຍະເວລາອັນສັ້ນໆເທົ່ານັ້ນ, ລັດອິດສະລາມໂດຍຂະໜານນາມເອງ (IS), ຊຶ່ງແມ່ນອົງການຫົວຮຸນແຮງ ໄດ້ກໍ່ການຈະລາຈົນຢູ່ຫຼາຍເຂດທີ່ກ້ວາງໃຫຍ່ໃນປະເທດອີຣັກ ແລະ ພວມມີສັນຍານເປີດກ້ວາງການເຄື່ອນໄຫວອອກສູ່ປະເທດເພື່ອນບ້ານໃກ້ຄຽງ ຊີຣີ. ໃນບົດລາຍງານຄັ້ງຫຼ້າສຸດ ປະກາດເມື່ອວັນທີ 27/8, ສະຫະປະຊາຊາດຢືນຢັນວ່າ ບັນດາມືປືນຂອງ IS ມີໂທດກຳສົງຄາມ ແລະ ໂທດກຳຕ້ານມວນມະນຸດ. ເຖິງວ່າປະຊາຄົມໂລກໄດ້ມີບັນດາການກະທຳ ແລະ ປະຕິກິລີຍາໃນເບື້ອງຕົ້ນຕໍ່ໜ້າໄພອັນຕະລາຍຂອງ IS ກໍຕາມ, ແຕ່ການຍູ້ ການເຄື່ອນໄຫວຂອງ ອົງການຫົວຮຸນແຮງນີ້ໃຫ້ຖອຍໄປນັ້ນ, ແມ່ນສິ່ງທີ່ບໍ່ງ່າຍດາຍແຕ່ຢ່າງໃດເລີຍ.
ບັນດາມືປືນຂອງລັດອິດສະລາມໂດຍຂະໜານນາມເອງ (ພາບ:AP)
|
ປະຊາຄົມໂລກພວມນັບມື້ນັບມີຄວາມວິຕົກກັງວົນຕໍ່ໄພນາບຂູ່ຂອງ IS ພາຍຫຼັງບັນດາການບຸກໂຈມຕີຂອງກຸ່ມນີ້ໃນບໍລິເວນທົ່ວປະເທດອີຣັກ ແລະ ພິເສດແມ່ນກໍລະນີ IS ສັງຫານນັກຂ່າວອາເມລິກາ James Foley ຢູ່ຊີຣີ. ເປັນໜ້າສົນໃຈກວ່າໝູ່ ແມ່ນກຳລັງ IS ຢູ່ຊີຣີ, ເປັນຄັ້ງທຳອິດໄດ້ປັບປຸງການຄວບຄຸມຂອງຕົນສຳລັບທັງແຂວງ Raqqa ໃນພາກເໜືອ, ພາຍຫຼັງທີ່ໄດ້ຢຶດເອົາຖານທັບອາກາດຍຸດທະສາດ Al-Tabaqa. ຊຸມມື້ມໍ່ໆມານີ້, ກຸ່ມນີ້ໄດ້ບຸກເຂົ້າແຂວງ Aleppo ແລະ ໄດ້ຄວບຄຸມແຂວງ Deir Ezzor ທີ່ມີຫຼາຍບໍ່ນ້ຳມັນ. ບັນດາມືປືນ IS ໄດ້ເຂັ່ນຂ້າ, ລອກຈັບຕົວ, ທູບຕີທໍລະມານ, ຄ້າຂາຍຄົນບໍ່ແມ່ນເຊື້ອສາຍອາຣັບ ແລະ ບໍ່ແມ່ນຊາວມຸດສະລິມນິກາຍຊັນນີຢູ່ອີຣັກ, ທຳລາຍບັນດາສະຖານທີ່ວັດທະນະທຳ ແລະ ສາສະໜາ. ມີປະຊາຊົນນັບຮ້ອຍຄົນໄດ້ຖືກ IS ສັງຫານ ແລະ ກວ່າ 2.500 ຄົນຖືກລອກຈັບຕົວນັບແຕ່ເດືອນ 8 . IS ຍັງບັງຄັບໃຫ້ເດັກນ້ອຍໄວ 15 ປີຕ້ອງເຂົ້າຖັນແຖວທະຫານ ແລະ ນຳໃຊ້ພວກເຂົາປຽບເໝືອແຜ່ນກຳບັງ.
ການສ້າງຕັ້ງສຳພັນທະມິດຕ້ານ IS ແມ່ນຈຳເປັນ
ນາຍພົນ Martin Dempsey ປະທານສະພາເສນາທິການກຳລັງທະຫານປະສົມອາເມລິກາ ຖືວ່າ ບັນດາມືປືນຫົວຮຸນແຮງທີ່ຂຶ້ນກັບກຸ່ມ IS ແມ່ນໄພອັນຕະລາຍນາບຂູ່ຕໍ່ຄວາມສະຫງົບໃນພາກພື້ນຕາເວັນອອກໂດຍກົງ, ແຕ່ຈະກາຍເປັນໄພອັນຕະລາຍນາບຂູ່ໂດຍກົງຕໍ່ຄວາມສະຫງົບຂອງບໍ່ພຽງແຕ່ອາເມລິກາເທົ່ານັ້ນ, ຫາກຍັງນາບຂູ່ຕໍ່ທະວີບເອີລົບອີກດ້ວຍ. ດັ່ງນັ້ນ ການສ້າງຕັ້ງສຳພັນທະມິດຕ້ານ IS ໃນປະຈຸບັນແມ່ນຈຳເປັນ. ຕໍ່ໜ້າຄວາມຈິງດັ່ງກ່າວ, 7ປະເທດຊຶ່ງລວມມີ: ອັງກິດ, ການາດາ, ອານບານີ, ກຣວາດເຕັຍ, ແດນໝາກ, ອີຕາລີ ແລະ ຝະລັ່ງ ໄດ້ເຫັນດີເປັນເອກະສັນ ພ້ອມກັບອາເມລິກາສະໜອງອາວຸດໃຫ້ແກ່ກຳລັງຊາວ Kurd ຢູ່ພາກເໜືອອີຣັກເພື່ອຕ້ານຄືນບັນດາການບຸກໂຈມຕີຂອງບັນດາມືປືນກຸ່ມ ລັດອິດສະລາມໂດຍຂະໜານນາມເອງ IS. ໃນຂະນະນັ້ນ, ກະຊວງການຕ່າງປະເທດເຢຍລະມັນໃຫ້ຮູ້ວ່າ ປະເທດນີ້ພວມປຶກສາຫາລືກັບອາເມລິກາ ແລະ ບັນດາຄູ່ຮ່ວມມືສາກົນອື່ນໆກ່ຽວກັບກໍລະນີມີການກະທຳທາງທະຫານແນໃສ່ IS ຢູ່ຊີຣີ ແຕ່ Berlin ຈະບໍ່ເຂົ້າຮ່ວມທຸກການແຊກແຊງທາງທະຫານໃດໆຢູ່ຫັ້ນ. ສ່ວນລັດຖະມົນຕີການຕ່າງປະເທດຝະລັ່ງ Fabius ໄດ້ກະຕຸກຊຸກຍູ້ທຸກໆປະເທດໃນພາກພື້ນ ແລະ ອີຣານ ຈົ່ງຮຽງບ່າຮຽງໄຫຼ່ພ້ອມກັບບັນດາປະເທດຝ່າຍຕາເວັນຕົກ ທຳການຕໍ່ສູ້ຕ້ານກຳລັງກະບົດ ລັດອິດສະລາມໂດຍຂະໜານນາມເອງ IS ຊຶ່ງພວມເປັນໄພອັນຕະລາຍຢູ່ອີຣັກ ແລະ ຊີຣີ.
ທີ່ສະໜາມຮົບ, ການກະທຳຂອງ IS ຢູ່ອີຣັກໄດ້ພາໃຫ້ອາເມລິກາຕ້ອງດຳເນີນບັນດາການບຸກໂຈມຕີທາງອາກາດຢູ່ພາກເໜືອອີຣັກນັບແຕ່ເດືອນ 8. ສ່ວນຢູ່ປະເທດຊີຣີ, ເຮືອບິນອາເມລິກາກໍເລີ່ມບິນສອດແນມເທິ່ງເຂດນານຟ້າຊີຣີໃນຂະນະທີ່ກຳລັງກະບົດ IS ພວມຕ້ອງຮັບການບຸກໂຈມຕີທາງອາດຢ່າງດຸເດືອດຫຼາຍຄັ້ງຈາກກອງທັບລັດຖະບານ. ຕາມການປະກາດຂອງອາເມລິກາ, ນັບແຕ່ວັນທີ 8/8, ບັນດາເຮືອບິນສູ້ຮົບ ແລະ ເຮືອບິນບໍ່ມີຄົນຂັບຂອງອາເມລິກາໄດ້ດຳເນີນ ການບຸກໂຈມຕີທາງອາດນັບ 10 ຄັ້ງທີ່ແນໃສ່ກຳລັງ IS.
ຄວາມຫຍຸ້ງຍາກບໍ່ແມ່ນໜ້ອຍ.
ບັນດາເຈົ້າໜ້າທີ່ ແລະ ຜູ້ຊ່ຽວຊານດ້ານການປ້ອງກັນຄວາມສະຫງົບຖືວ່າ ເລື່ອງ IS ບຸກໂຈມຕີອາເມລິກາ ແລະ ຝ່າຍຕາເວັນຕົກ ພຽງແຕ່ແມ່ນບັນຫາວັນເວລາເທົ່ານັ້ນ. ທ່ານ Michael Hayden ອະດີດຜູ້ອຳນວຍການອົງການສືບລາສະການລັບອາເມລິກາ CIA ໃຫ້ຂໍ້ສັງເກດວ່າ : ການໂບຸກໂຈມຕີຝ່າຍຕາເວັນຕົກ ຈະແມ່ນວິທີເພື່ອໃຫ້ IS ສະແດງຄວາມມັກໃຫຍ່ໃຝ່ສູງ.
ເພາະສະນັ້ນ, ການຕ້ານ IS ແມ່ນຮຽກຮ້ອງໃຫ້ມີຄວາມສາມາດເປັນເອກະພາບ ແລະ ການຮ່ວມມືລະຫວ່າງບັນດາປະເທດ. ແຕ່ໃນຕົວຈິງ, ສິ່ງນີ້ແມ່ນຫຍຸ້ງຍາກພໍສົມຄວນ. ຍົກຕົວຢ່າງຄື ໃນວັນທີ 26/8, ວົງການເຈົ້າໜ້າທີ່ອາເມລິກາໄດ້ປະຕິເສດຕໍ່ການຮ່ວມມືກັບ Damascus ເພື່ອຕ້ານຄືນ IS ຢູ່ຊີຣີ. ສາຍເຫດໂດຍໂຄສົກທຳນຽບຂາວ ທ່ານ Josh Earnest ຍົກອອກມານັ້ນ ແມ່ນຍ້ອນອາເມລິກາຖືລະບອບຂອງປະທານາທິບໍດີ Al- Assad ແມ່ນໄພນາບຂູ່ກໍ່ການຮ້າຍ. ໃນຂະນະນັ້ນ, ບັນດາຜູ້ບັນຊາການກຳລັງທະຫານອາເມລິກາ ພວມວາງອອກບັນດາວິທີການເພື່ອຕ້ານຄືນ IS ຢູ່ທັງອີຣັກ ແລະ ຊີຣີ, ຊຶ່ງລວມທັງບັ້ນບຸກໂຈມຕີທາງອາກາດ. ສ່ວນລັດຖະມົນຕີການຕ່າງປະເທດຊີຣີ Walid Muallem ໄດ້ກ່າວເຕືອນວ່າ ຊີຣີບໍ່ຍອມຮັບບັນດາການບຸກໂຈມຕີທາງທະຫານພຽງລຳພັງຝ່າຍດຽວຂອງອາເມລິກາຫຼືບໍ່ວ່າປະເທດໃດໆ. ທຸກໆການກະທຳລະເມີດອະທິປະໄຕຂອງຊີຣີຈະຖືກຖືວ່າ ແມ່ນການຮຸກຮານ.
ເປັນໜ້າວິຕົກກັງວົນກວ່ານັ້ນ, ໃນແຈ້ງການຫຼ້າສຸດເມື່ອວັນທີ 28/8, ລັດຖະບານອາເມລິກາ ແລະ ອົດສະຕາລີໄດ້ພ້ອມກັນກ່າວເຕືອນກ່ຽວກັບສະພາບພົນລະເມືອງຂອງປະເທດຕົນໄປຍັງຊີຣີ ເພື່ອເຂົ້າເປັນສະມາຊິກຂອງອົງການກໍ່ການຮ້າຍແຫ່ງລັດອິດສະລາມໂດຍຂະໜານນາມເອງ IS. ເຈົ້າໜ້າທີ່ທ່ານໜຶ່ງຂອງອາເມລິກາໄດ້ຍອມຮັບວ່າ ໄພນາບຂູ່ອັນໃຫຍ່ຫຼວງກວ່າໝູ່ສຳລັບອາເມລິກາໃນປະຈຸບັນ ແມ່ນບັນດາມືປືນເຫຼົ້ານັ້ນ ກັບຄືນມາປະເທດເພື່ອດຳເນີນບັນດາການບຸກໂຈມຕີແບບກໍ່ການຮ້າຍ.
ໃນຂະນະທີ່ກຳລັງລັດອິດສະລາມໂດຍຂະໜານນາມເອງ IS ພວມເປີດກ້ວາງການສ່ົງຜົນສະທ້ອນຢ່າງບໍ່ຢຸດຢັ້ງນັ້ນ, ເລື່ອງສາກົນຮ່ວມສຳພັນເພື່ອສະກັດກັ້ນບາດກ້າວເດີນຂອງບັນດາມືປືນນີ້ ແມ່ນຈຳເປັນທີ່ສຸດ. ແຕ່ຄວາມຈິງໄດ້ສະແດງໃຫ້ເຫັນວ່າ ການປະຕິບັດວຽກງານນີ້ໃຫ້ບັນລຸໝາກຜົນ ແມ່ນສິ່ງທີ່ບໍ່ງ່າຍດາຍແຕ່ຢ່າງໃດ.