ວັນທີ 1/7 ທີ່ຜ່ານມາ, ອາເມລິກາໄດ້ປະກາດເອກະສານກ່ຽວກັບຍຸດທະສາດການທະຫານແຫ່ງຊາດໃໝ່ໃຫ້ປີ 2015, ຕາມນັ້ນແລ້ວ, ໄດ້ເນັ້ນໜັກເຖິງການຫັນປ່ຽນເປົ້າໝາຍຍຸດທະສາດໄປສູ່ພາກພື້ນປາຊີຟິກ. ເປັນໜ້າສົນໃຈແມ່ນໃນຍຸດທະສາດນີ້, ອາເມລິກາໄດ້ເນັ້ນເຖິງບາງປະເທດຄູ່ແຂ່ງ, ແມ່ນໄພນາບຂູ່ຕົ້ນຕໍສຳລັບຄວາມສະຫງົບຂອງອາເມລິກາ. ດັ່ງນັ້ນ, ກອງທັບຂອງປະເທດນີ້ຄວນແຊກແຊງຢ່າງແຂງແຮງກວ່າ, ແນໃສ່ຢັ້ງຢືນຄວາມຮັບຜິດຊອບຂອງປະເທດມະຫາອຳນາດໃນການຮັບປະກັນຄວາມເປັນລະບຽບຮຽບຮ້ອຍ, ຄວາມໝັ້ນຄົງທົ່ວໂລກ.
ກອງທັບຂອງອາເມລິກາຢັ້ງຢືນຄວາມຮັບຜິດຊອບຂອງປະເທດມະຫາອຳນາດໃນການຮັບປະກັນຄວາມເປັນລະບຽບຮຽບຮ້ອຍ, ຄວາມໝັ້ນຄົງທົ່ວໂລກ.
|
ຍຸດທະສາດການທະຫານແຫ່ງຊາດ 2015 ຖືກສ້າງ 4 ປີຕໍ່ຄັ້ງບົນພື້ນຖານ ຍຸດທະສາດປ້ອງກັນຄວາມສະຫງົບແຫ່ງຊາດ 2015. ຍຸດທະສາດໃໝ່ໄດ້ຢັ້ງຢືນວ່າ ອາເມລິກາມີພື້ນຖານປ້ອງກັນຊາດດ້ວຍກຳລັງກອງທັບໄດ້ຮັບການຝຶກແອບ, ປະກອບອາວຸດທັນສະໄໝກວ່າໝູ່ໃນໂລກ, ໝັ້ນໝາຍເພີ່ມທະວີການປ້ອງກັນຄວາມສະຫງົບຢູ່ພາຍໃນປະເທດ, ສ້າງທ່າສະໜາມປ້ອງກັນຄວາມສະຫງົບທົ່ວໂລກ ສາມາດລະດົມກຳລັງແຮງທັງຊາດ, ສະກັດກັ້ນການແຜ່ຂະຫຍາຍອາວຸດລ້າງຜານ, ເປັນຕົ້ນແມ່ນອາວຸດນິວເຄຼຍ; ສ້າງຄວາມສາມາດຮັບມືໃນທົ່ວໂລກ, ຊົມເຊີຍບັນດາປະເທດໃຫຍ່ທີ່ພວມພົ້ນເດັ່ນຂຶ້ນ, ແຕ່ກ່າວເຕືອນພ້ອມແລ້ວທີ່ຈະສະກັດກັ້ນບັນດາຄູ່ແຂ່ງທີ່ຊ້ອນແຝງຄວາມເປັນອັນຕະລາຍ. ພ້ອມກັນນັ້ນ, ຍຸດທະສາດດັ່ງກ່າວ , ກໍໄດ້ກ່າວເຕືອນບັນດາສິ່ງທ້າທາຍທີ່ນັບມື້ນັບເພີ່ມທະວີຂຶ້ນໃນສະພາວະທີ່ໂລກມີການຜັນແປຫຼາຍຢ່າງ.
ເປີດກ້ວາງບົດບາດປ້ອງກັນຄວາມໝັ້ນຄົງທົ່ວໂລກ
ຍຸດທະສາດການທະຫານແຫ່ງຊາດ 2015 ໂດຍທຳນຽບ 5 ແຈປະກາດເມື່ອວັນທີ 1/7, ເຖິງວ່າໄດ້ເນັ້ນໜັກວ່າ ອາເມລິກາແມ່ນປະເທດທີ່ມີທ່າແຮງທາງດ້ານເຕັກໂນໂລຢີ, ພະລັງງານ, ປະເທດພັນທະມິດ, ແຕ່ເອກະສານນີ້ ກໍຍອມຮັບວ່າ ບັນດາທ່າດີນີ້ ກໍພວມຢືນຢູຕໍ່ໜ້າສິ່ງທ້າທາຍນາໆປະການ.
ຍຸດທະສາດການທະຫານ 2015 ມີຫຼາຍຈຸດໃໝ່ເມື່ອທຽບໃສ່ ຍຸດທະສາດການທະຫານ 2011 ແລະ ຕາມການໄຈ້ແຍກຂອງບັນດາຜູ້ຊ່ຽວຊານການທະຫານອາເມລິກາແລ້ວ, ການປ່ຽນແປງເຫຼົ້ານັ້ນ, ແມ່ນເພື່ອແນໃສ່ຕອບສະໜອງສະພາບການໂລກທີ່ພວມມີການຜັນແປຫຼາຍຢ່າງໃນປະຈຸບັນ. 1 ໃນບັນດາຈຸດໃໝ່ຂອງ ຍຸດທະສາດນີ້, ນອກຈາກບັນດາປັດໄຈທີ່ບໍ່ຂຶ້ນກັບປະເທດໃດ ເຊ່ັນ ອົງການກໍ່ການຮ້າຍຫົວຮຸນແຮງນັ້ນ, ປັດໄຈ “ປະເທດຄູ່ແຂ່ງ” ໄດ້ຖືກອາເມລິກາຊີ້ແຈ້ງເຖິງ, ໃນນັ້ນ, ລັດເຊຍ ແລະ ຈີນຖືກຈັດຢູ່ແຖວໜ້າຂອງບັນຊີລາຍຊື່ນີ້.ຕາມບົດລາຍງານນີ້, ລັດເຊຍຖືກກ່າວຫາວ່າ ໄດ້ລະເມີດຂໍ້ຕົກລົງກັນຫຼາຍສະບັບ, ໃນນັ້ນ ເປັນທີ່ຈະແຈ້ງທີ່ສຸດ ແມ່ນສົນທິສັນຍາ ລູກສອນໄຟໄລຍະກາງ. ກ່ຽວກັບຈີນ, ບົດລາຍງານຍຸດທະສາດໃໝ່ຂອງອາເມລິກາ ໄດ້ຊີ້ແຈ້ງເຖິງບັນດາການກະທຳຂອງປັກກິງໃນໄລຍະທີ່ຜ່ານມາ, ພວມເຮັດໃຫ້ພາກພື້ນອາຊີ-ປາຊີຟິກເພີ່ມຄວາມເຄັ່ງຕຶງຂຶ້ນຕື່ມ. ຖະແຫຼງການທວງເອົາອະທິປະໄຕຢູ່ທະເລຕາເວັນອອກເກືອບທັງໝົດຂອງຈີນ ໄດ້ລະເມີດບັນດາຂໍ້ກຳນົດ ແລະ ກົດໝາຍສາກົນ. ພ້ອມກັນນັ້ນ, ໃນຂະນະທີ່ປະຊາຄົມໂລກພວມຮຽກຮ້ອງປັກກິງແກ້ໄຂຄວາມເຄັ່ງຕຶງດ້ວຍວິທີຮ່ວມມືນັ້ນ, ປັກກິງໄດ້ຕອບໂຕ້ຄືນດ້ວຍບັນດາການເຄຶ່ອນໄຫວບູລະນະ, ເປີດກ້ວາງການກໍ່ສ້າງ, ຫວັງນຳໃຊ້ບັນດາທີ່ຕັ້ງຍຸດທະສາດຢູ່ ທະເລຕາເວັນອອກເພື່ອຈຸດປະສົງການທະຫານ.
ດັ່ງນັ້ນ, ຍຸດທະສາດການທະຫານແຫ່ງຊາດ 2015 ໄດ້ຊີ້ແຈ້ງວ່າ ອາເມລິກາຈະຕັ້ງໜ້າພັດທະນາບັນດາສາຍພົວພັນກັບປະເທດພັນທະມິດເພື່ອປ້ອງກັນຄວາມສະຫງົບ ແລະ ສັນຕິພາບ, ເນັ້ນໜັກເຖິງການພົວພັນກັບກຸ່ມ NATO , ຍີ່ປຸ່ນ, ສ.ເກົາຫຼີ, ອົດສະຕາລີ ແລະ ສືບຕໍ່ຍູ້ແຮງຍຸດທະສາດຫັນທິດໄປສູ່ອາຊີ, ເພີ່ມທະວີບັນດາອາວຸດຍຸດທະພັນ ພ້ອມກັບກຳລັງຕ່າງໆໃຫ້ແກ່ພາກພື້ນຍຸດທະສາດນີ້.
ຫັນທິດຍຸດທະສາດຈຸດສຸມ
ຖ້າວ່າ ບັນດາຍຸດທະສາດການທະຫານກ່ອນນີ້ໄດ້ຢັ້ງຢືນ ຈຸດສຸມຂອງອາເມລິກາແມ່ນຂົງເຂດຫຼັງສະຫະພາບໂຊຫວຽດນັ້ນ, ໃນວັນນີ້, ອາຊີ-ປາຊີຟິກ ໄດ້ກາຍເປັນຈຸດສຸມໃນຍຸດທະສາດນີ້. ບົດລາຍງານຍຸດທະສາດປີ 2011 ໄດ້ເຕື້ອງເຖິງຍຸດທະສາດຫັນທິດໄປສູ່ ອາຊີ-ປາຊີຟິກ, ແຕ່ຕ້ອງຮອດບົດລາຍງານ ຍຸດທະສາດການທະຫານຄັ້ງນີ້, ໜ້າທີ່ຂອງກອງທັບອາເມລິກາຈຶ່ງໄດ້ຮັບການກຳນົດລະອຽດຕາມທິດເປີດກ້ວາງກວ່າເກົ່າ. ບໍ່ພຽງແຕ່ສະກັດກັ້ນບັນດາການບຸກໂຈມຕີຢ່າງກະທັນຫັນ, ຮັບປະກັນມີທ່າດີຫຼາຍກວ່າຄູ່ຕໍ່ສູ້ເທ່ົານັ້ນ, ຍຸດທະສາດໃໝ່ຍັງເນັ້ນໜັກເຖິງການເປີດກ້ວາງເປົ້າໝາຍຮັບການປ້ອງກັນຄວາມສະຫງົບໃຫ້ທັງບັນດາຄູ່ຮ່ວມມື ແລະ ປະເທດທີ່ບໍ່ແມ່ນພັດທະມິດ ແຕ່ມີຜົນປະໂຫຍດຍຸດທະສາດຮ່ວມກັບອາເມລິກາ.
ທີ່ເວທີປາໄສສາກົນປະຈຳປີກ່ຽວກັບຄວາມໝັ້ນຄົງຢູ່ອາຊີ-ປາຊີຟິກ ເມື່ອມໍ່ໆມານີ້, ຜູ້ນຳທຳນຽບ 5 ແຈ ໄດ້ຢືນຢັນ ຄວາມຕັດສິນໃຈຂອງທຳນຽບຂາວ ເພື່ອສ້າງບັນຍາກາດແຫ່ງຄວາມເຊື່ອໝັ້ນຕໍ່ກັນໃນການພົວພັນລະຫວ່າງອາເມລິກາ ກັບບັນດາປະເທດໃນພາກພື້ນ, ໜູນຊ່ວຍບັນດາປະເທດເຫຼົ່ານັ້ນ ແກ້ໄຂບັນດາບັນຫາຂອງເຂົາເຈົ້າ ແລະ ຮັບປະກັນສະຖຽນລະພາບ ແລະ ຄວາມໝັ້ນຄົງບົນດິນແດນປະເທດເຫຼົ່ານັ້ນ.
ໃນສະພາວະທີ່ປະເທດຈີນພວມຟື້ນຕົວຢ່າງແຂງແຮງ, ເລື່ອງອາເມລິກາຫັນຍຸດທະສາດຈຸດສຸມໄປສູ່ພາກພື້ນອາຊີ-ປາຊີຟິກ ແມ່ນສິ່ງທີ່ບໍ່ມີຫຍັງປະຫຼາດໃຈ. ຫວນຄືນຍຸດທະສາດການທະຫານຂອງອາເມລິກາປີ 2015 ແມ່ນອາດຈະເຫັນແຈ້ງກ່ຽວກັບສິ່ງທີ່ອາເມລິກາຍາມໃດກໍຫວັງຢາກຢັ້ງຢືນທີ່ຕັ້ງບົດບາດຂອງປະເທດມະຫາອຳນາດເບີໜຶ່ງ, ບໍ່ພຽງແຕ່ທາງດ້າສນເສດຖະກິດເທົ່ານັ້ນ, ຫາກຍັງນັບທັງດ້ານການທະຫານ, ພິເສດແມ່ນກຳລັງບົ່ມຊ້ອນດ້ານປ້ອງກັນຊາດອີກດ້ວຍ.