(vovworld)- ທີ່ກອງປະຊຸມຜັນຂະຫຍາຍວຽກງານສາສະຫນາ ປີ 2012 ຂອງຄະນະສາສະຫນາຂອງລັດຖະບານ ຊຶ່ງດຳເນີນໃນວັນທີ 28/2, 2 ເນື້ອໃນສຳຄັນທ່ີຖືກຍົກອອກມາປຶກສາຫາລືນັ້ນແມ່ນ ການສະຫລຸບ 5 ປີ ແຫ່ງການປະຕິບັດຄຳສັ່ງເລກ 01 ຂອງນາຍົກລັດຖະມົນຕີ ກ່ຽວກັບບາງວຽກງານທີ່ມີຕໍ່ສາສະຫນາໂປແຕສະຕັງ ແລະ ການສະຫລຸບ 3 ປີແຫ່ງການປະຕິບັດຄຳສັ່ງເລກທີ 1940 ຂອງນາຍົກລັດຖະມົນຕີ ກ່ຽວກັບເຮືອນຢູ່, ທີ່ດິນກ່ຽວຂ້ອງເຖິງສາສະຫນາ.
ພາຍຫລັງ 3 ປີ ແຫ່ງການປະຕິບັດຄຳສັ່ງເລກ 1940, ອຳນາດການປົກຄອງທຸກຂັ້ນຍາມໃດກໍເອົາໃຈໃສ່ເຖິງຄວາມຕ້ອງການນຳໃຊ້ເຮືອນຢູ່, ທີ່ດິນຂອງບັນດາອົງການສາສະຫນາຄືດັ່ງຫນຶ່ງໃນບັນດາເງື່ອນໄຂຈຳເປັນທີ່ສຸດເພື່ອສ້າງຮາກຖານສາສະຫນາ ແລະ ຮັບໃຊ້ການເຄື່ອນໄຫວສາສະຫນາ. ບັນດາຂໍ້ຕິດຂັດໃນການຈົດທະບຽນນຳໃຊ້ທີ່ດິນ ແລະ ອອກຫນັງສືຢັ້ງຢືນການນຳໃຊ້ທີ່ດິນໃຫ້ແກ່ບັນດາຮາກຖານສາສະຫນາ ຄ່ອຍໆໄດ້ຮັບການແກ້ໄຂ. ທ່ານຮອງນາຍົກລັດຖະມົນຕີ ຫງວຽນຊວນຟຸກ ກໍສະເຫນີໃຫ້ບັນດາທ້ອງຖິ່ນເກັບກຳສະຖິຕິສະພາບເຮືອນຢູ່ທີ່ດິນກ່ຽວຂ້ອງເຖິງສາສະຫນາຢ່າງທັນການ, ລາຍງານຕໍ່ນາຍົກລັດຖະມົນຕີຕາມກຳນົດເວລາເປັນປະຈຳ. ທ່ານຮອງນາຍົກລັດຖະມົນຕີ ຫງວຽນຊວນຟຸກ ເນັ້ນຫນັກວ່າ:
“ລະບອບທີ່ດິນຢູ່ ຫວຽດນາມ ແມ່ນລະບອບກຳມະສິດສ່ວນລວມກ່ຽວກັບສະຖານທີ່ທຳການຜະລິດ, ລັດແມ່ນຜູ້ຄຸ້ມຄອງຫາກບໍ່ແມ່ນຂອງສ່ວນບຸກຄົນໃດໆຫນຶ່ງ ແຕ່ລັດເອົາໃຈໃສ່ເຖິງຄວາມຕ້ອງການອັນຊອບທຳ, ຕ້ອງວາງແຜນກຳນົດ, ອອກຫນັງສືອະນຸຍາດ, ປະຕິບັດຢ່າງຄ່ອງແຄ້ວ, ຖືກຕ້ອງຕາມກົດໝາຍ.”
ການດຳເນີນຊີວິດສາສະຫນາໂປແຕສະຕັງຢູ່ເຂດໄຕງວຽນ
ພາບ:ຈາກ Internet
ຄຳສັ່ງເລກ 01 ຂອງນາຍົກລັດຖະມົນຕີປະກາດໃຊ້ເມື່ອປີ 2005 ໄດ້ເຮັດໃຫ້ສະພາບການເຄື່ອນໄຫວຂອງສາສະຫນາໂປແຕສະຕັງມີການປ່ຽນແປງໂດຍພື້ນຖານ ຕາມທິດສະຖຽນລະພາບກວ່າ, ກໍລະນີຮ້ອງທຸກ ແລະ ຄັດຄ້ານກໍຫລຸດລົງ. ໄລ່ມາຮອດປະຈຸບັນ, ມີສາສະນິກະຊົນສາສະຫນາໂປແຕສະຕັງກວ່າ 875.000 ຄົນ ເຄື່ອນໄຫວເປັນລະບຽບຮຽບຮ້ອຍ, ປະຕິບັດຕາມລະບຽບກົດໝາຍ. ຄຳສັ່ງນີ້ໄດ້ສ້າງບາດກ້າວບຸກທະລຸໃນວຽກງານບໍລິຫານລັດ, ເຮັດໃຫ້ສະພາບການເຄື່ອນໄຫວຂອງສາສະຫນາໂປແຕສະຕັງມີການປ່ຽນແປງໂດຍພື້ນຖານຕາມທິດມີສະຖຽນລະພາບກວ່າ. ພາຍຫລັງໄດ້ຮັບຮູ້ວ່າ ບັນດາອົງການສາສະຫນາໂປແຕສະຕັງ ການເຄື່ອນໄຫວເປັນລະບຽບຮຽບຮ້ອຍແລ້ວ ແລະ ໄປຄຽງຄູ່ກັບປະເທດຊາດ. ຈາກຄວາມຕ້ອງການດ້ານຈິດໃຈໄດ້ຮັບປະກັນ, ປະຊາຊົນຖືສາສະຫນາໂປແຕສະຕັງ ເປັນຕົ້ນແມ່ນປະຊາຊົນຊົນບັນດາເຜົ່າສ່ວນຫນ້ອຍຢູ່ເຂດພູດອຍທາງພາກເຫນືອ ແລະ ເຂດໄຕງວຽນ ໄດ້ເຂົ້າຮ່ວມການເຄື່ອນໄຫວທາງສັງຄົມ, ການກຸສົນມະນຸດສະທຳຢ່າງຕັ້ງຫນ້າ, ເປັນເຈົ້າການສົມທົບກັບອຳນາດການປົກຄອງທ້ອງຖິ່ນຕໍ່ສູ້ຕ້ານການເຄື່ອນໄຫວສວຍໃຊ້ສາສະຫນາໂປແຕສະຕັງ, ປະກອບສ່ວນຮັກສາສະຖຽນລະພາບດ້ານການເມືອງ ຄວາມສະຫງົບປອດໄພ, ຄວາມເປັນລະບຽບຮຽບຮ້ອຍທາງສັງຄົມຢູ່ທ້ອງຖິ່ນ. ສາສະຫນາໂປແຕສະຕັງກໍປະກອບສ່ວນລົບລ້າງບັນດາປະເພນີຫລ້າຫລັງ, ການເຊື່ອຖືແບບງົມງວາຍ, ໄພສັງຄົມ. ທ່ານ ຫງວຽນແທນຊວນ ຮອງຫົວຫນ້າຄະນະປະຈຳຄະນະສາສະຫນາລັດຖະບານໃຫ້ຮູ້ວ່າ:
“ພາບພົດຂອງສາສະຫນາໂປແຕສະຕັງເມື່ອທຽບໃສ່ກັບປີ 2005 ມີການຫັນປ່ຽນໃຫຍ່ຫລວງ, ຕັ້ງຫນ້າກວ່າກ່ອນນີ້. ປະຊາຊົນຖືສາສະຫນາໂປແຕສະຕັງມີຄວາມປິຕິຊົມຊຶ່ນ ແລະ ສະແດງໃຫ້ເຫັນນະໂຍບາຍສາສະຫນາຂອງພັກ ແລະ ລັດຫວຽດນາມ ທີ່ມີຕໍ່ສາສະຫນາໂປແຕສະຕັງ. ວຽກງານສາສະຫນາໂປແຕສະຕັງໃນ 6 ປີ ຜ່ານມາ ໄດ້ປະກອບສ່ວນສຳຄັນເຂົ້າໃນການໂຄສະນາເພື່ອໃຫ້ບັນດາກຳລັງພາຍນອກມີຄວາມເຂົ້າໃຈຢ່າງຖືກຕ້ອງກ່ຽວກັບສະພາບການຢູ່ຫວຽດນາມ.”
ຄຳສັ່ງເລກທີ 01 ຂອງນາຍົກລັດຖະມົນຕີກ່ຽວກັບບາງວຽກງານທີ່ມີຕໍ່ສາສະຫນາໂປແຕສະຕັງ ແລະ ຄຳສັ່ງເລກທີ 1940 ກ່ຽວກັບເຮືອນຢູ່ທີ່ດິນກ່ຽວຂ້ອງເຖິງສາສະຫນາ ແມ່ນບັນດານະໂຍບາຍສຳຄັນ ເພື່ອຫັນລັດຖະບັນຍັດວ່າດ້ວຍການເຊື່ອຖື, ສາສະຫນາໄດ້ຮັບການປະກາດໃຊ້ເມື່ອປີ 2004 ໃຫ້ປະກົດຜົນເປັນຈິງ. ທ່ານຮອງນາຍົກລັດຖະມົນຕີຫວຽດນາມ ຫງວຽນຊວນຟຸກ ສະເຫນີໃຫ້ຄະນະສາສະຫນາລັດຖະບານປະກາດໃຊ້ດຳລັດໃຫມ່ ເພື່ອແນະນຳການປະຕິບັດລັດຖະບັນຍັດວ່າດ້ວຍການເຊື່ອຖືສາສະຫນາ, ກ້າວໄປເຖິງການສ້າງກົດໝາຍສະບັບຫນຶ່ງກ່ຽວກັບສາສະຫນາເພື່ອໃຫ້ພົນລະເມືອງທຸກຄົນມີສິດເສລີໃນການເຊື່ອຖືສາສະຫນາຢ່າງສະເໝີພາບ ໃນຂອບເຂດຂອງລັດແຫ່ງອຳນາດຕິຕິບັນຍັດ.
ເຮືອງຢາງ