ສະໄໝປະຊຸມຄັ້ງທີ 22 ສະພາສິດທິມະນຸດ ສປຊ ຫາກໍ່ຖືກໄຂຂຶ້ນຢູ່ເຊີແນວ ປະເທດສະວິດ. ໂດຍໄດ້ນຳໜ້າຄະນະຜູ້ແທນຫວຽດນາມ ໄປເຂົ້າຮ່ວມສະໄໝປະຊຸມຄັ້ງນີ້, ທ່ານລັດຖະມົນຕີການຕ່າງປະເທດຫວຽດນາມ ຟ້າມບິງມິງ ໄດ້ມີບົດກ່າວປາໄສ, ໃນນັ້ນ, ໄດ້ຍົກອອກບັນດາຄວາມຫຍຸ້ງຍາກ, ສິ່ງທ້າທາຍຊື່ງມວນມະນຸດພວມຕ້ອງປະເຊີນໜ້າ, ພ້ອມກັນນັ້ນໄດ້ຢັ້ງຢືນອີກເທື່ອໜຶ່ງນະໂຍບາຍສະເໝີຕົ້ນສະເໝີປາຍຂອງຫວຽດນາມ ແມ່ນເຄົາລົບ ແລະ ຮັບປະກັນສິດທິມະນຸດທັງໝົດຖືກຕ້ອງຕາມບັນດາມາດຖານສາກົນ. ນັກຂ່າວແອງຮ່ວຽນ ຂໍຄັດສະເໜີບັນດາເນື້ອໃນສຳຄັນໃນບົດກ່າວປາໄສດັ່ງກ່າວ.
ທ່ານລັດຖະມົນຕີການຕ່າງປະເທດຫວຽດນາມ ຟ້າມບິງມິງ
(ພາບ:vtv.vn)
ຂຶ້ນຕົ້ນບົດກ່າວປາໄສ, ທ່ານລັດຖະມົນຕີການຕ່າງປະເທດຫວຽດນາມ ຟ້າມບິງມິງ ຢັ້ງຢືນວ່າ: ນັບແຕ່ໄດ້ຮັບການສ້າງຕັ້ງຂຶ້ນ, ສະພາສິດທິມະນຸດໄດ້ທຳການເຄື່ອນໄຫວຢ່າງມີປະສິດທິຜົນ ແລະ ປະກອບສ່ວນຢ່າງແທດຈິງກ່ວາເຂົ້າໃນການຊຸກຍູ້, ປົກປ້ອງສິດທິມະນຸດໃນໂລກ. ທ່ານລັດຖະມົນຕີການຕ່າງປະເທດຫວຽດນາມ ຟ້າມບິງມິງ ສະເໜີວ່າ, ສະພາສິດທິມະນຸດຄວນເພີ່ມທະວີແຫຼ່ງກຳລັງ ແລະ ປະສິດທິຜົນໃນການເຄື່ອນໄຫວ, ຍົກອອກບັນດາມາດຕະການທີ່ມີປະໂຫຍດເພື່ອແນ່ໃສ່ຮັບມືກັບບັນດາສິ່ງທ້າທາຍດ້ານສິດທິມະນຸດເພື່ອເປັນອົງການສຳຄັນຂອງ ສປຊ ກ່ຽວກັບສິດທິມະນຸດ. ທ່ານລັດຖະມົນຕີການຕ່າງປະເທດຫວຽດນາມ ຟ້າມບິງມິງ ຢັ້ງຢືນວ່າ: ຫວຽດນາມ ຈະສືບຕໍ່ຮ່ວມມື ແລະ ປະກອບສ່ວນຢ່າງຕັ້ງໜ້າໃຫ້ແກ່ຄວາມມານະພະຍາຍາມລວມຂອງສະພາສິດທິມະນຸດ ແລະ ທຸກໆປະເທດໃນຂົງເຂດນີ້.
(ພາບປະກອບ:ອິນເຕີແນັດ)
ຕາມທ່ານລັດຖະມົນຕີການຕ່າງປະເທດຫວຽດນາມ ຟ້າມບິງມິງ ແລ້ວ, ນະໂຍບາຍສະເໝີຕົ້ນສະເໝີປາຍຂອງຫວຽດນາມ ແມ່ນເຄົາລົບນັບຖື ແລະ ຮັບປະກັນສິດທິມະນຸດທັງໝົດຖືກຕ້ອງຕາມບັນດາມາດຖານສາກົນວ່າດ້ວຍສິດທິມະນຸດ. ຊື່ງສະແດງໃຫ້ເຫັນຜ່ານຊຸມປີຜ່ານມາ, ບັນດາສິດ ແລະ ຄວາມເສລີອັນເປັນພື້ນຖານຂອງຫວຽດນາມ ນັບມື້ນັບໄດ້ຮັບການເຄົາລົບນັບຖື ແລະ ຮັບປະກັນເປັນຢ່າງດີກ່ວາ. ພິເສດ, ດ້ວຍນະໂຍບາຍການຕ່າງປະເທດເອກະລາດ, ເປັນເຈົ້າຕົນເອງ ແລະ ເຊື່ອມໂຍງເຂົ້າກັບສາກົນຢ່າງຮອບດ້ານ, ຫວຽດນາມ ໄດ້ເຂົ້າຮ່ວມ, ປະກອບສ່ວນສ້າງ ແລະ ມີຄວາມຮັບຜິດຊອບສຳລັບຫຼາຍບັນຫາສາກົນ, ໃນນັ້ນມີຂົງເຂດສິດທິມະນຸດ. ຫວຽດນາມ ແມ່ນສະມາຊິກຂອງສົນທິສັນຍາສາກົນສຳຄັນກ່ຽວກັບສິດທິມະນຸດເກືອບທັງໝົດ ແລະ ພວມກະກຽມບັນດາລະບຽບການສຳເລັດເພື່ອສາມາດໃຫ້ສັດຕະຍາບັນສົນທິສັນຍາກ່ຽວກັບສິດທິຄົນພິການໂດຍໄວ ແລະ ເຂົ້າຮ່ວມສົນທິສັນຍາຕ້ານການທໍລະມານ. ໃນໄລຍະຈະມາເຖິງ, ຫວຽດນາມ ຈະຮັບເອົາບັນດາລະບຽບການພິເສດກ່ຽວກັບສິດໄດ້ຮັບການສຶກສາ, ສິດມີທັນຍາຫານ, ສິດວັດທະນະທຳຄືດັ່ງໄດ້ໃຫ້ຄຳໝັ້ນສັນຍາ, ພ້ອມທັງຈະສືບຕໍ່ພິຈາລະນາ, ຮັບບັນດາລະບຽບການພິເສດອື່ນໆຕື່ມອີກ. ຫວຽດນາມ ກໍ່ເພີ່ມທະວີການຮ່ວມມື, ເຈລະຈາສອງຝ່າຍກັບຫຼາຍປະເທດກ່ຽວກັບດ້ານສິດທິມະນຸດເພື່ອແບ່ງປັນບົດຮຽນ, ຂໍ້ມູນຂ່າວ ເພື່ອແນໃສ່ຮັບປະກັນສິດທິມະນຸດດີກ່ວາອີກ. ຫວຽດນາມ ມີກົນໄກເຈລະຈາດ້ານສິດທິມະນຸດປະຈຳປີກັບຫຼາຍປະເທດ, ມີບັນດາການປະກອບສ່ວນຢ່າງແທດຈິງເພື່ອເພີ່ມທະວີການຮ່ວມມືດ້ານສິດທິມະນຸດໃນອາຊຽນ. ແຕ່ເຖິງຢ່າງໃດກໍ່ຕາມ, ໂດຍແມ່ນປະເທດພວມພັດທະນາ, ຜົນຮ້າຍຢ້ອນຫຼັງຈາກສົງຄາມຍັງໜັກໜ່ວງ ແລະ ພວມຢູ່ໃນໄລຍະປັບປຸງລັດແຫ່ງອຳນາດນິຕິບັນຍັດ ກໍ່ຄືຕໍ່ໜ້າການກະທົບຈາກວິກິດການເສດຖະກິດທົ່ວໂລກ, ຫວຽດນາມ ຍັງຕ້ອງປະເຊີນໜ້າກັບສິ່ງທ້າທາຍຫຼາຍຢ່າງ ແລະ ຕ້ອງມານະພະຍາຍາມຢ່າງແຮງກ່ວາອີກ ເພື່ອຮັບປະກັນບັນດາສິດພື້ນຖານດ້ານເສດຖະກິດ, ສັງຄົມກໍ່ຄືພົນລະເຮືອນ, ການເມືອງຂອງປະຊາຊົນ.
ໂດຍເລີ່ມຈາກຄວາມປາດຖະໜາຢາກປະກອບສ່ວນຢ່າງຫຼວງຫຼາຍກ່ວາອີກເຂົ້າໃນຄວາມມານະພະຍາຍາມລວມຂອງ ສປຊ ແລະ ປະຊາຄົມໂລກ ເພື່ອແນ່ໃສ່ຊຸກຍູ້ ແລະ ປົກປ້ອງສິດທິມະນຸດໃນໂລກ, ທ່ານລັດຖະມົນຕີການຕ່າງປະເທດຫວຽດນາມ ຟ້າມບິງມິງ ເນັ້ນໜັກວ່າ: ລັດຖະບານຫວຽດນາມ ໄດ້ອອກສະໝັກຮັບເລືອກຕັ້ງເປັນສະມາຊິກສະພາສິດທິມະນຸດ ສປຊ ອາຍຸການ 2014-2016 ຢ່າງເປັນທາງການ. ຫວຽດນາມ ແບ່ງປັນສະຕິຄວາມຮັບຮູ້ລວມແມ່ນບັນດາປະເທດມີຄວາມສາມາດປະກອບສ່ວນ ແລະ ອອກສະໝັກຮັບເລືອກຕັ້ງເປັນຄັ້ງທຳອິດເຂົ້າໃນສະພາສິດທິມະນຸດຄືຫວຽດນາມ ຄວນໄດ້ມອບຮັບກາລະໂອກາດ. ຖ້າຫາກວ່າໄດ້ກາຍເປັນສະມາຊິກສະພາສິດທິມະນຸດ, ຫວຽດນາມ ໃຫ້ຄຳໝັ້ນສັນຍາຈະຊາບຊືມບັນດາຈຸດໝາຍ ແລະ ຫຼັກການຂອງກົດບັດ ສປຊ, ບັນດາມາດຖານສາກົນກ່ຽວກັບສິດທິມະນຸດ; ສົມທົບກັບບັນດາປະເທດສະມາຊິກອື່ນໆຢ່າງແໜ້ນແຟ້ນ ແລະ ບັນດາກົນໄກສິດທິມະນຸດ ສປຊ ບົນຈິດໃຈເຈລະຈາ ແລະ ຮ່ວມມື, ປະກອບສ່ວນຢ່າງຕັ້ງໜ້າ, ກໍ່ສ້າງ ແລະ ມີຄວາມຮັບຜິດຊອບເຂົ້າໃນວຽກງານລວມຂອງສະພາສິດທິມະນຸດຕາມທິດໂປ່ງໄສ, ພາວະວິໄສ, ສຳພັດຮອບດ້ານ ແລະ ດຸນດຽງສິດທິມະນຸດທັງໝົດດ້ານການເມືອງ, ພົນລະເຮືອນ ແລະ ເສດຖະກິດ, ສັງຄົມ, ວັດທະນະທຳ.
ສິ້ນສຸດບົດກ່າວປາໄສ, ທ່ານລັດຖະມົນຕີການຕ່າງປະເທດຫວຽດນາມ ຟ້າມບິງມິງ ຖືວ່າ: ເລື່ອງເຄົາລົບ ແລະ ຮັບປະກັນບັນດາສິດ, ຄວາມເສລີອັນເປັນພື້ນຖານຂອງມະນຸດ ແມ່ນຄວາມມຸ້ງຫັວງລວມຂອງມວນມະນຸດ, ພ້ອມທັງສະແດງໃຫ້ເຫັນຄວາມເຊື່ອໝັ້ນວ່າ: ສະໄໝປະຊຸມຄັ້ງທີ 22 ສະພາສິດທິມະນຸດ ສປຊ ຈະບັນລຸໄດ້ໝາກຜົນອັນແທດຈິງ, ປະກອບສ່ວນເຂົ້າໃນການປະຕິບັດຈຸດໝາຍລວມຄື: ສິດທິມະນຸດ ແລະ ກຽດສັກສີໃຫ້ແກ່ທຸກຄົນ ແລະ ແຕ່ລະຄົນໃນໂລກ.