(ພາບປະກອບ)
(vovworld) – ໃນລະຫວ່າງວັນທີ 12-13/3, ທ່ານນາຍົກລັດຖະມົນຕີ ຫງວຽນເຕີ໋ນຢຸງ ເຂົ້າຮ່ວມກອງປະຊຸມຂັ້ນສູງກ່ຽວກັບການຮ່ວມມື ກຳປູເຈຍ - ລາວ - ມຽນມາ - ຫວຽດນາມ ຄັ້ງທີ 6 (CLMV 6), ເປັນປະທານຈັດຕັ້ງກອງປະຊຸມຂັ້ນສູງເຂດສາມຫຼ່ຽມພັດທະນາ ກຳປູເຈຍ - ລາວ - ຫວຽດນາມ ຄັ້ງທີ 7 (CLV 7) ແລະ ເຂົ້າຮ່ວມກອງປະຊຸມຂັ້ນສູງຍຸດທະສາດຮ່ວມມືດ້ານເສດຖະກິດແມ່ນ້ຳ 3 ລຳ Ayeyawadi – Chao Phraya – Mekong ຄັ້ງທີ 5 (ACMECS 5) ຢູ່ນະຄອນຫຼວງວຽງຈັນ, ເຂົ້າຮ່ວມກອງປະຊຸມເຫຼົ່ານັ້ນ, ຫວຽດນາມຢືນຢັນຄວາມຕັດສິນໃຈຍູ້ແຮງ ແລະ ເພີ່ມທະວີການຮ່ວມມືໃນບັນດາຂົງເຂດຄື: ການຄ້າ ແລະ ການລົງທຶນ, ການເຊື່ອມຈອດໃນພາກພື້ນ, ການພັດທະນາແຫຼ່ງຊັບພະຍາກອນມະນຸດ ແລະ ປັບປຸງການພົວພັນກັບບັນດາປະເທດໃນພາກພື້ນ.
ຄວາມຈິງແລ້ວ, ໃນຈຳນວນ 10 ປະເທດສະມາຊິກອາຊຽນ, GDP ຂອງກຸ່ມ 6 ປະເທດສະມາຊິກເກົ່າ, ເຊິ່ງລວມມີ: ອິນໂດເນເຊຍ, ບຮູໄນ, ໄທ, ມາເລເຊຍ, ສິງກະໂປ, ຟີລິບປິນ ແລະ 4 ປະເທດສະມາຊິກໃໝ່, ເຊິ່ງລວມມີ: ກຳປູເຈຍ, ລາວ, ມຽນມາ, ຫວຽດນາມ ແມ່ນມີຄວາມຜິດໂຕນກັນພໍສົມຄວນ. ຄຽງຂ້າງນັ້ນ, ຂອບຂະໜາດຕະຫຼາດ ແລະ ໂຄງປະກອບຂອງບັນດາຂະແໜງເສດຖະກິດໃນບັນດາປະເທດອາຊຽນກໍ່ມີຄວາມແຕກຕ່າງກັນ ແລະ ຜິດໂຕນກັນອີກ. ຍ້ອນເຫດນັ້ນ, ຊ່ອງຫວ່າງພັດທະນາລະຫວ່າງບັນດາປະເທດສະມາຊິກພວມແມ່ນສິ່ງທີ່ກີດຂວາງຕົ້ນຕໍ່ສຳຫຼັບອະນາຄົດແຫ່ງການພັດທະນາຂອງອາຊຽນ, ພິເສດແມ່ນໃນສະພາບການ ຍັງມີເວລາພຽງ 2 ປີເທົ່ານັ້ນ, ອາຊຽນຕ້ອງປະຕິບັດສຳເລັດຄາດໝາຍກໍ່ສ້າງປະຊາຄົມລວມ. ດັ່ງນັ້ນໃນການພົບປະລະຫວ່າງນາຍົກລັດຖະມົນຕີ 3 ປະເທດ ຫວຽດນາມ - ລາວ - ກຳປູເຈຍ, ຢູ່ວຽງຈັນ (ລາວ), ເມື່ອເດືອນ 10/1999, ຂໍ້ລິເລີ່ມຮ່ວມມື CLV ຖືກຍົກອອກມາ, ເພື່ອແນໃສ່ເພີ່ມທະວີຄວາມສາມັກຄີ, ການຮ່ວມມືພັດທະນາທາງດ້ານເສດຖະກິດ - ສັງຄົມ, ປະກອບສ່ວນຮັກສາຄວາມໝັ້ນຄົງ, ຄວາມປອດໄພໃນເຂດຊາຍແດນລະຫວ່າງສາມປະເທດ. ພ້ອມກັນນັ້ນ, ການຮ່ວມມື CLMV ກໍ່ໄດ້ຮັບການສ້າງຕັ້ງຂຶ້ນ, ເພື່ອແນໃສ່ຮັດແຄບຊ່ອງຫວ່າງພັດທະນາ, ຊຸກຍູ້ການເຊື່ອມໂຍງຂອງບັນດາປະເທດ CLMV ເຂົ້າໃນວິວັດການພັດທະນາລວມຂອງອາຊຽນ ແລະ ພາກພື້ນ.
ດ້ວຍ 200 ກວ່າໂຄງການພວມໄດ້ຮັບການປະຕິບັດ, ທີ່ສຸມໃສ່ເຂົ້າບັນດາຂົງເຂດພັດທະນາໂຄງລ່າງ, ຄົມມະນາຄົມຂົນສົ່ງ, ພັດທະນາພື້ນຖານເຊື່ອມໂຍງທາງດ້ານເສດຖະກິດ, ເຕັກໂນໂລຢີຂໍ້ມູນຂ່າວສານ ແລະ ໂທລະຄົມ, ພັດທະນາແຫຼ່ງຊັບພະຍາກອນມະນຸດ…., ກຸ່ມ 4 ປະເທດ ຫວຽດນາມ - ລາວ - ມຽນມາ - ກຳປູເຈຍ ພວມໄດ້ຮັບຜົນງານຫຼາຍຢ່າງໃນການລົບລ້າງຄວາມອຶດຫີວ ຫຼຸດຜ່ອນຄວາມທຸກຍາກ, ປັບປຸງສິ່ງແວດລ້ອມ ແລະ ຊຸກຍູ້ການພັດທະນາການທ່ອງທ່ຽວພາຍໃນກຸ່ມ. ແຕ່ເພື່ອໃຫ້ 4 ປະເທດດັ່ງກ່າວພັດທະນາຢ່າງວ່ອງໄວ ແລະ ເຊື່ອມໂຍງຢ່າງເລິກເຊິ່ງກວ່າ ແມ່ນຕ້ອງສຸມຄວາມສາມາດບົ່ມຊ້ອນຮ່ວມມືທັງໝົດພາຍໃນກຸ່ມ. ກອງປະຊຸມຂັ້ນສູງ CLMV 6 ຖືກຈັດຂຶ້ນຢູ່ວຽງຈັນຄັ້ງນີ້ ກໍ່ເພື່ອຈຸດໝາຍສຸມໃສ່ການສຳຫຼວດກວດຄືນສະພາບການຜັນຂະຫຍາຍບັນດາແຜນການດຳເນີນງານໄລຍະ 2011 – 2012, ປຶກສາຫາລືບາງຂົງເຂດຮ່ວມມືຢ່າງລະອຽດ ກໍ່ຄືທິດທາງຍູ້ແຮງການຮ່ວມມືໃນພາກພື້ນ CLMV.
ໃນໄລຍະຜ່ານມາ, ຫວຽດນາມໄດ້ເປັນເຈົ້າການ ແລະ ຕັ້ງໜ້າເຂົ້າຮ່ວມບັນດາການເຄື່ອນໄຫວຮ່ວມມືຂອງກົນໄກນີ້, ສວມບົດບາດຕົ້ນຕໍ່ໃນການກໍ່ສ້າງບັນດາໂຄງການດຳເນີນງານປະຈຳປີຂອງການຮ່ວມມື CLMV, ສະເໜີບາງຂໍ້ລິເລີ່ມເພື່ອແນໃສ່ເພີ່ມປະສິດທິຜົນແຫ່ງການຮ່ວມມື. ພິເສດ, ປີ 2013 – 2014, ຫວຽດນາມ ໄດ້ຮັບບົດບາດເປັນປະທານກຸ່ມປະຕິບັດງານ Marketing ແລະ ໂຄສະນາ ກ່ຽວກັບການເຊື່ອມຕໍ່ໂຄງລ່າງທ່ອງທ່ຽວອາຊຽນ. ໂດຍເສີມຂະຫຍາຍທ່າແຮງຂອງຫວຽດນາມ ນັ້ນແມ່ນເຂດພາກກາງນອນໃນແລວເສດຖະກິດຕາເວັນອອກ - ຕາເວັນຕົກ, ຫວຽດນາມພວມພ້ອມກັບປະເທດຕ່າງໆຂຸດຄົ້ນຄວາມສາມາດບົ່ມຊ້ອນອັນໃຫຍ່ຫຼວງຢູ່ເຂດດັ່ງກ່າວ. ໄປຄຽງຄູ່ກັບການໂຄສະນາ ແມ່ນການວາງນະໂຍບາຍ ສ້າງເງື່ອນໄຂສະດວກໃຫ້ນັກທ່ອງທ່ຽວໄປມາໃນເຂດແລວຕາເວັນອອກ - ຕາເວັນຕົກ, ຫຼຸຸດຜ່ອນບັນດາລະບຽບການດ້ານບໍລິຫານທີ່ບໍ່ຈຳເປັນ, ພ້ອມທັງນຳໃຊ້ເຕັກໂນໂລຢີ ເພື່ອກວດກາຢູ່ດ່ານຊາຍແດນສາກົນທາງບົກ, ສະໜາມບິນ, ທ່າກຳ່ປັ່ນ. ທ່ານ ຫງວຽນແມ້ງເກື່ອງ, ຮອງຫົວໜ້າກົມໃຫຍ່ທ່ອງທ່ຽວຫວຽດນາມ, ຖືວ່າ:
”ບາງທ້ອງຖີ່ນມີທ່າແຮງ ເພື່ອສຸມໃສ່ພັດທະນາເຄື່ອງໝາຍທ່ອງທ່ຽວ. ກວາງຈິ້ ແມ່ນແຫ່ງທີ່ມີສະຖານທີ່ປະຫວັດສາດຫຼາຍແຫ່ງ, ດັ່ງນັ້ນຕ້ອງຂຸດຄົ້ນ ແລະ ຕ້ອງວາງແຜນການເພື່ອປະຕິບັດ. ພວກເຮົາຕ້ອງສ້າງຜະລິດຕະພັນລະຫວ່າງເຂດ, ຮ່ວມສຳພັນ, ຮ່ວມມືນຳກັນ, ຫຼຸດຜ່ອນລະບຽບການດ້ານບໍລິຫານ ເພື່ອສ້າງຄວາມສະດວກສະບາຍ”.
(ພາບ: vientianemai.net)
ພ້ອມກັບທ່ານນາຍົກລັດຖະມົນຕີລາວ, ກຳປູເຈຍ, ທ່ານນາຍົກລັດຖະມົນຕີຫວຽດນາມ ຫງວຽນເຕີ໋ນຢູງ ກໍ່ ເປັນປະທານກອງປະຊຸມຂັ້ນສູງ ເຂດສາມຫຼ່ຽມພັດທະນາ ກຳປູເຈຍ - ລາວ - ຫວຽດນາມ. ຢູ່ທີ່ນີ້, ບັນດາການນຳສຸມໃສ່ກວດກາການຜັນຂະຫຍາຍບັນດາຂໍ້ຕົກລົງທີ່ໄດ້ຮັບການຮັບຮອງເອົາໃນກອງປະຊຸມຄັ້ງກ່ອນແລ້ວ ແລະ ສະເໜີບາງທິດທາງຊຸກຍູ້ການພົວພັນຮ່ວມມືລະຫວ່າງສາມປະເທດໃນເຂດສາມຫຼ່ຽມພັດທະນາໃນຕໍ່ໜ້າ. ທ່ານ ດັ້ງຊວນກວາງ, ຮອງຫົວໜ້າກົມລົງທຶນຕ່າງປະເທດ, ສັງກັດກະຊວງແຜນການ ແລະ ການລົງທຶນຫວຽດນາມ, ຖືວ່າ:
“ເປັນທີ່ຈະແຈ້ງແລ້ວວ່າ, ເມື່ອທຽບໃສ່ບັນດາເຂດອື່ນໆ, ພື້ນຖານໂຄງລ່າງຂອງເຂດສາມຫຼ່ຽມພັດທະນານີ້ບໍ່ທັນສະດວກສະບາຍ ແລະ ບໍ່ທັນຕອບສະໜອງຄວາມຕ້ອງການດຶງດູດການລົງທຶນໃນໄລຍະຈະມາເຖິງໄດ້. ທີສອງແມ່ນນະໂຍບາຍລະຫວ່າງບັນດາປະເທດທີ່ກ່ຽວຂ້ອງເຖິງການຊຸກຍູ້ການລົງທຶນໃນພາກພື້ນນີ້ຕ້ອງຄົບຊຸດຈຶ່ງມີປະສິດທິຜົນກວ່າ. ນອກນັ້ນທັງສາມປະເທດຫວຽດນາມ, ລາວ, ກຳປູເຈຍ ຈຳເປັນຕ້ອງມີໂຄງການດຳເນີນງານລວມອີກ“.
ໃນຂອບເຂດການເຄື່ອນໄຫວຕ່າງໆຢູ່ລາວ, ທ່ານນາຍົກລັດຖະມົນຕີ ຫງວຽນເຕີ໋ນຢຸງ ກໍ່ໄປຢ້ຽມຢາມ ແລະ ເຮັດວຽກຢູ່ບາງແຂວງທາງພາກເໜືອຂອງລາວ. ການຢ້ຽມຢາມ ແລະ ເຮັດວຽກຢູ່ລາວຄັ້ງນີ້ຂອງທ່ານນາຍົກລັດຖະມົນຕີ ຫງວຽນເຕີ໋ນຢຸງ ເພື່ອແນໃສ່ຮັດແໜ້ນສາຍພົວພັນມິດຕະພາບທີ່ເປັນມູນເຊື້ອ, ຄວາມສາມັກຄືແບບພິເສດ ແລະ ການຮ່ວມມືຮອບດ້ານລະຫວ່າງຫວຽດນາມ -ລາວ, ກໍ່ຄືເພີ່ມທະວີການຮ່ວມມື, ການລົງທຶນລະຫວ່າງຫວຽດນາມ, ລາວ, ກຳປູເຈຍ ແລະ ມຽນມາກວ່າອີກ