ແຕ່ວັນທີ 3/6 ຫາວັນທີ 6/6, ທ່ານນາຍົກລັດຖະມົນຕີຫວຽດນາມ ຫງວຽນເຕີນຢຸງ ໄດ້ດຳເນີນການຢ້ຽມຢາມປອກຕຸຍການ ແລະ ສ.ບຸນກາຣີຢ່າງເປັນທາງການ. ໂດຍແມ່ນມະມາຊິກຂອງສະຫະພາບເອີລົບ EU, ທັງປອກຕຸຍການ ແລະ ບຸນກາຣີ ລ້ວນແຕ່ມີສາຍພົວພັນທີ່ເປັນມູນເຊື້ອອັນດີງາມກັບຫວຽດນາມ. ການຢ້ຽມຢາມຢ່າງເປັນທາງການຂອງ ທ່ານນາຍົກລັດຖະມົນຕີຫວຽດນາມ ຫງວຽນເຕີນຢຸງ ຄັ້ງນີ້, ແມ່ນໂອກາດທີ່ສຳຄັນເພື່ອໃຫ້ຫວຽດນາມເພີ່ມທະວີຊຸກຍູ້ການພົວພັນຮ່ວມມືໃນຫຼາຍຂົງເຂດ,ເປັນຕົ້ນແມ່ນການຍູ້ແຮງການຮ່ວມມືດ້ານເສດຖະກິດ 2 ຝ່າຍກັບ 2 ປະເທດທີີ່ມີຄວາມສາມາດບົ່ມຊ້ອນຫຼາຍຢ່າງນີ້.
ທ່ານນາຍົກລັດຖະມົນຕີຫວຽດນາມ ຫງວຽນເຕີນຢຸງໄປຮອດສະໜາມບິນ Figo Manduro ທີ່ນະຄອນຫຼວງ Lisbon |
ການເດີນທາງຢ້ຽມຢາມຢ່າງເປັນທາງການຂອງ ທ່ານນາຍົກລັດຖະມົນຕີຫວຽດນາມ ຫງວຽນເຕີນຢຸງ ຄັ້ງນີ້ຖືກດຳເນີນໃນຈຸດເວລາກົງກັບໂອກາດທີ່ຫວຽດນາມ ແລະ ບຸນກາຣີ ຈັດຕັ້ງສະເຫຼີມສະຫຼອງ 65 ປີແຫ່ງວັນສ້າງຕັ້ງການພົວພັນທາງການທູດ ແລະ ສະເຫຼີມສະຫຼອງ 40 ປີແຫ່ງວັນສ້າງຕັ້ງການພົວພັນທາງການທູດລະຫວ່າງຫວຽດນາມ ແລະ ປອກຕຸຍການ. ໂດຍແມ່ນ 2 ປະເທດມະມາຊິກຂອງສະຫະພາບເອີລົບ EU , ທັງປອກຕຸຍການ ແລະ ບຸນກາຣີ ລ້ວນແຕ່ແມ່ນບັນດາປະເທດທີ່ມີການພັດທະນາເສດຖະກິດດີພໍສົມຄວນ, ພິເສດແມ່ນໃນບັນດາຂົງເຂດທີ່ຄ້າຍຄືກັນກັບເສດຖະກິດຫວຽດນາມ. ຍິ່ງກວ່ານັ້ນ, ໂດຍຜ່ານຫວຽດນາມ, ດ້ວຍແງ່ຫວັງປະຊາຄົມເສດຖະກິດອາຊຽນຈະມີຜົນບັງຄັບໃຊ້ນັບແຕ່ປີ 2016 ເປັນຕົ້ນໄປ, ປອກຕຸຍການ ແລະ ບຸນກາຣີກໍຫວັງວ່າ ຫວຽດນາມຈະແມ່ນປະຕູເພື່ອໃຫ້ບັນດາປະເທດຊຸກຍູ້ການຮ່ວມມືກັບພາກພື້ນອາຊຽນທີ່ກ້ວາງໃຫຍ່ ແລະ ມີຄວາມສາມາດບົ່ມຊ້ອນຫຼາຍຢ່າງ.
ຖືເປັນສຳຄັນການຊຸກຍູ້ການຮ່ວມມືກັບ ປອກຕຸຍການ
ຕາມທ່ານ ຫງວຽນງອກເຊີນ ເອກອັກຄະລັດຖະທູດຫວຽດນາມປະຈຳຝະລັ່ງທັງຮັບຜິດຊອບປອກຕຸຍການແລ້ວ, ການຢ້ຽມຢາມປອກຕຸຍການຢ່າງເປັນທາງການຂອງ ທ່ານນາຍົກລັດຖະມົນຕີຫວຽດນາມ ຫງວຽນເຕີນຢຸງ ຄັ້ງນີ້ ແມ່ນມີຄວາມໝາຍສຳຄັນພິເສດໃນການພົວພັນລະຫວ່າງ 2 ປະເທດເພາະວ່າ ນີ້ແມ່ນການຢ້ຽມຢາມປອກຕຸຍການຄັ້ງທຳອິດຂອງນາຍົກລັດຖະມົນຕີຫວຽດນາມ, ທັງແມ່ນໂອກາດເພື່ອໃຫ້ 2 ປະເທດຈັດຕັ້ງສະເຫຼີມສະຫຼອງ 40 ປີແຫ່ງວັນສ້າງຕັ້ງການພົວພັນທາງການທູດ. ຕາມການຕີລາຄາຈາກທັງ 2 ຝ່າຍແລ້ວ, ການພົວພັນລະຫ່ວາງ 2 ປະເທດ, ພິເສດແມ່ນການພົວພັນທາງດ້ານເສດຖະກິດຍັງບໍ່ທັນເທົ່າທຽມກັບຄວາມສາມາດບົ່ມຊ້ອນຂອງແຕ່ລະຝ່າຍເທື່ອ. ເພາະສະນັ້ນ, ຫາງສຽງ 2 ປະເທດຄອຍຖ້າຕໍ່ການຢ້ຽມຢາມຂັ້ນສູງນີ້ຫລາຍທີ່ສຸດ. ທ່ານເອກອັກຄະລັດຖະທູດ ຫງວຽນງອກເຊີນ ຖືວ່າ :
“ການຢ້ຽມຢາມປອກຕຸຍການຂອງ ທ່ານນາຍົກລັດຖະມົນຕີຫວຽດນາມ ຫງວຽນເຕີນຢຸງ ຄັ້ງນີ້ຈະເປັນຂີດໝາຍບາດກ້າວຂະຫຍາຍຕົວໃໝ່ໃນການພົວພັນລະຫວ່າງ 2 ປະເທດ. ຜ່ານບັນດາເອກະສານທີ່ຮັບການລົງນາມໃນການຢ້ຽມຢາມຄັ້ງນີ້ ຈະເປີດແງ່ຫວັງໃໝ່ໃນການພົວພັນລະຫວ່າງ 2 ປະເທດ. ຜ່ານການຢ້ຽມຢາມຄັ້ງນີ້, ຈະຊ່ວຍພວກເພື່ອນປອກຕຸຍການມີຄວາມເຂົ້າໃຈກວ່າກ່ຽວກັບຫວຽດນາມ. ແລະ ພິເສດ, ເວທີປາໄສວິສາຫະກິດລະຫວ່າງ 2 ປະເທດ ຊຶ່ງຄາດວ່າຈະມີວິສາຫະກິດເກືອບ 100 ແຫ່ງຂອງຫວຽດນາມ ແລະ ຫຼາຍແຫ່ງຂອງປອກຕຸຍການເຂົ້າຮ່ວມ ”
ໃນຂອບເຂດການຢ້ຽມຢາມ, ນອກຈາກບັນດາການພົບປະກັບບັນດາການນຳສູງສຸດຂອງປອກຕຸຍການ, ພິທີລົງນາມໃນບາງເອກະສານຮ່ວມມືລະຫວ່າງ 2 ປະເທດນັ້ນ, ມີເຫດການໜຶ່ງທີ່ພົ້ນເດັ່ນໃນການຢ້ຽມຢາມປອກຕຸຍການຢ່າງເປັນທາງການຄັ້ງນີ້, ນັ້ນແມ່ນ ທ່ານນາຍົກລັດຖະມົນຕີຫວຽດນາມ ຫງວຽນເຕີນຢຸງ ກັບທ່ານນາຍົກລັດຖະມົນຕີ ປອກຕຸຍການ ເປັນປະທານຮ່ວມເວທີປາໄສເສດຖະກິດທະເລປີ 2015 ຊຶ່ງຄາດວ່າຈະມີປະມານ 50 ປະເທດ ແລະ ບັນດາອົງການຈັດຕັ້ງເຂົ້າຮ່ວມ. ຕີລາຄາກ່ຽວກັບຄວາມໝາຍຂອງການເຄື່ອນໄຫວນີ້, ທ່ານເອກອັກຄະລັດຖະທູດ ຫງວຽນງອກເຊີນ ໃຫ້ຮູ້ວ່າ :
“ປອກຕຸຍການຖືເປັນສຳຄັນທີ່ສຸດການຢ້ຽມຢາມຢ່າງເປັນທາງການຂອງ ທ່ານນາຍົກລັດຖະມົນຕີຫວຽດນາມ ຫງວຽນເຕີນຢຸງ ແລະ ຕີລາຄາສູງບົດບາດຂອງຫວຽດນາມ, ດັ່ງນັ້ນ ໄດ້ເຊື້ອເຊີນທ່ານນາຍົກລັດຖະມົນຕີ ຫງວຽນເຕີນຢຸງ ເປັນປະທານຮ່ວມເວທີປາໄສເສດຖະກິດທະເລປີ 2015. ນີ້ແມ່ນໂອກາດເພື່ອໃຫ້ຫວຽດນາມສາມາດຊອກຮູ້ຢ່າງເລິກເຊິ່ງກວ່າກ່ຽວກັບຄວາມສົນໃຈລວມຂອງບັນດາປະເທດໃນໂລກທີ່ມີຕໍ່ບັນຫາມະຫາສະໝຸດ ກໍຄືການປະກອບຄຳເຫັນຂອງຫວຽດນາມເຂົ້າໃນການປົກປັກຮັກສາສິ່ງແວດລ້ອມທະເລ ກໍຄືການພັດທະນາເສດຖະກິດທະເລໃນອະນາຄົດ ”
ມຸ່ງໄປສູ່ການພົວພັນຄູ່ຮ່ວມມືຍຸດທະສາດກັບບຸນກາຣີ
ຖັດຈາກປອກຕຸຍການ, ທ່ານນາຍົກລັດຖະມົນຕີຫວຽດນາມ ຫງວຽນເຕີນຢຸງ ພ້ອມດ້ວຍຄະນະໄດ້ໄປຮອດບຸນກາຣີ. ໂດຍແມ່ນໜຶ່ງໃນ 10 ປະເທດທຳອິດໃນໂລກໄດ້ຮັບຮູ້ ແລະ ສ້າງຕັ້ງການພົວພັນທາງການທູດກັບຫວຽດນາມເມື່ອປີ 1950, ບຸນກາຮີ ຍາມໃດກໍສະຫງວນໃຫ້ຫວຽດນາມ ການຊ່ວຍເຫຼືອທັງທາງດ້ານວັດຖຸ ແລະ ຈິດໃຈໃນພາລະກິດຕໍ່ສູ້ປົດປ່ອຍຊາດ ແລະ ປັກປັກຮັກສາປະເທດຊາດໃນປະຈຸບັນ. ໃນຊຸມປີມໍ່ໆມານີ້, ການພົວພັນຮ່ວມມືດ້ານເສດຖະກິດ-ການຄ້າລະຫວ່າງ ຫວຽດນາມ - ບຸນກາຣີ ໄດ້ຮັບການເປີດກ້ວາງ. ຖ້າວ່າໃນປີ 2006, ມູນຄ່າການແລກປ່ຽນການຄ້າລະຫວ່າງ 2 ປະເທດບັນລຸ 18,5 ລ້ານ USD ນັ້ນ, ໃນປີ 2014, ຕົວເລກນີ້ ໄດ້ຂຶ້ນເຖິງ 90 ລ້ານ USD, ແຕ່ກໍຍັງບໍ່ທັນເທົ່າທຽມກັບຄວາມສາມາດບົ່ມຊ້ອນຂອງ 2 ປະເທດເທື່ອ. ທ່ານເອກອັກຄະລັດຖະທູດຫວຽດນາມປະຈຳ ບຸນກາຣີ ເລດຶກລິວ ຖືວ່າ :
“ ຈຸດໃໝ່ໃນການຢ້ຽມຢາມ ຄັ້ງນີ້, ເພື່ອປະຕິບັດຕາມການຊີ້ນຳຂອງນາຍົກລັດຖະມົນຕີທັງ 2, ບັນດາລັດຖະມົນຕີວ່າການ, ຊ່ວຍວ່າການ, ຂະແໜງການຕ່າງໆຂອງທັງ 2 ຝ່າຍ ຈະພົບປະກັນໂດຍກົງເພື່ອປຶກສາຫາລືເນື້ອໃນການຮ່ວມມືລະອຽດ ເພື່ອຍົກສູງປະສິດທິຜົນບັນດາໂຄງການຮ່ວມມື, ສົ່ງເສີມການລົງທຶນລະຫວ່າງ 2 ປະເທດ…ພ້ອມກັນນັ້ນ ກໍຊອກຮູ້ບັນດາຂໍ້ມູນຂ່າວສານກ່ຽວກັບການຮ່ວມທຸລະກິດທີ່ມີຄວາມສາມາດປະຕິບັດຢ່າງສູງເພື່ອໃຫ້ວິສາຫະກິດ 2 ຝ່າຍສາມາດປະຕິບັດໃນໄລຍະທີ່ຈະເຖິງ”
ໂດຍແມ່ນສະມາຊິກຂອງສະຫະພາບເອີລົບ EU, ທັງປອກຕຸຍການ ແລະ ບຸນກາຣີ ລ້ວນແຕ່ມີສາຍພົວພັນທີ່ເປັນມູນເຊື້ອອັນດີງາມກັບຫວຽດນາມ. ການຢ້ຽມຢາມຢ່າງເປັນທາງການຂອງ ທ່ານນາຍົກລັດຖະມົນຕີຫວຽດນາມ ຫງວຽນເຕີນຢຸງ ຄັ້ງນີ້ ແມ່ນເພື່ອແນໃສ່ຮັດແໜ້ນການພົວພັນມິດຕະພາບທີ່ເປັນມູນເຊື້ອ. ນີ້ກໍແມ່ນໂອກາດເພື່ອໃຫ້ຫວຽດນາມຍູ້ແຮງການຮ່ວມມືດ້ານເສດຖະກິດທີ່ແທດຈິງ ຕ່າງຝ່າຍຕ່າງມີຜົນປະໂຫຍດກັບບັນດາປະເທດໃນສະຫະພັນເສດຖະກິດອາຊີ-ເອີລົບເວົ້າລວມ ແລະ ກັບປອກຕຸຍການ ແລະ ບຸນກາຣີ ເວົ້າສະເພາະ