(vovworld)- ເລື່ອງຖືກຈັດເຂົ້າບັນຊີລາຍຊື່ກຸ່ມປະເທດມີລາຍຮັບປານກາງ ພວມວາງອອກບັນດາສິ່ງທ້າທາຍໃຫຍ່ສຳລັບຫວຽດນາມ. ບົດຮຽນແຫ່ງການພັດທະນາໃນໂລກສະແດງໃຫ້ເຫັນວ່າ: ມີພຽງແຕ່ປະເທດໃດຢືດໝັ້ນການປະຕິຮູບ, ສ້າງລະບອບການເມືອງ ແລະ ຄຸ້ມຄອງເປັນຢ່າງດີ, ຍົກສູງກຳລັງຄວາມສາມາດແກ້ງແຍ້ງເທົ່ານັ້ນ ຈຶ່ງສາມາດຜ່ານຜ່າໄດ້. ສຳລັບຫວຽດນາມ, ລັດຖະບານ ພວມຕັດສິນໃຈປ່ຽນໃຫມ່ຢ່າງແຮງກວ່າ, ນັບທັງຈີນຕະນາການພັດທະນາກໍຄືຄວາມມານະພະຍາຍາມປະຕິຮູບ, ມຸ່ງໄປເຖິງພື້ນຖານເສດຖະກິດແບບຍືນຍົງ, ກວມລວມໃນໄລຍະຈະມາເຖິງ.
ກອງປະຊຸມສຳມະນາ“ການປະຕິຮູບເສດຖະກິດເພື່ອການເຕີບໂຕແບບຍືນຍົງ
photo:internet
|
ໃນສານຕົ້ນປີ, ທ່ານນາຍົກລັດຖະມົນຕີ ຫງວຽນເຕີນຢູງ ໄດ້ເນັ້ນຫນັກວ່າ ເພື່ອຟື້ນຕົວທ່າເຕີບໂຕຢ່າງວ່ອງໄວ ແລະ ພັດທະນາແບບຍືນຍົງ, ແຫລ່ງກຳລັງຫນູນຕົ້ນຕໍ ຕ້ອງເລີ່ມຈາກການປ່ຽນໃຫມ່ລະບອບນະໂຍບາຍ. ສະນັ້ນ ການປະຕິຮູບ ແລະ ສ້າງລະບອບເສດຖະກິດການຕະຫລາດໃຫ້ສົມບູນແບບ ແມ່ນຄຳຮຽກຮ້ອງທີ່ຈຳເປັນ ມີລັກສະນະຍຸດທະສາດຂອງຫວຽດນາມ ໃນໄລຍະປະຈຸບັນ.
ປ່ຽນໃຫມ່ຈີນຕະນາການ ແລະ ວິໄສທັດແຫ່ງການພັດທະນາ
ເລື່ອງຊອກທິດກ້າວເດີນໃຫມ່ເພື່ອກ້າວໄປເຖິງພື້ນຖານເສດຖະກິດແບບຍືນຍົງ, ມີຄວາມກົມກຽວລະຫວ່າງ ສັງຄົມ ແລະ ສະພາບແວດລ້ອມ ບໍ່ພຽງແຕ່ແມ່ນຄຳຮຽກຮ້ອງທີ່ຈຳເປັນເທົ່ານັ້ນ ຫາກຍັງແມ່ນກຳລັງຫນູນສຳຄັນຊຸກຍູ້ວິວັດການຟື້ນຕົວຂອງເສດຖະກິດໂລກກໍຄືຢູ່ແຕ່ລະປະເທດ.
ຫວນຄືນໄລຍະແຫ່ງການພັດທະນາໃນເກືອບ 30 ປີ ນັບແຕ່ເມື່ອຫວຽດນາມ ດຳເນີນກິດຈະການປ່ຽນແປງໃຫມ່, ຄຽງຄູ່ກັບບັນດາຜົນງານທີ່ບັນລຸໄດ້, ຫວຽດນາມ ຍັງຕ້ອງປະເຊີນຫນ້າກັບສິ່ງທ້າທາຍຫລາຍຢ່າງ. ພື້ນຖານເສດຖະກິດພັດທະນາບໍ່ທັນໝັ້ນທ່ຽງ, ຄຸນນະພາບການເຕີບໂຕ, ສະມັດຕະພາບ ແລະ ກຳລັງແກ້ງແຍ້ງຂອງພື້ນຖານເສດຖະກິດຍັງຕຳ່. ເຖິງວ່າ ກຳລັງແຮງງານອຸດົມສົມບູນ ແຕ່ອັດຕາສ່ວນຄົນງານບໍ່ທັນໄດ້ຮຽນວິຊາຊີບຍັງສູງຢູ່. ຊີວິດການເປັນຢູ່ຂອງປະຊາຊົນຈຳນວນຫນຶ່ງຍັງປະສົບກັບຄວາມຫຍຸ້ງຍາກ. ພ້ອມນັ້ນແມ່ນສິ່ງທ້າທາຍກ່ຽວກັບສິ່ງແວດລ້ອມ, ການປ່ຽນແປງຂອງດິນຟ້າອາກາດ. ໂດຍຮັບຮູ້ໄດ້ສິ່ງທ້າທາຍດັ່ງກ່າວ, ໃນຍຸດທະສາດພັດທະນາເສດຖະກິດສັງຄົມໄລຍະ 2011-2020, ຫວຽດນາມ ຢືນຢັນຄວາມຕັດສິນໃຈຍູ້ແຮງກິດຈະການປ່ຽນໃຫມ່ຢ່າງຮອບດ້ານ ດ້ວຍ 3 ຂອດບຸກທະລຸຍຸດທະສາດ, ໃນນັ້ນ ເອົາໃຈໃສ່ເປັນພິເສດເຖິງການສ້າງລະບອບນະໂຍບາຍເສດຖະກິດການຕະຫລາດໃຫ້ສົມບູນແບບ. ສິ່ງດັ່ງກ່າວ ໄດ້ຮັບການຢັ້ງຢືນຈາກທ່ານຮອງນາຍົກລັດຖະມົນຕີ, ທັງເປັນລັດຖະມົນຕີການຕ່າງປະເທດ ຫວຽດນາມ ຟ້າມບີງມີງ ຕໍ່ຫນ້າປະຊາຄົມໂລກ ໃນກອງປະຊຸມສຳມະນາ“ການປະຕິຮູບເສດຖະກິດເພື່ອການເຕີບໂຕແບບຍືນຍົງ ແລະ ກວມລວມ” ຊື່ງຖືກຈັດຂຶ້ນໃນຕົ້ນອາທິດຢູ່ ຮ່າໂນ້ຍ. ທ່ານຟ້າມບີງມີງກ່າວວ່າ:
“ຫວຽດນາມ ຈະຍູ້ແຮງການປະຕິຮູບລະບອບນະໂຍບາຍເສດຖະກິດ, ລັດ ຮັບປະກັນ ການຕະຫລາດສວມບົດບາດສຳຄັນໃນການຈັດແບ່ງແຫ່ຼງກຳລັງ, ພ້ອມທັງມີເຄື່ອງມື ແລະ ນະໂຍບາຍດັດປັບຢ່າງມີປະສິດທິຜົນ ເພື່ອ ຮັບປະກັນຄວາມຍຸຕິທຳ ແລະ ຄວາມກ້າວຫນ້າສັງຄົມ. ຫວຽດນາມ ພວມຕັດສິນໃຈຍູ້ແຮງການປະຕິຮູບ ແລະ ຫັນລັດວິສາຫະກິດເປັນຫຸ້ນສ່ວນ, ນັບທັງບັນດາກຸ່ມບໍລິສັດແຫ່ງລັດ, ສ້າງສະພາບແວດລ້ອມການແກ້ງແຍ້ງຢ່າງສະເຫມີພາບ ແລະ ສະດວກທີ່ສຸດໃຫ້ແກ່ປະຊາຊົນທຸກຄົນ ແລະ ວິສາຫະກິດທີ່ຂຶ້ນກັບທຸກພາກສ່ວນເພື່ອພັດທະນາການຜະລິດດຳເນີນທຸລະກິດ.”
ບັນດາການປະຕິຮູບເສດຖະກິດຢ່າງແຮງຂອງຫວຽດນາມ ພວມໄດ້ຮັບຄວາມສົນໃຈຈາກປະຊາຄົມໂລກ, ບັນດານັກອຸປະຖຳ, ອົງການຈັດຕັ້ງສາກົນ. ໃນການຢ້ຽມຢາມ, ເຮັດວຽກຢູ່ຫວຽດນາມ ໃນເດືອນ 3/2014, ທ່ານນາງ Helen Clack, ຜູ້ອຳນວນການໃຫຍ່ອົງການ ສປຊ ເພື່ອການພັດທະນາ ໄດ້ເນັ້ນຫນັກວ່າ: ຍາມໃດ ຫວຽດນາມກໍແມ່ນປະເທດສຳເລັດຜົນໃນການປະຕິບັດບັນດາເປົ້າໝາຍພັດທະນາສະຫັດສະວັດ ຂອງ ສປຊ ແລະ ບັນລຸການເຕີບໂຕ. ເພື່ອສືບທອດຜົນງານດັ່ງກ່າວ, ການຊອກຫາ, ເລືອກເຟັ້ນບັນດາມາດຕະການປະຕິຮູບຢ່າງເໝາະສົມ ແມ່ນຄຳຮຽກຮ້ອງທີ່ຈຳເປັນຂອງຫວຽດນາມປະຈຸບັນ ແລະ ສປຊ ຕີລາຄາສູງບັນດາການປະຕິຮູບຂອງຫວຽດນາມໃນໄລຍະມໍ່ໆມານີ້. ທ່ານນາງ Helen Clack ຊີ້ແຈ້ງວ່າ:
“ປະເຊີນຫນ້າກັບການພັດທະນາເສດຖະກິດຢ່າງຊັກຊ້າ, ລັດຖະບານຫວຽດນາມ ພວມຕັ້ງຫນ້າສ້າງບັນດາການປະຕິຮູບເສດຖະກິດໄລຍະທີສອງ ເພື່ອຍູ້ແຮງການເຕີບໂຕເສດຖະກິດ ແລະ ຮັບປະກັນສືບຕໍ່ບັນດາຄວາມກ້າວຫນ້າເສດຖະກິດສັງຄົມທີ່ເປັນຫນ້າຮັບຮູ້ໃນສອງທົດສະວັດຜ່ານມາ. ບັນດາຍຸດທະສາດຊຸກຍູ້ການເຕີບໂຕກວມລວມ ແລະ ໝັ້ນຄົງ ຈະແມ່ນສິ່ງສຳຄັນແກ່ການສຳເລັດຜົນຂອງບັນດາການປະຕິຮູບນັ້ນ, ເພື່ອຮັບປະກັນໃຫ້ປະຊາຊົນຫວຽດນາມ ທຸກຄົນ, ໃນປະຈຸບັນ ແລະ ໃນອະນາຄົດ, ໄດ້ຮັບຜົນປະໂຫຍດຈາກການເຕີບໂຕແບບຍືນຍົງ.”
ໃນໂລກທີ່ພວມມີການປ່ຽນແປງຢ່າງວ່ອງໄວ, ບັນດາການຮ່ວມສຳພັນດ້ານເສດຖະກິດຫລາຍຂັ້ນ, ເປັນຕົ້ນແມ່ນສັນຍາເຂດການຄ້າເສລີ (FTA) ສະບັບໃຫມ່ ດ້ວຍຂໍ້ກຳນົດຕ່າງໆ ແລະ ລະດັບເປີດປະຕູການຕະຫລາດຢ່າງເລິກເຊິ່ງ, ກວ້າງຂວາງ ທັງສ້າງການພັດທະນາໃຫມ່, ທັງວາງອອກສິ່ງທ້າທາຍໃຫຍ່ກ່ຽວກັບການປະຕິຮູບພາຍໃນປະເທດເພື່ອດັດປັບໃຫ້ເໝາະສົມ.
ຫວຽດນາມ ພວມກ້າວເຂົ້າສູ່ໄລຍະພັດທະນາທີ່ສຳຄັນ, ຍິ່ງຮຽກຮ້ອງການປ່ຽນໃຫມ່ ແລະ ມີຈີນຕະນາການ ແລະ ຄວາມຕັດສິນໃຈຢ່າງສູງ, ຍູ້ແຮງການປະຕິຮູບ ແລະ ເປັນເຈົ້າການ, ຕັ້ງຫນ້າເຊື່ອມໂຍງເຂົ້າກັບສາກົນ. ບັນດາຄວາມຕັດສິນໃຈປ່ຽນແປງໃຫມ່ຂອງຫວຽດນາມ ພວມໄດ້ຮັບການຕີລາຄາສູງ ແລະ ມີຄວາມເຊື່ອໝັ້ນຈາກຄູ່ຮ່ວມມືສາກົນ. ທີ່ກອງປະຊຸມສຳມະນາ“ການປະຕິຮູບເສດຖະກິດເພື່ອການເຕີບໂຕແບບຍືນຍົງ ແລະ ກວມລວມ”, ທ່ານນາງ Helen ຢືນຢັນວ່າ:
“ຫວຽດນາມ ມີຫລາຍຈຸດແຮງສະເພາະຂອງຕົນ, ໃນນັ້ນ ມີກຳລັງແຮງງານຫນຸ່ມ ແລະ ສາມາແກ້ງແຍ້ງ, ແຫລ່ງຊັບພະຍາກອນທຳມະຊາດອຸດົມສົມບູນ ແລະ ທີ່ຕັ້ງພູມສາດຢູ່ໃຈກາງຂອງພາກພື້ນພັດທະນາຢ່າງຂະຫຍັນຂັນເຄື່ອນ. ດ້ວຍການເລືອກເຟັ້ນນະໂຍບາຍເໝາະສົມ, ແນ່ນອນວ່າ ຫວຽດນາມ ຈະພັດທະນາຢ່າງດີງາມໃນອະນາຄົດ.”
ຄຽງຄູ່ກັບກຳລັງແຮງພາຍໃນ ແລະ ຄວາມມຸ່ງຫວັງບືນຕົວຂຶ້ນຂອງທັງປະເທດ, ບັນດາບົດຮຽນ ແລະ ພຶດຕິກຳທີ່ດີໃນໂລກ, ບັນດາຂໍ້ສະເຫນີກ່ຽວກັບນະໂຍບາຍຈາກປະຊາຄົມໂລກ ຍາມໃດກໍແມ່ນບົດຮຽນອັນລຳ້ຄ່າສຳລັບຫວຽດນາມ, ເພື່ອໃຫ້ຫວຽດນາມ ຜ່ານຜ່າສິ່ງທ້າທາຍ, ເຮັດໃຫ້ວິໄສທັດຮອດປີ 2020 ຈະກາຍເປັນປະເທດອຸດສາຫະກຳຕາມທິດທັນສະໄຫມໃຫ້ປະກົດຜົນເປັນຈິງ.