ຫວ່າງແລ້ວນີ້, ທ່ານນາຍົກລັດຖະມົນຕີຫວຽດນາມ ຫງວຽນເຕີ້ນຢຸງ ຫາກໍເຊັນປະກາດໃຊ້ດຳລັດ 67/2014/ດລ-ລບ ກ່ຽວກັບບາງນະໂຍບາຍພັດທະນາສິນໃນນ້ຳ. ຕາມນັ້ນແລ້ວ, ລັດຖະບານມີຫຼາຍນະໂຍບາຍໜູນຊ່ວຍຊາວປະມົງກ່ຽວກັບການລົງທຶນ, ສິນເຊື່ອ, ການປະກັນໄພ. ນີ້ໄດ້ຮັບຖືວ່າ ແມ່ນປະຖົມປັດໄຈທີ່ສຳຄັນທີ່ສຸດໃນການຂຸດຄົ້ນຄວາມສາມາດບົ່ມຊ້ອນດ້ານເສດຖະກິດທະເລ, ພັດທະນາອາຊີບຫາປາຕາມທິດທັນສະໄໝກໍຄືຊ່ວຍຊາວປະມົງມີຄວາມໝັ້ນໃຈເດີນທະເລ, ປົກປັກຮັກສາອະທິປະໄຕເຂດທະເລ, ຫມູ່ເກາະຂອງປະເທດຊາດ.
ຊາວປະມົງແຂວງແຄ້ງຮ່ວາພວມໄດ້ຮັບການໜູນຊ່ວຍໃຫ້ມີຄວາມໝັ້ນໃຈເດີນທະເລ (ພາບ: baosaigongiaiphong)
|
ດຳລັດສະບັບນີ້ຂອງລັດຖະບານເລ່ັງໃສ່ໜູນຊ່ວຍການເຄື່ອນໄຫວລົງທຶນຍົກລະດັບ, ຕໍ່ກຳປັ່ນຫາປາລຳໃໝ່ ກໍຄືສ້າງກອງກຳປັ່ນບໍລິການຮັບໃຊ້ການປະມົງ, ຮັບໃຊ້ການຂຸດຄົ້ນ, ຫາປາຢູ່ໄກຝັ່ງຢ່າງມີປະສິດທິຜົນກວ່າ. ພ້ອມກັບ ດຳລັດສະບັບນີ້, ການສ້າງຕັ້ງບັນດາໜ່ວຍ, ກຸ່ມຮ່ວມມືຜະລິດການປະມົງ, ສົ່ງເສີມວິສາຫະກິດລົງທຶນເຂົ້າຂົງເຂດການປະມົງ.....ກໍຖືກລັດຖະບານປະກາດໃຊ້ໃນເອກະສານກ່ອນນັ້ນ, ແມ່ນບັນດາເງື່ອນໄຂຢ່າງຄົບຖ້ວນເພື່ອພັດທະນາການປະມົງຢູ່ໄກຝັ່ງ.
ໃຫ້ບຸລິມະສິດໃຫ້ຊາວປະມົງໃນລະດັບສູງສຸດ
ສິ່ງທີ່ໜ້າສົນໃຈໃນດຳລັດ 67 ແມ່ນລັດຖະບານເອົາໃຈໃສ່ເປັນພິເສດເຖິງນະໂນບາຍສິນເຊື່ອບຸລິມະສິດໃຫ້ແກ່ຊາວປະມົງເພື່ອຕໍ່ກຳປັ່ນຫຸ້ມເຫຼັກໃໝ່. ຕາມນັ້ນແລ້ວ, ຖ້າຫາກຕໍ່ກຳປັ່ນຫຸ້ມເຫຼັກໃໝ່ເພື່ອເປັນບໍລິການຮັບໃຊ້ການຂຸດຄົ້ນສິນໃນນ້ຳຢູ່ໄກຝັ່ງ(ມີຍອດຄວາມແຮງເຄື່ອງຈັກ 400 CV ຂຶ້ນໄປ) ຫຼື ຕໍ່ກຳປັ່ນໃໝ່(ມີຍອດຄວາມແຮງເຄື່ອງຈັກ 800 CV ຂຶ້ນໄປ) ເຈົ້າຂອງກຳປັ່ນຈະໄດ້ກູ້ຢືມທຶນຈາກທະນາຄານການຄ້າຢ່າງຫຼາຍສຸດແມ່ນ 95% ຍອດມູນຄ່າລົງທຶນເພື່ອ ຕໍ່ກຳປັ່ນໃໝ່ດ້ວຍຄ່າດອດເບ້ຍ 7%/ປີ; ໃນນັ້ນ, ເຈົ້າຂອງກຳປັ່ນຈາຍຄ່າດອກເບ້ຍພຽງ 1%/ປີເທົ່ານັ້ນ, ລັດຈະໜູນຊ່ວຍງົບປະມານ 6%/ປີ . ເມື່ອຕໍ່ກຳປັ່ນຫຸ້ມເຫຼັກໃໝ່(ມີຍອດຄວາມແຮງເຄື່ອງຈັກ ແຕ່ 400 CV ຫາຕ່ຳກວ່າ 800 CV), ເຈົ້າຂອງກຳປັ່ນຈະໄດ້ກູ້ຢືມທຶນຈາກທະນາຄານການຄ້າຢ່າງຫຼາຍສຸດແມ່ນ 90% ຍອດມູນຄ່າລົງທຶນດ້ວຍຄ່າດອດເບ້ຍ 7%/ປີ, ໃນນັ້ນເຈົ້າຂອງກຳປັ່ນຈາຍຄ່າດອກເບ້ຍພຽງ 2%/ປີເທົ່ານັ້ນ, ລັດຈະໜູນຊ່ວຍງົບປະມານ 5%/ປີ . ພິເສດ, ຄ່າບຳລຸງສ້າງ, ແນະນຳໃຫ້ລູກເຮືອນຳໃຊ້ກຳປັ່ນຫຸ້ມເຫຼັກໃໝ່, ແນະນຳດ້ານເຕັກນິກຂຸດຄົ້ນ, ບູລະນະສ້ອມແປງຕາມໄລຍະໆຈະໄດ້ຮັບການໜູນຊ່ວຍ 100%.
ພ້ອມກັນນັ້ນ, ດຳລັດ 67 ຍັງມີບັນດານະໂຍບາຍກ່ຽວກັບການປະກັນໄພ, ພາສີອາກອນ ແລະ ບັນດານະໂຍບາຍໜູນຊ່ວຍຊາວປະມົງຍົກສູງປະສິດທິຜົນການຜະລິດ, ມີຄວາມໝັ້ນໃຈເດີນທະເລເພື່ອຫາປາ. ລັດຈະໜູນຊ່ວຍ 100% ຄ່າໃຊ້ຈາຍໃຫ້ແກ່ການຊື້ປະກັນໄພໃຫ້ລູກເຮືອແຕ່ລະຄົນ. ພ້ອມກັນນັ້ນ ກໍໜູນຊ່ວຍ ຄ່າໃຊ້ຈາຍໃຫ້ແກ່ການຊື້ປະກັນໄພໃຫ້ເຮືອ, ເຄື່ອງອະປະກອນຮັບໃຊ້ການປະມົງ. ທ່ານ ຟານຮີຮ່ວາງ ຮອງຫົວໜ້າພະແນກກະສີກຳ ແລະ ພັດທະນາຊົນນະບົດແຂວງກວາງງ້າຍ ຖືວ່າ :
ນີ້ແມ່ນແຜນນະໂຍບາຍອັນຖືກຕ້ອງ ແລະ ຕິດແທດຕົວຈິງ. ມີຄວາມຫານກ້າໃຫ້ຊາວປະມົງ ຕໍ່ກຳປັ່ນຫຸ້ມເຫຼັກໃໝ່, ໄປຫາປາຢູ່ໄກຝັ່ງ ກໍແມ່ນການປະກອບສ່ວນ ປົກປັກຮັກສາອະທິປະໄຕເຂດທະເລ, ຫມູ່ເກາະຂອງປະເທດຊາດ. ກຳປັ່ນຫຸ້ມເຫຼັກມີຄວາມປອດໄພ ແລະ ທັນສະໄໝກວ່າຫຼາຍເມືອ່ທຽບໃສ່ກຳປັ່ນໄມ້, ອັນໄດ້ສ້າງບາດກ້າວບຸກທະລຸໃນການສ້າງອາຊີບການປະມົງເປັນທັນສະໄໝ”
ຜັນຂະຫຍາຍ ດຳລັດຂອງລັດຖະບານຢ່າງຄົບຊຸດ ແລະ ມີປະສິດທິຜົນ
ດຳລັດ 67 ຈະມີຜົນບັງຄັບໃຊ້ນັບແຕ່ວັນທີ 25/8 ເປັນຕົ້ນໄປ. ເພື່ອໃຫ້ນະໂຍບາຍພັດທະນາສິນໃນນ້ຳ ແລະ ໂຄງການໜູນຊ່ວຍທີ່ຕິດແທດຕົວຈິງ, ເຂົ້າສູ່ຊີວິດຂອງຊາວປະມົງ, ທ່ານ ຫງວຽນວັນບີງ ຜູ້ວ່າການທະນາຄານແຫ່ງລັດຫວຽດນາມໃຫ້ຮູ້ວ່າ :
“ ພວກຂ້າພະເຈົ້າຢືນຢັນວ່າ ແຫຼ່ງທຶນໃຫ້ຊາວປະມົງກູ້ຢືມໄດ້ກຽມພ້ອມແລ້ວ, ແລະ ອາດຈະປ່ອຍເງິນໃນບໍ່ວ່າເວລາໃດ ພາຍຫຼັງທີ່ມີພື້ນຖານກົດໝາຍຂອງລັດຖະບານ”
ນອກຈາກການສົ່ງເສີມສ້າງຕັ້ງວິສາຫະກິດໜູນຊ່ວຍ ຊາວປະມົງເດີນທະເລຫາປາ ກໍໄດ້ຮັບການດຳເນີນ. ສະຫະພັນໃຫຍ່ແຮງງານຫວຽດນາມ ກໍໄດ້ເປັນຜູ້ຈັດຕັ້ງການເຊື່ອມຕໍ່ລະຫວ່າງ ຊາວປະມົງກັບອຳນາດການປົກຄອງທ້ອງຖິ່ນ ແລະ ວິສາຫະກິດ. ທ່ານ ດັ້ງງອກຕຸ່ງ ປະທານ ສະຫະພັນໃຫຍ່ແຮງງານຫວຽດນາມ ໃຫ້ຮູ້ວ່າ :
“ ກຳປັ່ນຫາປານັບຮ້ອຍລຳຂອງ ຊາວປະມົງ ກໍຕ້ອງມີກຳປັ່ນຮັບໃຊ້ໃຫ້ເດີນຕາມ. ຄາວນັ້ນ, ກຳປັ່ນຮັບໃຊ້ຈະສະໜອງນ້ຳສະອາດ, ນ້ຳມັນ, ວັດຖຸເຄື່ອງຂອງທີ່ຈຳເປັນເພື່ອໃຫ້ຊາວປະມົງເດີນທະເລຫາປາເປັນເວລາດົນນານ. ສິ່ງທີ່ສຳຄັນແມ່ນກຳປັ່ນຮັບໃຊ້ນີ້ ຕ້ອງເກັບຊື້ສິນໃນນ້ຳໂດຍຊາວປະມົງຈັບຫາໄດ້ ແລະ ແນະນຳໃຫ້ຂາວປະມົງກ່ຽວກັບເຕັກນິກ ເພື່ອຮັບປະກັນທາງດ້ານຄຸນນະພາບ ກໍຄືປະລິມານຂຸດຄົ້ນ”
ລັດຖະບານໄດ້ມີຫຼາຍນະໂຍບາຍໜູນຊ່ວຍຊາວປະມົງດ້ວຍຫຼາຍຮູບການ, ພ້ອມກັບນະໂຍບາຍເຫຼົ່ານີ້, ເລື່ອງປະກາດໃຊ້ດຳລັດ 67 ຈະສ້າງກອບກົດໝາຍເປັນເອກະພາບ, ສ້າງເງື່ອນໄຂສະດວກທີ່ສຸດເພື່ອໜູນຊ່ວຍຊາວປະມົງສ້າງຄວາມຮັ່ງມີຈາກທະເລ, ປົກປັກຮັກສາອະທິປະໄຕເຂດທະເລ, ຫມູ່ເກາະຂອງປະເທດຊາດ.