(vovworld)- ລັດຖະທຳມະນູນ ສສ ຫວຽດນາມ ມີຜົນສັກສິດຢ່າງເປັນທາງການນັບແຕ່ວັນທີ 1/1/2014 ເປັນຕົ້ນໄປ. ມາຮອດປະຈຸບັນ, ບັນດາກະຊວງ, ຂະແຫນງການ ແລະ ທ້ອງຖິ່ນຕ່າງໆ ໄດ້ຜັນຂະຫຍາຍບັນດາການເຄື່ອນໄຫວຢ່າງລະອຽດ ແລະ ແທດຈິງ ເພື່ອປະຕິບັດບັນດາເນື້ອໃນພື້ນຖານຂອງກົດໝາຍຕົ້ນສະບັບ.
ກະຊວງຕຳຫລວດ ຜັນຂະຫຍາຍການປະຕິບັດລັດຖະທຳມະນູນ
|
ຄວາມຮຽກຮ້ອງຕ້ອງການທີ່ວາງອອກສຳລັບການຈັດຕັ້ງຜັນຂະຫຍາຍປະຕິບັດລັດຖະທຳມະນູນ ນັ້ນແມ່ນຕ້ອງຄົບຊຸດ, ເປັນເອກະພາບ ແລະ ມີປະສິດທິຜົນ. ບົນເນື້ອໃນຈິດໃຈດັ່ງກ່າວ, ນັບແຕ່ຕົ້ນປີມາຮອດປະຈຸບັນ, ບັນດາກະຊວງ, ຂະແຫນງ ແລະ ທ້ອງຖິ່ນຕ່າງໆ ໄດ້ມີແຜນການລະອຽດ, ສຸມໃສ່ໂຄສະນາບັນດາເນື້ອໃນທີ່ພົ້ນເດັ່ນຂອງລັດຖະທຳມະນູນ, ກວດກາຄືນບັນດາເອກະສານນິຕິກຳ, ຝືກອົບຮົມໃຫ້ແກ່ຖັນແຖວພະນັກງານກົດໝາຍຢ່າງເລິກເຊິ່ງ.
ຫນ້າທີ່ຈຸດສຸມໃນປີຂອງກະຊວງ, ຂະແຫນງການ ແລະ ທ້ອງຖິ່ນ.
ການຜັນຂະຫຍາຍນຳລັດຖະທຳມະນູນເຂົ້າສູ່ຊີວິດຕົວຈິງໄດ້ກຳນົດວ່າແມ່ນຫນຶ່ງໃນບັນດາຫນ້າທີ່ສຳຄັນຕົ້ນຕໍຂອງກົງຈັກບໍລິຫານແຫ່ງລັດ. ຕົ້ນເດືອນ 3/2014, ທີ່ກະຊວງຍຸຕິທຳ, ອົງການຄຸ້ມຄອງລັດກ່ຽວກັບວຽກງານສ້າງ ແລະ ປະຕິບັດກົດໝາຍ ຈະຈັດຕັ້ງກອງປະຊຸມໂດຍກົງຜ່ານເຄືອຂ່າຍອິນເຕີແນດ ເພື່ອແນະນຳ, ເຜີຍແຜ່ບັນດາເນື້ອໃນພື້ນຖານຂອງລັດຖະທຳມະນູນໃຫ້ແກ່ຖັນແຖວຜູ້ລາຍງານ, ໂຄສະນາດ້ານກົດໝາຍຂອງບັນດາກະຊວງ, ອົງການທຽບເທົ່າກະຊວງ ແລະ ຄະນະກຳມະການປະຊາຊົນຂັ້ນແຂວງ. ຕໍ່ຈາກນັ້ນ ແມ່ນຝືກອົບຮົມໂດຍລົງເລິກກ່ຽວກັບເນື້ອໃນຂອງລັດຖະທຳມະນູນໃຫ້ແກ່ພະນັກງານການນຳ, ບໍລິຫານຂອງກະຊວງຍຸຕິທຳ, ການນຳຫົວຫນ້າພາກສ່ວນກົດໝາຍຂອງບັນດາກະຊວງ, ຂະແຫນງການ. ແລະ ໃນປີ 2014, ກະຊວງຍຸຕິທຳຈະຜັນຂະຫຍາຍການເສັງ“ຊອກຮູ້ລັດຖະທຳມະນູນ ສສ ຫວຽດນາມ” ແນໃສ່ຍົກສູງຄວາມຮັບຮູ້ຂອງປະຊາຊົນກ່ຽວກັບເນື້ອໃນ ແລະ ຄວາມໝາຍຂອງກົດໝາຍຕົ້ນສະບັບ ດັ່ງກ່າວ. ໄປຄຽງຄູ່ກັນນັ້ນ ຈະຈັດກອງປະຊຸມສຳມະນາ ຄົ້ນຄ້ວາ, ວິຈານດ້ານວິທະຍາສາດກ່ຽວກັບ ລັດຖະທຳມະນູນ ຫລາຍຄັ້ງ ໂດຍມີການເຂົ້າຮ່ວມຂອງບັນດາຜູ້ຊ່ຽວຊານ, ນັກວິທະຍາສາດ.
ໂດຍແມ່ນອົງການຕຸລາການ, ມີຫນ້າທີ່ປະຕິບັດ ແລະ ກວດກາເລື່ອງປະຕິບັດ ລັດຖະທຳມະນູນ, ອົງການໄອຍະການປະຊາຊົນສູງສຸດ ພວມຜັນຂະຫຍາຍການເຄື່ອນໄຫວຫລາຍຢ່າງເພື່ອປະຕິບັດຫນ້າທີ່ສຳຄັນນີ້, ທ່ານ ຫງວຽນຮວາບີງ, ຫົວຫນ້າອົງການໄອຍະການປະຊາຊົນສູງສຸດໃຫ້ຮູ້ວ່າ:
“ພວກຂ້າພະເຈົ້າຜັນຂະຫຍາຍກ່ຽວກັບເນື້ອໃນໃຫມ່ຂອງ ລັດຖະທຳມະນູນ ເຖິງພະນັກງານ, ລັດຖະກອນທັງໝົດໃນທົ່ວຂະແຫນງ. ການນຳຂະແຫນງໄດ້ກຳນົດວ່າ ນີ້ແມ່ນວິວັດທະນາການຊອກຮູ້, ຄົ້ນຄ້ວາ ພາຍໃຕ້ຫລາຍຮູບການແຕກຕ່າງກັນ, ນັບທັງການຄົ້ນຄ້ວາດ້ວຍຕົນເອງຂອງພະນັກງານແຕ່ລະຄົນ. ສຳລັບການສ້າງເອກະສານດ້ານກົດໝາຍໃຫ້ສອດຄ່ອງກັບ ລັດຖະທຳມະນູນ, ອົງການໄອຍະການເປັນເຈົ້າພາບຮຽບຮຽງປະມວນກົດໝາຍສຳຄັນ 2 ສະບັບ ນັ້ນແມ່ນກົດໝາຍວ່າດ້ວຍການດຳເນີນຄະດີອາຍາ ແລະ ກົດໝາຍວ່າດ້ວຍອົງການໄອຍະການ. ປະຈຸບັນ ພວກຂ້າພະເຈົ້າໄດ້ແນະນຳຮ່າງກົດໝາຍນີ້ທາງອິນເຕີແນດແລ້ວ ເພື່ອຮັບເອົາຄຳເຫັນຈາກປະຊາຊົນ.”
ໃນຂະນະນັ້ນ, ຢູ່ຫລາຍທ້ອງຖິ່ນ, ແຂວງ ແລະ ນະຄອນຕ່າງໆໄດ້ປະກາດໃຊ້ແຜນການຜັນຂະຫຍາຍການປະຕິບັດ ລັດຖະທຳມະນູນ, ຈັດຕັ້ງບັນດາກອງປະຊຸມໂດຍກົງຜ່ານເຄືອຄ່າຍອິນເຕີແນັດ ເພື່ອເຜີຍແຜ່ເນື້ອໃນ ລັດຖະທຳມະນູນ.
ຢູ່ແຂວງ ທາຍບີ່ງ, ບັນດາອົງການ, ຫົວຫນ່ວຍຕ່າງໆໃນແຂວງ ໄດ້ດຳເນີນການກວດກາຄືນບັນດາເອກະສານດ້ານກົດໝາຍທີ່ໄດ້ປະກາດໃຊ້ຢ່າງຮອບດ້ານ ແລະ ຄົບຊຸດ. ສ່ວນຢູ່ ແຂວງ ກວ໋າງນາມ, ນອກຈາກຈັດກອງປະຊຸມຂັ້ນແຂວງແລ້ວ, ອົງການປະຈຳສະພາປະຊາຊົນ ໄດ້ສົມທົບກັນຈັດຕັ້ງກອງປະຊຸມ 18 ຄັ້ງຢູ່ບັນດາທ້ອງຖິ່ນ ເພື່ອຜັນຂະຫຍາຍເຮັດໃຫ້ພະນັກງານຫລັກແຫລ່ງແລະ ຜູ້ລາຍງານຂັ້ນເມືອງຊາບຊືມເນື້ອໃນ ລັດຖະທຳມະນູນ 2013.
ຄວາມສະດວກແລະສິ່ງທ້າທາຍເມື່ອຜັນຂະຫຍາຍການປະຕິບັດລັດຖະທຳມະນູນ
ການຜັນຂະຫຍາຍປະຕິບັດ ລັດຖະທຳມະນູນ ແມ່ນວຽກງານໃຫຍ່ຫລວງ. ໃນວິວັດທະນາການນີ້, ຫວຽດນາມ ຕ້ອງປະເຊີນຫນ້າກັບສິ່ງທ້າທາຍບໍ່ແມ່ນຫນ້ອຍ, ໃນນັ້ນ ຕ້ອງເວົ້າເຖິງສະຕິຮູ້ສຶກໃນການປະຕິບັດກົດໝາຍຂອງປະຊາຊົນບໍ່ທັນສູງ. ລະບົບກົດໝາຍຍັງມີຂໍ້ຂາດຕົກບົກຜ່ອງ, ຄວນໄດ້ຮັບການປັບປຸງຢ່າງແຮງ. ຄຽງຄູ່ກັນນັ້ນ, ສະພາບການໂລກ, ພາກພື້ນມີການຜັນແປຢ່າງສັບສົນ, ກໍ່ຄວາມຫຍຸ້ງຍາກຫລາຍຢ່າງໃນວິວັດທະນາການທີ່ຫວຽດນາມ ປະຕິບັດບັນດາເນື້ອໃນໃຫມ່ຂອງ ລັດຖະທຳມະນູນ. ເຖິງຢ່າງໃດກໍຕາມ, ພາຍຫລັງ 2 ເດືອນນັບແຕ່ເມື່ອ ລັດຖະທຳມະນູນ ມີຜົນສັກສິດ, ແລະ ໂດຍມີການເຂົ້າຮ່ວມຢ່າງຕັ້ງຫນ້າຂອງບັນດາກະຊວງ, ຂະແຫນງການ ແລະ ທ້ອງຖິ່ນ ກົດໝາຍຕົ້ນສະບັບນີ້ໄດ້ຮັບການປະຕິບັດຢ່າງຮອບດ້ານສົມຄວນ. ທ່ານ ເລມີງທົງ, ຮອງຫົວຫນ້າກຳມາທິການກົດໝາຍຂອງສະພາແຫ່ງຊາດໄດ້ໃຫ້ຂໍ້ສັງເກດວ່າ:
“ຄວາມສະດວກທີ່ສຸດ ແມ່ນ ລັດຖະທຳມະນູນສະບັບນີ້ໄດ້ຮັບການສະຫນັບສະຫນູນ ແລະ ມີຄວາມເຊື່ອໝັ້ນຈາກປະຊາຊົນທຸກຊັ້ນວັນນະ. ຄວາມເຫັນດີເຫັນພ້ອມຂອງສັງຄົມແມ່ນສິ່ງສະດວກທີ່ສຸດໃນການຜັນຂະຫຍາຍ. ທີ 2 ຄວາມຕັດສິນໃຈດ້ານການເມືອງຂອງບັນດາການນຳລັດ, ຄວາມຮັບຜິດຊອບດ້ານການເມືອງ, ຂອງບັນດາອົງການລັດຕໍ່ສັງຄົມກ່ຽວກັບການຜັນຂະຫຍາຍປະຕິບັດ ລັດຖະທຳມະນູນ ຢ່າງເຂັ້ມງວດ. ເພາະສະນັ້ນ ນັບແຕ່ຕົ້ນປີ, ໃນລາຍການ, ແຜນການເຄື່ອນໄຫວຂອງທຸກອົງການ, ກະຊວງ, ຂະແຫນງການ, ທ້ອງຖິ່ນ, ຫນ້າທີ່ຜັນຂະຫຍາຍ ລັດຖະທຳມະນູນ ໄດ້ຮັບຖືວ່າ ແມ່ນຫນຶ່ງໃນບັນດາຫນ້າທີ່ຈຸດສຸມຕົ້ນຕໍ.”
ທ່ານປະທານສະພາແຫ່ງຊາດ ຫງວຽນຊີງຮຸ່ງ ໄດ້ເນັ້ນຫນັກຢ່າງແຮງເຖິງຫນ້າທີ່ສຳຄັນ ພາຍຫລັງຮັບຮອງເອົາ ລັດຖະທຳມະນູນ ຕ້ອງຮັບປະກັນບັນດາເນື້ອໃນຂອງ ລັດຖະທຳມະນູນ ເຂົ້າສູ່ຊີວິດ. ບັນດາວຽກງານເຊິ່ງບັນດາກະຊວງ, ຂະແຫນງ, ທ້ອງຖິ່ນຕ່າງໆພວມຮີບເຮັ່ງດຳເນີນເພື່ອປະຕິບັດລັດຖະທຳມະນູນນັ້ນ ຈະກອບສ່ວນຢ່າງຕັ້ງຫນ້າເຂົ້າໃນການພັດທະນາຢ່າງຮອບດ້ານ ແລະ ໝັ້ນຄົງຂອງປະເທດຊາດໃນໄລຍະໃຫມ່.