(vovworld)- ປີ 2013 ໄດ້ຜ່ານໄປດ້ວຍການສົ່ງອອກແຮງງານສຳເລັດລື່ນກາຍລະດັບຄາດໝາຍທີ່ວາງອອກ, ແມ່ນສົ່ງຄົນງານໄດ້ 88.155 ຄົນໄປເຮັດວຽກຢູ່ຕ່າງປະເທດ. ກ້າວເຂົ້າສູ່ປີ 2014, ເປີດຫລາຍກາລະໂອກາດໃຫມ່ໃຫ້ແກ່ຄົນງານ ຫວຽດນາມ.
ຫວຽດນາມ ສູ້ຊົນບັນລຸຄາດໝາຍສົ່ງອອກຄົນປະມານ 85.000-90.000 ຄົນໄປເຮັດວຽກຢູ່ຕ່າງປະເທດໃນປີ 2014 ນີ້
photo:internet
|
ເຖິງວ່າຍັງປະສົບກັບຄວາມຫຍຸ້ງຍາກຫລາຍຢ່າງກໍຕາມ ແຕ່ການສົ່ງອອກແຮງງານຍັງມີບັນດາແງ່ຫວັງອັນຕັ້ງຫນ້າ ດ້ວຍເລື່ອງ ສເກົາຫລີ ເປີດປະຕູຄືນໃຫມ່ສຳລັບແຮງງານຫວຽດນາມ. ພ້ອມກັນນັ້ນ, ມີຕະຫລາດອື່ນຫລາຍແຫ່ງກໍເລີ່ມຮັບເອົາຄົນງານຫວຽດນາມ ທີ່ມີລະດັບຄວາມຮູ້ ມາເຮັດວຽກ.
ມີຄົນງານຫວຽດນາມ ເກືອບ 16.000 ຄົນມີກາລະໂອກາດໄປເຮັດວຽກຢູ່ ສເກົາຫລີ
ໃນຊຸມມື້ຕົ້ນເດືອນ 1/2014 ແມ່ນຊຸມມື້ທີ່ຂະແຫນງສົ່ງອອກແຮງງານຕັ້ງຄວາມຫວັງທີ່ສຸດ. ບົດບັນທຶກຊ່ວຍຈຳສະບັບພິເສດລະຫວ່າງກະຊວງແຮງງານ ທະຫານເສຍອົງຄະ ແລະ ສັງຄົມ ຫວຽດນາມ ກັບກະຊວງວຽກເຮັດງານທຳ ແລະ ແຮງງານ ສເກົາຫລີ ມີເວລາກຳນົດພຽງ 1 ປີ ແຕ່ເລື່ອງລົງນາມດັ່ງກ່າວໄດ້ນຳມາເຊິ່ງຄວາມເບີກບານມ່ວນຊື່ນໃຫ້ແກ່ຄົນງານເກືອບ 16.000 ຄົນ. ທ່ານ ຫງວຽນງອກກີງ(Nguyen Ngoc Quynh), ຫົວຫນ້າກົມຄຸ້ມຄ້ອງແຮງງານຢູ່ຕ່າງປະເທດ ໃຫ້ຮູ້ວ່າ:
“ສະເພາະຕະຫລາດ ສເກົາຫລີ, ທ່ານນາຍົກລັດຖະມົນຕີ ໄດ້ມີຂໍ້ຕົກລົງກ່ຽວກັບການປະຕິບັດທົດລອງການຈຳເງິນສຳລັບຄົນງານກ່ອນທີ່ໄປເຮັດວຽກຢູ່ຕ່າງປະເທດ ແລະ ບັນດາມາດຕະການທັງໝົດເຫລົ່ານັ້ນ ປະຈຸບັນ ພວມໄດ້ຮັບການປະຕິບັດ. ຫວ່າງແລ້ວນີ້, ພວກເຮົາບັນລຸໄດ້ບັນດາໝາກຜົນທີ່ີແນ່ນອນ. ອັດຕາຄົນງານທີ່ໝົດກຳນົດເວລາໃນສັນຍາແຮງງານເຮັດວຽກຢູ່ ສເກົາຫລີ ທີ່ບໍ່ກັບເມືອປະເທດ ໄດ້ຫລຸດລົງພໍສົມຄວນ ແລະ ພວມມີທ່າອ່ຽງຫລຸດລົງອີກ. ຂ້າພະເຈົ້າເຊື່ອໝັ້ນວ່າ ໃນປີ 2014, ພວກເຮົາສາມາດເຊື່ອມຕໍ່ຂໍ້ຕົກລົງກັບ ສເກົາຫລີ ເພື່ອສືບຕໍ່ສົ່ງຄົນງານໃຫມ່ໄປເຮັດວຽກຢູ່ ສເກົາຫລີ.”
ຕາມທ່ານ ຫງວຽນງອກກີງ ແລ້ວ, ຍ້ອນເວລາຢຸດຕິສົ່ງຄົນງານໄປເຮັດວຽກຢູ່ ສເກົາຫລີ ແມ່ນຍາວນານ ສະນັ້ນ ເພື່ອຫນູນຊ່ວຍຄົນງານຝືກຫັດພາສາ ສເກົາຫລີ ຄືນໃຫມ່, ກະຊວງແຮງງານ, ທະຫານເສຍອົງຄະ ແລະ ສັງຄົມຫວຽດນາມ ພວມວາງແຜນມອບໃຫ້ສູນແຮງງານຕ່າງະເທດ ເປີດຊຸດຮຽນ ພາສາ ສເກົາຫລີ ແລະ ບັນດາຄວາມຮູ້ທີ່ຈຳເປັນໃຫ້ແກ່ຄົນງານ. ສະເພາະ ຄົນງານຢູ່ເມືອງທຸກຍາກ ກວ່າ 2.700 ຄົນ ຂຶ້ນກັບເມືອງທຸກຍາກໄດ້ຈົດທະບຽນເສັງພາສາ ສເກົາຫລີ ເພື່ອໄປເຮັດວຽກຢູ່ປະເທດນີ້ ໃນຂົງເຂດກະສິກຳ ຈະໄດ້ຮັບການຫນູນຊ່ວຍເພື່ອຮຽນພາສາ ສເກົາຫລີ ຄືນໃຫມ່ຕາມຂໍ້ຕົກລົງເລກທີ 71 ຂອງນາຍົກລັດຖະມົນຕີ.
ມີກາລະໂອກາດອື່ນຫລາຍຢ່າງ
ກ່ຽວກັບຕະຫລາດແຮງງານ, ໃນປີ 2014 ມີຕະຫລາດແຮງງານເດີມຈຳນວນຫນຶ່ງຄື: ຍີ່ປຸ່ນ, ໄຕ້ຫວັນ, ມາເລເຊຍ ສືບຕໍ່ຕ້ອງການຄົນງານຕ່າງປະເທດເປັນຈຳນວນຫລາຍ, ໃນນັ້ນ ມີຄົນງານຫວຽດນາມ. ທ່ານ ດາວກົງຫາຍ, ຮອງຫົວຫນ້າກົມຄຸ້ມຄອງແຮງງານຕ່າງປະເທດ ໄດ້ໃຫ້ຂໍ້ສັງເກດວ່າ:
“ພວກເຮົາສືບຕໍ່ສຸມໃສ່ເຂົ້າ 4 ຕະຫລາດແຮງງານເດີມ.ທີຫນຶ່ງ ແມ່ນ ມາເລເຊຍ ພວກຂ້າພະເຈົ້າຈະຊີ້ນຳຢ່າງຂ້ຽວຂາດໃນປີນີ້ເພື່ອສົ່ງຄົນງານປະມານ 15.000- 20.000 ໄປເຮັດວຽກຢູ່ປະເທດນີ້. ທີສອງ ຕະຫລາດໄຕ້ຫວັນ ໃນປີ 2013 ສົ່ງຄົນງານໄປເຮັດວຽກຢູ່ປະເທດນີ້ບັນລຸລະດັບສະຖິຕິ 43.000 ຄົນ, ປີນີ້ພະຍາຍາມຮັກສາລະດັບນີ້ຫລືບັນລຸລະດັບສູງກວ່າໃນປີ 2014. ທີສາມ, ຕະຫລາດຍີ່ປຸ່ນ ແມ່ນສົ່ງຄົນງານໄປຮຽນຢູ່ປະເທດນີ້ໄດ້ 10.000 ຄົນ. ພິເສດ ຕະຫລາດ ສເກົາຫລີ ໄດ້ເປີດປະຕູແລ້ວ, ຫວັງວ່າ ຈະສົ່ງແຮງງານໄດ້ 10.000-12.000 ຄົນ.ນອກນັ້ນ ຕາເວັນອອກກາງ ແລະ ອາຟຼິກາເຫນືອ ກໍແມ່ນບັນດາຕະຫລາດດຶງດູດແຮງງານຕ່າງປະເທດເປັນຈຳນວນຫລາຍ. ໃນປີຫນຶ່ງ,ແຕ່ລະປະເທດຢູ່ຕາເວັນອອກກາງ ອາດຈະຕ້ອງການຄົນງານເຖິງ 100.000 ຄົນທ່ີເຮັດວຽກໃນຂົງເຂດກໍ່ສ້າງ, ສະນັ້ນ ຫວຽດນາມ ກໍ່ສາມາດສົ່ງຄົນງານ 10.000 ຄົນໄປເຮັດວຽກຢູ່ປະເທດນີ້ໄດ້.”
ຄຽງຄູ່ກັນນັ້ນ ມີຕະຫລາດທີ່ຕ້ອງການຄຸນນະພາບສູງຫລາຍແຫ່ງ ໄດ້ເປີດປະຕູຮັບຄົນງານຫວຽດນາມທີ່ມີລະດັບຄວາມຮູ້. ບັນດາໂຄງການສົ່ງພະຍາບານໄປເຮັດວຽກຢູ່ ເຢຍລະມັນ ແລະ ຍີ່ປຸ່ນ ພວມໄດ້ຮັບການຜັນຂະຫຍາຍຢ່າງສະດວກ. ເຖິງວ່າ ຈຳນວນຄົນງານໃນຂົງເຂດນີ້ບໍ່ຫລາຍກໍຕາມ ແຕ່ໄດ້ສ້າງທ່ວງທ່າເພື່ອເປີດກວ້າງຕະຫລາດສ່ົງອອກແຮງງານທີ່ມີລະດັບຄວາມຮູ້ສູງ, ລາຍຮັບສູງພໍສົມຄວນຢູ່ບັນດາປະເທດພັດທະນາ. ຫວຽດນາມ ມີຄວາມສະດວກຫລາຍຢ່າງສຳລັບການສົ່ງແຮງງານໃນຂົງເຂດກໍ່ສ້າງ ແລະ ບໍລິການ ໄປເຮັດວຽກຢູ່ຕາເວັນອອກກາງ ເພາະວ່າ ເສດຖະກິດຢູ່ພາກພື້ນນີ້ ພວມຄ່ອຍໆຟື້ນຕົວ ສະນັ້ນ ຄວາມຕ້ອງການກ່ຽວກັບແຮງງານມາຈາກຫວຽດນາມ ຈະເພີ່ມຂຶ້ນ.
ປີ 2014 ໄດ້ຮັບການຄາດຄະເນວ່າ ແມ່ນສະພາບເສດຖະກິດຍັງປະສົບກັບຄວາມຫຍຸ້ງຍາກ, ມີວິສາຫະກິດຫລາຍແຫ່ງພວມຕົກເຂົ້າສູ່ສະພາບລົ້ມລະລາຍ, ຈຳນວນຄົນງານຖືກວ່າງງານເພີ່ມຂຶ້ນ ສະນັ້ນ ການສົ່ງອອກແຮງງານ ແມ່ນສວມບົດບາດສຳຄັນໃນການຮັກສາເສດຖະກິດສັງຄົມເປັນປົກກະຕິ ກໍຄືການລົບລ້າງ ຄວາມອຶດຫິວ ຫລຸດຜ່ອນຄວາມທຸກຍາກ. ບັນດາຂະແຫນງການກ່ຽວຂ້ອງຂອງຫວຽດນາມ ສູ້ຊົນບັນລຸຄາດໝາຍສົ່ງອອກຄົນປະມານ 85.000-90.000 ຄົນໄປເຮັດວຽກຢູ່ຕ່າງປະເທດໃນປີ 2014 ນີ້.