ກອງປະຊຸມສະມັດຊາໃຫຍ່ສະຫະພັນລັດຖະສະພາສາກົນຄັ້ງທີ 132 (IPU 132) ຫາກໍອັດລົງຢູ່ນະຄອນຫຼວງຮ່າໂນ້ຍ. ຜົນສຳເລັດດີງາມທີ່ສຸດຂອງ IPU 132 ຊຶ່ງຖືກຈັດຂຶ້ນຢູ່ຮ່າໂນ້ຍເປັນຄັ້ງທຳອິດ, ນັ້ນແມ່ນ IPU 132 ໄດ້ຮັບຮອງເອົາຖະແຫຼງການຮ່າໂນ້ຍ. ນີ້ແມ່ນເອກະສານທີ່ສຳຄັນ ສະແດງໃຫ້ເຫັນວິໄສທັດຂອງບັນດາລັດຖະສະພາພາຄີ IPU , ປະກອບສ່ວນເຂົ້າໃນການວາງນະໂຍບາຍ ແລະ ເປົ້າໝາຍພັດທະນາແບບຍືນຍົງຂອງ ສ.ປ.ຊ ພາຍຫຼັງປີ 2015.
ທ່ານປະທານສະພາແຫ່ງຊາດຫວຽດນາມ ຫງວຽນຊິງຮຸ່ງ ປະທານກອງປະຊຸມ IPU 132 ຕອບສຳພາດນັກຂ່າວທີ່ການປະຊຸມຂ່າວ |
ຖະແຫຼງການຮ່າໂນ້ຍຢືນຢັນເຈດຈຳນົງທີ່ແຂງແຮງຂອງ IPU ຊຶ່ງຖືເອົາປະຊາຊົນເປັນໃຈກາງ, ອີງໃສ່ການປະຕິບັດທຸກໆສິດທິມະນຸດ, ໝັ້ນໝາຍຊຸກຍູ້ບົດບາດແຫ່ງຊາດໃນການປະຕິບັດບັນດາ ເປົ້າໝາຍພັດທະນາແບບຍືນຍົງ.
ຖະແຫຼງການຮ່າໂນ້ຍຖືກຍັກອອກມາໃນສະພາວະໂລກພວມສະຫຼຸບການປະຕິບັດບັນດາເປົ້າໝາຍສະຫັດສະວັດ ແລະ ກະກຽມຕົກລົງກ່ຽວກັບໂຄງການພັດທະນາໃໝ່ພາຍຫຼັງປີ 2015, ຊຶ່ງຄາດວ່າຈະຖືກສົ່ງເຖິງກອງປະຊຸມສຸດຍອດສະມັດຊາໃຫຍ່ສະຫະປະຊາຊາດຊຶ່ວຈະຖືກດຳເນີນໃນເດືອນ 9 ທີ່ຈະມາເຖິງ, ເພື່ອເປັນພື້ນຖານໃຫ້ແກ່ການນຳສະເໜີບັນດາ ເປົ້າໝາຍພັດທະນາແບບຍືນຍົງໃໝ່ຂອງປະຊາຄົມໂລກ.
ຄຳເວົ້າຕ້ອງໄປຄຽງຄູ່ກັບການກະທຳ
ອາດຈະຢືນຢັນວ່າ ຖະແຫຼງການຮ່າໂນ້ຍເປັນຂີດໝາຍທ່າອຽງໃໝ່ໃນການເຄື່ອນໄຫວຂອງ IPU , ນັ້ນແມ່ນເອົາໃຈໃສ່ເຖິງການຊອກຫາບັນດາວິທີການແກ້ໄຂທີ່ມີປະສິດທິຜົນທີ່ສຸດເພື່ອຫັນບັນດາຄຳໝັ້ນສັນຍາເປັນການກະທຳລະອຽດ. ສິ່ງດັ່ງກ່າວໄດ້ຮັບການຢັ້ງຢືນຈາກປະທານອົງການ IPU . ຖ້າວ່າ ກ່ອນນີ້ກອງປະຊຸມ IPU ຄັ້ງຕ່າງໆພຽງແຕ່ຮັບຮອງເອົາມະຕິຫຼືຮັບຮອງເອົາຖະແຫຼງການກ່ຽວກັບບັນຫາຕ່າງໆທີ່ບໍ່ມີລັກສະນະທົ່ວໂລກຄືບັນດາ ເປົ້າໝາຍພັດທະນາແບບຍືນຍົງນັ້ນ, ເປັນຄັ້ງທຳອິດໄດ້ພິຈາລະນາ ແລະ ຮັບຮອງເອົາ ຖະແຫຼງການຮ່າໂນ້ຍຢູ່ຫວຽດນາມ.ທ່ານປະທານສະຫະພັນລັດຖະສະພາສາກົນSaberໃຫ້ຮູ້ວ່າ:
“ ໃນກອງປະຊຸມ IPU ຄັ້ງກ່ອນໆ, ພວກຂ້າພະເຈົ້າພຽງແຕ່ເວົ້າເຖິງບັນຫາ ແລະ ແຜນການປະສານສົມທົບເທົ່ານັ້ນ. ແຕ່ໃນກອງປະຊຸມ IPU ຄັ້ງນີ້ ຢູ່ຮ່າໂນ້ຍແມ່ນວິທີສຳພັດໃໝ່, ທ່າອຽງໃໝ່, ເລັ່ງໃສ່ວິທີການແກ້ໄຂປະຕິບັດ, ຫາກບໍ່ພຽງແຕ່ຍົກອອກບັນຫາເທົ່ານັ້ນ. ຍົກຕົວຢ່າງຄື IPU 132 ຮັບຮອງເອົາມະຕິກ່ຽວກັບສະພາວະສຸກເສີນຫຼືກອງປະຊຸມກ່ຽວກັບບັນດາ ເປົ້າໝາຍພັດທະນາແບບຍືນຍົງ, ຫັນຄຳເວົ້າເປັນການກະທຳ, ເພື່ອເປົ້າໝາຍພັດທະນາຮັບໃຊ້ປະຊາຊົນ. ຂ້າພະເຈົ້າຖືວ່າ ຖະແຫຼງການຮ່າໂນ້ຍເປັນຂີດໝາຍການປ່ຽນແປງກ່ຽວກັບລະດັບຄວາມຮັບຮູ້, ແມ່ນມໍລະດົກຂອງ IPU , ແມ່ນການປະກອບສ່ວນຂອງຫວຽດນາມໃຫ້ທົ່ວໂລກ ”
ຄວາມຈິງໃນຕະຫຼອດກອງປະຊຸມ, “ບັນດາເປົ້າໝາຍພັດທະນາແບບຍືນຍົງ- ຫັນຄຳເວົ້າເປັນການກະທຳ” ຫົວຂໍ້ໂດຍຫວຽດນາມນຳສະເໜີແມ່ນຫົວເລື່ອງທະລຸລົງ, ເປັນຮູບປະທຳໃຫ້ແກ່ບັນດາການປຶກສາຫາລືຂອງ IPU . ການພັດທະນາແບບຍືນຍົງແມ່ນຄວາມຫວັງຂອງທຸກໆປະເທດຊາດ, ແຕ່ວ່າແຕ່ລະປະເທດບໍ່ສາມາດພັດທະນາຢ່າງຈະເລີນຮຸ່ງເຮືອງໄດ້ ຖ້າຫາກບໍ່ສາມາດແກ້ໄຂໄດ້ບັນດາສິ່ງທ້າທາຍຄື ຄວາມອຶດຫິວ, ທຸກຍາກ, ການເພີ່ມປະຊາກອນ, ການຂາດແຄນຊັບພະຍາກອນທຳມະຊາດ, ມົນລະພິດສິ່ງແວດລ້ອມ, ຊີວະນາໆພັນຖືກນາບຂູ່…ພິເສດ, ໂລກບໍ່ອາດພັດທະນາແບບຍືນຍົງໄດ້ ຖ້າຫາກບໍ່ມີສັນຕິພາບ, ຄວາມສະເໝີພາບລະຫວ່າງບັນດາປະເທດ, ບໍ່ເຄົາລົບກົດໝາຍສາກົນ. ສິ່ງນີ້ກໍໄດ້ຮັບການຢັ້ງຢືນຢ່າງຈະແຈ້ງໃນ ຖະແຫຼງການຮ່າໂນ້ຍ. ທ່ານ Hans Franken ສະມາຊິກສະພາແຫ່ງຊາດ ໂຮນລັງ ຖືວ່າ :
“ ສິດຕັດສິນດ້ວຍຕົນເອງຂອງບັນດາປະຊາຊາດແມ່ນສຳຄັນທີ່ສຸດ. ແຕ່ລະປະຊາຊາດ ລ້ວນແຕ່ມີສິດຕັດສິນຊະຕາກຳຂອງຕົນ, ຖ້າຫາກໄປຝືນນັ້ນ, ກໍແມ່ນລະເມີດສິດທິມະນຸດ. ແຕ່ຢູ່ຫຼາຍແຫ່ງໃນໂລກ, ພວກເຮົາຍັງເຫັນຜູ້ຮັບເຄາະຮ້າຍຫຼາຍຄົນຈາກການ ລະເມີດສິດທິມະນຸດ , ເຂົາເຈົ້າບໍ່ອາດຕັດສິນດ້ວຍຕົນເອງໄດ້. ກົດໝາຍສາກົນຍາມໃດກໍແມ່ນພື້ນຖານທີ່ສຳຄັນເພື່ອແກ້ໄຂບັນດາການຂັດແຍ້ງເຂດນ້ຳແດນດິນລະຫວ່າງບັນດາປະເທດ. ບັນດາປະເທດຕ້ອງເຄົາລົບ ແລະ ປະຕິບັດຕາມສົນທິສັນຍາສາກົນ”
ມຸ່ງໄປສູ່ເປົ້າໝາຍພັດທະນາແບບຍືນຍົງ
ປີ 2015 ແມ່ນຈຸດເວລາທີ່ IPU ພວມຊຸກຍູ້ໂຄງການດຳເນີນງານຂອງຕົນໃຫ້ສອດຄ່ອງກັບບັນດາ ໂຄງການດຳເນີນງານຊຶ່ງ ສ.ປ.ຊ ໄດ້ວາງອອກໃນ 15 ປີທີ່ຈະມາເຖິງ. ບັນດາໝາກຜົນທີ່ສຳຄັນກວ່າໝູ່ຂອງ IPU , ສະແດງອອກຜ່ານຖະແຫຼງການຮ່າໂນ້ຍຊຶ່ງແມ່ນເອກະສານສະແດງໃຫ້ເຫັນຄວາມຫວັງ ແລະ ຄຳໝັ້ນສັນຍາຂອງ IPU ແລະ ບັນດາລັດຖະສະພາພາຄີໃນການສ້າງ ແລະ ຊຸກຍູ້ການປະຕິບັດບັນດາ ເປົ້າໝາຍພັດທະນາແບບຍືນຍົງ SDGs ຊຶ່ງ ສ.ປ.ຊ ພວມ ສ້າງເຖິງປີ 2030. ທ່ານນາງ Annette King ສະມາຊິກລັດຖະສະພາ ແນິວເຊີແລນ ເນັ້ນໜັກວ່າ :
“ ຂ້າພະເຈົ້າຖືວ່າ ນີ້ແມ່ນບາດກ້າວລິເລີ່ມເພື່ອສູ້ຊົນໃຫ້ແກ່ ເປົ້າໝາຍພັດທະນາແບບຍືນຍົງ. ຖະແຫຼງການຮ່າໂນ້ຍແມ່ນໝາກຜົນຂອງການເຮັດວຽກຢ່າງເຂັ້ມງວດຂອງບັນດາ ສະມາຊິກລັດຖະສະພາທີ່ມາຈາກກວ່າ 100 ລັດຖະສະພາພາຄີ, ຊຶ່ງໄດ້ບັນລຸຄວາມຮັບຮູ້ລວມກ່ຽວກັບການພັດທະນາແບບຍືນຍົງ ”
ຖະແຫຼງການຮ່າໂນ້ຍດ້ວຍບັນດາເນື້ອໃນ, ຄຳໝັ້ນສັນຍາກະທຳທີ່ສອດຄ່ອງກັບຄວາມຫວັງ ແລະ ແນວທາງການພັດທະນາຂອງຫວຽດນາມຢ່າງສິ້ນເຊິ່ງ. ໃນການເຄື່ອນໄຫວຂອງໂລກທີ່ເຕັມໄປດ້ວຍຄວາມຟົດເດືອດ ແລະ ມີການຜັນແປຜິດປົກກະຕິບໍ່ໜ້ອຍນັ້ນ, ເຫດການການທູດທີ່ຍິ່ງໃຫຍ່, ເຕົ້າໂຮມບັນດາ ສະມາຊິກລັດຖະສະພາຢູ່ທຸກແຫ່ງໃນໂລກ ເພື່ອມຸ່ງໄປສູ່ຫົວເລື່ອງລວມ ແລະ ບັນລຸໝາກຜົນຄືດັ່ງຄວາມຫວັງ ກໍແມ່ນຜົນສຳເລັດອັນໃຫຍ່ຫຼວງ, ເປີດຊອງທາງໃໝ່ໃຫ້ແກ່ສະຫະພັນລັດຖະສະພາສາກົນ.