(vovworld)- ສານຕົ້ນປີໃຫມ່ຂອງບັນດາການນຳຂັ້ນສູງພັກ ແລະ ລັດຫວຽດນາມ, ຂ່າວ ແລະ ບົດກ່ຽວກັບບັນຍາກາດ“ຊົມເຊີຍພັກ, ອວຍພອນລະດູບານໃຫມ່”, ຕ້ອນຮັບລະດູບານໃຫມ່ຢ່າງເບິກບານມ່ວນຊື່ນ, ແລະມີຄວາມຜາສຸກຂອງປະຊາຊົນໃນທົ່ວປະເທດຫວຽດນາມ ໄດ້ຮັບການລົງພິມໃນບັນດາຫນັງສືພິມປີໃຫມ່ປີມະເມຍ 2014. ຮີດຄອງປະເພນີຕ້ອນຮັບບຸນປີໃຫມ່ປະຈຳຊາດຂອງຊາວຫວຽດນາມ ຢູ່ພາຍໃນ ແລະ ຕ່າງປະເທດ, ສະພາບການເສດຖະກິດສັງຄົມຂອງປະເທດຊາດ ກໍແມ່ນຫົວເລື່ອງທີ່ລົງພິມຫລາຍກວ່າໝູ່ໃນຫນັງສືພິມປີໃຫມ່ປະຈຳຊາດປີນີ້.
ຫນັງສືພິມລະດູບານໃຫມ່ປີມະເມຍ 2014 ແມ່ນອຸດົມສົມບູນ
ພາບ:laodong.com.vn
|
ໃນສານສົ່ງເຖິງປະຊາຊົນ, ທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟູຈ້ອງ ອວຍພອນ ແລະ ປາດຖະຫນາຢາກໃຫ້ທົ່ວພັກ, ທົ່ວປວງຊົນ, ທົ່ວກອງທັບ ຈົ່ງສາມັກຄີ, ເປັນຈິດຫນຶ່ງໃຈດຽວເຊື່ອໝັ້ນຕໍ່ພັກ, ພ້ອມກັນກ້າວເຂົ້າສູ່ປີໃຫມ່, ນຳປະເທດຊາດສືບຕໍ່ພັດທະນາຂຶ້ນສູ່ລະດັບສູງໃຫມ່. ທ່ານເລຂາທິການໃຫຍ່ ຫງວຽນຟູຈ້ອງ ເນັ້ນຫນັກບຸລິມະສິດຕົ້ນຕໍຂອງປະເທດຊາດປະຈຸບັນ ຍັງຄົງແມ່ນຮັກສາເສດຖະກິດມະຫາພາກເປັນປົກກະຕິ, ຄວບຄຸມໄພເງິນເຟີ້, ບັນລຸການເຕີບໂຕເໝາະສົມ ແລະ ຮັບປະກັນຊີວິດສັງຄົມ.
ເມື່ອຕອບສຳພາດຕໍ່ສຳນັກຂ່າວສານຫວຽດນາມ ເນື່ອງໃນໂອກາດປີໃຫມ່, ທ່ານປະທານສະພາແຫ່ງຊາດຫວຽດນາມ ຫງວຽນຊີງຮຸ່ງ ເນັ້ນຫນັກວ່າ: ປີ 2013,ສະພາແຫ່ງຊາດ ໄດ້ຮັບຮອງເອົາມະຕິສຳຄັນຫລາຍສະບັບທີ່ກ່ຽວຂ້ອງເຖິງຊີວິດການເປັນຢູ່ຂອງປະຊາຊົນ, ແກ້ໄຂບັນດາບັນຫາທີ່ຮ້ອນເຮັ່ງຂອງປະຊາຊົນ ຊື່ງໄດ້ຮັບຄວາມຊົມເຊີຍຈາກຜູ້ມີສິດເລືອກຕັ້ງເປັນຈຳນວນຫລວງຫລາຍ. ເປັນຄັ້ງທຳອິດ, ສະພາແຫ່ງຊາດດຳເນີນການລົງຄະແນນສຽງໄວ້ວາງໃຈສຳລັບບັນດາຕຳແຫນ່ງ ໂດຍສະພາແຫ່ງຊາດເລືອກຕັ້ງ ຫລືໃຫ້ສັດຕະຍາບັນ. ພິເສດ ສະພາແຫ່ງຊາດຮັບຮອງເອົາລັດຖະທຳມະນູນສະບັບໃຫມ່ຂອງ ສສ ຫວຽດນາມ, ສະແດງໃຫ້ເຫັນເຈດຈຳນົງ, ຄວາມມຸ່ງມາດປາດຖະຫນາຂອງປະຊາຊົນ, ສ້າງພື້ນຖານດ້ານການເມືອງ, ນິຕິກຳທີ່ສຳຄັນໃຫ້ແກ່ກິດຈະການສ້າງສາ, ພັດທະນາປະເທດຊາດໃນໄລຍະປ່ຽນແປງໃຫມ່ຢ່າງຮອບດ້ານ ແລະ ເຊື່ອມໂຍງເຂົ້າກັບສາກົນ.
ຫນັງສືພິມລະດູບານໃຫມ່ປີ 2014 ໄດ້ສະຫງວນເວລາສ່ວນຫລາຍເພື່ອໄຈ້ແຍກຜົນງານດ້ານເສດຖະກິດສັງຄົມປີ 2013 ແລະ ຄາດຄະເນແງ່ຫວັງເສດຖະກິດສັງຄົມປີ 2014. ສ່ວນຫນັງສືພິມລົງທຶນ, ທ່ານ ບູ່ຍກວາງວີງ, ລັດຖະມົນຕີກະຊວງແຜນການ ແລະ ການລົງທຶນ ຫວຽດນາມ ຖືວ່າ: ລະດັບການເຕີບໂຕ GDP ປີ 2013 ແມ່ນ 5,42% ຊື່ງແມ່ນລະດັບເຕີບໂຕເໝາະສົມໃນສະພາບການພື້ນຖານເສດຖະກິດໂລກ ແລະ ພາຍໃນປະເທດປະສົບກັບຄວາມຫຍຸ້ງຍາກ, ຕ້ອງໃຫ້ບຸລິມະສິດແກ່ການຄວບຄຸມໄພເງິນເຟີ້. ຈຸດເດັ່ນຂອງພາບພົດເສດຖະກິດຫວຽດນາມໃນປີ 2013 ນັ້ນແມ່ນ ການເຕີບໂຕດ້ານການສົ່ງອອກສູງບັນລຸລະດັບສູງຄື:ກວ່າ 132 ຕື້ USD, ການດຶງດູດເງິນລົງທຶນຂອງຕ່າງປະເທດ FDI ຟື້ນຕົວຢ່າງແຮງ,ບັນລຸປະມານ 23 ຕື້ USD, ດັດຊະນີລາຄາໃຊ້ສອຍ CPI ຫລຸດລົງຍັງເຫລືອພຽງ 5,6%, ຊື່ງແມ່ນລະດັບຕຳ່ສຸດໃນ 10 ປີຜ່ານມາ.
ດ້ວຍຫົວຂໍ້“ FDI 2013”: ປີຂອງບັນດາໂຄງການມີເງິນລົງທຶນນັບຕື້ USD”, ຫນັງສືພິມ ເສດຖະກິດຫວຽດນາມ ຢືນຢັນວ່າ: ຫວຽດນາມ ສືບຕໍ່ແມ່ນສະຖານທີ່ດູດດື່ມບັນດານັກລົງທຶນຕ່າງປະເທດ. ບັນດາໂຄງການທີ່ມີເງິນລົງທຶນກ້ອນໃຫຍ່ຂອງຕ່າງປະເທດໃຫຍ່ໃນປີ 2013 ຕ້ອງເວົ້າເຖິງ ໂຄງການລົງທຶນຂອງກຸ່ມບໍລິສັດ Samsung ສເກົາຫລີ ທີ່ລົງທຶນຢູ່ແຂວງ ທາຍງວຽນ ມີເງິນລົງທຶນ 2 ຕື້ USD, ສ່ວນ ຍີ່ປຸ່່ນ ເພີ່ມເງິນລົງທຶນ 2,8 ຕື້ USD ໃຫ້ແກ່ໂຄງການກັ່ນຕອງນຳ້ມັນ ງີເຊີນ ໄລຍະ 1, ຢູ່ແຂວງ ແທງຮວາ; ສະຫະພັນ ລັດເຊຍ ລົງທຶນ 1 ຕື້ USD ເພື່ອກໍ່ສ້າງໂຮງງານປະກອບແລະ ຜະລິດສິ້ນສ່ວນເຄື່ອງອາໄລ່ອຸປະກອນລົດໂອໂຕ ຢູ່ ແຂວງ ບີງດີ້ງ.
ຫນັງສຶພີມລົງທຶນຫລັກຊັບ ໄດ້ຄັດສະເຫນີການຄາດຄະເນຂອງບັນດາອົງການສາກົນກ່ຽວກັບເສດຖະກິດມະຫາພາກຫວຽດນາມ ໃນປີ 2014. ທະນາຄານໂລກ WB ຖືວ່າ: GDP ຫວຽດນາມ ບັນລຸ 5,4%, ໄພເງິນເຟີ້ຄວບຄຸມຢູ່ໃນລະດັບ 1 ຕົວເລກ. ໃນຂະນະນັ້ນ, ທະນາຄານພັດທະນາ ອາຊີ ADB ໄດ້ໃຫ້ຂໍ້ສັງເກດວ່າ:GDP ຫວຽດນາມ ບັນລຸລະດັບ 5,5%, ໄພເງິນເຟີ້ ຢູ່ໃນລະດັບ 7,2%, ອັດຕາແລກປ່ຽນເງິນດົງ/USD ເປັນປົກກະຕິ.
ບົດນຳ“ຄຸນນະທາດ ແລະ ພູມປັນຍາຫວຽດນາມ” ຂອງຫນັງສືພິມເຍີນເຢີນ(ສຽງຂອງພັກກອມມູນິດຫວຽດນາມ) ເຊື່ອໝັ້ນວ່າ: ປີ 2014 ພາຍໃຕ້ການຊີ້ນຳນຳພາອັນສະຫລາດສ່ອງໃສຂອງພັກກອມມູນິດຫວຽດນາມ, ກຳລັງແຮງມະຫາສາມັກຄີທົ່ວປວງຊົນໄດ້ຮັບການເສີມຂະຫຍາຍ, ປະເທດຊາດຈະໝັ້ນຄົງກ້າວຂຶ້ນ, ບໍ່ມີຄວາມຫຍຸ້ງຍາກສິ່ງທ້າທາຍ ໃດສາມາດກີດຂວາງໄດ້. ບົດນຳຫນັງສືພິມ ກວນໂດ້ຍເຍີນເຢີນ(ສຽງຂອງກອງທັບປະຊາຊົນຫວຽດນາມ) ທີ່ມີຫົວຂໍ້ວ່າ: “ໝັ້ນໃຈເພື່ອກ້າວຂຶ້ນ” ສະແດງໃຫ້ເຫັນວ່າ: ບັນດານະໂຍບາຍໃຫຍ່ຂອງພັກ ແລະ ລັດກ່ຽວກັບການສ້າງໂຄງປະກອບພື້ນຖານເສດຖະກິດຄືນໃຫມ່, ການລົບລ້າງຄວາມອຶດຫິວຫລຸດຜ່ອນຄວາມທຸກຍາກ, ຕ້ານການສໍ້ລາດບັງຫລວງ, ການຟຸມເຟືອຍ…ພວມໄດ້ຮັບການຜັນຂະຫຍາຍຢ່າງຄົບຊຸດ ແລະ ບັນລຸໄດ້ປະສິດທິຜົນໃນເບື້ອງຕົ້ນ.
ກ່ຽວກັບການພົວພັນກັບສາກົນ, ບັນດາຫນັງສືພິມລະດູບານໃຫມ່ໄດ້ສະແດງໃຫ້ເຫັນຜົນງານການຕ່າງປະເທດຂອງຫວຽດນາມ ໃນປີ 2013. ຕາມນັ້ນແລ້ວ, ຫວຽດນາມ ໄດ້ຮັບເລືອກຕັ້ງເປັນຫນຶ່ງໃນຈຳນວນ 14 ປະເທດສະມາຊິກ ສະພາສິດທິທະນຸດ ສປຊ ດ້ວຍບັດສະຫນັບສະຫນູນສູງສຸດ ແລະ ເປັນເຈົ້າພາບຈັດກອງປະຊຸມໃຫຍ່ສະມັດຊາໃຫຍ່ລັດຖະສະພາລະຫວ່າງຊາດໂລກຄັ້ງທີ 32 ໃນເດືອນ 3/2015 ແລະ ກອງປະຊຸມສຸດຍອດ APEC ປີ 2017. ຫນັງສືພິມ ແທງນຽນ(ຊາວຫນຸ່ມ) ມີບົດຂຽນກ່ຽວກັບຊາວຫວຽດນາມຜູ້ຫນຶ່ງໃນຈຳນວນ 500 ທ່ານທີ່ມີສິດອຳນາດສູງກວ່າໝູ່ຢູ່ ໃນໂລກ. ນັ້ນແມ່ນນັກການທູດ ເລເລືອງມີງ, ຜູ້ຮັບຕຳ່ແຫນ່ງເປັນເລຂາທິການໃຫຍ່ອາຊຽນ ຢ່າງເປັນທາງການເມື່ອວັນທີ 9/1/2013 ກາຍເປັນຊາວຫວຽດນາມຜູ້ທຳອິດດຳລົງຕຳແຫນ່ງເປັນເລຂາທິການໃຫຍ່ ອາຊຽນ.
ບັນດາຂ່າວ ແລະ ບົດກ່ຽວກັບຮີດຄອງປະເພນີຕ້ອນຮັບບຸນປີໃຫມ່ປະຈຳຊາດຂອງຊາວຫວຽດນາມ, ບັນດາງານບຸນໃນລະດູບານໃຫມ່, ບັນຍາກາດຕ້ອນຮັບບຸນປີໃຫມ່ຂອງຊາວຫວຽດນາມ ອາໄສຢູ່ບັນດາປະເທດໃນໂລກຖືກລົງພິມໃນບັນດາຫນັງສືພິມລະດູບານໃຫມ່. ດ້ວຍຫົວຂໍ້ວ່າ: ສີສັນບຸນປີໃຫມ່ປະຈຳຊາດ ຫວຽດນາມ”, ຫນັງສືພິມຂອງວິທະຍຸກະຈາຍສຽງຫວຽດນາມ VOV ໄດ້ສະແດງໃຫ້ເຫັນວ່າ: ຫວຽດນາມ ມີ 54 ຊົນເຜົ່າ, ຊົນເຜົ່າໃດກໍຕ້ອນຮັບບຸນປີໃຫມ່ອັນເປັນປະເພນີຂອງຕົນ, ແຕ່ບຸນປີໃຫມ່ປະຈຳຊາດໂດຍໄລ່ຕາມຈັນທະປະຕິທິນແມ່ນບຸນປີໃຫມ່ປະເພນີຂອງທັງຊາດ. ໃນຄໍລຳ “ຊາວຫວຽດນາມ ອາໄສຢູ່ຕ່າງປະເທດຕ້ອນຮັບບຸນປີໃຫມ່ປະຈຳຊາດ”, ຫນັງສືພິມ VOV ໄດ້ສ່ອງແສງໃຫ້ເຫັນບັນຍາກາດຕ້ອນຮັບບຸນປີໃຫມ່ປະຈຳຊາດຂອງຊາວຫວຽດນາມອາໄສ ຢູ່ ອາເມລິກາ, ໄທ, ຍີ່ປຸ່ນ. ເຂົາເຈົ້າລ້ວນແຕ່ຕ້ອນຮັບບຸນປີໃຫມ່ຕາມຮີດຄອງປະເພນີຂອງຊາວຫວຽດນາມ.
ບັນດາຫນັງສືພິມ ຍັງລົງພິມຂ່າວ, ບົດຕ່າງໆສະແດງໃຫ້ເຫັນຄວາມເອົາໃຈໃສ່ຂອງພັກ, ລັດ ທີ່ມີຕໍ່ຜູ້ທຸກຍາກ, ຄອບຄົວໃນເປົ້າໝາຍນະໂຍບາຍ, ຜູ້ມີຄຸນງາມຄວາມດີຕໍ່ການປະຕິວັດ, ທະຫານ ແລະ ປະຊາຊົນຢູ່ເຂດໝູ່ເກາະເຈື່ອງຊາເພື່ອໃຫ້ເຂົາເຈົ້າຕ້ອນຮັບບຸນປີໃຫມ່ປະຈຳຊາດຢ່າງອົບອຸ່ນ.
ຫນັງສືພິມລະດູບານໃຫມ່ປີມະເມຍ ແມ່ນອຸດົມສົມບູນ, ມີເນື້ອໃນອັນດູດດື່ມ, ການຈັດພິມຢ່າງງາມຕາ, ກາຍເປັນອາຫານດ້ານຈິດໃຈທີ່ຂາດບໍ່ໄດ້ຂອງຊາວຫວຽດນາມ ແຕ່ລະຄົນ ເມື່ອບຸນປີໃຫມ່, ລະດູບານໃຫມ່ວຽນມາ. ຫນັງສືພິມລະດູບານໃຫມ່ ແມ່ນສະບັບພິເສດສະຫງວນໃຫ້ແກ່ບຸນປີໃຫມ່ປະຈຳຊາດ, ແມ່ນຜະລິດຕະພັນສະເພາະຂອງສື່ມວນຊົນ ຫວຽດນາມ, ແມ່ນພາຫະນະພິສູດໃຫ້ເຫັນພື້ນຖານວັດທະນະທຳຫວຽດນາມ ທີ່ອຸດົມສົນບູນ, ເຂັ້ມຂົ້ນໄປດ້ວຍສີສັນຊາດ.