ນະໂຍບາຍເງິນຕາປີ 2015 ໄດ້ຮັບການປະຕິບັດຢ່າງຖືກຕ້ອງຕາມການຊີ້ນຳນຳພາຂອງນາຍົກລັດຖະມົນຕີນັ້ນແມ່ນ ເປັນເຈົ້ການ, ມີໄຫວພິບຕາມສັນຍານຂອງຕະຫຼາດ, ຮັບປະກັນໝັ້ນທ່ຽງໃຫ້ມູນຄ່າເງິນດົງຂອງຫວຽດນາມ, ສົມທົບກັນຢ່າງແໜ້ນແຟ້ນກັບບັນດານະໂຍບາຍອື່ນ ເພື່ອຮັກສາສະຖຽນລະພາບດ້ານເສດຖະກິດມະຫາພາກ, ສູ້ຊົນບັນລຸ ແລະ ລື່ນກາຍບັນດາຄາດໝາຍ, ໜ້າທີ່ແຜນການທີ່ໄດ້ວາງອອກໃຫ້ປີ 2015. ທ້າຍປີ 2015, ໝາກຜົນແຫ່ງການບໍລິຫານນະໂຍບາຍເງິນຕາ ໄດ້ຮັບໝາກຜົນຢ່າງຕັ້ງໜ້າໃນຫຼາຍດ້ານເຊັ່ນ ການຊຳລະ, ອັດຕາດອກເບ້ຍ ຕະຫຼອດຮອດອັດຕາແລກປ່ຽນເງິນຕາ.
ນະໂຍບາຍເງິນຕາໄດ້ຮັບການປະຕິບັດຢ່າງເຄັ່ງຄັດ, ມີໄຫວພິບ
ຈຸດພົ້ນເດັ່ນທີ່ສຸດໃນນະໂຍບາຍເງິນຕາປີ 2015 ແມ່ນການຕັດສິນດັດປັບອັດຕາແລກປ່ຽນຢ່າງມີໄຫວພິບຂອງທະນາຄານແຫ່ງລັດ. ອາດເວົ້າໄດ້ວ່າ, ປີ 2015 ແມ່ນປີທີ່ອັດຕາແລກປ່ຽນມີການເໜັງຕີງຫຼາຍໃນສະພາບທີ່ກົມສະສົມສະຫະລັດອາເມລິກາ (FED) ເພີ່ມອັດຕາດອກເບ້ຍ USD ຂຶ້ນ ແລະ ຈີນ ດັດປັບອັດຕາແລກປ່ຽນເງິນຢວນ ຢ່າງແຮງ. ພາຍຫຼັງທີ່ເງິນຢວນ ຖືກຫຼຸດລາຄາ (11/08) ພຽງ 1 ວັນ, ຫວຽດນາມ ໄດ້ດັດປັບອັດຕາແລກປ່ຽນລະຫວ່າງລາຄາເງິນດົງ ແລະ USD ເພີ່ມຈາກ +/-1% ຂຶ້ນ +/-2%. ຕໍ່ຈາກນັ້ນ, ເພື່ອເປັນເຈົ້າການນຳຕະຫຼາດ, ຫຼຸດຜ່ອນບັນດາການທະທົບບໍ່ດີຈາກເລື່ອງ FED ສາມາດເພີ່ມອັດຕາດອກເບ້ຍ, ຫຼັງຈາກນັ້ນ 1 ສັບປະດາ (ວັນທີ 19/08), ຫວຽດນາມ ສືບຕໍ່ດັດປັບອັດຕາແລກປ່ຽນສະເລ່ຍລະຫວ່າງທະນາຄານ ລະຫວ່າງເງິນດົງ ແລະ USD ຕື່ມອີກ 1%, ພ້ອມທັງເປີດກວ້າງອັດຕາແລກປ່ຽນຄັ້ງທີ 2 ຈາກ +/-2% ຂຶ້ນ +/-3%. ໝາກຜົນທີ່ບັນລຸໄດ້ນັ້ນແມ່ນອັດຕາແລກປ່ຽນ ແລະ ຕະຫຼາດເງິນຕາຕ່າງປະເທດໄດ້ມີສະຖຽນລະພາບໂດຍໄວ.
ຄຽງຂ້າງນັ້ນ, ຕະຫຼາດຄຳພາຍໃນປະເທດສືບຕໍ່ຮັກສາສະຖຽນລະພາບ, ສ່ອງແສງໃຫ້ເຫັນປະສິດທິຜົນຂອງບັນດາມາດຕະການຄຸ້ມຄອງຄຳຂອງທະນາຄານແຫ່ງລັດ ທີ່ໄດ້ ແລະ ພວມໄດ້ຮັບການຜັນຂະຫຍາຍ. ບັນດາມາດຕະການແກ້ໄຂໜີ້ສາທາລະນະ ກໍເສີມຂະຫຍາຍປະສິດທິຜົນ ເມື່ອໃນທ້າຍປີ, ໜີ້ສາທາລະນະຂອງທົ່ວລະບົບໄດ້ຫຼຸດລົງລະດັບ 2,71% ປະຕິບັດສຳເລັດຄາດໝາຍທີ່ໄດ້ວາງອອກ.
ກ່ຽວກັບການຊຳລະ, ໄລ່ຮອດວັນທີ 21/12/2015 ໄດ້ເພີ່ມຂຶ້ນ 13,55% ເມື່ອທຽບໃສ່ທ້າຍປີ 2014, ພ້ອມກັນນັ້ນ ອັດຕາດອກເບ້ຍໃນຕະຫຼາດທີ່ສືບຕໍ່ຫຼຸດລົງຈາກ 0,2 – 0,5%/ປີ, ຜ່ານນັ້ນ, ໄດ້ໜູນຊ່ວຍໃຫ້ແກ່ການເຄື່ອນໄຫວຜະລິດດຳເນີນທຸລະກິດຢ່າງຕັ້ງໜ້າ. ສິນເຊື່ອຂອງທົ່ວລະບົບທະນາຄານຫວຽດນາມ ໃນປີ 2015 ຄາດຄະເນວ່າໄດ້ເພີ່ມຂຶ້ນ 18%, ອັນໄດ້ສະແດງໃຫ້ເຫັນຄວາມມານະພະຍາຍາມຂອງທົ່ວລະບົບ ໃນເລື່ອງແກ້ໄຂຄວາມຫຍຸ້ງຍາກດ້ານສິນເຊື່ອ, ເມື່ອຄວາມຕ້ອງການທັງໝົດ ແລະ ກຳລັງດຶງດູດທຶນຂອງພື້ນຖານເສດຖະກິດຍັງຕ່ຳຢູ່. ທ່ານ ຮີນວັນຕຽບ, ສະມາຊິກສະພາແຫ່ງຊາດ ນະຄອນເກີ່ນເທີ ໄດ້ຕີລາຄາວ່າ.
“ທະນາຄານແຫ່ງລັດໄດ້ບັນລຸຜົນສຳເລັດໃນວຽກງານຮັກສາຕະຫຼາດຄຳເປັນປົກກະຕິ, ແລະ ໃນການຫຼຸດຜ່ອນອັດຕາດອກເບ້ຍ. ອັດຕາແລກປ່ຽນເງິນຕາຕ່າງປະເທດໄດ້ຮັບການຮັກສາໄວ້ຢ່າງໝັ້ນທ່ຽງ, ການສະສົມເງິນຕາຕ່າງປະເທດເພີ່ມຂຶ້ນສູງ, ສິນເຊື່ອບັນລຸລະດັບເຕີບໂຕດີພໍສົມຄວນ, ປະກອບສ່ວນເຮັດໃຫ້ການຜະລິດດຳເນີນທຸລະກິດມີຄວາມໝັ້ນທ່ຽງ ແລະ ພັດທະນາ”.
ປະກອບສ່ວນສຳຄັນເຂົ້າໃນການຮັກສາສະຖຽນລະພາບດ້ານເສດຖະກິດມະຫາພາກ ບັນດາຜົນງານທີ່ບັນລຸໄດ້ໃນການບໍລິຫານນະໂຍບາຍເງິນຕາດັ່ງກ່າວ ໄດ້ປະກອບສ່ວນຮັກສາເສດຖະກິດມະຫາພາກເປັນປົກກະຕິ, ຄວບຄຸມໄພເງິນເຟີ້ປີ 2015 (CPI ເພີ່ມຂຶ້ນ 0,63%, ເຊິ່ງເປັນລະດັບເພີ່ມຂຶ້ນຕ່ຳທີ່ສຸດນັບແຕ່ປີ 2002) ແລະ ການໜູນຊ່ວຍການເຕີບໂຕດ້ານເສດຖະກິດຢູ່ໃນລະດັບສູງ (ບັນລຸກວ່າ 6,5%). ນະໂຍບາຍເງິນຕາມີໄຫວພິບ, ແໜ້ນແຟ້ນ ຍັງປະກອບສ່ວນສຳຄັນເຂົ້າໃນການປະຕິບັດຄາດໝາຍຮັກສາສະຖຽນລະພາບດ້ານເສດຖະກິດມະຫາພາກ, ຫັນປ່ຽນຮູບແບບການເຕີບໂຕ, ຍົກສູງປະສິດທິຜົນການລົງທຶນ, ຍົກສູງສະມັດຕະພາບແຮງງານ. ທ່ານປະລິຍາເອກ ຫງວຽນຈິ໋ຮ໋ຽວ, ນັກຊ່ຽວຊານດ້ານການເງິນທະນາຄານ ໃຫ້ຮູ້ວ່າ.
“ຜົນງານໃຫຍ່ສຸດຂອງນະໂຍບາຍເງິນຕາຂອງທະນາຄານສູນກາງ ແມ່ນໄດ້ຫຼຸດໄພເງິນເຟີ້ລົງລະດັບຕ່ຳສຸດໃນປີ 2015. ນັ້ນແມ່ນຜົນງານໃຫຍ່ກວ່າໝູ່. ຄວບຄຸມໄພເງິນເຟີ້ເປັນຢ່າງດີ ແລະ ຊຸກຍູ້ໄດ້ການເຕີບໂຕດ້ານເສດຖະກິດ. ຂ້າພະເຂົ້າຄິດວ່າ, ທະນາຄານສູນກາງ ຈະສືບຕໍ່ມີບັນດາໂຄງການ, ແຜນການເພື່ອຊຸກຍູ້ການເຕີບໂຕດ້ານເສດຖະກິດ ແລະ ຄວບຄຸມໄພເງິນເຟີ້ໃນໄລຍະຈະມາເຖິງ”.
ສ້າງປະຖົມປັດໃຈສະດວກໃຫ້ປີ 2016
ຄາດຄະເນວ່າ, ປີ 2016 ວຽກງານບໍລິຫານນະໂຍບາຍເງິນຕາຈະປະສົບກັບສິ່ງທ້າທາຍ 3 ຢ່າງ. ທີ່ໜຶ່ງແມ່ນຄວາມດັນດ້ານທຶນຮອນ ສຳລັບລະບົບທະນາຄານ; ທີ່ 2 ແມ່ນບໍລິຫານອັດຕາແລກປ່ຽນ; ທີ່ 3 ແມ່ນຕະຫຼາດພັດທະບັດກະທົບເຖິງອັດຕາດອກເບ້ຍ. ສະນັ້ນ, ປີ 2016 ທະນາຄານແຫ່ງລັດ ຈະເປັນເຈົ້າການປະຕິບັດບັນດາມາດຕະການຄຸ້ມຄອງຕະຫຼາດເງິນຕາຕ່າງປະເທດ, ຕະຫຼາດຄຳ, ນຳໃຊ້ USD ໃນການຊຳລະໃຫ້ແກ່ການສົ່ງອອກ, ນຳເຂົ້າ; ຍູ້ແຮງການຊຳລະໂດຍບໍ່ໃຊ້ເງິນສົດ. ບັນດາມາດຕະການນີ້ ກໍປະກອບສ່ວນປະຕິບັດບັນດາຄາດໝາຍເຊິ່ງສະພາແຫ່ງຊາດ ແລະ ລັດຖະບານໄດ້ຍົກອອກມານັ້ນແມ່ນ: ຄວບຄຸມໄພເງິນເຟີ້ໃຫ້ຢູ່ໃນລະດັບຕ່ຳກວ່າ 5%, ໜູນຊ່ວຍການເຕີບໂຕດ້ານເສດຖະກິດໃນລະດັບເໝະສົມແມ່ນ 6,7%. ທ່ານນາງຮອງຜູ້ວ່າການທະຫານແຫ່ງລັດຫວຽດນາມ ຫງວຽນທິຮົ່ງ ໃຫ້ຮູ້ວ່າ.
“ພວກຂ້າພະເຈົ້າຈະຕິດຕາມຢ່າງໃກ້ຊິດບັນດາການຜັນແປຂອງຕະຫຼາດ, ຢືດໝັ້ນຄາດໝາຍຄວບຄຸມໄພເງິນເຟີ້ ແລະ ປະຕິບັດບັນດາເຄື່ອງມື, ມາດຕະການແກ້ໄຂຢ່າງຄົບຊຸດ ເພື່ອຮັບປະກັນຮັກສາສະຖຽນລະພາບດ້ານເສດຖະກິດມະຫາພາກ. ສຳລັບລະບົບທະນາຄານ, ເມື່ອພື້ນຖານເສດຖະກິດຂອງພວກເຮົາໄດ້ລົງນາມໃນສັນຍາການຄ້າຫຼາຍສະບັບ, ຂະແໜງທະຫານຄານຈະສືບຕໍ່ພັດທະນາ ເພື່ອເປີດກວ້າງບັນດາການບໍລິການການເງິນ ເພື່ອຮັບໃຊ້ໃຫ້ວິສາຫະກິດ ໃນວິວັດການເຊື່ອມໂຍງ”.
ອາດເວົ້າໄດ້ວ່າ, ປີ 2015 ວຽກງານບໍລິຫານນະໂຍບາຍເງິນຕາໄດ້ສ້າງຂີດໝາຍຢ່າງໃຫຍ່ຫຼວງ ໃນບັນດານະໂຍບາຍເສດຖະກິດຂອງລັດຖະບານຫວຽດນາມ. ບັນດາບົດຮຽນ ແລະ ປະສິດທິຜົນເຊິ່ງນະໂຍບາຍນີ້ນຳມາໃຫ້ ຈະແມ່ນກຳລັງໜູນເພື່ອໃຫ້ຫວຽດນາມ ປະຕິບັດບັນດາຄາດໝາຍບໍລິຫານເສດຖະກິດປີ 2016, ປະກອບສ່ວນພັດທະນາເສດຖະກິດແບບຍືນຍົງ.