(vovworld)- ຍັງອີກ 4-5 ມື້, ປະຊາຊົນ ຫວຽດນາມ ຈະສະເຫລີມສະຫລອງ 70 ປີແຫ່ງວັນການປະຕິວັດເດືອນ ສິງຫາ ສຳເລັດຜົນ (19/8/1945-19/8/2015). ກ່ອນນີ້ 70 ປີ, ມີສະມາຊິກພັກພຽງ 5000 ຄົນ, ພັກກອມມູນິດຫວຽດນາມ ໄດ້ນຳພາທົ່ວປວງຊົນທັງຊາດ ປະຕິບັດການປະຕິວັດເດືອນສິງຫາຄັ້ງປະຫວັດສາດສຳເລັດຜົນຢ່າງງົດງາມ. ໄຊຊະນະອັນຍິ່ງໃຫຍ່ດັ່ງກ່າວໄດ້ປະໄວ້ໃຫ້ຄົນລຸ້ນຫລັງບັນດາບົດຮຽນກ່ຽວກັບການກໍ່ສ້າງພັກ ເພື່ອພັດທະນາປະເທດຊາດໃນວັນນີ້. ບົດຂຽນຂອງ ມີງເຈີມ ທີ່ມີຫົວຂໍ້ວ່າ: ບົດບາດການຊີ້ນຳນຳພາຂອງພັກກອມມູນິດຫວຽດນາມໃນການປະຕິວັດເດືອນສິງຫາ.
ຊາວນະຄອນຫລວງຮ່າໂນ້ຍ ນັບລ້ານໆຄົນເຂົ້າຮ່ວມ
ງານຊຸມນຸມມິດຕິງຂ່ຳນັບຊົມເຊີຍໄຊຊະນະການປະຕິວັດ
ເດືອນສິງຫາພາບເອກະສານ
|
ເມື່ອຕີລາຄາກ່ຽວກັບບົດບາດຂອງພັກໃນການປະຕິວັດເດືອນສິງຫາ, ທ່ານປະທານ ໂຮ່ຈິມີນ ໄດ້ຂຽນວ່າ: “ບໍ່ພຽງແຕ່ ຊົນຊັ້ນກຳມະກອນຊາວຜູ້ອອກແຮງງານ ແລະ ປະຊາຊົນຫວຽດນາມ ມີຄວາມເອກອ້າງທະນົງໃຈເທົ່ານັ້ນ ຫາກຊົນຊັ້ນກຳມະກອນຊາວຜູ້ອອກແຮງງານ ແລະ ບັນດາປະເທດຖືກກົດຂີ່ຂູດຮີດອື່ນໃນໂລກ ກໍມີຄວາມເອກອ້າງທະນົງໃຈວ່າ: ເປັນຄັ້ງທຳອິດໃນປະຫວັດສາດປະຕິວັດຂອງປະເທດຫົວເມືອງຂຶ້ນ ແລະ ເຄິ່ງຫົວເມືອງຂຶ້ນ, ພັກຫນຶ່ງທີ່ມີອາຍຸພຽງ 15 ປີ ໄດ້ຊີ້ນຳນຳພາການປະຕິວັດສຳເລັດຜົນ, ກຳອຳນາດໃນທົ່ວປະເທດ.
ແນວທາງຊີ້ນຳນຳພາຢ່າງຖືກຕ້ອງ
ຕາມທ່ານຮອງສາດສະດາຈານ, ດຣ ຫງວຽນຈ້ອງຟຸກ, ອະດີດຫົວຫນ້າສະຖາບັນປະຫວັດສາດພັກ, ສະຖາບັນການເມືອງ ແຫ່ງຊາດໂຮ່ຈິມີນແລ້ວ, ການຊີ້ນຳນຳພາອັນຖືກຕ້ອງຂອງພັກສະແດງໃຫ້ເຫັນດ້ວຍເລື່ອງ ພັກໄດ້ວາງແຜນກຳນົດ ແລະ ວາງແນວທາງປົດປ່ອຍຊາດອັນຖືກຕ້ອງ, ກໍ່ສ້າງກຳລັງປະຕິວັດໃຫ້ເຂັ້ມແຂງແຮງກ້າ, ນຳໃຊ້ວິທີການປະຕິວັດເໝາະສົມ ພ້ອມທັງແກ້ໄຂບັນດາການພົວພັນລະຫວ່າງ ສະພາວະການ ແລະ ຄວາມສ່ຽງໃນການປະຕິວັດເປັນຢ່າງດີ. ຈີນຕະນາການຍຸດທະສາດຂອງພັກ ໃນການລຸກຮື້ຂຶ້ນເດືອນສິງຫາຂະຫນາດໃຫຍ່ ໄດ້ສະແດງອອກຜ່ານວິໄສທັດຍຸດທະສາດກ່ຽວກັບກຳລັງແຮງຂອງມະຫາຊົນ.
“ພັກໄດ້ກຳນົດຕ້ອງກໍ່ສ້າງກຳລັງປະຕິວັດໃຫ້ເຂັ້ມແຂງແຮງກ້າ, ພິເສດແມ່ນກຳລັງການເມືອງໃນແນວໂຮມຫວຽດມີງ; ເປັນເຈົ້າການພັດທະນາການປະຕິວັດຢ່າງແທ້ຈິງ. ທີສອງ ພັກໄດ້ສຸມໃສ່ກໍ່ສ້າງກຸ່ມກ້ອນມະຫາສາມັກຄີທົ່ວປວງຊົນທັງຊາດ, ເຕົ້າໂຮມທົ່ວປວງຊົນທັງຊາດໃນແນວໂຮມຫວຽດມີງ. ຍ້ອນມີກຳລັງແຮງຂອງກຸ່ມກ້ອນສາມັກຄີ ໄດ້ປຸກລຸກນ້ຳໃຈຮັກຊາດອັນແຮງກ້າຂອງທົ່ວປວງຊົນທັງຊາດ ແລະ ຈາກນັ້ນ ເສີມຂະຫຍາຍເຈດຈຳນົງເພີ່ມຕົນເອງສ້າງຄວາມເຂັ້ມແຂງດ້ວຍຕົນເອງຂອງທົ່ວປວງຊົນທັງຊາດ.”
ໃນຕະຫລອດວິວັດທະນາການລຸກຮື້ຂຶ້ນ, ພັກກອມມູນິດຫວຽດນາມ ຍາມໃດກໍຮັບຮູ້ບົດບາດ, ທີ່ຕັ້ງຊີ້ນຳນຳພາຂອງຕົນຢ່າງຖືກຕ້ອງ, ຖືເປັນສຳຄັນຫນ້າທີ່ຂະຫຍາຍສະມາຊິກພັກ, ກໍ່ສ້າງອົງການພັກ, ເພີ່ມທະວີກຸ່ມກ້ອນສາມັກຄີ, ເປັນເອກະພາບໃນພັກ. ສະນັ້ນ ໃນໄລຍະນັ້ນທີ່ມີ ອາຍຸ ພຽງ 15 ປີ ດ້ວຍສະມາຊິກພັກ 5000 ຄົນ, ພັກກອມມູນິດຫວຽດນາມ ໄດ້ຊີ້ນຳນຳພາມະຫາຊົນສ້າງການປະຕິວັດອັນຍິ່ງໃຫຍ່, ສ້າງເປັນລັດຂອງກຳມະກອນຊາວນາລັດທຳອິດຢູ່ ອາຊີຕາເວັນອອກສ່ຽງໃຕ້. ການປະຕິວັດເດືອນ ສິງຫາປີ 1945 ໄດ້ກາຍເປັນແບບຢ່າງຂອງການປະຕິວັດປົດປ່ອຍຊາດ, ປົດປ່ອຍຫົວເມືອງຂຶ້ນໃນໂລກ.
ບົດຮຽນອັນລ້ຳຄ່າກ່ຽວກັບການກໍ່ສ້າງກຳລັງ
ມາຮອດປະຈຸບັນ, ພັກກອມມູນິດຫວຽດນາມ ຄົບຮອບ 85 ປີ ດ້ວຍສະມາຊິກພັກໃນທົ່ວປະເທດ ກວ່າ 4 ລ້ານຄົນ. ຫນ້າທີ່ຄວາມຮັບຜິດຊອບຂອງພັກຕໍ່ປະເທດຊາດ, ຕໍ່ຊາດ ແມ່ນຫນັກຫນ່ວງຍິ່ງກວ່າເວລາໃດໝົດ. ນັ້ນແມ່ນຫນ້າທີ່ຄວາມຮັບຜິດຊອບການຊີ້ນຳນຳພາປະຊາຊົນປະຕິບັດກິດຈະການປ່ຽນແປງໃຫມ່ຢ່າງມີໄຊ, ເປີດປະຕູ ແລະ ເຊື່ອມໂຍງກັບໂລກຢ່າງເລິກເຊິ່ງ, ກວ້າງຂວາງ. ພັກ ຍັງຢືນຢູ່ຕໍ່ຫນ້າສິ່ງທົດສອບອັນໃຫຍ່ຫລວງ ນັ້ນແມ່ນຮັກສາຄຸນນະທາດປະຕິວັດ, ຮັກສາຄວາມສາມັກຄີ, ເປັນເອກະພາບໃນພັກ. ຮອງສາດສະດາຈານ, ດຣ ຫງວຽນມີງຕວນ, ຫົວຫນ້າສະຖາບັນກໍ່ສ້າງພັກ, ສະຖາບັນການເມືອງແຫ່ງຊາດ ໂຮ່ຈິມີນ ຖືວ່າ:
“ສະມາຊິກພັກເດີນຕາມການປະຕິວັດ, ຕາມພັກ ແມ່ນທ່ຽງທຳ, ບໍລິສຸດຜູດຜ່ອງ, ຖືຜົນປະໂຫຍດຂອງຊາດຂອງປະຊາຊົນເປັນສຳຄັນແຖວຫນ້າ, ຕ້ອງເສຍສະຫລະຜົນປະໂຫຍດຂອງຕົນເອງ. ໄລຍະປະຕິວັດເດືອນສິງຫາ, ບັນດາສະມາຊິກພັກ ໄດ້ເສຍສະຫລະຄືແນວນັ້ນ, ໄລຍະປະຈຸບັນກໍເຊັ່ນດຽວກັນ.”
ສາດສະດາຈານ ຫວູເຢືອງນີງ, ສັງກັດມະຫາວິທະຍາໄລແຫ່ງຊາດ ຮ່າໂນ້ຍ ຖືວ່າ: ໃນການປະຕິວັດເດືອນສິງຫາ, ພັກ ໄດ້ສຸມໃສ່ເຕົ້າໂຮມບັນດານັກຮົບຈົ່ງຮັກພັກດີ, ຊັດຊື່ທ່ຽງທຳ, ກໍ່ສ້າງ ແລະ ຂະຫຍາຍບັນດາອົງການພັກຂັ້ນຮາກຖານ, ພ້ອມທັງຂະຫຍາຍພັກ ໂດຍອີງໃສ່ປະຊາຊົນ. ປະຈຸບັນ ສະພາບການພາຍໃນປະເທດ ແລະ ໃນໂລກ ທັງມີກາລະໂອກາດ ແລະ ສິ່ງທ້າທາຍ, ຮຽກຮ້ອງພັກຕ້ອງມີການປ່ຽນໃຫມ່ຢ່າງບໍ່ຢຸດຢັ້ງ, ນັບມື້ນັບພັດທະນາດີກວ່າ, ສົມກັບຄວາມໄວ້ເນື້ອເຊື່ອໃຈຂອງປະຊາຊົນຕໍ່ພັກ.
“ວຽກງານກໍ່ສ້າງພັກ ນັບແຕ່ເມື່ອສ້າງຕັ້ງຂຶ້ນ ແມ່ນວິວັດທະນາການພັດທະນາໃນຄວາມຫຍຸ້ງຍາກ, ສິ່ງທົດສອບຢ່າງຂ້ຽວຂາດ ແຕ່ພັກກອມມູນິດຫວຽດນາມ ໄດ້ຜ່ານຜ່າ ແລະ ກາຍເປັນພັກເຂັ້ມແຂງ, ຊີ້ນຳນຳພາການປະຕິວັດຫວຽດນາມ. ການຕໍ່ສູ້ຍິ່ງຂ້ຽວຂາດ, ບັນດາກຳລັງເປັນປໍລະປັກຍິ່ງທຳລາຍ, ພັກຕ້ອງກໍ່ສ້າງໃຫ້ເຂັ້ມແຂງດ້ານ ແນວຄິດ , ຄຸນນະທາດ, ຖັນແຖວສະມາຊິກພັກ, ການຈັດຕັ້ງ ແລະ ສຳຄັນທີ່ສຸດ ພັກຕ້ອງອີງໃສ່ປະຊາຊົນ.”
70 ປີໄດ້ລ່ວງເລີຍໄປ ແຕ່ໄຊຊະນະອັນຍິ່ງໃຫຍ່ຂອງການປະຕິວັດເດືອນສິງຫາ ຍັງມີຄຸນຄ່າດ້ານປະຫວັດສາດໄວ້ດັ້ງເດີມ. ໃນນັ້ນ ການຊີ້ນຳນຳພາຢ່າງເກັ່ງກ້າສາມາດ, ສະຫລາດສ່ອງໃສຂອງພັກກອມມູນິດຫວຽດນາມ ບໍ່ພຽງແຕ່ແມ່ນບົດຮຽນອັນລ້ຳຄ່າສຳລັບການຕໍ່ສູ້ປົດປ່ອຍຊາດຂອງປະຊາຊົນ ຫວຽດນາມ ເທົ່ານັ້ນ ຫາກຍັງມີຄວາມໝາຍອັນເລິກເຊິ່ງໃນກິດຈະການປ່ຽນແປງໃຫມ່ ແລະ ພັດທະນາປະເທດຊາດປະຈຸບັນ.