(vovworld)- ພາຍຫລັງເຮັດວຽກມາເປັນເວລາ 1 ເດືອນ ດ້ວຍຈິດໃຈປະຊາທິປະໄຕ, ມີຄວາມຮັບຜິດຊອບສູງ, ວັນທີ 26/6, ກອງປະຊຸມສະໄຫມສາມັນເທື່ອທີ 9 ສະພາແຫ່ງຊາດຫວຽດນາມ ຊຸດທີ 13 ໄດ້ອັດລົງຢ່າງຈົບງາມ. ທີ່ກອງປະຊຸມຄັ້ງນີ້, ສະພາແຫ່ງຊາດໄດ້ປຶກສາຫາລື ແລະ ຮັບຮອງເອົາຫລາຍເນື້ອໃນສຳຄັນ, ມີຄວາມໝາຍຕັດສິນຊີ້ຂາດການພັດທະນາຂອງປະເທດຊາດ.
ກອງປະຊຸມສະໄຫມສາມັນເທື່ອທີ 9 ສະພາແຫ່ງຊາດຊຸດທີ 13
ພາບ:vtc.vn
|
ກອງປະຊຸມສະໄຫມສາມັນເທື່ອນີ້ໄດ້ສ້າງຂີດໝາຍໃນການປະຕິບັດບັນດາຫນ້າທີ່ຂອງສະພາແຫ່ງຊາດໃນ 3 ຂົງເຂດນິຕິບັນຍັດ, ຕິດຕາມກວດກາ ແລະ ຕັດສິນຫລາຍບັນຫາສຳຄັນຂອງປະເທດຊາດ. ສະພາແຫ່ງຊາດໄດ້ຮັບຮອງເອົາຫລາຍຮ່າງກົດໝາຍສຳຄັນຫລາຍສະບັບ ສຳລັບການພັດທະນາເສດຖະກິດສັງຄົມຂອງປະເທດຊາດ ແລະ ຊີວິດການເປັນຢູ່ຂອງປະຊາຊົນ. ສະພາແຫ່ງຊາດໄດ້ວາງອອກບັນດາມາດຕະການພັດທະນາເສດຖະກິດສັງຄົມແບບຍືນຍົງ. ນອກນັ້ນ, ເພື່ອກະກຽມໃຫ້ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ 12 ຂອງພັກກອມມູນິດ ຫວຽດນາມ, ບັນດາສະມາຊິກສະພາແຫ່ງຊາດ ກໍໄດ້ປຶກສາຫາລື, ປະກອບຄຳເຫັນໃສ່ບັນດາຮ່າງເອກະສານຍື່ນສະເຫນີກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກ.
ຈຸດສຸມແມ່ນວຽກງານສ້າງກົດໝາຍ
ຊື່ງແມ່ນກອງປະຊຸມຄັ້ງເກືອບສຸດທ້າຍຂອງສະພາແຫ່ງຊາດຊຸດທີ 13, ສະນັ້ນ ກອງປະຊຸມເທື່ອນີ້ ສະພາແຫ່ງຊາດວາງຫນ້າທີ່ຈຸດສຸມເຂົ້າໃນວຽກງານສ້າງກົດໝາຍເພື່ອປະກອບສຳເລັດໂຄງການສ້າງກົດໝາຍ, ລັດຖະບັນຍັດຂອງອາຍຸການ. ສະພາແຫ່ງຊາດໄດ້ຮັບຮອງເອົາ ຮ່າງກົດໝາຍ 11 ສະບັບ, ມະຕິ 5 ສະບັບ ແລະ ໃຫ້ຄຳເຫັນໃສ່ ຮ່າງກົດໝາຍອື່ນ 15 ສະບັບ. ຮ່າງກົດໝາຍທັງໝົດ ຊື່ງສະພາແຫ່ງຊາດຮັບຮອງເອົາ ຫລື ໃຫ້ຄຳເຫັນທີ່ກອງປະຊຸມສະໄຫມສາມັນເທື່ອທີ 9, ສະພາແຫ່ງຊາດຊຸດທີ 13 ລ້ວນແຕ່ແມ່ນບັນດາຮ່າງກົດໝາຍສຳຄັນ, ໃນນັ້ນ ສະພາແຫ່ງຊາດ ບຸລິມະສິດຮັບຮອງເອົາບັນດາຮ່າງກົດໝາຍ ເພື່ອຮັບໃຊ້ການພັດທະນາເສດຖະກິດສັງຄົມຂອງປະເທດຊາດໄລຍະ 2015-2020. ເປັນຫນ້າສົນໃຈ ມີກົດໝາຍວ່າດ້ວຍຊັບພະຍາກອນທຳມະຊາດ, ສິ່ງແວດລ້ອມທະເລ ແລະ ໝູ່ເກາະ, ກົດໝາຍວ່າດ້ວຍງົບປະມານແຫ່ງລັດ (ສະບັບປັບປຸງ), ກົດໝາຍວ່າດ້ວຍກວດສອບແຫ່ງລັດ(ສະບັບປັບປຸງ), ກົດໝາຍວ່າດ້ວຍການປະກາດໃຊ້ເອກະສານນິຕິກຳ… ທ່ານ ອວງຈູລືວ, ຮອງປະທານສະພາແຫ່ງຊາດ ຫວຽດນາມ ຊີ້ແຈ້ງວ່າ:
“ປະລິມານວຽກງານ ແລະ ຄວາມຕ້ອງການເຄື່ອນໄຫວນິຕິບັນຍັດຂອງສະພາແຫ່ງຊາດ ນັບມື້ນັບໃຫຍ່ຫລວງ ເພື່ອຕອບສະຫນອງຄວາມຮຽກຮ້ອງຕ້ອງການພັດທະນາຂອງປະເທດຊາດ, ສ້າງລັດແຫ່ງອຳນາດນິຕິບັນຍັດ, ສ້າງພື້ນຖານເສດຖະກິດການຕະຫລາດ ແລະ ຕັ້ງຫນ້າເຊື່ອມໂຍງເຂົ້າກັບສາກົນ. ສະນັ້ນ ເລື່ອງສ້າງລະບົບກົດໝາຍຕ້ອງຮັບປະກັນລັກເປັນເອກະພາບ, ຄົບຊຸດ, ມີຄວາມເປັນໄປໃນຊີວິດ. ກົດໝາຍທີ່ຫາກໍໄດ້ຮັບການປະກາດໃຊ້ຕ້ອງດີກວ່າກົດໝາຍປະຈຸບັນ.”
ຮ່າງກົດໝາຍສ່ວນຫລາຍແມ່ນຮັບເອົາຄຳເຫັນປະກອບຫລືໄດ້ຮັບການຮັບຮອງເອົາໃນກອງປະຊຸມເທື່ອນີ້ ແມ່ນສະແດງໃຫ້ເຫັນຈິດໃຈເຄົາລົບລັດຖະທຳມະນູນປີ 2013, ຫັນລັກສະນະດີເລີດຂອງລັດຖະທຳມະນູນເປັນລະອຽດ, ປົກປ້ອງສິດທິມະນຸດ, ສິດພົນລະເມືອງດີກວ່າເກົ່າ.
ຊຸກຍູ້ການເຕີບໂຕ, ຮັບປະກັນຊີວິດສັງຄົມ
ກອງປະຊຸມສະໄຫມສາມັນເທື່ອທີ 9 ສະພາແຫ່ງຊາດຫວຽດນາມ ຊຸດທີ 13 ໄດ້ສຸມໃສ່ປຶກສາຫາລືບັນດາມາດຕະການປະຕິບັດບັນດາຫນ້າທີ່ເສດຖະກິດສັງຄົມປີ 2015 ແລະ ບັນດາມາດຕະການພັດທະນາເສດຖະກິດສັງຄົມໃນຊຸມປີຕໍ່ໄປຢ່າງມີໄຊ. ໃນສະພາບການພື້ນຖານເສດຖະກິດຂອງປະເທດຊາດພວມໃນທ່າຟື້ນຕົວ, ພັດທະນາແບບຍືນຍົງ ຍາມໃດກໍແມ່ນຈຸດໝາຍຊື່ງຫວຽດນາມ ມຸ້ງໄປເຖິງ. ກ່ອນອື່ນ ໃນປີ 2015, ຫວຽດນາມ ສູ້ຊົນບັນລຸລະດັບເຕີບໂຕ GDP ແມ່ນ 6,2%, ວົງເງິນສົ່ງອອກເພີ່ມຂຶ້ນ 10%, ຄວບຄຸມໄພເງິນເຟີ້ຢູ່ໃນລະດັບປະມານ 5%, ສ້າງວຽກເຮັດງານທຳໃຫ້ແກ່ຄົນງານ 1,6 ລ້ານຄົນ. ເພື່ອພັດທະນາເສດຖະກິດສັງຄົມແບບຍືນຍົງ, ສະພາແຫ່ງຊາດປະຕິບັດບັນດາມາດຕະການຢ່າງຄົບຊຸດ.
ມາດຕະການມີລັກສະນະຍຸດທະສາດ, ພື້ນຖານ ແມ່ນຕ້ອງປ່ຽນໃໝ່ຮູບແບບລະດັບການເຕີບໂຕຕິດພັນກັບການສ້າງໂຄງປະກອບພື້ນຖານເສດຖະກິດຄືນໃໝ່ຢ່າງເດັດຂາດ, ໃນນັ້ນມີການປະຕິບັດສ້າງໂຄງປະກອບການລົງທຶນຂອງລັດ, ວິສາຫະກິດແຫ່ງລັດຄືນໃໝ່ຢ່າງຂ້ຽວຂາດ. ທ່ານຮອງນາຍົກລັດຖະມົນຕີ ຫງວຽນຊວນຟຸກ,ສະມາຊິກສະພາແຫ່ງຊາດແຂວງ ກວາງນາມ, ໃຫ້ຮູ້ວ່າ:
“ລັດຖະບານສືບຕໍ່ຮັກສາເສດຖະກິດມະຫາພາກເປັນປົກກະຕິ, ປັບປຸງສະພາບແຫ່ງການລົງທຶນດຳເນີນທຸລະກິດ. ຜົນສຳເລັດຂອງ ຫວຽດນາມ ແມ່ນດຶງດູດແຫຼ່ງເງິນລົງທຶນໂດຍກົງຈາກຕ່າງປະເທດ (ODA). ສະນັ້ນລັດຖະບານຍັງສືບຕໍ່ດຶງດູດການລົງທຶນ ODA ເຂົ້າຫວຽດນາມ. ມາດຕະການຕົ້ນຕໍໃຫ້ແກ່ການເຊື່ອມໂຍງເຂົ້າກັບສາກົນປະສົບຜົນສຳເລັດ ແມ່ນຍົກສູງຄວາມສາມາດແກ່ງ ແຍ້ງຢູ່ທັງ 3 ຂັ້ນ ນັ້ນແມ່ນລະດັບຊາດ, ວິສາຫະກິດ ແລະ ປະຊາຊົນ.”
ມາດຕະການສຳຄັນອື່ນໂດຍສະພາແຫ່ງຊາດຍົກອອກມາ ນັ້ນແມ່ນຈັດຕັ້ງ ຕະຫຼາດຄືນໃໝ່, ເປີດກວ້າງຕະຫຼາດສົ່ງອອກ; ພ້ອມທັງຍູ້ແຮງການປະຕິຮູບລະບຽບການບໍລິຫານ, ປະຕິບັດການປ້ອງກັນ, ຕ້ານການສໍ້ລາດບັງຫຼວງ, ການຟຸມເຟືອຍຢ່າງຂ້ຽວຂາດ.
ຍົກສູງປະສິດທິຜົນການຕິດຕາມກວດກາ
ວາລະຊັກຖາມ ແລະ ຕອບຄຳຊັກຖາມ ແມ່ນການເຄື່ອນໄຫວຕິດຕາມກວດກາທີ່ສຳຄັນໃນກອງປະຊຸມສະໄມສາມັນສະພາແຫ່ງຊາດແຕ່ລະເທື່ອ. ກອງປະຊຸມສະໄໝສາມັນຄັ້ງນີ້, ສະພາແຫ່ງຊາດສະຫງວນເວລາ 2 ມື້ ເຄິ່ງໃຫ້ວາລະຊັກຖາມ ແລະ ຕອບຄຳຊັກຖາມຂອງສະມາຊິກລັດຖະບານ, ລັດຖະມົນຕີ 4 ທ່ານໄດ້ຕອບຄຳຊັກຖາມແມ່ນ ທ່ານລັດຖະມົນຕີວ່າການກະຊວງກະສິກຳ ແລະ ພັດທະນາຊົນນະບົດ, ທ່ານລັດຖະມົນຕີວ່າການກະຊວງອຸດສາຫະກຳ ແລະ ການຄ້າ, ທ່ານລັດຖະມົນຕີວ່າການກະຊວງວິທະຍາສາດ ແລະ ເຕັກໂນໂລຊີ ແລະ ທ່ານ ລັດຖະມົນຕີວ່າການກະຊວງສຶກສາ ແລະ ບຳລຸງສ້າງ. ເມື່ອໄດ້ຮັບການມອບສິດຈາກທ່ານນາຍົກລັດຖະມົນຕີ, ທ່ານຮອງນາຍົກລັດຖະມົນຕີ ຫງວຽນຊວນຟຸກ ໄດ້ເຮັດແຈ້ງຕື່ມອີກບາງບັນຫາໃນການຊີ້ນຳ, ການບໍລິຫານດ້ານເສດຖະກິດ-ສັງຄົມທີ່ຂຶ້ນກັບຄວາມຮັບຜິດຊອບຂອງລັດຖະບານ ແລະ ຕອບຄຳຊັກຖາມໂດຍກົງຂອງບັນດາສະມາຊິກສະພາແຫ່ງຊາດ. ທ່ານ ຫງວຽນແຮ້ງຟຸກ, ຫົວໜ້າຫ້ອງວ່າການສະພາແຫ່ງຊາດ, ຕີລາຄາວ່າ:
“ການຊັກຖາມມີການປ່ຽນໃໝ່. ວີທີຕັ້ງຄຳຖາມຂອງບັນດາສະມາຊິກ ແລະ ວິທີຕອບຄຳຖາມຂອງບັນດາລັດຖະມົນຕີ ແມ່ນສຸມໃສ່ບັນຫາທີ່ຫາງສຽງສົນໃຈ, ຄຳຕອບມີຄຸນນະພາບ ແລະ ໃກ້ຊິດກັບຕົວຈິງ. ສະພາແຫ່ງຊາດໄດ້ຍົກອອກມະຕິ ກ່ຽວກັບການຊັກຖາມ ແລະ ຕອບຄຳຊັກຖາມ. ຂ້າພະເຈົ້າສະແດງຄວາມເຊື່ອໝັ້ນວ່າ ວາລະຊັກຖາມແມ່ນຜົນສຳເລັດ”.
ກອງປະຊຸມສະໄໝສາມັນເທື່ອທີ 9, ສະພາແຫ່ງຊາດຫວຽດນາມ ຊຸດທີ 13 ກຳນົດບັນດາໜ້າວຽກທີ່ຄວນເຮັດຢ່າງທັນທີ, ບັນດາໜ້າວຽກຄວນສືບຕໍ່ປະຕິບັດສຳເລັດໃນປີ 2015 ເພື່ອມຸ່ງໄປເຖິງຄາດໝາຍພັດທະນາແບບຍືນຍົງ. ຜົນສຳເລັດຂອງກອງປະຊຸມສະໄໝສາມັນເທື່ອທີ 9, ສະພາແຫ່ງຊາດຫວຽດນາມ ຊຸດທີ 13 ຈະສ້າງຄວາມໄວ້ເນື້ອເຊື່ອໃຈໃຫ້ພໍ່ແມ່ປະຊາຊົນ ແລະ ຜູ້ມີສິດເລືອກຕັ້ງໃນທົ່ວປະເທດ.