ກອງປະຊຸມສະໄໝສາມັນເທື່ອທີ 7 ສະພາແຫ່ງຊາດຫວຽດນາມຊຸດທີ 13 ໄດ້ອັດລົງໃນຕອນເຊົ້າວັນທີ 24/6, ພາຍຫຼັງດຳເນີນມາເປັນເວລາ 28 ວັນ. ທີ່ກອງປະຊຸມຄັ້ງນີ້, ຫຼາຍບັນດາທີ່ສຳຄັນໄດ້ຖືກນຳມາ ປຶກສາຫາລື, ໃນນັ້ນ, ຕ້ອງເວົ້າເຖິງການຮັບຮອງເອົາຮ່າງກົດໝາຍຫຼາຍສະບັບ ແລະ ເປັນຄັ້ງທຳອິດ ທີ່ສະພາແຫ່ງຊາດຫວຽດນາມໄດ້ອອກແຈ້ງການຄັດຄ້ານເລື່ອງຈີນຕັ້ງຮ້ານເຈາະນ້ຳມັນໄຮຢາງ 981 ເຂົ້າເຄື່ອນໄຫວໃນເຂດເສດຖະກິດຈຳເພາະ ແລະ ໄຫຼ່ທະວີບຂອງຫວຽດນາມ. ສະພາແຫ່ງຊາດຫວຽດນາມຍັງໄດ້ຕົກລົງໜູນຊ່ວຍເງິນ 16.000 ຕື້ດົງເພື່ອຊ່ວຍຊາວປະມົງຕໍ່ກຳປັ່ນຫາປາຢູ່ໄກຝັ່ງ, ຕໍ່ກຳປັ່ນ ແລະ ປະກອບເຄື່ອງພາຫະນະໃຫ້ກຳລັງຕຳຫຼວດທະເລ, ກວກກາການປະມົງ.
ວາລະອັດກອງປະຊຸມສະໄໝສາມັນເທື່ອທີ 7 ສະພາແຫ່ງຊາດຫວຽດນາມຊຸດທີ 13
(ພາບ:TTXVN)
|
ກອງປະຊຸມສະໄໝສາມັນເທື່ອທີ 7 ສະພາແຫ່ງຊາດຫວຽດນາມຊຸດທີ 13 ໄດ້ດຳເນີນໃນສະພາບເສດຖະກິດຫວຽດນາມໃນຊຸມເດືອນຕົ້ນປີ 2014 ມີການຜັນແປຕາມທ່າອຽງທີ່ດີ, ລາຍຮັບງົບປະມານບັນລຸໝາກຜົນທີ່ຕັ້ງໜ້າພໍສົມຄວນ. ແຕ່ການທີ່ຈີນຕັ້ງຮ້ານເຈາະນ້ຳມັນໄຮຢາງ 981 ເຂົ້າເຄື່ອນໄຫວໃນເຂດເສດຖະກິດຈຳເພາະ ແລະ ໄຫຼ່ທະວີບຂອງຫວຽດນາມໄດ້ພາໃຫ້ເກີດການລະແວງສົງໄສຫຼາຍຢ່າງ ແລະ ວາງສິ່ງທ້າທາຍບໍ່ແມ່ນໜ້ອຍ.
ຕັ້ງໜ້າຫັນລັດຖະທຳມະນູນປີ 2013 ໃຫ້ເປັນລະບອບລະບຽບການ.
ນັບແຕ່ຫົວທີ, ກອງປະຊຸມສະໄໝສາມັນເທື່ອທີ 7 ສະພາແຫ່ງຊາດ ຫວຽດນາມຊຸດທີ 13 ໄດ້ຮັບການກຳນົດວ່າແມ່ນກອງປະຊຸມຂອງວຽກງານສ້າງກົດໝາຍ. ວັນເວລາທີ່ສະຫງວນໃຫ້ວຽກງານນີ້ແມ່ນກວມເອົາ 2/3 ເວລາປະຊຸມທັງໝົດຂອງ ສະພາແຫ່ງຊາດ, ໃນນັ້ນ, ໃຫ້ບຸລິມະສິດປຶກສາຫາລື ແລະ ຮັບຮອງເອົາບັນດາກົດໝາຍທີ່ກ່ຽວຂ້ອງເຖິງການຈັດຕັ້ງກົງຈັກແຫ່ງລັດ, ເສດຖະກິດການຕະຫຼາດຕາມກຳນົດທິດສັງຄົມນິຍົມ, ສິດທິມະນຸດ. ທີ່ກອງປະຊຸມສະໄໝສາມັນເທື່ອນີ້, ສະພາ ແຫ່ງຊາດ ຫວຽດນາມໄດ້ພິຈາລະນາ, ຮັບຮອງເອົາກົດໝາຍ 11 ສະບັບ ແລະ ມະຕິ 2 ສະບັບ, ໃຫ້ຄຳເຫັນໃສ່ຮ່າງກົດໝາຍ 16 ສະບັບ ແລະ ມະຕິ 1 ສະບັບ. ສະພາແຫ່ງຊາດຍັງຕົກລົງນຳຮ່າງກົດໝາຍວ່າດ້ວຍການແຫ່ຂະບວນປະທ້ວງເພີ່ມເຕີມເຂົ້າໃນໂຄງການສ້າງລັດຖະບັນຍັດປີ 2015. ຕາມທ່ານຮອງຫົວໜ້າຫ້ອງວ່າການ ສະພາ ແຫ່ງຊາດຫວຽດນາມ ຫງວຽນຊີ້ຢຸ້ງ ແລ້ວ, ບໍ່ມີວັນທີ່ສະພາແຫ່ງຊາດ ຫວຽດນາມມີກອງປະຊຸມດ້ວຍເນື້ອໃນສ້າງກົດໝາຍທີ່ກ້ວາງໃຫຍ່ເຊັ່ນນັ້ນ. ນີ້ແມ່ນການເຄື່ອນໄຫວແນໃສ່ສືບຕໍ່ປະຕິບັດກອງປະຊຸມໃຫຍ່ຄັ້ງທີ 9 ຂອງພັກກອມມູນິດຫວຽດນາມ ແລະ ຫັນລັດຖະທຳມະນູນປີ 2013 ໃຫ້ເປັນລະບອບລະບຽບການ. ທ່ານດິງຊວນຖາວ ສ.ສ.ຊ ນະຄອນຮ່າໂນ້ຍເປີດເຜີຍວ່າ:
“ 6 ເດືອນຕົ້ນປີນີ້ ແມ່ນໄລຍະທຳອິດທີ່ລັດຖະທຳມະນູນປີ 2013 ມີຜົນສັກສິດ. ການສ້າງກົດໝາຍຄັ້ງນີ້ ແມ່ນມີການຫັນປ່ຽນຢ່າງຕັ້ງໜ້າຢູ່ບ່ອນວ່າ ເມື່ອພິຈາລະນະບັນດາມາດຕາຂອງກົດໝາຍ ກໍລ້ວນແຕ່ເລ່ັງໃສ່ສິດຂອງປະຊາຊົນ, ຂອງອົງການຈັດຕັ້ງ. ຖ້າຫາກກ່ອນນີ້, ການສ້າງກົດໝາຍ, ຕົ້ນຕໍແມ່ນເນັ້ນເຖິງການຄຸ້ມຄອງຂອງລັດນັ້ນ, ແຕ່ປະຈຸບັນ, ແມ່ນຮັບປະກັນສິດຂອງປະຊາຊົນ ເພື່ອປະກອບສ່ວນໃຫ້ແກ່ຜົນສຳເລັດຂອງພາລະກິດ. ອີກອັນໜຶ່ງ ແມ່ນຈິດໃຈຂອງບັນດາ ສ.ສ.ຊ ໄດ້ເສີມຂະຫຍາຍບົດບາດ ແລະ ຄວາມຮັບຜິດຊອບຕໍ່ໜ້າຜູ້ມີສິດເລືອກຕັ້ງເປັນຢ່າງດີ, ເປັນຕົ້ນແມ່ນການປຶກສາຫາລືກ່ຽວກັບບັນດາຮ່າງກົດໝາຍ, ບໍ່ເຫັນມີກອງປະຊຸມເທື່ອໃດທີ່ຈຳນວນ ສ.ສ.ຊ ຈົດຊື່ກ່າວຄຳເຫັນຫຼາຍທົບ 2 - 3 ເທົ່າເມື່ອທຽບໃສ່ຈຳນວນ ສ.ສ.ຊ ໄດ້ຮັບອະນຸຍາດກ່າວຄຳເຫັນຄືກອງປະຊຸມເທື່ອນີ້. ສັງເກດໂດຍສັງລວມແລ້ວ, ຄຸນນະພາບການສ້າງກົດໝາຍ ແລະ ການອອກບັນດາມະຕິທີ່ກອງປະຊຸມ ສະໄໝສາມັນເທື່ອນີ້ ແມ່ນມີບາດກ້າວໃໝ່ ”
ສະແດງເຈດຈຳນົງຂອງປະຊາຊົນກ່ຽວກັບທະເລຕາເວັນອອກຢ່າງຈະແຈ້ງ
ທີ່ກອງປະຊຸມສະໄໝສາມັນເທື່ອນີ້, ໂດຍຕາງໜ້າຜູ້ມີສິດເລືອກຕັ້ງໃນທົ່ວປະເທດ, ບັນດາ ສ.ສ.ຊ ໄດ້ຄັດຄ້ານຢ່່າງຮຸນແຮງຕໍ່ເລື່ອງ ຈີນຕັ້ງຮ້ານເຈາະນ້ຳມັນໄຮຢາງ 981 ເຂົ້າເຄື່ອນໄຫວໃນເຂດເສດຖະກິດຈຳເພາະ ແລະ ໄຫຼ່ທະວີບຂອງຫວຽດນາມ. ໃນມື້ທຳອິດຂອງກອງປະຊຸມ, ສະພາແຫ່ງຊາດຫວຽດນາມ ໄດ້ຮັບຟັງ ແລະ ປຶກສາຫາລືບົດລາຍງານຂອງລັດຖະບານກ່ຽວກັບສະພາບການຢູ່ທະເລຕາເວັນອອກ. ບົນພື້ນຖານການປະກອບຄຳຄິດເຫັນຂອງບັນດາ ສ.ປ.ຊ, ສະພາແຫ່ງຊາດໄດ້ອອກແຈ້ງການເລກທີ 2 ສະແດງທັດສະນະ, ທ່າທີຕໍ່ໜ້າການກະທຳຜິດພາດຂອງຈີນ. ແຈ້ງການສະບັບນີ້ໄດ້ຮັບຖືວ່າຄືດັ່ງ ຖະແຫຼງການຂອງສະພາແຫ່ງຊາດຫວຽດນາມ ຊຶ່ງໄດ້ຢືນຢັນເລື່ອງຈີນຕັ້ງຮ້ານເຈາະນ້ຳມັນໄຮຢາງ 981 ເຂົ້າເຄື່ອນໄຫວໃນເຂດເສດຖະກິດຈຳເພາະ ແລະ ໄຫຼ່ທະວີບຂອງຫວຽດນາມ ແມ່ນການລ່ວງລ້ຳອະທິປະໄຕ, ສິດອະທິປະໄຕ ແລະ ສິດອຳນາດສານຂອງຫວຽດນາມ. ເນື້ອໃນເຫຼົ່ານີ້ສືບຕໍ່ຖືກທ່ານປະທານສະພາ ແຫ່ງຊາດ ຫງວຽນຊິງຮຸ່ງ ກ່າວຢ້ຳຄືນໃນບົດປາໄສອັດກອງປະຊຸມສະໄໝສາມັນເທື່ອທີ 7 ສະພາແຫ່ງຊາດຫວຽດນາມຊຸດທີ 13. ວິທີການປະພຶດຕໍ່ກັບບັນດາການຜັນແປທີ່ສັບສົນຢູ່ທະເລຕາເວັນອອກ ອາດຈະເຫັນໄດ້ວ່າ ສະພາແຫ່ງຊາດໄດ້ສະແດງໃຫ້ເຫັນວິໄສທັດ, ວິທີການແກ້ໄຂຢ່າງໜັກແໜ້ນ, ແລະ ລະມັດລະວັງ. ທ່ານ ຫງວຽນທ້າຍຮອກ ສ.ສ.ຊ ແຂວງ ຟູ້ອຽນ ໃຫ້ຂໍ້ສັງເກດວ່າ :
“ ນີ້ແມ່ນກອງປະຊຸມທີ່ຟົດຟື້ນດ້ວຍເນື້ອໃນຫຼາຍປະການໄດ້ຮັບການພິຈາລະນາດ້ວຍຈິດໃຈຮັບຜິດຊອບສູງ. ກ່ຽວກັບທະເລຕາເວັນອອກ, ຜູ້ມີສິດເລືອກຕັ້ງມີຄວາມສົນໃຈ ແລະ ສ.ສ.ຊ ກໍໄດ້ສະແດງໃຫ້ເຫັນຈົນສຸດຄວາມຮັບຜິດຊອບຂອງຕົນ. ສ.ສ.ຊ ໄດ້ສະແດງຄວາມນຶກຄິດ, ຄວາມໃນໃຈ, ຄວາມມຸ່ງມາດປາດຖະໜາ ແລະ ເຈດຈຳນົງຄວາມຕັດສິນໃຈຂອງຜູ້ມີສິດເລືອກຕັ້ງກ່ຽວກັບບັນຫາທະເລຕາເວັນອອກທີ່ກອງປະຊຸມສະພາແຫ່ງຊາດ”
ເປັນໜ້າສົນໃຈ, ສະພາແຫ່ງຊາດກໍໄດ້ຕົກລົງຢ່າງທັນການ, ແທດເໝາະກັບຈິດໃຈຂອງປະຊາຊົນ, ນັ້ນແມ່ນໄດ້ຕົກລົງໜູນຊ່ວຍເງິນ 16.000 ຕື້ດົງເພື່ອຊ່ວຍຊາວປະມົງຕໍ່ກຳປັ່ນຫາປາຢູ່ໄກຝັ່ງ, ຕໍ່ກຳປັ່ນ ແລະ ປະກອບເຄື່ອງ ພາຫະນະໃຫ້ກຳລັງຕຳຫຼວດທະເລ, ກວກກາການປະມົງ. ທ່ານ ຮີງຈ້ອງເງັ້ຍ ສ.ສ.ຊ ນະຄອນໂຮ່ຈິມິນຖືວ່າ :
“ ປະຈຸບັນ, ສະພາແຫ່ງຊາດ, ຂະແໜງການ ຂັ້ນຕ່າງໆພວມເຮັດຈົນສຸດຄວາມສາມາດຂອງຕົນເພື່ອສະໜັບສະໜູນການຕໍ່ສູ້ໃນສະຖານທີ່ຕົວຈິງ, ໃນນັ້ນມີການໜູນຊ່ວຍຊາວປະມົງ, ກຳລັງປະຕິບັດກົດໝາຍບົນທະເລ, ຊຶ່ງແມ່ນບັນດາຜູ້ຕິດພັນກັບທະເລ ປົກປັກຮັກສາອະທິປະໄຕຂອງປະເທດຊາດ. ເພາະສະນັ້ນ, ການຮັບຮອງເອົາການໜູນຊ່ວຍເງິນ 16.000 ຕື້ດົງເພື່ອຊ່ວຍຊາວປະມົງ, ກຳລັງຕຳຫຼວດທະເລ, ກຳລັງກວກກາການປະມົງ ແມ່ນໄດ້ຮັບການເຫັນດີເຫັນພ້ອມຈາກບັນດາ ສ.ສ.ຊ ”
ແລະ ກໍໃນກອງປະຊຸມສະໄໝສາມັນເທື່ອນີ້, ຕໍ່ໜ້າບັນດາການຜັນແປໄປຢ່າງສັບສົນຢູ່ທະເລຕາເວັນອອກ , ສະພາແຫ່ງຊາດໄດ້ສະເໜີລັດຖະບານສືບຕໍ່ຍູ້ໄວການສ້າງໂຄງປະກອບພື້ນຖານເສດຖະກິດຄືນໃໝ່ຕິດພັນກັບການຫັນປ່ຽນຮູບແບບການເຕີບໂຕ, ສ້າງໂຄງປະກອບຂະແໜງກະສີກຳຄືນໃໝ່, ພັດທະນາເສດຖະກິດທະເລຕິດພັນກັບການປົກປັກຮັກສາອະທິປະໄຕເຂດທະເລໝູ່ເກາະຂອງປະເທດຊາດ.
ກອງປະຊຸມສະໄໝສາມັນເທື່ອທີ 7 ສະພາແຫ່ງຊາດຫວຽດນາມຊຸດທີ 13 ອັດລົງແລ້ວ, ໄດ້ເປັນຂີດໝາຍພິເສດໃນການເຄື່ອນໄຫວຂອງສະພາແຫ່ງຊາດ. ໝາກຜົນຂອງກອງປະຊຸມໄດ້ສ່ອງແສງຄວາມມຸ່ງມາດປາດຖະໜາຂອງຜູ້ມີສິດເລືອຕັ້ງ, ສະແດງໃຫ້ເຫັນພາລະບົດບາດສ້າງກົດໝາຍ, ຕິດຕາມກວດກາຂອງອົງການທີ່ມີສິດອຳນາດສູງສຸດຂອງລະບົບການເມືອງ.