(vovworld) - ວັນທີ 19/11, ຮ່າງກົດໝາຍວ່າດ້ວຍທີ່ດິນສະບັບປັບປຸງ ຖືກຍົກອອກມາປຶກສາຫາລືໃນກອງປະຊຸມສະໄຫມສາມັນເທື່ອທີ 4, ສະພາແຫ່ງຊາດ ຫວຽດນາມ ຊຸດທີ 13. ບັນດາສະມາຊິກສະພາແຫ່ງຊາດ ໄດ້ຕີລາຄາສູງບັນດາຈຸດໃຫມ່ຂອງຮ່າງກົດໝາຍວ່າດ້ວຍທີ່ດິນສະບັບປັບປຸງ, ໃນນັ້ນ ໃຫ້ບຸລິມະສິດແກ້ໄຂກອງທຶນທີ່ດິນຮັບໃຊ້ການພັດທະນາກະສິກຳ, ແບ່ງຂັ້ນເມື່ອປະຕິບັດການວາງແຜນກຳນົດນຳໃຊ້ທີ່ດິນ ແລະ ຈຸດໝາຍຫລຸດຜ່ອນຄຳຮ້ອງທຸກ, ການສໍ້ລາດບັງຫລວງທີ່ກ່ຽວຂ້ອງເຖິງຂົງເຂດທີ່ດິນ.
ພາຍຫລັງເກືອບ 10 ປີແຫ່ງການປະຕິບັດ, ກົດໝາຍວ່າດ້ວຍທີ່ດິນປີ 2003 ບັນລຸໄດ້ຜົນງານອັນຕັ້ງຫນ້າຫລາຍຢ່າງ. ແຕ່ຄວາມຈິງແລ້ວ, ການປະຕິບັດກົດໝາຍດັ່ງກ່າວຍັງປະກົດມີຂໍ້ຈຳກັດ, ຄວາມຫຍໍ້ທໍ້ຄື: ນະໂຍບາຍທີ່ດິນໄດ້ຮັບການປ່ຽນແປງຜ່ານຫລາຍໄລຍະ, ກົດໝາຍວ່າດ້ວຍທີ່ດິນພວມປະກາດໃຊ້ໃນປະຈຸບັນ ຍັງມີບາງເນື້ອໃນບໍ່ທັນຈະແຈ້ງບໍ່ຄົບຖ້ວນ, ບໍ່ທັນເໝາະສົມ, ບໍ່ທັນຄົບຊຸດ, ການວາງແຜນກຳນົດນຳໃຊ້ທີ່ດິນ, ການຊົດເຊີຍ, ບຸກເບີກຫນ້າພຽງ, ການກຳນົດລາຄາທີ່ດິນ, ການຫນູນຊ່ວຍການຕັ້ງຖິ່ນຖານຄົງທີ່ຄືນໃຫມ່ ແລະ ບັນດາລະບຽບການບໍລິຫານກ່ຽວກັບທີ່ດິນຍັງຈຳກັດຢູ່, ຜົນປະໂຫຍດຂອງລັດ ແລະ ປະຊາຊົນກ່ຽວກັບການຖອນທີ່ດິນ, ບຸກເບີກຫນ້າພຽງບໍ່ທັນສົມຄູ່. ແຫລ່ງກຳລັງແຮງກ່ຽວກັບທີ່ດິນ ບໍ່ທັນໄດ້ຮັບການເສີມຂະຫຍາຍຢ່າງພຽງພໍເພື່ອກາຍເປັນກຳລັງພາຍໃນຮັບໃຊ້ການພັດທະນາເສດຖະກິດສັງຄົມ. ເລື່ອງນຳໃຊ້ທີ່ດິນຢູ່ຫລາຍແຫ່ງຍັງຟຸມເຟືອຍ, ມີປະສິດທິຜົນຕຳ່, ການສໍ້ລາດບັງຫລວງ ແລະ ສິ່ງຫຍໍ້ທໍ້ໃນຂົງເຂດນີ້ຍັງໃຫຍ່ຫລວງຢູ່. ສະພາບການຮ້ອງທຸກ, ກ່າວຟ້ອງ, ການພິພາດກ່ຽວກັບທີ່ດິນຍັງຜັນແປໄປຢ່າງສັບສົນ. ພ້ອມກັບເລື່ອງແກ້ໄຂບັນດາຂໍ້ຂາດຕົກບົກຜ່ອງດັ່ງກ່າວ, ຮ່າງ ກົດໝາຍວ່າດ້ວຍທີ່ດິນ ສະບັບປັບປຸງ ມຸ່ງໄປເຖິງຈຸດໝາຍບຸລິມະສິດໃຫ້ແກ່ກອງທຶນທີ່ດິນກະສິກຳ ເພື່ອຄ້ຳປະກັນດ້ານສະບຽງອາຫານແຫ່ງຊາດ ແລະ ເນື້ອທີ່ປ່າ. ທ່ານ Uong Chu Luu ສສຊ ແຂວງ Thanh Hoa ຊີ້ແຈງວ່າ:
“ຕ້ອງນຳໃຊ້ຂໍ້ກຳນົດໃນກົດໝາຍສະບັບນີ້ເພື່ອຮັກສາເນື້ອທີ່ດິນກະສິກຳໃຫ້ໄດ້ 3,8 ລ້ານເຮັກຕາ ເພື່ອຄ້ຳປະກັນດ້ານສະບຽງອາຫານແຫ່ງຊາດ. ສິ່ງດັ່ງກ່າວຮຽກຮ້ອງຕ້ອງເພີ່ມເຕີມຂໍ້ກຳນົດໃນກົດໝາຍຕື່ມອີກ . ບັນຫາວາງອອກນັ້ນແມ່ນ ການວາງແຜນກຳນົດທີ່ດິນ, ການຫັນປ່ຽນຈຸດປະສົງນຳໃຊ້ທີ່ດິນແມ່ນຄືແນວໃດ. ປະຈຸບັນ ການກຳນົດເວລາສຳລັບທີ່ດິນກະສິກຳ ແມ່ນ 20 ປີ, ທີ່ດິນປູກຕົ້ນໄມ້ແມ່ນ 50 ປີ. ແຕ່ຕາມການກຳນົດຂອງກົດໝາຍດັ່ງກ່າວແລ້ວ, ບໍ່ຈຳແນກການກຳນົດເວລານຳໃຊ້ທີ່ດິນໄລຍະສັ້ນ ຫລື ຍາວ, ຫາກທັງໝົດລ້ວນແຕ່ກຳນົດເວລາ 50 ປີ. ຂ້າພະເຈົ້າຄິດວ່າ ການກຳນົດດັ່ງກ່າວແມ່ນເໝາະສົມ ເພາະວ່າ ມັນຈະຊ່ວຍໃຫ້ປະຊາຊົນອຸ່ນອຽນໃຈໃນການລົງທຶນ ແລະ ມີແຜນກຳນົດເພື່ອປູກຕົ້ນໄມ້ປະເພດໃດ, ສ້າງມູນຄ່າເພີ່ມສູງກວ່າ.”
ສະພາແຫ່ງຊາດປຶກສາຫາລືກ່ຽວກັບຮ່າງກົດໝາຍວ່າດ້ວຍທີ່ດິນ
ພາບ: internet |
ຮ່າງກົດໝາຍວ່າດ້ວຍທີ່ດິນ ສະບັບປັບປຸງ ໄດ້ກຳນົດວ່າ : ທັງສາມຂັ້ນຈາກສູນກາງ, ຂັ້ນແຂວງ ແລະ ເມືອງລ້ວນແຕ່ເຂົ້າຮ່ວມການວາງແຜນກຳນົດ, ແຜນການນຳໃຊ້ທີ່ດິນ. ກ່ຽວຂ້ອງເຖິງລະດັບລາຄາທີ່ດິນ, ຮ່າງ ກົດໝາຍວ່າດ້ວຍທີ່ດິນ ໄດ້ກຳນົດວ່າ: ລັດຖະບານກຳນົດລະດັບລາຄາທີ່ດິນ ແລະ ມອບໃຫ້ຄະນະກຳມະການປະຊາຊົນບັນດາແຂວງ, ນະຄອນ ກຳນົດຢ່າງລະອຽດ ແຕ່ບໍ່ໄດ້ເກີນລະດັບລາຄາຊຶ່ງລັດຖະບານໄດ້ວາງອອກ.
ການຖອນທີ່ດິນຄືນ ແລະ ກົນໄກຖອນທີ່ດິນ ແມ່ນຫນຶ່ງໃນບັນດາເນື້ອໃນໃຫມ່ຂອງຮ່າງ ກົດໝາຍວ່າດ້ວຍທີ່ດິນສະບັບປັບປຸງໃນຄັ້ງນີ້. ຕາມການກຳນົດ, ທີ່ດິນແມ່ນຂຶ້ນກັບກຳມະສິດຂອງທົ່ວປວງຊົນ, ລັດ ເປັນເຈົ້າຂອງຕາງຫນ້າ, ລັດມີສິດຖອນທີ່ດິນຄືນເພື່ອຮັບໃຊ້ຈຸດປະສົງປ້ອງກັນຊາດ, ປ້ອງກັນຄວາມສະຫງົບ, ຜົນປະໂຫຍດແຫ່ງຊາດ ແລະ ຜົນປະໂຫຍດສ່ວນລວມ. ເຖິງຢ່າງໃດກໍຕາມ, ຕາມບັນດາ ສສຊ ແລ້ວ, ຮ່າງ ກົດໝາຍວ່າດ້ວຍທີ່ດິນ ສະບັບປັບປຸງ ຄວນມີບັນດາຂໍ້ກຳນົດລະອຽດຕື່ມອີກ ເພື່ອແກ້ໄຂຄວາມຂັດແຍ່ງທີ່ເກິດຂຶ້ນໃນຕົວຈິງລະຫວ່າງການຖອນທີ່ດິນຄືນ ຮັບໃຊ້ຈຸດປະສົງເພື່ອຊີວິດການເປັນຢູ່ຂອງປະຊາຊົນ ແລະ ບັນດາຈຸດໝາຍອື່ນ, ຈາກນະໂຍບາຍຊົດເຊີຍຕະຫລອດຮອດການບຸກເບີກຫນ້າພຽງ.
ຈຸດໃຫມ່ອື່ນອີກອັນຫນຶ່ງໃນຮ່າງກົດໝາຍວ່າດ້ວຍທີ່ດິນ ສະບັບປັບປຸງ ນັ້ນແມ່ນການກຳນົດ ບັນຊີຄ້ຳປະກັນ ເມື່ອປະຕິບັດບັນດາໂຄງການລົງທຶນ. ກ່ຽວກັບບັນຫານີ້, ທ່ານ Tran Thanh Man ສສຊ ແຂວງ Can Tho ຊີ້ແຈງວ່າ:
“ໃນຂໍ້ມາດຕາ 63 ໄດ້ກຳນົດວ່າ ຕ້ອງມີ ບັນຊີຄ້ຳປະກັນ ເພື່ອປະຕິບັດບັນດາໂຄງການລົງທຶນ, ຂ້າພະເຈົ້າເຫັນວ່າ ຂໍ້ກຳນົດນີ້ແມ່ນໃຫມ່ອ່ຽມ. ກ່ອນນີ້ ບັນດາວິສາຫະກິດມາລົງທຶນຢູ່ທ້ອງຖິ່ນໄດ້ຮັບທີ່ດິນ ແຕ່ບໍ່ມີບັນຊີຄ້ຳປະກັນ ລົງທຶນ,ບຸກເບີກຫນ້າພຽງບໍ່ເປັນລະບົບແລ້ວປະໄວ້, ທ້ອງຖິ່ນຍາກທີ່ຮັບປະກັນຄວາມປອດໄພໄດ້. ແຕ່ໄລຍະຈະມາເຖິງ, ບັນດາໂຄງການດັ່ງກ່າວຖ້າມີ ບັນຊີຄ້ຳປະກັນ ພວກເຮົາຈະຄຸ້ມຄອງໄດ້. ”
ຮ່າງ ກົດໝາຍວ່າດ້ວຍທີ່ດິນ ສະບັບປັບປຸງ ລວມມີ: 14 ພາກ ແລະ 190 ມາດຕາ, ເພີ່ມຂຶ້ນ 6 ພາກ ແລະ 44 ມາດຕາ ເມື່ອທຽບໃສ່ ກົດໝາຍວ່າດ້ວຍທີ່ດິນປີ 2003 ເພື່ອແກ້ໄຂຂໍ້ຄົງຄ້າງ, ຈຳກັດ ຂອງກົດໝາຍປະຈຸບັນ. ຕາມທ່ານ Nguyen Minh Quang ລັດຖະມົນຕີກະຊວງຊັບພະຍາກອນ ແລະ ສິ່ງແວດລ້ອມ ຫວຽດນາມ ແລ້ວ, ຮ່າງ ກົດໝາຍວ່າດ້ວຍທີ່ດິນ ຄັ້ງນີ້ ໄດ້ວາງຈຸດໝາຍ: ນຳໃຊ້ທີ່ດິນຢ່າງມີປະສິດທິຜົນ, ຮັບປະກັນຜົນປະໂຫຍາດຂອງລັດ, ປະຊາຊົນ ແລະ ວິສາຫະກິດໃນການນຳໃຊ້ທີ່ດິນຢ່າງກົມກ່ຽວ ແລະຫລຸດຜ່ອນຄຳຮ້ອງທຸກ, ການສໍ້ລາດບັງຫລວງກ່ຽວກັບທີ່ດິນ. ຮ່າງ ກົດໝາຍວ່າດ້ວຍທີ່ດິນ ສະບັບປັບປຸງຈະສືບຕໍ່ໄດ້ຮັບການປັບປຸງເພ່ືອຍື່ນສະເຫນີຕໍ່ສະພາແຫ່ງຊາດຮັບຮອງເອົາໃນສະໄຫມປະຊຸມຄັ້ງຈະມາເຖິງ./.