(vovworld)- ກອງປະຊຸມຄັ້ງທີ 8 ຄະນະບໍລິຫານງານສູນກາງພັກກອມມູນິດຫວຽດນາມຊຸດທີ 11 ຫາກໍດຳເນີນໄປຢູ່ຮ່າໂນ້ຍ ດ້ວຍຫລາຍເນື້ອໃນສຳຄັນ ມີຜົນສະທ້ອນຢ່າງເລິກເຊິ່ງ ແລະ ກວ້າງຂວາງ, ໄດ້ຮັບຄວາມສົນໃຈຈາກທົ່ວພັກ, ທົ່ວປວງຊົນ, ທົ່ວກອງທັບຫວຽດນາມ. ນີ້ບໍ່ແມ່ນບັນດາເນື້ອໃນໃຫມ່ ແຕ່ສິ່ງເປັນຫນ້າສົນໃຈນັ້ນແມ່ນ ບັນດາເນື້ອໃນດັ່ງກ່າວແມ່ນວາງອອກໃນສະພາບການໃຫມ່ ເມື່ອໂລກ ແລະ ພາກພື້ນ ຍັງມີການຜັນແປສັບສົນຫລາຍຢ່າງ, ດ້ານການເມືອງ, ເສດຖະກິດ, ຄວາມສະຫງົບປອດໄພ, ສັງຄົມ…ຍາກທີ່ຈະຄາດຄະເນໄດ້. ໃນລາຍການສະຖານະການການເມືອງພາກນີ້ ພວກເຮົາຄັດສະເຫນີບົດຂຽນຂອງນັກຂ່າວ ຫງວຽນດັງຕຽນ, ຜູ້ອຳນວຍການໃຫຍ່ວິທະຍຸກະຈາຍສຽງຫວຽດນາມ ກ່ຽວກັບລັດຖະນະໂຍບາຍດັ່ງກ່າວ.
ກ່ຽວກັບເນື້ອໃນການພັດທະນາເສດຖະກິດສັງຄົມ, ຕາມນັກຂ່າວ ຫງວຽນດັງຕຽນແລ້ວ, ກອງປະຊຸມສູນກາງຄັ້ງນີ້ແມ່ນເອົາໃຈໃສ່ເປັນພິເສດໃນການເຮັດແຈ້ງບັນດາບັນຫາຄື: ຮັກສາເສດຖະກິດມະຫາພາກເປັນປົກກະຕິ, ໄພເງິນເຟີ້, ສະພາບຫນີ້ເສຍ, ຕະຫລາດອະສັງຫາລິມະຊັບ, ສະພາບເຫລືອເງິນສົດແຕ່ຂາດທຶນຮອນ, ໝາກຜົນຂອງບັນດາຄວາມມານະພະຍາຍາມປັບປຸງສະພາບແວດລ້ອມແຫ່ງການລົງທຶນດຳເນີນທຸລະກິດ, ແກ້ໄຂຄວາມຫຍຸ້ງຍາກໃຫ້ແກ່ບັນດາວິສາຫະກິດ.
ກອງປະຊຸມສູນກາງຄັ້ງທີ 8 ຂອງພັກກອມມູນິດຫວຽດນາມ
ພາບ:internet
|
ການຟື້ນຕົວລະດັບຈະເລີນເຕີບໂຕຕິດພັນກັບການສ້າງໂຄງປະກອບພື້ນຖານເສດຖະກິດຄືນໃຫມ່, ການປ່ຽນໃຫມ່ຮູບແບບການເຕີບໂຕ ແລະ ປະຕິບັດ 3 ຂອດບຸກທະລຸຍຸດທະສາດ, ວຽກງານຮັບປະກັນສະຫວັດດີການ, ຮັບປະກັນຊີວິດສັງຄົມ ແລະ ຍົກສູງຊີວິດການເປັນຢູ່ໃຫ້ແກ່ປະຊາຊົນ ແມ່ນບັນດາບັນຫາທີ່ກອງປະຊຸມໄດ້ປຶກສາຫາລື ແລະ ໃຫ້ຄຳເຫັນກຳນົດທິດເພື່ອໃຫ້ກອງປະຊຸມສະໄຫມສາມັນເທື່ອທີ 6 ສະພາແຫ່ງຊາດຫວຽດນາມ ຊຸດທີ 13 ຄັ້ງຈະມາເຖິງປຶກສາຫາລື, ຕົກລົງ.
ກ່ຽວກັບການປ່ຽນໃຫມ່ການສຶກສາ ບຳລຸງສ້າງໂດຍພື້ນຖານ ແລະ ຮອບດ້ານ, ນັກຂ່າວ ຫງວຽນດັງຕຽນ ຖືວ່າ: ນັ້ນແມ່ນຫນຶ່ງໃນບັນດາເນື້ອໃນທັງມີລັກສະນະຍຸດທະສາດທັງມີຄວາມຈຳເປັນທີ່ສຸດ. ຜົນງານຂອງຂະແຫນງສຶກສາ ບຳລຸງສ້າງໃນຫລາຍທົດສະວັດຜ່ານມາ ພິເສດພາຍຫລັງການປ່ຽນໃຫມ່ໄດ້ນຳມາເຊິ່ງຫລາຍແຫລ່ງກຳລັງທີ່ມີຄຸນຄ່າສູງ ກະທົບໂດຍກົງເຖິງບັນດາຂົງເຂດຂອງຊີວິດສັງຄົມ. ເຖິງຢ່າງໃດກໍຕາມ, ຂະແຫນງສຶກສາບຳລຸງສ້າງຍັງມີສິ່ງທີ່ຄົງຄ້າງ, ຂາດຕົກບົກຜ່ອງບໍ່ແມ່ນຫນ້ອຍ ພິເສດໃນໄລຍະພັດທະນາໃຫມ່ຂອງປະເທດຊາດ ພວມຕ້ອງການລັດຖະນະໂຍບາຍຢ່າງຮອບດ້ານ, ໂດຍພື້ນຖານ, ສົມກັບຂົງເຂດທີ່ໄດ້ຮັບຖືວ່າແມ່ນລັດຖະນະໂຍບາຍຕົ້ນຕໍນີ້.
ການປ່ຽນໃຫມ່ການສຶກສາໂດຍພື້ນຖານ ແລະ ຮອບດ້ານ ແມ່ນການປ່ຽນໃຫມ່ຈີນຕະນາການ, ທັດສະນະ, ແນວຄວາມຄິດຊີ້ນຳນຳພາຕະຫລອດຮອດຈຸດໝາຍ, ເນື້ອໃນ, ທິດທາງການສຶກສາບຳລຸງສ້າງ ພ້ອມກັບບັນດາກົນໄກ, ນະໂຍບາຍຈັດຕັ້ງປະຕິບັດ. ການປ່ຽນໃຫມ່ຈາກການຊີ້ນຳນຳພາຂອງພັກ, ການຄຸ້ມຄອງລັດຕະຫລອດຮອດການປ່ຽນໃຫມ່ບັນດາຮາກຖານການສຶກສາ ບຳລຸງສ້າງ ແລະ ການເຂົ້າຮ່ວມຂອງຄອບຄົວ, ວົງຄະນາຍາດ ແລະ ສັງຄົມ. ກອງປະຊຸມສູນກາງຄັ້ງທີ 8 ໄດ້ຢືນຢັນການລົງທຶນໃຫ້ແກ່ການສຶກສາແມ່ນການລົງທຶນໃຫ້ແກ່ການພັດທະນາ, ໄດ້ຮັບບຸລິມະສິດກ່ອນບາດກ້າວຫນຶ່ງໃນບັນດາໂຄງການ, ແຜນການພັດທະນາເສດຖະກິດສັງຄົມ, ຫັນປ່ຽນວິວັດການສຶກສາຢ່າງແຂງແຮງເພື່ອພັດທະນາກຳລັງຄວາມສາມາດຮອບດ້ານ ແລະ ຄຸນທາດຂອງຜູ້ຮຽນດ້ວຍທິດນຳຮຽນໄປຄຽງຄູ່ກັບການປະຕິບັດ, ການສຶກສາໃນໂຮງຮຽນຕ້ອງຕິດພັນກັບການສຶກສາໃນຄອບຄົວ ແລະ ສັງຄົມ, ທັງຕອບສະຫນອງຄວາມຮຽກຮ້ອງຕ້ອງການກ່ຽວກັບດ້ານຈຳນວນ, ທັງເອົາໃຈໃສ່ຍົກສູງຄຸນນະພາບ, ລະບົບການສຶກສາທີ່ມີລັກສະນະເປີດ, ມີໄຫວພິບ, ຮັບປະກັນການເຊື່ອມຕໍ່ລະຫວ່າງບັນດາລະດັບ ແລະ ລະຫວ່າງວິທີການສິດສອນ, ສ້າງເງື່ອນໄຂໃຫ້ແກ່ການຮຳ່ຮຽນຕະຫລອດຊີວິດ, ສ້າງສັງຄົມແຫ່ງການຮຳ່ຮຽນ.
ກ່ຽວກັບຮ່າງລັດຖະທຳມະນູນປີ 1992 ສະບັບປັບປຸງ. ນີ້ແມ່ນຫນ້າທີ່ສຳຄັນພິເສດຂອງພັກ, ລັດ ແລະ ທົ່ວລະບົບການເມືອງ, ເພາະວ່າ ລັດຖະທຳມະນູນແມ່ນເອກະສານການເມືອງ - ນິຕິກຳພື້ນຖານ, ແມ່ນກົດໝາຍຕົ້ນສະບັບ ຂອງລັດເພື່ອປັບປຸງບັນດາການພົວພັນສັງຄົມຕົ້ນຕໍທີ່ສຸດມີລັກສະນະພື້ນຖານ, ສະແດງໃຫ້ເຫັນເນື້ອແທ້ຂອງລັດ ແລະ ລະບອບ. ຢູ່ແຕ່ລະໄລຍະປະຫວັດສາດ, ອີງໃສ່ຈຸດສະເພາະ, ສະພາບການ ແລະ ການພັດທະນາຂອງປະເທດຊາດ ພັກ, ລັດ ມີແຜນນະໂຍບາຍຄົ້ນຄ້ວາ, ປັບປຸງ, ເພີ່ມເຕີມລັດຖະທຳມະນູນໃຫ້ເໝາະສົບກັບລັກສະນະ ແລະ ການພັດທະນາສັງຄົມຂອງໄລຍະປະຫວັດສາດນັ້ນ. ກອງປະຊຸມສູນກາງຄັ້ງນີ້ ສືບຕໍ່ສະຫງວນເວລາສ່ວນຫລາຍເພື່ອຄົ້ນຄ້ວາ, ປຶກສາຫາລື, ປະກອບຄຳເຫັນລະອຽດເຂົ້າໃນແຕ່ລະພາກ, ມາດຕາ ແລະ ຮ່າງລັດຖະທຳມະນູນທັງໝົດ ເພື່ອໃຫ້ຄະນະຮຽບຮຽງຮ່າງລັດຖະທຳມະນູນປີ 1992 ສະບັບປັບປຸງສຳເລັດ ເພື່ອຍື່ນສະເຫນີຕໍ່ກອງປະຊຸມສະໄຫມສາມັນເທື່ອທີ 6 ສະພາແຫ່ງຊາດຫວຽດນາມຊຸດທີ 13 ຮັບຮອງເອົາ.
ກ່ຽວກັບຍຸດທະສາດປົກປັກຮັກສາປະເທດຊາດໃນສະພາບການໃຫມ່. ທັດສະນະທີ່ມີລັກສະນະຫລັກການຂອງທົ່ວພັກ, ທົ່ວກອງທັບ ແລະ ທົ່ວປວງຊົນ ນັ້ນແມ່ນ ໃນທຸກສະພາວະການຕ້ອງປົກປັກຮັກສາເອກະລາດ, ອະທິປະໄຕ, ເອກະພາບ, ຜືນແຜນດິນອັນຄົບຖ້ວນຂອງປະເທດຊາດຢ່າງໝັ້ນຄົງ, ປົກປ້ອງພັກ, ລັດ, ປະຊາຊົນ ແລະ ລະບອບ, ຮັກສາຜົນປະໂຫຍດແຫ່ງຊາດ, ຊົນຊາດ, ປ້ອງກັນຄວາມສະຫງົບ, ສະຖຽນລະພາບດ້ານການເມືອງ, ຄວາມເປັນລະບຽບຮຽບຮ້ອຍທາງສັງຄົມ. ຕໍ່ຫນ້າການຜັນແປຢ່າງວ່ອງໄວ, ສັບສົນຂອງດ້ານການເມືອງ, ເສດຖະກິດໂລກ ແລະ ພາກພື້ນ, ເປັນຕົ້ນແມ່ນສະພາບການຢູ່ທະເລຕາເວັນອອກ, ການຕ້ານທຳລາຍຂອງບັນດາອິດທິກຳລັງເປັນປໍລະປັກ, ບັນດາການຜັນແປທີ່ຫຍໍ້ທໍ້ຈາກພື້ນຖານເສດຖະກິດການຕະຫລາດ ພ້ອມກັບຄວາມອ່ອນດ້ອຍໃນວຽກງານຊີ້ນຳນຳພາ, ຄຸ້ມຄອງ, ຍາມໃດພັກ ແລະ ລັດ ຫວຽດນາມ ກໍຮັກສາທັດສະນະ ແລະ ຍົກອອກບັນດານະໂຍບາຍສອດຄອ່ງເພື່ອປົກປັກຮັກສາປະເທດຊາດຢ່າງໝັ້ນຄົງ, ຮັກສາສະພາບແວດລ້ອມສັນຕິພາບ, ສະຖຽນລະພາບໃຫ້ແກ່ການພັດທະນາຂອງປະເທດຊາດ.
ກອງປະຊຸມສູນກາງພັກຄັ້ງທີ 8 ຊຸດທີ 11 ຫາກໍອັດລົງດ້ວຍຫລາຍລັດຖະນະໂຍບາຍສຳຄັນ ແລະ ຈຳເປັນທີ່ສຸດ. ພວກເຮົາພວມດຳລົງຊີວິດໃນສະພາບທັງມີກາລະໂອກາດ ທັງມີສິ່ງທ້າທາຍຫລາຍຢ່າງ. ທົ່ວພັກ,ທົ່ວກອງທັບ ແລະ ທ່ົວປວງຊົນ ຕ້ອງເດັດດ່ຽວສ້າງໃຫ້ໄດ້ກຳລັງແຮງພາຍໃນ, ກຳລັງແຮງດ້ານພູມປັນຍາຂອງທ່ົວປວງຊົນ, ກຳລັງແຮງຂອງປະຊາຊົນ ແລະ ພື້ນຖານອັນໝັ້ນແກ່ນຂອງລະບອບ. ແລະ ກອງປະຊຸມສູນກາງຄັ້ງທີ 8 ນີ້ໄດ້ລວບລວມບັນດາເນື້ອໃນພົ້ນເດັ່ນຂອງຈິດໃຈນັ້ນ.