ທະນາຄານແຫ່ງລັດຕົກລົງຫລຸດຜ່ອນອັດຕາດອກເບ້ຍເງິນຝາກ
ພາບ:dantri.com |
(vovworld) - ທະນາຄານແຫ່ງລັດ ຫວຽດນາມ ຫາກໍ່ຕົກລົງຫລຸດຜ່ອນ ອັດຕາດອກເບ້ຍເງິນຝາກ ແລະ ອັດຕາດອກເບ້ຍປະເພດອື່ນລົງຕື່ມອີກ 1%. ນອກນັ້ນ ທະນາຄານແຫ່ງລັດ ຍັງຕົກລົງເປີດສິນເຊື່ອໃຫ້ກູ້ຢືມສຳລັບບັນດາຂົງເຂດທີ່ບໍ່ສົ່ງເສີມ ຊຶ່ງລວມມີ: ສິນເຊື່ອຫລັກຊັບ, ອະສັງຫາລິມະຊັບ ແລະ ການໃຊ້ຈ່າຍ ເພື່ອໂອນທຶນໃຫ້ແກ່ພື້ນຖານເສດຖະກິດ, ຫນູນຊ່ວຍບັນດາວິສາຫະກິດຜະລິດດຳເນີນທຸລະກິດ. ບັນດາການກະທຳນີ້ໄດ້ຮັບຖືວ່າ ແມ່ນບາດກ້າວທີ່ເໝາະສົມໃນວິວັດການບໍລິຫານເສດຖະກິດມະຫາພາກ ດ້ວຍບັນດາມາດຕະການສິນເຊື່ອໃນສະພາບການໄພເງິນເຟີ້ພວມໄດ້ຮັບການຄວບຄຸມເປັນຢ່າງດີ.
ພາຍຫລັງທະນາຄານແຫ່ງລັດ ປະກາດເລື່ອງຫລຸດຜ່ອນອັດຕາດອກເບ້ຍບໍລິຫານ ແລະ ອັດຕາດອກເບ້ຍເພດານສຳລັບເງິນຝາກຕື່ມອີກ 1%, ທະນາຄານລົງທຶນ ແລະ ພັດທະນາ ຫວຽດນາມ ໄດ້ນຳໃຊ້ຕາຕະລາງອັດຕາດອກເບ້ຍໃຫມ່
ໃນນັ້ນອັດຕາດອກເບ້ຍໃຫ້ກູ້ຢືມໄລຍະສັ້ນແມ່ນ 14,5%/ປີ, ອັດຕາດອກເບ້ຍໃຫ້ກູ້ຢືມສຳລັບໄລຍະກາງ ແລະ ຍາວ ແມ່ນ 16%/ປີ, ອັດຕາດອກເບ້ຍໃຫ້ກູ້ຢືມສຳລັບການລົງທຶນ ແລະ ດຳເນີນທຸລະກິດຫລັກຊັບໄລຍະສັ້ນແມ່ນ 17%/ປີ, ໄລຍະກາງ ແລະ ຍາວແມ່ນ 18%/ປີ. ທ່ານ Pham Quang Tung ຮອງຜູ້ອຳນວຍການໃຫຍ່ທະນາຄານລົງທຶນ ແລະ ພັດທະນາ ຫວຽດນາມ ໃຫ້ຮູ້ວ່າ:
“ໃນຊຸມມື້ຈະມາເຖິງ, ພວກຂ້າພະເຈົ້າຄາດວ່າຈະປະກາດບັນດາບ້ວງສິນເຊື່ອທີ່ສະຫງວນໃຫ້ແກ່ບັນດາຂົງເຂດບຸລິມະສິດ ແລະ ບັນດາເປົ້າໝາຍຊຶ່ງແມ່ນລູກຄ້າທີ່ມີການພົວພັນຕິດຕໍ່ກັບທະນາຄານເປັນປະຈຳ. ນອກຈາກການຫລຸດຜ່ອນອັດຕາດອກເບ້ຍແລ້ວ, ພວກຂ້າພະເຈົ້າກໍຈະປະກາດຈຳນວນເງິນຢ່າງຈະແຈ້ງເພື່ອໃຫ້ລູກຄ້າສຳພັດ.”
ຕາມທ່ານ Do Minh Toan, ຮອງຜູ້ອຳນວຍການໃຫຍ່ທະນາຄານ A Chau ແລ້ວ, ການດັດປັບອັດຕາດອກເບ້ຍເງິນຝາກລົງ 1% ໃນຈຸດເວລານີ້ແມ່ນເໝາະສົມ ຍ້ອນຄວາມສາມາດການຊຳລະຂອງທະນາຄານຫລາຍແຫ່ງແມ່ນໄດ້ດີກວ່າເກົ່າແລ້ວ. ນອກນັ້ນ, ເງື່ອນໄຂເສດຖະກິດມະຫາພາກ, ອັດຕາໄພເງິນເຟີ້ຢູ່ໃນລະດັບຕ່ຳໃນຊຸມເດືອນມໍ່ໆມານີ້ ກໍແມ່ນສັນຍານທີ່ດີເພື່ອສາມາດຫລຸດຜ່ອນອັດຕາດອກເບ້ຍລົງ. ການຫລຸດຜ່ອນອັດຕາດອກເບ້ຍຄັ້ງນີ້ ຈະຊ່ວຍຫລຸດຜ່ອນລາຍຈ່າຍດ້ານທຶນຮອນໃຫ້ແກ່ພື້ນຖານເສດຖະກິດ ແລະ ບໍ່ສົ່ງຜົນກະທົບເຖິງການຜັນແປຂອງໄພເງິນເຟີ້ນັບແຕ່ນີ້ຮອດທ້າຍປີ. ທ່ານ Do Minh Toan ຢືນຢັນວ່າ:
“ບັນດາສັນຍານອັນຕັ້ງຫນ້າຂອງພື້ນຖານເສດຖະກິດໃນປະຈຸບັນ ໄດ້ສະແດງໃຫ້ເຫັນວ່າ ຮອດຈຸດເວລາແລ້ວທີ່ພວກເຮົາຕ້ອງຄິດເຖິງເລື່ອງຫລຸດຜ່ອນອັດຕາດອກເບ້ຍລົງ, ສະນັ້ນ ເລື່ອງຫລຸດຜ່ອນອັດຕາດອກເບ້ຍຄືແນວນີ້ ຈະປະກອບສ່ວນ ຊຸກຍູ້ພື້ນຖານເສດຖະກິດຂອງຫວຽດນາມໃຫ້ ພັດທະນາກວ່າ.”
ເມື່ອໃຫ້ຂໍ້ສັງເກດກ່ຽວກັບເລື່ອງ ທະນາຄານແຫ່ງລັດ ຫລຸດຜ່ອນອັດຕາດອກເບ້ຍເງິນຝາກດ້ວຍສະກຸນເງິນດົ່ງ VND ຈາກ 13% ລົງເຫລືອງພຽງ 12%/ປີ ນັບແຕ່ວັນທີ 11/4 ເປັນຕົ້ນໄປ, ທ່ານ Tran Xuan Quang, ຮອງຜູ້ອຳນວຍການໃຫຍ່ທະນາຄານການຄ້າຫຸ້ນສ່ວນເດີນທະເລ ຖືວ່າ: ທະນາຄານ ແລະ ລູກຄ້າລ້ວນແຕ່ມີການກະກຽມກ່ອນທີ່ທະນາຄານແຫ່ງລັດປະກາດຫລຸດຜ່ອນອັດຕາດອກເບ້ຍເງິນຝາກລົງຢ່າງເປັນທາງການ. ບັນຫາຕົ້ນຕໍນັ້ນແມ່ນ ບັນດາທະນາຄານ ຕ້ອງກະກຽມຢ່າງພຽງພໍກ່ຽວກັບຄຸນນະພາບ ແລະ ການບໍລິການຢ່າງທັນສະໄຫມເພື່ອຮັບປະກັນການລະດົມທຶນ ແລະ ຮັບປະກັນຊຳລະເປັນປົກກະຕິເພື່ອຮັບໃຊ້ການຜະລິດດຳເນີນທຸລະກິດ ແລະ ໃຫ້ກູ້ຢືມ. ທ່ານ Tran Xuan Quang ໃຫ້ຮູ້ວ່າ:
“ພວກຂ້າພະເຈົ້າຕີລາຄາວ່າ: ເລື່ອງຫລຸດຜ່ອນອັດຕາດອກເບ້ຍຂອງທະນາຄານແຫ່ງລັດ ກໍຄືອັດຕາດອກເບ້ຍພື້ນຖານ, ອັດຕາດອກເບ້ຍເພດານ ແມ່ນສັນຍານທີ່ດີໃຫ້ແກ່ພື້ນຖານເສດຖະກິດ ບົນພື້ນຖານຕີລາຄາບັນດາດັດຊະນີກ່ຽວກັບໄພເງິນເຟີ້ຢູ່ໃນລະດັບຕ່ຳພໍສົມຄວນໃນໄລຍະຜ່ານມາ. ທີສອງ ນັ້ນກໍແມ່ນສັນຍານເພື່ອໃຫ້ທະນາຄານແຫ່ງລັດແຈ້ງໃຫ້ຊາບເລື່ອງຫລຸດຜ່ອນອັດຕາດອກເບ້ຍຈະດຳເນີນໄປໃນໄລຍະຈະມາເຖິງເພື່ອໃຫ້ບັນດາວິສາຫະກິດຟື້ນຟູ ແລະ ພັດທະນາ.”
ລູກຄ້າເຮັດລະບຽບການຝາກເງິນຢູ່ທະນາຄານ A Chau
ພາບປະກອບ:internet
|
ພາຍຫລັງໄຈ້ແຍກສະພາບການປະຈຸບັນກໍຄືຄາດຄະເນການຜັນແປຂອງພື້ນຖານເສດຖະກິດ, ທະນາຄານແຫ່ງລັດກໍຕົກລົງເປີດສິນເຊື່ອໃຫ້ກູ້ຢືມສຳລັບຂົງເຂດບໍ່ສົ່ງເສີມຊຶ່ງລວມມີ: ສິນເຊື່ອຫລັກຊັບ, ອະສັງຫາລິມະຊັບ ແລະ ການໃຊ້ຈ່າຍ. ຕາມທ່ານ Nguyen Van Binh ຜູ້ວ່າການທະນາຄານແຫ່ງລັດ ແລ້ວ, ເລື່ອງເປີດກົນໄກຄືແນວນີ້ ໄດ້ຮັບການຄິດໄລ່ບົນພື້ນຖານຕີລາຄາບັນດາມາດຕະການຢ່າງຈະແຈ້ງ, ລະມັດລະວັງ, ມີວິວັດການເພື່ອຮັບປະກັນການປະຕິບັດຈຸດໝາຍຄວບຄຸມໄພເງິນເຟີ້ໃຫ້ຕ່ຳກວ່າ 10%, ຮັກສາເສດຖະກິດມະຫາພາກເປັນປົກກະຕິ, ສ້າງເງື່ອນໄຂຫນູນຊ່ວຍວິສາຫະກິດ ແລະ ການເຕີບໂຕ GDP ຢ່າງເໝາະສົມ. ທ່ານ Nguyen Van Binh ຜູ້ວ່າການທະນາຄານແຫ່ງລັດ ເນັ້ນຫນັກວ່າ:
“ພວກຂ້າພະເຈົ້າມີຄວາມເຊື່ອໝັ້ນວ່າ ຖ້າຫາກຂົງເຂດອະສັງຫາລິມະຊັບໄດ້ຮັບການແກ້ໄຂສ່ວນຫນຶ່ງຈະຊ່ວຍໃຫ້ຫລາຍຂົງເຂດຄື: ຊີມັງ, ເຫລັກກ້າ ສາມາດແກ້ໄຂສິນຄ້າຄ້າງສາງໄດ້, ສ້າງວຽກເຮັດງານທຳໃຫ້ແກ່ຜູ້ເຮັດວຽກງານກໍ່ສ້າງ, ສ້າງແຫລ່ງທຶນໃຫ້ແກ່ພື້ນຖານເສດຖະກິດ ແລະ ປັບປຸງສະພາບຫນີ້ເສຍໃນລະບົບທະນາຄານ.”
ມະຕິເລກທີ 11 ຂອງລັດຖະບານກ່ຽວກັບການຄວບຄຸມໄພເງິນເຟີ້, ຮັກສາເສດຖະກິດມະຫາພາກເປັນປົກກະຕິ, ຮັບປະກັນຊີວິດສັງຄົມ ໄດ້ຊີ້ແຈງວ່າ: ທະນາຄານແຫ່ງລັດ ຕ້ອງບໍລິຫານນະໂຍບາຍເງິນຕາຢ່າງແຫນ້ນແຟ້ນ, ລະມັດລະວັງ ແຕ່ກໍ່ຕ້ອງມີໄຫວພິບເພື່ອຄວບຄຸມໄພເງິນເຟີ້, ຫນູນຊ່ວຍຮັກສາເສດຖະກິດມະຫາພາກເປັນປົກກະຕິ, ຮັບປະກັນທົ່ວລະບົບທະນາຄານ. ໃນ 3 ເດືອນຕົ້ນປີ 2012, ທະນາຄານແຫ່ງລັດ ໄດ້ແກ້ໄຂຄວາມສາມາດຊຳລະເທື່ອລະກ້າວ. ນອກນັ້ນ ດັດຊະນີລາຄາໃຊ້ສອຍກໍຫລຸດລົງ, ສະນັ້ນ ເລື່ອງຫລຸດຜ່ອນອັດຕາດອກເບ້ຍຂອງທະນາຄານແຫ່ງລັດ ຫວຽດນາມ ແມ່ນບາດກ້າວເໝາະສົມໃນຈຸດເວລານີ້, ເພື່ອສືບຕໍ່ສ້າງເງື່ອນໄຂເພື່ອໃຫ້ພື້ນຖານເສດຖະກິດຂອງຫວຽດນາມ ເປັນປົກກະຕິ ແລະ ພັດທະນາ.
Thu Hoa