(vovworld)- ການເລືອກຕັ້ງສະມາຊິກສະພາແຫ່ງຊາດຊຸດທີ XIV, ສະມາຊິກສະພາປະຊາຊົນ ທຸກຂັ້ນອາຍຸການ 2016- 2021, ການເລືອກຕັ້ງຄັ້ງນີ້ມີຂອບຂະຫນາດໃຫຍ່ສຸດນັບແຕ່ກ່ອນມາຮອດປະຈຸບັນ ແລະ ໄດ້ຮັບຜົນສຳເລັດຢ່າງຈົບງາມ. ນີ້ແມ່ນການເລືອກຕັ້ງທີ່ມີປະຊາທິປະໄຕ, ປ່ຽນໃຫມ່, ເສີມຂະຫຍາຍສິດເປັນເຈົ້າຂອງປະຊາຊົນຢ່າງແທ້ຈິງ. ຜູ້ມີສິດເລືອກຕັ້ງໄດ້ສະແດງໃຫ້ເຫັນຢ່າງຈະແຈ້ງຄວາມຮັບຜິດຊອບ ແລະ ພັນທະຂອງຕົນໃນການຄັດເລືອກບັນດາຜູ້ທີ່ສົມເປັນຕົວແທນຂອງຕົນໃນອົງການອຳນາດແຫ່ງລັດຢູ່ສູນກາງ ແລະ ທ້ອງຖິ່ນ. ໝາກຜົນການເລືອກຕັ້ງກໍສະແດງໃຫ້ເຫັນວ່າ ຜູ້ມີສິດເລືອກຕັ້ງປາດຖະຫນາຢາກໃຫ້ຜູ້ເປັນຕົວແທນຂອງຕົນປະກອບກຳລັງເຫື່ອແຮງ, ພູມປັນຍາ ປະກອບສ່ວນນຳປະເທດຊາດພັດທະນາ.
ຜູ້ມີສິດເລືອກຕັ້ງຮ່າໂນ້ຍໄປປ່ອນບັດ
ພາບ:thoibaotaichinh
|
ການເລືອກຕັ້ງດຳເນີນເມື່ອວັນທີ22/5/2016 ແມ່ນການເລືອກຕັ້ງມີຂອບຂະຫນາດໃຫຍ່ສຸດນັບແຕ່ກ່ອນມາຮອດປະຈຸບັນ ດ້ວຍ ຜູ້ມີສິດເລືອກຕັ້ງກວ່າ 69 ລ້ານຄົນ. ນີ້ກໍແມ່ນການເລືອກຕັ້ງຄັ້ງທຳອິດ ຊື່ງ ຫວຽດນາມປະຕິບັດກົດໝາຍວ່າດ້ວຍການເລືອກຕັ້ງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນທຸກຂັ້ນ ປີ 2015, ເປັນຄັ້ງທຳອິດ ສະພາເລືອກຕັ້ງແຫ່ງຊາດໄດ້ຮັບການສ້າງຕັ້ງຂຶ້ນ ແລະ ເຄື່ອນໄຫວ. ບັນດາສິ່ງດັ່ງກ່າວ ແມ່ນການພິສູດໃຫ້ເຫັນວ່າ ວຽກງານດຳເນີນການເລືອກຕັ້ງປີນີ້ ມີບັນດາບາດກ້າວເປັນຫນ້າຮັບຮູ້.
ອັດຕາສ່ວນຜູ້ມີສິດເລືອກຕັ້ງໄປປ່ອນບັດຢູ່ໃນລະດັບສູງ
ຕາມຫ້ອງການສະພາເລືອກຕັ້ງແຫ່ງຊາດແລ້ວ, ຍອດຈຳນວນຜູ້ມີສິດເລືອກຕັ້ງເຂົ້າຮ່ວມການປ່ອນບັດ ແມ່ນ 66.830.360 ຄົນ, ບັນລຸ 98,79%. ມີ 47/63 ແຂວງ, ນະຄອນ ມີອັດຕາສ່ວນຜູ້ມີສິດເລືອກຕັ້ງໄປປ່ອນບັດບັນລຸ 99% ຂຶ້ນໄປ. ໃນນັ້ນ 2 ແຂວງ ຄື: ເທື່ອທຽນເຫ້ວ ແລະ ອຽນບາຍ, ຈຳນວນຜູ້ມີສິດເລືອກຕັ້ງໄປປ່ອນບັດບັນລຸລະດັບສູງສຸດ 99,99%. ຫົວຫນ່ວຍເລືອກຕັ້ງສ່ວນຫລາຍປະກາດວ່າ: ໝາກຜົນການປ່ອນບັດແມ່ນຖືກຕາມຂໍ້ກຳນົດ. ຜົນສຳເລັດຂອງການເລືອກຕັ້ງບໍ່ພຽງແຕ່ແມ່ນຍ້ອນ ຈຳນວນຜູ້ມີສິດເລືອກຕັ້ງໄປປ່ອນບັດສູງເທົ່ານັ້ນ ຫາກສິ່ງສຳຄັນ ນັ້ນແມ່ນຄວາມຮັບຮູ້ດ້ານການເມືອງຂອງຜູ້ມີສິດເລືອກຕັ້ງຕໍ່ບັດເລືອກຕັ້ງຂອງຕົນ. ຕາມທ່ານນາງ ເຈີນທິຮວາຊີງ, ສະມາຊິກສະພາແຫ່ງຊາດແຂວງ ລ້າງເຊີນ ແລ້ວ, ປັດໄຈສຳຄັນທີ່ສຸດເພື່ອສ້າງຜົນສຳເລັດຂອງການເລືອກຕັ້ງຄັ້ງນີ້ ນັ້ນແມ່ນຄວາມຮັບຜິດຊອບສູງຂອງຜູ້ມີສິດເລືອກຕັ້ງແຕ່ລະຄົນຕໍ່ບັດເລືອກຕັ້ງຂອງຕົນ.
“ຜ່ານການເລືອກຕັ້ງແຕ່ລະຄັ້ງ, ຂ້າພະເຈົ້າເຫັນວ່າ ການຕີລາຄາຂອງຜູ້ມີສິດເລືອກຕັ້ງຕໍ່ບັນດາຜູ້ສະໝັກຮັບເລືອກຕັ້ງແມ່ນມີການຊັ່ງຊາຢ່າງລະອຽດ, ນັບມື້ນັບມີຄວາມຮຽກຮ້ອງຕ້ອງການສຳລັບຜູ້ສະໝັກຮັບເລືອກຕັ້ງຕ້ອງມີລະດັບຄວາມຮູ້, ກຳລັງຄວາມສາມາດພຽງພໍ. ສຳລັບການເລືອກຕັ້ງຄັ້ງນີ້, ຜູ້ມີສິດເລືອກຕັ້ງມີສະຕິຄວາມຮັບຜິດຊອບສູງ ແລະ ຂ້າພະເຈົ້າຕີລາຄາສູງການຄັດເລືອກຂອງຜູ້ມີສິດເລືອກຕັ້ງ.”
ຕາມທ່ານ ເລມີງທົງ, ຮອງຫົວຫນ້າຫ້ອງການສະພາເລືອກຕັ້ງແຫ່ງຊາດແລ້ວ, ຜູ້ມີສິດເລືອກຕັ້ງປ່ອນບັດດ້ວຍຄວາມຮັບຜິດຊອບຄືແນວນັ້ນ ຍ້ອນມີຄວາມເຂົ້າໃຈຢ່າງເລິກເຊິ່ງກ່ຽວກັບຄວາມໝາຍຂອງການເລືອກຕັ້ງ, ຄຸນຄ່າອັນໃຫຍ່ຫລວງຂອງບັດເລືອກຕັ້ງ.
“ເຂົາເຈົ້າມີຄວາມຮັບຮູ້ຕໍ່ບົດບາດນັບມື້ນັບສູງຂອງສະພາແຫ່ງຊາດ, ສະພາປະຊາຊົນ ແລະ ສະແດງໃຫ້ເຫັນເຈດຈຳນົງ ນັບມື້ນັບດີກວ່າ ແລະ ຄວາມມຸ່ງມາດປາດຖະຫນາຂອງຜູ້ມີສິດເລືອກຕັ້ງ. ເຂົາເຈົ້າເຫັນວ່າ ພຽງແຕ່ຜ່ານສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນ ຄຳເຫັນຂອງເຂົາເຈົ້າຈຶ່ງໄດ້ຮັບການແກ້ໄຂ, ແລະໄດ້ປະກອບສ່ວນເຂົ້າໃນການວາງແຜນນະໂຍບາຍ ແລະ ຕັດສິນບັນດາບັນຫາສຳຄັນຂອງປະເທດຊາດ. ເປັນທີ່ຈະແຈ້ງແລ້ວວ່າ ຜູ້ມີສິດເລືອກຕັ້ງ ມີຄວາມສົນໃຈ ເຖິງການເຄື່ອນໄຫວຂອງສະພາແຫ່ງຊາດ, ສະພາປະຊາຊົນ ແລະ ສິ່ງສຳຄັນແມ່ນມີຄວາມເຊື່ອໝັ້ນຕໍ່ສະພາແຫ່ງຊາດ ສະພາປະຊາຊົນສະນັ້ນ ເຂົາເຈົ້າຈຶ່ງເລືອກເຟັ້ນ. ທີສອງ ເລື່ອງຜູ້ມີສິດເລືອກຕັ້ງລຽນແຖວເພື່ອປ່ອນບັດແມ່ນການສະແດງໃຫ້ເຫັນປະຊາທິປະໄຕ, ການເຄົາລົບສິດເປັນເຈົ້າຂອງຜູ້ມີສິດເລືອກຕັ້ງແຕ່ລະຄົນ.”
ຕາມການກຳນົດຂອງກົດໝາຍ, ການເລືອກຕັ້ງຄັ້ງນີ້ ແມ່ນເປີດກວ້າງສິດເລືອກຕັ້ງຕໍ່ຜູ້ຖືກຈັບຕົວ, ກັກຂັງພາງ ແລະ ກຳນົດກ່ຽວກັບການເຂົ້າຮ່ວມສັກຂີພິຍານການນັບບັດຂອງຜູ້ມີສິດເລືອກຕັ້ງ, ຜູ້ຕາງຫນ້າອົງການຈັດຕັ້ງ, ຫົວຫນ່ວຍສະເຫນີຜູ້ສະໝັກຮັບເລືອກຕັ້ງຫລືຜູ້ໄດ້ຮັບການມອບສິດ, ນັກຂ່າວສື່ມວນຊົນ. ສິ່ງດັ່ງກ່າວບໍ່ພຽງແຕ່ຮັບປະກັນໃຫ້ປະຊາຊົນປະຕິບັດສິດເລືອກຕັ້ງຂອງຕົນໃນການຄັດເລືອກບັນດາຜູ້ທີ່ມີຄວາມເກັ່ງກ້າສາມາດ, ມີຄຸນສົມບັດ ຢ່າງພຽງພໍ ເຂົ້າໃນອົງການອຳນາດແຫ່ງລັດເທົ່ານັ້ນ ຫາກຍັງສ້າງພື້ນຖານເພື່ອໃຫ້ການເລືອກຕັ້ງດຳເນີນໄປຢ່າງຍຸຕິທຳ, ເປີດເຜີຍ, ໂປ່ງໃສ, ຮັບປະກັນຄວາມແທດຈິງ.
ຍ້ອນມີການກະກຽມຢ່າງລອບຄອບທີ່ຖ້ວນຈຶ່ງສຳເລັດຜົນ
ຜົນສຳເລັດລວມຂອງການເລືອກຕັ້ງຍ້ອນມີການກະກຽມຢ່າງລອບຄອບຖີ່ຖ້ວນ ອຳນາດການປົກຄອງຂອງທຸກຂັ້ນທ້ອງຖິ່ນຕ່າງໆ, ວຽກງານໂຄສະນາເຜີຍແຜ່ກົດໝາຍຢ່າງຄົບຖ້ວນກ່ຽວກັບຈຸດປະສົງ, ຄວາມໝາຍຂອງການເລືອກຕັ້ງ, ສິດ ແລະ ພັນທະຂອງພົນລະເມືອງ ສະນັ້ນນັບແຕ່ເວລາເລີ່ມຕົ້ນການເລືອກຕັ້ງ, ຜູ້ມີສິດເລືອກຕັ້ງໄດ້ຕັ້ງຫນ້າ, ຫ້າວຫັນເຂົ້າຮ່ວມການເລືອກຕັ້ງ, ປະຕິບັດຫນ້າທີ່ ສິດ ແລະ ພັນທະຂອງພົນລະເມືອງ. ທ່ານ ຫງວຽນແຫ້ງຟຸກ, ເລຂາທິການໃຫຍ່ສະພາແຫ່ງຊາດ, ຫົວຫນ້າຫ້ອງການສະພາເລືອກຕັ້ງແຫ່ງຊາດ ໄດ້ຕີລາຄາວ່າ: ວຽກງານຈັດຕັງການເລືອກຕັ້ງຄັ້ງນີ້ມີການປັບປຸງຫລາຍຢ່າງ ແລະ ມີການກະກຽມຢ່າງລອບຄອບຖີ່ຖ້ວນປະຕິບັດຢ່າງເປັນລະບົບ, ປະກອບສ່ວນເຂົ້າໃນຜົນສຳເລັດລວມຂອງການເລືອກຕັ້ງທົ່ວປະເທດ.
“ຜົນສຳເລັດຂອງການເລືອກຕັ້ງຍ້ອນມີການຊີ້ນຳນຳພາການເຄື່ອນໄຫວຢ່າງຂ້ຽວຂາດ, ຈາກສູນກາງຕະຫລອດຮອດທ້ອງຖິ່ນ. ຄະນະກຳມະການເລືອກຕັ້ງ, ຄະນະເລືອກຕັ້ງ, ບັນດາຫົວຫນ່ວຍເລືອກຕັ້ງໄດ້ຈັດຕັ້ງການຝືກອົບຮົມຢ່າງລະອຽດ. ຈາກນັ້ນ ຊ່ວຍໃຫ້ວຽກງານວິຊາການຂອງຫົວຫນ່ວຍເລືອກຕັ້ງດີກວ່າເກົ່າ. ວຽກງານໂຄສະນາກໍໄດ້ຮັບການປະຕິບັດເປັນຢ່າງດີ, ມີຫລາຍຮູບການອຸດົມສົມບູນ, ຈາກນັ້ນຍົກສູງຄວາມຮັບຮູ້ຂອງປະຊາຊົນ.”
ຕາມການກຳນົດຂອງກົດໝາຍແລ້ວ, ຢ່າງຊ້າສຸດແມ່ນ 20 ມື້ນັບແຕ່ມື້ປ່ອນບັດເລືອກຕັ້ງ, ຄະນະກຳມະການເລືອກຕັ້ງແຫ່ງຊາດ ຈະປະກາດໝາກຜົນຢ່າງເປັນທາງການ. ຜູ້ມີສິດເລືອກຕັ້ງປາດຖະຫນາວ່າ ບັນດາຜູ້ແທນໂດຍປະຊາຊົນເລືອກຕັ້ງເຂົ້າເປັນສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນ ຈະປະຕິບັດຄຳໝັ້ນໝາຍຂອງຕົນເປັນຢ່າງດີ, ສົມກັບຄວາມໄວ້ເນື້ອເຊື່ອໃຈຂອງຜູ້ມີສິດເລືອກຕັ້ງ, ພ້ອມກັນປະກອບສ່ວນສ້າງສາປະເທດຊາດໃຫ້ນັບມື້ນັບພັດທະນາ.